Yoowaneesi 18

Bi cúú Yeesu

(Kpèè Maat 26.47-56, Maar 14.43-50, Luuki 22.47-53)

1 Yeesu sòon̄ an nyɔɔbuŋŋi ki dóòyee, ní u nì u-boonnooliibi búntì Seedrɔn buŋgbandi lapu pu^a. Bukpaa bubɔ nìn bí niin, ní u nì u-boonnooliibi cūtì ki kɔ́ bu-poon. 2 Juudasi un nìn nyáń u-boonee mun nyí niin, kun puee Yeesu nì u-boonnooliibi nìn pée cá niin múlmul^b. 3 Bisaraaŋakpilib nì Fariisab nìn tīī Juudasi disoojakitil nì dipilisikitil, ní u yōoǹ-bi ki cáa nín cá bukpaayee poon. Bi nìn ŋúb́ iŋminaapool nì fitilab nì tijanjawan. 4 Yeesu nyí tin dòoń-uee, ní ki sútì ki pìl̄-bi, ki bālifì-bi yii: «Ŋma ní ni nyàab̀ ní?» 5 Ní bi kíí-u yii: «Ti nyàab̀ Yeesu Naasaareeti yɔuee ní.» Ní u kíí-bi yii: «Man sèé!» Juudasi, un nyáń u-boonee, sáká bi-kansikin. 6 Yeesu nín kíí-bi yii: «Man sèéyee», ní bi fātìi túlifì bi-boon ki lítì kitiŋ. 7 Ní Yeesu fātìi tí bālifì-bi yii: «Ŋma ní ni nyàab̀ ní?» Ní bi bí yii: «Ti nyàab̀ Yeesu Naasaareeti yɔuee ní.» 8 Ní Yeesu kíí-bi yii: «Kéè, m pée tùkū-ni yii m sèéyaa! An yaa sá man ní ni nyàab̀ee, ní yàntī bin bí nee ń nīn cá!»

9 Mimmee an ŋá kii u nín bàà sòon̄ puee dee, yii: «Maa fá bin a tīī-mee kansikin báà ubɔ.» 10 Niinee ní Siimɔn Peetroo dáaĺ ki fɔ́fì u-tàataajiki, ki gāā ki wúkutì usaraaŋakpil tɔntɔnliu ubɔ ŋaŋgiitafal. Bi nìn yíì utɔntɔnli gbanti Maalkusi ní. 11 Ní Yeesu bí Peetroo yii: «Gíiǹ a-tàataajiki kí fúuń kujitooun! M-Baa yaa tīī-mi falaa ḿ nyɔ̀ee, ḿ taa nyɔ̀ɔɔ^c?»

Bi cáá Yeesu usaraaŋakpil nimbiin

(Kpèè Maat 26.57-58, Maar 14.53-54, Luuki 22.54)

12 Niinee ní disoojakitilee nì bi-kpiliu nì Juuda yab pilisib cúú Yeesu ki bóob́-u, 13 ní ki dá láá cáá-u ki cūnnì Aani^d cee. Aani gbanti di nìn sá Kaayiifi un nìn sá usaraaŋakpil dibindi gbantee coo. 14 Kaayiifi gbantee di nìn sáŋkì Juuda yab yii: «An máaǹ unibaanti ń kpú binib kɔkɔ yil puee.»

Peetroo néé yii waa nyí Yeesu

(Kpèè Maat 26.69-70, Maar 14.66-68, Luuki 22.55-57)

15 Siimɔn Peetroo nì Yeesu boonnooliu ubɔ nìn nóó Yeesu. Uboonnoolee nóó Yeesu ki kɔ́ usaraaŋakpil cindin, kun puee usaraaŋakpil nìn nyí-u, 16 ní Peetroo nìn gbíntìi sí kipunyɔkɔ boon mmɔŋki. Ní uboonnool un usaraaŋakpil nìn nyée nyáń ki ká unimpu un nìn cí kipunyɔkɔpuee ní ki cáá Peetroo ki kɔ́ǹ. 17 Ní unimpu un nìn cí kipunyɔkɔpuee bālifì Peetroo yii: «A mun kaa sá uninja nee boonnooliibi ubɔɔɔ?» Ní Peetroo bí-u yii: «Aayee, maa sá.»

18 Tiwool nìn bí, an pu ní bitɔntɔnliibi nì pilisib kpāā ŋŋmi ki sí ki wùl̀, ní Peetroo mun yú bi-cee niin ki wùl̀.

Usaraaŋakpil bālifì Yeesu tibɔti

(Kpèè Maat 26.59-66, Maar 14.55-64, Luuki 22.66-71)

19 Niinee ní usaraaŋakpil bíi bàlifī Yeesu u-boonnooliibi bɔti nì tibɔti tin u dàkèe pu. 20 Ní Yeesu kíí-u yii: «M sòon̄ mpaampiin pu báà ŋma nimbiin, ki dàkā m-bɔti akpafidiinni nì kunimbɔtidiin, laakin Juuda yab kɔkɔ kpáfée. Maa nìn sòon̄ tiba dibalin. 21 Ba pu ní a bàlifī-mi? Bàlifì bin pílifì tin m sòon̄ee. Bālifì-bi tin m lēe, bíǹ nyí tin m sòon̄ee.» 22 Ŋyunti ŋun Yeesu lī mimmee, ní pilisi ubɔ un yú ki kɔ́ĺ-uee fáá-u ntampa, ní ki bí-u yii: «Míǹ ní bi kíikí usaraaŋakpilaaa?» 23 Ní Yeesu bí-u yii: «M yaa sòon̄ min kaa kítèe, dàkà-mi min ní m yīntèe. M yaa tí sòon̄ min kítèe, ba pu ní a fáá-mi?» 24 Yeesu ŋalii gbíntìi bóob́ee, ní Aani dū-u ki tīī usaraaŋakpil Kaayiifi.

Peetroo fātìi tí néé yii waa nyí Yeesu

(Kpèè Maat 26.71-75, Maar 14.69-72, Luuki 22.58-62)

25 Ŋyunti gbantee, Peetroo yú ki wùl̀ ŋŋmi. Ní bi bālifì-u yii: «Si mun kaa sá uninja nee boonnooliuaaa?» Ní Peetroo néé yii: «Aayee, man kaa sá.» 26 Ní usaraaŋakpil tɔntɔnliu ubɔ un nabiki tafal Peetroo bàà gāā ki wúkutèe bí-u yii: «Maa bàà ká si nì u bukpaanaaa?» 27 Ní Peetroo fātìi tí néé yii an kaa sá úǹ. Kpalaa niin ní ukooja báakì.

Bi cáá Yeesu Piilati nimbiin

(Kpèè Maat 27.1-2, 11-14, Maar 15.1-5, Luuki 23.1-5)

28 Ní bi yōoǹní Yeesu Kaayiifi cee ki cáá-u ki nín cá gɔmina Piilati cee. An nìn dáá sá kutaafaau pɔ̀lpɔl ní. Juuda yab kaa nìn là kí kɔ́ gɔmina diikun kun puee bi là kí nīn bí circir kí ŋmā kí jī Dilákatil jiŋaaliu. 29 Míǹ pu ní gɔmina Piilati nyánní ki dɔ́miń bi-cee, ní ki bālifì-bi yii: «Ba ní uninja nee ŋá ní ni cáań-u ní?» 30 Ní bi kíí-u yii: «U yaa kaa bàà sá unikpiti, taa bàà cāabìń-u kí tīī-si!» 31 Ní Piilati bí-bi yii: «Yòom̄maan-u, ní sòom̀maan u-bɔti kí nóó nì ni-marau nín sá puee!» Ní bi kíí-u yii: «Timbi kaa cáá nsan kí kpɔ̀ unil.»

32 An ŋá míǹ kí dàkà Yeesu nín nìn sòon̄ u-kúm min u làá kpúee puee dee. 33 Ní Piilati nín kóò kudiin ki yíiń Yeesu, ní ki bālifì-u yii: «Mimmee, sii di sá Juuda yab bɔtiuaaa?» 34 Ní Yeesu kíí-u yii: «Tin tin a lī nee, sii a-ba di dākafì míǹ naaa, ubɔ di tùkū-si míǹ man pu ní?» 35 Ní Piilati kíí-u yii: «M sá Ujuudajaaa? A-yab nì bisaraaŋakpilib di dū-si ki tīiń-mi. Mimmee, ba ní a ŋá ní?» 36 Ní Yeesu kíí-u yii: «M-beel kaa sá taapu doo beel. M-beel yaa bàà sá duulinyan yal, m-tɔntɔnliibi bàà jáà kí mɔ̄tì m-pu ní. Baa bàà kíikí bí dū-mi kí tīī Juuda yab kpilib. Ama, m-beel kaa sá taapu doo yal.» 37 Ní Piilati bí-u yii: «Mimmee, a sá ubɔti níii?» Ní Yeesu kíí-u yii: «Sii di lī. M dɔ́miń bi màl̄-mi duulinyan ḿ dàkà binib kun di sá ibaamɔnee ní. Un kamaa sá ibaamɔn yɔuee pílifí tin m sòoǹee ní.» 38 Ní Piilati bālifì-u yii: «Ba di sá ibaamɔn ní?»

Piilati lēē yii bí kpɔ̀ Yeesu

(Kpèè Maat 27.15-31, Maar 15.6-20, Luuki 23.13-25)

Piilati sòon̄ míǹ ki dóòyee, ní ki nyáń ki tí nín cá Juuda yab cee, ní ki bí-bi yii: «Maa ká kun pu ní kijapaai nee máaǹ ditafadaaldee. 39 Kii ni-marau nín pée sá puee, Dilákatil jiŋaaliu kamaayee, m gīintí usarkadaan ubɔ ní kí líí-ni. Mimmee, ni là ḿ gíiǹ Juuda yab bɔtiu kí líí-naaa?» 40 Niinee ní bi gíti tí bíi tátí yii: «Aayee, á taa gíiǹ úǹ kí líí, see Baaraabaasi ní á gíiǹ kí líí!» Baaraabaasi gbantee mun di nìn sá digaŋgandaan^e.