2 Kɔranti 1

Kugbɔnliliitiiu kun Pɔɔl ŋmàn̄ ki tīī

Kɔranti

yabee

Ijaam

1 Man Pɔɔl un Unimbɔti là m sá Yeesu Kriisitoo kpambalee, nì ti-nabiki Tiimootee di ŋmàn̄ kugbɔŋu nee kí tīī nimbi Unimbɔti yab bin kóò Kɔranti tiŋkinee nì bin kɔkɔ sá Unimbɔti nikitil ki kóò Akaayi timmu mun kíǹee nee^a. 2 Ti-Baa Unimbɔti nì ti-Dindaan Yeesu Kriisitoo ń ŋá-ni tiŋan kí tīī-ni ŋgbansɔŋfi.

Pɔɔl bíi pàkà Unimbɔti

3 Tí nyɔ̄ŋkìmaan Unimbɔti ti-Dindaan Yeesu Kriisitoo Baa un di sūǹ ti-saai ki ŋmēentí-ti tikɔkɔ poonee^b. 4 Falaabi bin kɔkɔ jēetí ti-puee, úǹ di ŋmēentí-ti, án nín làá ŋá pu ti mun ń dū diŋmeendi din ti fòol̄ u-ceeyee kí ŋméeǹ bin mun bí báà falaa un kamaa poonee. 5 Kii Kriisitoo pu ti nín jīǹ falaa tikpil tikpil puee, míǹ mbaantiim ní u-puee ti tí fòol̄ diŋmeendi tikpil tikpil mun. 6 Timbi yaa bí ki jīǹ falaayee, an sá nimbi ń ká diŋmeendi nì difiil pu. Ní timbi yaa ká diŋmeendee, an sá yii ni mun ń ká diŋmeendi kí ŋmā kí ŋmèè nì kimɔtii falaabi bin timbi bíi jīǹee jutiibi yaa láa bāań-nee. 7 Ti máká ni-pu mbaamɔmin, kun puee ti nyí yii ni mun bí ki jīǹ falaa kii ti mun nín bí ki jīǹ pu nan ní, an puee ní ni ŋūǹ kí fōō diŋmeendi din bí ki tīī-tee mun.

8 Nnabiyaamu, ti là ní béé falaa un ti jíń Asii tiŋkinee. Falaa gbanti nìn cúú-ti ki lákatì ti-pɔŋŋu pu. Taa nìn gíti máká yii ti làá nīn bí dimaŋfalin^c. 9 Timbi ti-ba nìn pée ká yii tiba kaa ti bí, see ŋkúm ní ti làá kpú. Tin bí nee nìn bāań ti-pu án nín làá ŋá pu tí taa dū ti-mákal kí páań timbi ti-ba pu, ama tí nīn máká Unimbɔti un fìkitī bitaŋkpiibee pu. 10 Úǹ di nyántì-ti dinimbinaamandi kúm gbanti poon, ní ki làá dāá nyāntí-ti. Ní ti cáá dimákal u-pu yii úǹ di làá dāá gíti nyāntí-ti, 11 kun puee ti nyí yii ni bíi tútúǹ-ti ŋwimmeem poon. Di sá yii kunipaau yaa mēē ti-pu ní Unimbɔti fōō bi-wimmeemee, kunipaau làá dāá tí pàkà-u u nín ŋá tiŋan tin ki tīī-tee pu.

Pɔɔl kpītì u-saŋŋu

12 Kun pu an mɔ̄ǹ-tee di sá yii ti-pɔbiliŋ poonee, ti nyí yii ti dū dipɔbil diba nì mbimbimɔntiim ní ki kāl̀ duulinyan, cilinjee ni-kansikin. Tíǹ kɔkɔ nyánní Unimbɔti cee ní. An sá Unimbɔti ŋanti di kpōotì-ti, kaa sá unil ciiŋyi. 13 Di sá yii tigbɔn tin kɔkɔ ti ŋmàn̄ ki tīī-nee poonee, taa ti kútì tiba kii tin ni kàan̄ ki gbìl̄ee. Ní m máká yii ni làá gbìl̄ tibɔti nee taapu tiŋan. 14 - Di sá yii naa láá gbìl̄ kɔkɔ ki dóò -: Ama ti-Dindaan Yeesu gítintam dalee, timbi puee, án làá dāá mɔ̄ɔkiǹ-ni, ní ni mun puee, án làá dāá mɔ̄ɔkiǹ ti mun.

15 Tíǹ pu ní m máká ki bàà là kí dīń ni-cee án nín làá ŋá pu ní ká tiŋan mili puee. 16 M bàà dākafì yii ḿ dīń ni-cee ní kí nín càatī Maseeduwaan tiŋkin, ní boonee kí fàtīí tí dīń ni-cee ní bàà tūtuǹ-mi ḿ nìkī m-saŋkindi kí nīn cá Juudee tiŋkin. 17 M nín bɔ́ntì kí còom̀ m-saŋŋu puee, an sá man di gāā m-bindi ki là kí cù-ŋu naaa? Àá m sá unil un nyɔkɔ kaa bīī tibɔti kí lì yii iiin, ní kí dāá fàtīí lì yii aayeeyee ní? 18 Ibaamɔn, Unimbɔti sá m-seeradaaŋwu. M-bɔti tin m sòon̄ nee kaa sá «Iiin» nì «Aayee» bɔti. 19 Di sá yii Unimbɔti Jipɔɔn Yeesu Kriisitoo un bɔti man nì Siilasi nì Tiimootee^d sòon̄ ni-cee niinee kaa sá «Iiin» nì «Aayee» bɔti. Ama, u-nee, an pée sá «Iiin» ŋmaniŋma ní. 20 Kun puee Unimbɔti nín pōoǹ tiŋyee, Yeesu pu ní an sá «Iiin» tiŋman. An puee Yeesu Kriisitoo pu ní ti lì yii «Ameeni» ki nyɔ́ŋkí Unimbɔti. 21 Unimbɔti di báaǹ timbi nì nimbi inyaan Kriisitoo ni. Unimbɔti u-ba di lútì-ti. 22 Úǹ di dū u-daaŋku ki ŋá ti-pu, ní ki dū u-Fam ki ŋá ti-pɔbiliŋin kí dàkà-ti yii ti sá u-yab u kpáafì tiwammɔntiil ki yóoǹ kí dāá tīī-ti fool boon.

23 Unimbɔti pu ní m sòoǹ ibaamɔn. Kun pu maa dīń ni-cee Kɔranti tiŋkinee di sá maa là kí yòon̄ ni-pɔbiliŋ. M yaa mɔ́ntì ú kpɔ̀-mi. 24 Di sá yii taa là kí dū mpɔn kí dàkà-ni ni nín máaǹ kí fōō kí kíí puee. Ama ti là kí jòò-ni ní nīn cáá dipɔɔpindi ní, kun puee ni-fookiiu pɔ̄ɔ̄.