1 Kɔranti 16

Tootoo un bi tɔ́ kí tūtuǹ Kriisitoo yabee

1 Tibɔti tin m cáá kí tùkù-ni tootoo un ni tòó kí tīī Kriisitoo yab bin bí Jeerusaleemee puee sɔ̀^a. Ni mun ń nīn ŋáań kii m nín dàkā Kriisitoo nikitiŋ ŋin bí Galaati tiŋkinee puee. 2 Kɔɔsil kamaayee, báà ŋma ń lēē min u kée dijandi din u làá tīīyee kí yóoń, án taa nín̄ sá yii man ḿ bàń ní ní nín kíĺ animbil ditɔl. 3 Ní lēē binib biba, m yaa láa bāańee ḿ tīī-bi kugbɔŋu, kí tɔ̄-bi bí cáá ni-tootoou kí tīī Jeerusaleem yab. 4 An yaa tí sá yii ḿ cù m-baaa, man nì bi ń nóó kí cù.

Pɔɔl bíi dàkafī kí còom̀ u-saŋŋu

5 M yaa làá dāan̄ ni-ceeyee, m làá dīń Maseeduwaan tiŋkin ní kí nín bàń-ni, kun puee m là kí dī Maseeduwaan ní^b. 6 An yaa yíì m làá kàl̄ ni-cee fiii. Ni yaa kaa kpēē gba, ni-cee ní m làá kàl̄ ní tiwool yuntiŋu ń jītí, án nín làá ŋá pu ní tūtuǹ-mi ḿ nìkī m-saŋŋu laakin sá ḿ cùee. 7 Maa ti là kí dāá kàl̄ ni-cee fiii, ti-Dindaan yaa kííyee, m làá kàl̄ ni-cee kí yúntí ní.

8 Ama m làá nīn bí Eefeesi tiŋkin ní kí tin sāā Pantikooti jiŋaaliu dal. 9 Di sá yii nsan ŋubɔ pīitì ki dōoǹ ḿ dī kí tɔ̄ dituŋkpaandi, nì min kɔkɔ m-nannanliibi wīikí tikpilee^c.

10 Tiimootee yaa bāań ni-ceeyee, ní fōō-u mmɔntiimin u-pɔbil ń nīn sɔ̀m̀, kun puee u mun tūǹ ti-Dindaan tundi kii mamee ní. 11 Ubɔ ń taa kpèè kí sìŋkīǹ-u, ama ní tūtuǹ-u ú fàtī kí gítiń m-cee nì dipɔɔsɔŋkil, di sá man nì nnabiyaamu mun bí dooyee kā ki cí-u.

12 M bàà tīī ti-nabiki Apooloosi kunyannyaau u nì nnabiyaamu mubɔ bí bàà dāan̄ ni-cee, ama waa là kí dāan̄ kɔŋkɔnnee^d. Ŋyunti ŋun sá ú dāan̄ee yaa láa bāańee, u dāa dòoń.

Tibɔkpaafikaal nì ijaam

13 Ní nīn nyí nì ni-ba kí nīn ŋúb́ ni-fookiiu Kriisitoo ni án píkí, kí nīn cáá dipɔbil, kí nīn pɔ̄ɔ̄. 14 Tin kɔkɔ ni yaa làá ŋée, ní nīn ŋáań nì dineendi.

15 Nnabiyaamu, m làá gíti kūtì-ni tiba: Kéè ni nyí Steefanasi nì u-dicaŋkuɔɔ, ni téetí yii bíǹ di sá bin péé péé ki fōō Yeesu ki kíí Greeki tiŋkin ki tútúǹ Unimbɔti yabee. 16 An puee, ní dū ni-ba kí tīī an nibee jutiibi nì bin kɔkɔ bí bi-cee ki tūǹ ditundi nì dipɔbil dibee.

17 Steefanasi nì Fɔrtunatuusi nì Akayikuusi dāantam mɔ́ɔkiǹ-mi, di sá ni nín kpá m-ceeyee, bíǹ di téeǹ ni-yil pu ki ŋáań tin ni yaa bàà bí ni bàà làá ŋá kí tīī-mee. 18 Bi tīī-mi kunyannyaau kii bi nín tīī ni mun puee. Binimɔntiibi bin bí mimmee máaǹ bí pàkà-bi.

19 Kriisitoo nikitiŋ ŋin bí Asii timmunee jáaḿ-ni. Akiilasi nì Priisiil^e nì bin kɔkɔ kōontí bi-dumpu ki jáaḿ Unimbɔtee jáaḿ-ni tiŋan ti-Dindaan pu. 20 Nnabiyaamu mun kɔkɔ bí dooyee jáaḿ-ni.

Ní jāam̀ tɔb nì kunabitiiu jaamii.

21 Man Pɔɔl m-ba di dū m-ŋal ki ŋmàn̄ anyɔɔbun nee kí jāam̀-ni.

22 Un kaa là ti-Dindaanee, udaan ń ŋá fám.

Maranata – Ti-Dindaan dòoń! –

23 Ti-Dindaan Yeesu ŋanti ń nīn bí ni-pu.

24 M néeń ni-kɔkɔ Yeesu Kriisitoo pu.