1 Kɔranti 8

Tiwaatootinan bɔti

1 Tiwaŋkuti tin bi tōotì awaayee nanti bɔtee^a, ti nyí yii báà ŋma nyí, ama dinyil cāabìń dilambil ní, ní dineendi yàntī binib cá nyɔkɔpu nnimbɔtisan poon. 2 Un dàkafī yii u nyí tibee kaa láá béè min sá ú bééyee. 3 Ama un yaa néeń Unimbɔtee, Unimbɔti béè udaan dee.

4 Ni nín bālifì yii ni ŋūǹ kí ŋmɔ́ tiwaatootinanaaayee, ti nyí yii diwaal kaa sá tiba duulinya poon, míǹ ní báà unimbɔti ubɔ gíti kpá see Unimbɔtibaantee. 5 Binib dàkafī yii inimbɔti wīikí, iba bí yilpu ní iba bí taapu. Tiŋman, bíǹ ceeyee, inimbɔti wīikí ní bidindambi mun wīikí. 6 Timbee, ti cáá Unimbɔtibambaanti ní, úǹ di sá Ubaati un náań tikɔkɔee. Úǹ pu ní ti bí. Ní ti-Dindaan sá ubaanti, úǹ di sá Yeesu Kriisitoo. Úǹ pu ní tiwan kɔkɔ bí, u-pu ní ti mun bí.

7 Ama bi-kɔkɔ kaa nyí míǹ. Di sá yii awaatuun mántiǹ biba, ní bi gbíntì ki ŋmóò tiwaatootinan, a lì kii diwaal di lafun baasii yì tinan gbantee, ní bi-pɔbiliŋ nín kaa pɔ̄ɔ̄ puee ní bí ŋá ikpiti. 8 Di sá yii tijin di kaa làá yàntī tí sútí kí pìl̄ Unimbɔti. Ti yaa jíńaaa, an kaa làá bàtī-ti tiba, ti yaa kaa jíńaaa, an kaa làá gbéeǹ-ti tiba^b.

9 Ama ní nīn nyíǹ ni-ba nì ni nín tɔ́ ni-ba ki ŋáań miŋyee, án taa yàntī bin kaa pɔ̄ɔ̄ nnimbɔtisan poonee ń lítí. 10 Un kaa pɔ̄ɔ̄ nnimbɔtisan poonee yaa ká sii un nyí Unimbɔti bɔti tiŋanee yaa kā ditaŋgbandi diba taapu ki jīǹee, an kaa téekí-u ú ŋmɔ́ tiwaatootinanaaa? 11 Ní sii nyítam puee, kinabiki kin kaa láá béè ki dóòyee, kinabiki kin pu Kriisitoo kpíìyee ń wāŋkàaa? 12 Ni nín bí ki ŋáań ni-nabiyaamu ikpiti min ki kɔ̄ntí bin kaa láá béè ki dóòyee landɔkɔi iweenee, an sá Kriisitoo ní ni ŋáań ikpiti gbanti. 13 An puee, tijin jītam di yaa làá yàntī m-nabiki ń lítée, m kpá kí ŋmɔ́ tinan, án nín làá ŋá pu m-nabiki ń taa lítée.