1 Kɔranti 7

Dinimpucaal bɔti

1 Tí kpèè kugbɔŋu kun ni ŋmàn̄ee bɔti. An ŋān̄ ki tīī unil ń taa bàà cáá unimpu. 2 Ama, án taa láa yàntī ní kɔ́ ajɔkɔntuun poonee, an máaǹ uninja kamaa ń nīn cáá u-nimpuu, ní unimpu kamaa ń nīn cáá u-cal. 3 Uninja ń tɔ̄ u-tundi nín sá puee kí tīī u-nimpuu, ní unimpu mun ń ŋá míǹ mbaantiim kí tīī u-cal. 4 Di sá yii an kaa sá unimpu di yì u-wunti u-ba, an sá u-cal di yì. Míǹ mbaantiim an kaa sá uninja di yì u-wunti u-ba, an sá u-nimpuu di yì. 5 An puee, ubɔ ń taa ŋmìntī u-juti báà tiba, asee ni yaa sòon̄ ki gbìlīǹ tɔb kí dū ŋyunti ŋubɔ kí taa gbēē tɔb kí ŋmā kí mèè. Ni nín mēē míǹ ki dóòyee, ní ní fàtīí kpāfì. An yaa kaa sá míǹ, ni nín kaa ŋūǹ kí nīn gbíntì ki ŋúb́ ni-ba ki ŋmèéyee puee, Sitaan ŋūǹ kí dī míǹ pu kí cɔ̄ŋkì-ni.

6 Tin m sòoǹ-ni nee, kaa sá mara ní m síiǹ-ni, m sáŋkí-ni ní. 7 M bàà là yii bininjab kɔkɔ ń bàà nín̄ bí kii man nín bí pu nee ní, ama báà ŋma nì Unimbɔti nín tīiń-u puee ní. U tīī ubɔ tiba ní ki tīī un kíǹee mun tiba.

8 Ama, m tùkù bin kaa cáá binimpoobi àá kaa mɔ́ǹee nì bikpiipoobi yii an bàà ŋān̄ bí gbíntí míǹ kii man nín bí pu nee. 9 Ama bi yaa kaa ŋūǹ kí cúú bi-ba kí kàl̄ míǹ, bí mɔ̄ǹ àá bí cáá binimpoobi, kun puee an sɔ́ á cáá unimpu àá á mɔ̄ǹ ki jítiǹ á nīn kā ki wù fɔ̀rrr fám.

10 Nimbi binimpucaaliibi nì bicamɔnliibi ní m tìì mara nee, (ti-Dindaan di yóoǹ mara gbanti, kaa sá man) yii: Unimpu ń taa yīkì u-cal cee. 11 U yaa tí cāntì u-calaaa, ú nīn kā míǹ kí taa mɔ̄ǹ ubɔ, àá u nì u-cal ń ŋāŋkì bi-kansikin ú fàtīí gítiń-u. Míǹ mbaantiim, uninja mun ń taa jà u-nimpuu^a.

12 Nimbi bin kíǹee, tin m làá tùkù-nee sèé, (an kaa sá ti-Dindaan di sòon̄ míǹ, man di lī.) M lī yii a yaa cáá unimpu ní ki dāa fōō Yeesu ki kíí ní a-nimpuu kaa fōō Yeesu ki kíí, ama ní ki kíí kí nīn gbíntìi sá a-nimpuuee, á taa yàntī-u. 13 Míǹ ní unimpu mun yaa tí nóó Yeesu ní u-cal kaa nóó Yeesu, ama ní ki kíí ú nīn gbíntìi sá u-nimpuuee, ú taa yīkì-u. 14 Uninja un kaa nóó Yeesuee nimpuu nín nóó Yeesuee puee, u kíǹ ki pìl̄ Unimbɔti dee. Ní unimpu un kaa nóó Yeesuee mun kíǹ ki pìl̄ Unimbɔti u-cal un nóó Yeesuee pu. An yaa kaa sá mimmee, bi-biyaamu kaa bàà pìl̄ nì Unimbɔti. An nín sá mimmee puee, bi-biyaamu bí circir. 15 Ama a yaa nóó Yeesu ní a-cal àá a-nimpuu kaa nóó Yeesu ní ki là kí càntī-see, pɔ̄-u nsan ú nīn cá, mara ubɔ kaa bóob́-si á cúú-u mpɔn kí kàan̄. Di sá yii Unimbɔti yíiń-ti tí dāan̄ kí nīn bí ŋgbansɔŋfin ní. 16 Unimpu, a nyí yii sii nì a-cal yaa làá nīn gbíntì ki bí, a làá ŋmā kí fīī-uaaa? Àá uninja, a nyí yii sii nì a-nimpuu yaa làá nīn gbíntì ki bí a làá ŋmā kí fīī-u?

Unimbɔti nín yíiń-ni puee, nín̄ bímaan míǹ

17 Tin bée di sá yii báà ŋma ń nīn ŋúb́ min ti-Dindaan tīī-u ki wāatì ní u nín fōō Yeesu ki kííyee. An marau ní m síiǹ Kriisitoo nikitiŋ kɔkɔ kansikin. 18 Sii un yaa gíí dikpancandi ní ki nín fōō Yeesu ki kííyee ń taa nín̄ yáliŋkí yii a làá gíti ŋá mana. Sii un kaa gíí dikpancandi ní ki fōō Yeesu ki kííyee ń taa gíí. 19 A yaa gííyaaa, a yaa kaa gííyaaa, tíǹ bɔti kaa páb́, tin pée páb́ee di sá á nīn ŋúb́ Unimbɔti marab. 20 Báà ŋma ń nīn gbíntì ki bí min ní u nìn pée bí ní ki nín fōō Yeesu ki kííyee. 21 A yaa nìn sá uyumbu ní ki nín fōō Yeesu ki kíí, á taa nín̄ yáliŋkí, ama a yaa tí ŋūǹ kí fōō a-baaa, á pɔ́ɔǹ kí fōō a-ba. 22 Uyumbu un fōō ti-Dindaan ki kííyee, ti-Dindaan nyántì-u ikpiti yuŋkun, míǹ ní un yì u-ba ki fōō Yeesu ki kííyee sá Kriisitoo yumbuu. 23 Unimbɔti dá-ni nì kudapɔɔu ní, an puee ní taa gíti dū ni-ba kí ŋá binib yumbui. 24 Nnabiyaamu, ni nín nìn pée bí min ki wāatì ki nín fōō Yeesu ki kííyee, ní nīn gbíntìi bí míǹ kí dū ni-ba kí tīī Unimbɔti.

Binimpucaaliibi nì bicamɔnliibi nì bikpiipoobi bɔti

25 An yaa kíǹ bin làá cáá binimpoobi nì bin làá mɔ̄ǹee bɔtee, ti-Dindaan kaa tīī-mi mara ḿ yóoń-bi, ama man nín dàkafī puee ní m làá lì kii m nín sá unil un ti-Dindaan pú diyimɔɔl bi cáá m-pu dimákalee pu.

26 Man ká yii, kii dinimbinaamandi din bí kɔŋkɔnnee puee, an ŋān̄ unil ń taa cáá unimpu. 27 A yaa gíti dáá cáá unimpuee, taa ti nyàab̀ nsan yii a làá jà-u. A yaa kaa láá tí cááyaaa, á taa ti cáá. 28 Ama nì míǹ kɔkɔee, uninja yaa cáá unimpu, waa yīntì, míǹ ní unimpu mun yaa mɔ́ǹ waa yīntì. Ama digìŋ́kpaandi di làá bà binimpucaaliibi nì bicamɔnliibi. An pu ní m bàà là kí nyāntí-bi digìńdin.

29 Nnabiyaamu, tin m làá lèe di sá yii ŋyunti kaa ti náaǹ. An puee bin cáá binimpoobee ń nīn bí kii bin kaa cááyee, 30 bin sūǹee ń nīn bí kii kunimbaau kaa cáá-bee, bin lāāyee ń nīn bí kii an kaa mɔ̄ǹ-bee, binyampoobi bin dāāyee ń nīn bí kii baa cáá tibee. 31 Bin bí ki jīǹ duulinya puee ń nīn bí kii baa bíi páatí tibee. Kun puee, ni nín wāĺ duulinya bí min nee, u làá dāá kúntí.

32 M bàà là yii ní nīn tɔ́ ni-ba kí taa nín̄ nìiǹ, di sá yii ti-Dindaan tundi ŋmaniŋma pu ní un kaa cáá unimpuee nimbiliŋ máǹ ki nyàab̀ kí fáatí ti-Dindaan. 33 Ama un cáá unimpuee nimbiliŋ máǹ duulinya tuuŋŋi pu ní u nyàab̀ kí fáatíǹ u-nimpuu. 34 Niinee u-landɔkɔi ŋá ili dee. Míǹ ní unimpu àá usapɔɔn un kaa mɔ́ǹee nimbiliŋ máǹ ti-Dindaan tundi pu, án nín làá ŋá pu u-wunti nì u-pɔbil ń nīn bí circiree. Ama unimpu àá usapɔɔn un mɔ́ǹee nimbiliŋ máǹ duulinya tuuŋŋi pu ní u nyàab̀ kí nīn fáatì u-cal.

35 Ni-ŋanti pu ní m sòoǹ tin bí nee, an kaa sá kí bàkan̄-ni. M là ní nīn ŋáań min ŋān̄ ki kítèe ní, kí dū ni-ba kɔkɔ kí ŋá ti-Dindaan ŋaan kí taa kíń báà laaba.

36 Unaacimpɔɔn un di yaa bàà lēē yii waa làá cáá u-bɔɔn ní ki dāa gíti ká yii waa ŋūǹ kí cúú u-ba, án làá nīn pée páb́-u míǹ kí nīn cée, ú cáá u-bɔɔn, waa ŋá ikpiti. 37 Ama un di lēē u-pɔbil poon kaa ti bí kí gítí u-boon ki yì u-ba ki nyí min u lēēyee, u nín baasii lēē u-pɔbil poon kí ŋá miŋyee deeyee, udaan lēē min ŋān̄ee. 38 Un kaa ŋúń ki cúú u-ba ki cáá u-bɔɔnee cee ŋān̄. Ama un ŋúń ki cúú u-ba kaa cáá u-bɔɔnee cee ŋān̄ ki lákatì.

39 Unimpu un mɔ́ǹee máaǹ kí nīn pée náká u-cal ní bí nīn bí iyunti kɔkɔ. Ama u-cal yaa kpíìyee, u tɔ́ u-ba kí mɔ̄ǹ un u yaa lèe. Ama un fōō Yeesu ki kííyee ní an sá ú fàtīí mɔ̄ǹ. 40 Man ceeyee, u yaa gbíntì míǹ kaa mɔ́ǹ, u-pɔbil làá nīn sɔ̀m̀ ki jítiǹ u yaa mɔ́ǹ. Man nín dàkafī puee dee, ní m fōō ki kíí yii ma mun cáá Unimbɔti Fam.