1 Kɔranti 1

Kugbɔmpeepeekaau kun Pɔɔl ŋmàn̄ ki tīī

Kɔranti

yabee

Ijaam

1 An sá man Pɔɔl un Unimbɔti là ki yíiń-mi ḿ nīn sá Yeesu Kriisitoo kpambalee nì ti-nabiki Sɔsteen di jáaḿ-ni^a.

2 M ŋmàn̄ kugbɔŋu nee ki tīī nimbi Unimbɔti nikitil din bí Kɔranti^b, Unimbɔti lútì-ni ní nīn sá u-yab Yeesu Kriisitoo puee. U yíiń-ni ní nīn bí circir, ni nì bin kɔkɔ bí báà laakin ki jáaḿ ti-Dindaan Yeesu Kriisitoo bi-Dindaan un sá ti mun Dindaanee. 3 Ti-Baa Unimbɔti nì ti-Dindaan Yeesu Kriisitoo ń ŋá-ni tiŋan kí tīī-ni ŋgbansɔŋfi.

Tiŋan tin ti fōō Kriisitoo ceeyee

4 M jáaḿ m-Nimbɔtiu múlmul ni-pu, tiŋan tin u ŋá-ni Yeesu Kriisitoo puee. 5 Di sá Kriisitoo pu ní u ŋá-ni tiŋan kɔkɔ, ki yāntì ni gbìl̄ ki béè u-bɔti taapu kɔkɔ ki ŋūǹ kí sòoǹ-tì mbaamɔmin. 6 Kriisitoo bɔti tin ti cáań ki sòon̄ nì nee, ni fōō-tì ki ŋúb́-tì tiŋan pu. 7 Míǹ pu ní nimbi bin kā ki cí ti-Dindaan Yeesu Kriisitoo gítintamee, Unimbɔti pú-ni u-pɔ̄tam kɔkɔ, báà miba kaa lóò-ni. 8 Unimbɔti gbanti di làá ŋúb́-ni mmɔntiimin kí tin cáá kátí-ku án nín làá ŋá pu ti-Dindaan Yeesu Kriisitoo yaa láa gítìńee, bí taa láa ká ni-pu ikpiti ibee. 9 Unimbɔti yaa pōoǹ puee, see ú ŋá míǹ, an di sá yii u yíiń-ni yii ni nì u-Jipɔɔn ti-Dindaan Yeesu Kriisitoo ń ŋá ubaanti^c.

Digàntil kɔ́ Kriisitoo nikitil kansikin

10 Nnabiyaamu, nì ti-Dindaan Yeesu Kriisitoo yindi puee, m gbàam̄-ni, ní nīn pēēmaan kinyɔkɔ, digàntil ń taa nín̄ bí ni-kansikin. Nín̄ pēēmaan kinyɔkɔ mmɔntiimin, ni-kɔkɔ bɔti ń nīn sá tibaantiil, ni-landɔkɔi mun ń nīn pēē. 11 Di sá yii m-nabiyaamu, Kloowee dicaŋkun yab biba dɔ́miń ki tùkū-mi yii kujaau bí ni-kansikin. 12 Kun pu m lì mimmee di sá m gbìl̄ yii ni-kansikin biba lì yii bíǹ nóó Pɔɔl ní, ní biba mun lì yii bíǹ nóó Apooloosi^d ní, ní biba mun lì yii bíǹ nóó Peetroo, ní biba mun lì yii bíǹ nóó Kriisitoo ní. 13 Mimmee, ni dàkafī yii Kriisitoo yākatì u-ba ajan kupaauaaa? Àá Pɔɔl ní bi kpáá ndɔpuntikaa pu ki tīī-ni ní? Àá Pɔɔl yindi pu ní bi fùl̄-ni Unimbɔti nyim ní?

14 M jáaḿ Unimbɔti m nín kaa fùl̄ ni-kansikin báà ubɔ nnyimee, asee Kriipusi nì Gaayusi baba^e. 15 An puee ni-kansikin ubɔ kaa ŋūǹ kí lì yii man yindi pu ní bi fùl̄-u nnyim. 16 Tiŋman! M téetí yii m nìn fùl̄ Steefanasi nì u-dicaŋkun yab Unimbɔti nnyim. M yaa gíti fùl̄ biba muɔɔɔ, maa ti nyí. 17 Di sá yii Kriisitoo kaa túnní-mi ḿ nīn fùul̀ binib Unimbɔti nnyim, ama u túnní-mi ḿ sòoǹ u-Bɔmɔntiiti ní. Maa làá dū binib ciiŋyi ní kí sòoǹ an bɔti. M yaa ŋá mimmee, m làá yàntī kun pu Yeesu Kriisitoo kpíì ndɔpuntikaa puee ń ŋá fám dee.

Yeesu Kriisitoo di sá Unimbɔti pɔŋŋu nì u-ciiŋŋu

18 Kun puee ti nín sòoǹ yii Kriisitoo kpíì ndɔpuntikaa pu kí fīī binibee, an sá tiwaatibɔti ní ki tīī bin bí diwaŋkil saŋŋu poonee. Ama ní ki sá Unimbɔti pɔŋŋu ki tīī timbi bin bí difiil saŋŋunee, 19 kii an nín ŋmàn̄ Unimbɔti gbɔŋku poon puee yii:

«M làá kúntí biciŋfitiibi ciiŋyi

ní kí nàan̄ binyiliibi nyil.»

20 Niinee uciŋfiti, àá unyil gíti cáá tilati? Bin bí duulinya poon ki kpākantée bí la? Unimbɔti dàkā yii duulinya yab ciiŋŋu sá kuwaatiiu ní^f.

21 Di sá yii duulinya nì u-ciiŋŋuee, waa ŋúń ki béè Unimbɔti nì u-ciiŋŋu. An pu ní an fáatì Unimbɔti ń dī tibɔti tin ti sòoǹ bi cáa yíì tiwaatibɔti nee pu kí fīī bin fōō-u ki kííyee. 22 An yaa sá Juuda yabee, bíǹ nyàab̀ bí ŋá maamaacib bí ká án nīn sá-bi kudaaŋŋu, ní Greeki yab bíǹ nyàab̀ iciin. 23 Ama ní timbee, Kriisitoo un bi kpáá ndɔpuntikaa puee bɔti ní ti sòoǹ. An bɔtee di làkantí Juuda yab, ní ki sá bin kaa sá Juuda yabee cee tiwaatibɔti. 24 Ama Kriisitoo di sá Unimbɔti pɔŋŋu nì u-ciiŋŋu ki tīī binib bin Unimbɔti yíińee, bin sá Juuda yabee nì bin kaa sée. 25 Di sá yii tin tin Unimbɔti ŋá binib cáa yíì tiwaatibɔtee jítiǹ binib ciiŋyi, ní tin u ŋá binib kpèé yii an sá iwɔfee pɔ̄ɔ̄ ki jítiǹ binib.

26 Nnabiyaamu, kpèèmaan nimbi dikitil din Unimbɔti yíińee, bin binib yíì biciŋfitiibee, nì biyidambi, nì agaajabil kaa wīikí ni-kansikin. 27 Ama Unimbɔti lēē kun ní duulinya yíì kuwaatiiuee ní ki dūu kɔ́ǹ biciŋfitiibi icoo, ní ki lēē kun duulinya yíì iwɔsɔfee ní ki dūu kɔ́ǹ bipɔɔbi icoo. 28 U lēē tiwan tin bi kpèé ki sìŋkīǹ kaa dūu yíiń tibee, tin kaa pée bí tibanee ní u dūu sīntiǹ tin bi wāĺ yii tì bí tibanee taapu taapu. 29 U ŋá míǹ unil báà ubɔ ń taa gāā u-bindi Unimbɔti nimbiin. 30 Di sá yii úǹ Unimbɔti di yāntì ní ni nì Yeesu Kriisitoo ŋá ubaanti. U yāntì Yeesu kpántì timbi ciiŋŋu. Kriisitoo pu ní ti kpántì deedeedambi Unimbɔti nimbiin ki bí circir, u fōō-ti ki líì. 31 An pu ní an ŋmàn̄ Unimbɔti gbɔŋku poon yii: «Sii un yaa làá gāā a-bindee ń gāā ti-Dindaan nín ŋá tiŋyee pu^g.»