1 Kɔranti 11

1 Ní nīn dīmaan man tabɔbiliŋ kii ma mun nín dī Kriisitoo tabɔbiliŋ puee.

Unimpu ń yíĺ ŋŋaabu Kriisitoo nikitilin

2 M pàkà-ni kii ni nín téetí m-pu ŋyunti kamaa pu, ki ŋúb́ tibɔti tin m dàkā-nee kii m nín pée dàkā-ni-tì puee. 3 Ama nì míǹ kɔkɔee, tibɔti tin m là ní bééyee sèé: Kriisitoo sá uninja kamaa yidaaŋwu, ní unimpu yidaaŋwu sá u-cal, ní Kriisitoo yidaaŋwu sá Unimbɔti. 4 Uninja di yaa bí ki mèé àá Unimbɔti tīī-u dinyɔɔbundi diba ní u bíi nàatī ní ki cíkí tiba u-yil puee, u kpèé Kriisitoo fám dee. 5 Ama unimpu di yaa bí ki mèé Unimbɔti àá Unimbɔti tīī-u dinyɔɔbundi diba ú nàatī ní tiba kaa bīī u-yil puee, u kpèé u-cal un sá u-yidaaŋwuee fám dee. An bí kii u tú diyibaakpandee ní. 6 Ama unimpu yaa kaa là kí dū tiba kí bìin̄ u-yil puee, ú cā u-yikpiti àá ú kòol̀. Diyikpical àá dikooldi yaa tí cáá-u icooyaaa, ú nīn bìintí tiba u-yil pu. 7 Uninja kaa máaǹ kí bìin̄ tiba u-yil pu, di sá yii úǹ sá Unimbɔti naŋku, ní ki sá u-nyooti. Ní unimpu sá uninja nyooti. 8 Di sá yii an kaa sá unimpu pu ní Unimbɔti lēē tiba ki náań uninja, ama an sá uninja pu ní u lēē tiba ki dūu náań unimpu. 9 An kaa tí sá unimpu pu ní u náań uninja, ama an sá uninja pu ní u náań unimpu^a. 10 An pu ní an sá yii ituun puee, unimpu máaǹ kí nīn yíĺ tiba kí bìin̄ u-yil pu, míǹ di dàkà yii waa yì u-ba. 11 Ti-Dindaan saŋŋu poonee, uninja kaa yì u-ba unimpu cee, míǹ ní unimpu mun kaa yì u-ba uninja cee. Ubɔ kaa ŋūǹ kí nīn bí ubɔ ń nín kpá. 12 Di sá uninja pu ní bi lēē tiba ki náań unimpu, ní unimpu mun di màal̀ uninja, ama bíǹ kɔkɔee nyánní Unimbɔti cee ní.

13 Nimbi ni-ba, ní dàkafì kí kpèè yii an ŋān̄ unimpu ń nīn mèé Unimbɔti kaa yíĺ tiba u-yil puɔɔɔ? 14 Duulinya u-ba dàkà yii an kaa ŋān̄ uninja ń nīn tú tiyikpiti sùuu. 15 Ama unimpuee, tiyikpiti yaa fɔ̀kɔ̀ee di sá u-nyooti, kun puee tiyikpiti nín fɔ̀kɔ̀ puee di fòol̄ ŋŋaabu ŋun u bàà làá yíĺee paaŋŋu. 16 Ubɔ yaa cáá tiba kí kpákáǹ an puɔɔɔ, timbi nì Unimbɔti nikitiŋ nín ŋúb́ miŋyee dee.

An nín máaǹ bí jī ti-Dindaan jikaati puee

(Kpèè Maat 26.26-29, Maar 14.22-25, Luuki 22.15-20)

17 Kɔŋkɔnnee m nín gbìl̄ tiŋyee puee m làá wòoǹ-ni ní, di sá yii ni nín kōontí ikoon in an bàà sá án tūtuǹ-ni kin an púntí-nee. 18 Mpeepeekaamee, m gbìl̄ yii ni yaa kpáfì kí jāam̀ Unimbɔtee, ni kpákà ní ki gàntī tɔb. - Man m-ba, m fōō yii an máaǹ ki sá míǹ. 19 An lafun máaǹ digàntil ń nīn bí ni-kansikin, bí ŋmā kí béé bin yú deedeeyee. - 20 Ni nín kpáfí ki jáaḿ Unimbɔtee, an kaa sá ti-Dindaan jinti ní ni jīǹ. 21 Di sá yii nimbee, báà ŋma ŋáań malaa ní kí yòon̄ u-jinti ki bíi jīǹ u-baba. Ni nín ŋá mimmee ní ŋkùm làá kpɔ̀ biba ní bin kíǹee ń gbí ndaam. 22 Naa cáá idumpu kí jī kí nyɔ̀ niinaaa? Unimbɔti nikitil ní ni kpèé fám naaa, bin kaa cáá tibee ní ni kɔ̄ntí icoo ní? Ni cí yii ḿ lì-ni tiba ní naa! Ḿ pàkà-naaa? Aayee, maa làá pàkà-ni báà fiii!

23 Ní kpèè tibɔti tin ti-Dindaan dàkā-mi m dū ki nāatì-nee. Di sá yii kunyeeu kun bi dū ti-Dindaan Yeesu ki ŋúbiǹ u-nannanliibee, u nìn yōoǹ kpɔnɔ 24 ki jáam̀ Unimbɔti an pu ní ki cúu gífì, ní ki bí yii: «Doo di sá man wunti tin m dūu tīī ni-puee, nín̄ ŋáaḿmaan míǹ ki téetí m-pu.» 25 Bi jíń tijikaal ki dóòyee ní u tí yōoǹ ndaam ní ki bí yii: «Ndaam nee di sá m-fatikuu un làá nyēe, an di sá mpèéyee daaŋku. Ní nīn ŋáań míǹ ki nyù ki téetí m-pu^b.» 26 Di sá yii, iyunti in kɔkɔ ní ni yaa bíi ŋmóò kpɔnɔ nee ki nyù ndaam neeyee, ni bí ki sòoǹ ti-Dindaan kúm pu dee kí dāá sāā ŋyunti ŋun u làá fàtīí gítińee.

27 An puee, ubɔ yaa kaa bàà máaǹ kí ŋmɔ́ kpɔnɔ kí nyɔ̀ ndaam gbanti ní ki yaa ŋmɔ́ ki nyùn̄ee, u yīntiǹ ti-Dindaan wunti nì u-fatikuu. 28 Míǹ puee, báà ŋma ń cɔ̄ŋkì u-ba kí wàatī ní kí nín ŋmɔ́ kpɔnɔ kí nyɔ̀ ndaam gbanti. 29 Kun puee un di yaa ŋmɔ́ kpɔnɔ ki nyùn̄ ndaam kaa nyí ti-Dindaan wunti bɔti taapuee, u nín ŋmɔ́ ki nyùn̄ mimmee, ditafadaaldi ní u dáaĺ ki tɔ́ u-ba pu. 30 An pu ní ni-kansikin biba sá bibunliibi nì bideembi, ní tikpil mun kpíì. 31 Ti yaa cɔ́ŋkì ti-bee, Unimbɔti kaa dátí ti-tafal. 32 Ama ti-Dindaan yaa dátí ti-tafalee, an sá kí sāŋkì-ti, án nín làá ŋá pu tí taa láa nīn bí ditafadaakpaandi din poon duulinya nib làá dāá kɔ́ee nee.

33 An puee nnabiyaamu, ni yaa kpáfì kí jī ti-Dindaan jikaatee, cīitímaan tɔb. 34 Un ní ŋkùm yaa cááyee, udaan ń jīń u-dumpu, án nín làá ŋá pu ní taa nín̄ kpáfí ki dátí ditafadaaldi ki tòó ni-ba puee. An yaa sá tibɔti tin kíǹee, m yaa láa dɔ́mińee ní m dāa dàkà-ni-tì.