1 Kɔranti 10

Unil ń nīn nyíǹ u-ba nì awaa

1 Nnabiyaamu, m là ní téetí ditagbandi^a din nìn còom̄ ki dī ti-naanjab ki ŋmíntí-bee, nì bi-kɔkɔ nín nìn dūtì Tikati mɔɔl puee bɔti. 2 Ditagbandee nì dimɔɔlee poon ní bi fùl̄-bi bí nīn nóó Mooyiisi, 3 ní bi-kɔkɔ jíń tijikaal tin nyēeń Unimbɔti ceeyee. 4 Bi-kɔkɔ di tí nyùn̄ nnyim min nyēeń Unimbɔti ceeyee. Di sá yii bi nìn nyùn̄ ditaŋkpakpaandi din nyánní Unimbɔti cee ki cēentí-bee nyim ní^b, ditaŋkpalee nìn sá Kriisitoo ní. 5 Ama nì míǹ kɔkɔee, bi-kansikin tikpil nìn ŋáań min kaa fáatiǹ Unimbɔtee, an pu ní bi nìn kpíì kuteeun^c.

6 Tin nìn ŋá-bi nee sá kudaaŋŋu ki tīī timbi tí taa nín̄ cáá ilandɔkɔkpiti kii bíǹ nín nìn cáá ilandɔkɔkpiti puee^d. 7 Ni mun ń taa ti nóó awaa kii bi-kansikin biba nín nìn nóó puee, a lì kii an nín ŋmàn̄ Unimbɔti gbɔŋku poon puee yii: «Kunipaau kāl̀ ki jíń ki nyùn̄ ní ki yíkì ki ŋōō ki gɔ́ǹ diwaal^e.» 8 Ti mun ń taa ŋá tilaakpaal kii bi-kansikin biba nín nìn ŋá puee, an di nìn yāntì binib kutukub mmuŋku nì bita lítì ki kpíì ŋwimbaanti^f. 9 Tí taa ti cɔ̄ŋkìmaan ti-Dindaan kii bi-kansikin biba nín nìn cɔ́ŋkì-u pu kin ikoobu dāa júntì ki kūū-bee^g. 10 Ni mun ń taa gbùkum̀ kii bi-kansikin biba nín nìn gbūkum̀ pu ŋkúm tuuŋŋu dɔ́miń ki kūū ki céetì-bee^h.

11 Ditafadaaldi gbanti nìn jéetì bi-pu kí nīn sá kudaaŋŋu ní. Bi ŋmàn̄ tibɔti gbanti kí kpāafì timbi bin bí ŋyuntijoolkaa nee poon nan ní. 12 An puee sii un dàkafī yii a nín yú pu nee, a yú deedeeyee, á nīn nyí nì a-ba kí taa lítí. 13 Icɔŋki in bàń ni-puee pée ŋmàntī unil pɔŋŋu nyɔkɔm ní, kun puee Unimbɔti yaa pōoǹ puee see ú ŋá míǹ. Waa kíikí tin lákatiǹ ni-pɔŋŋu puee ń bàń-ni, di sá yii ŋyunti ŋun ní icɔŋki yaa bāań-nee, u làá tīī-ni mpɔn ní ŋmā kí ŋmèè, ní kí dàkà-ni nsan ní dī kí nyā.

14 An puee nnabiyaamu, ní sāǹ awaa. 15 M sòon̄-ni kii bi nín sòoǹ binib bin cáá nlandɔkɔee puee ní. Nimbi ni-ba ń dàkafì tin m sòon̄ nee pu kí kpèè. 16 Ndaam min pu ti jáaḿ Unimbɔti ti yaa làá jī ti-Dindaan jikaatee di kaa kpáfí-ti nì Kriisitoo fatikuu ubaantaaa? Kpɔnɔ un ti gífí ki yàkatēe, an di kaa kpáfí ti nì Kriisitoo wunti kí ŋá ubaantaaaⁱ? 17 Kpɔnɔbambaanti ní an sá, ní bi gífí. Míǹ ní ti mun nín kpáfì ki sá kunipaau nee, ti kpántì tiwumbaantiil, kun puee ti-kɔkɔ ŋmɔ́ kpɔnɔbaanti gbanti.

18 Kpèèmaan Isirayeel yab bɔti: bin nìn jīǹ tin bi cāabìń ki ŋáań Unimbɔti saraayee, bi nì Unimbɔti un bi ŋáań saraayee ŋá ubaanti dee^j. 19 M nín lì pu nee dàkà yii diwaal bí tiban deeyaaa? Àá tiwaŋkuti tin bi tōotì-dèe nanti di bí tiban ní? 20 Aayee, kpataaa! Di sá tin bi tòotēe, bi cáa tìì arasiniibi ní, an kaa sá Unimbɔti^k. An puee maa là ni nì arasiniibi ń kpāfì ubaanti. 21 Naa ŋūǹ kí nyɔ̀ ti-Dindaan daam kí gíti nyɔ̀ arasiniibi mun yam. Naa tí ŋūǹ kí jī ti-Dindaan jikaati kí gíti jī arasiniibi mun yati. 22 Ti là kí táká ti-Dindaan tibɔti kí yòon̄ u-ŋuul naaa^l? Ti pɔ̄ɔǹ-uaaa?

Ti-tuuŋŋi ń nīn tìì Unimbɔti tinyool

23 Biba lì yii: «M cáá nsan kí ŋá tikɔkɔ,» ama tikɔkɔ mun kaa ŋān̄ ki tīī-ni. «Ti cáá nsan kí ŋá tikɔkɔ,» ama an kaa sá tikɔkɔ di tútúǹ-ti nnimbɔtisan poon. 24 Ubɔ ń taa nín̄ nyàab̀ úǹ u-ba ŋanti, ama ní nyàab̀ ni-jutiibi ŋanti.

25 Ni ŋūǹ kí dā tinan tin bi nyáfí kinyɔŋinee kí ŋmɔ́ nì dipɔɔsɔŋkil kí taa bàlifì yii tì sá ba yati. 26 Kun puee Unimbɔti gbɔŋku poon lī yii: «Kitiŋ nì tin kɔkɔ pée bí ki-puee, ti-Dindaan di yì^m.»

27 Tí lì yii ubɔ kaa nóó Yeesu ní ki yíiń-ni ní jī tijin. Ni yaa là ki cūtèe, tin u yaa cáań ki yóoǹ-nee, jīmaan. Ní taa lì yii ni là ni-pɔbiliŋ ń nīn sɔ̀m̀ee puee, ni làá bàlifì-u yii u-nanti gbanti sá ba yati. 28 Ama ubɔ yaa tùkū-ni yii an sá tiwaatootinanee, ní taa ŋmɔ́maan. Un tùkū-nee puee, ní taa ŋmɔ́maan án páb́ u-pɔbil. 29 - An kaa sá nimbi ní án taa páb́, un tùkū-nee ní án taa páb́.

«Ama ba pu ní an sá yii, án taa páb́ ubɔ puee, man batɔl cáá kigbeennyɔkɔ ní? 30 M yaa làá jī tijin ní ki yaa jáam̀ Unimbɔti ti-pu ní ki nín jíńee, ba pu ní bi gíti kpākantí-mi tijin tin pu m jáam̀ ki nín jíńee?»

31 An puee, an yaa sá tijin ní ni bí ki jīǹaaa, an yaa tí sá ndaam ní ni yaa tí bí ki nyùɔɔɔ, tin kɔkɔ ní ni bíi ŋáańee, ní yàntī án nīn tìì Unimbɔti tinyool. 32 Ni-bimbim ń taa yàntī bin sá Juuda yabee nì bin kaa sée, nì bin nóó Yeesuee ń lítí. 33 Nín̄ ŋáaḿmaan kii man nín ŋáań puee: m pée pɔ̄ɔntí m-ba kí nīn fáatíǹ báà ŋma tikɔkɔ poon ní. Maa nyàab̀ man m-ba ŋanti, ama báà ŋma ŋanti ní m nyàab̀, án nín làá ŋá pu bí ká difiilee.