1 Kɔranti 12

Unimbɔti Fam nín pūǹ dipɔl diŋyee bɔti

1 Nnabiyaamu, m là ní béé Unimbɔti Fam nín pūǹ dipɔl diŋyee bɔti. 2 Ni téetí yii ni nín kaa nìn dáá nóó Yeesuee, an nìn dátí-ni ní ki cáǹ awaa ŋin bi máń ŋaa gbìl̀ kaa sòoǹee cee. 3 An pu ní m là ní béé yii unil un Unimbɔti Fam kpòotēe kaa ŋūǹ kí lì yii mbusu ń jēetí Yeesu pu, míǹ ní ubɔ kaa tí ŋūǹ kí lì yii: «Yeesu sá ti-Dindaan» Unimbɔti Fam yaa kaa kpōotì udaan.

4 Unimbɔti Fam nín pūǹ dipɔl^a diŋyee bí u-ba u-ba, ama Unimbɔti Fam mbaantiimee di tìì míǹ. 5 Ní báà ŋma tundi nyēē di-ba di-ba, ama ní ti-kɔkɔ tūǹ ki tìì ti-Dindaan ubaanti. 6 Ní báà ŋma cáá min ní u tūǹ u-tundee, ama Unimbɔtibaanti di yàntī ti-kɔkɔ ŋūǹ ki ŋáań míǹ. 7 Unimbɔti Fam tìì binib dipɔl ní bi tūǹ atuun an tútúǹ báà ŋma. 8 Unimbɔti Fam pūǹ ubɔ iciin ú sòoǹ tibɔti, míǹ mbaantiim ní mì tí pūǹ ubɔ mun dinyil ú sòoǹ tibɔti. 9 Unimbɔti Famee mbaantiim di pūǹ ubɔ fookii, ní ki pūǹ ubɔ mun ú nīn ŋūǹ ki cāantí iween. 10 Unimbɔti Fam pūǹ ubɔ mpɔn ú nīn ŋáań maamaacib, ní kí pɔ̄ ubɔ mun ú nīn nàatī Unimbɔti nyɔɔbundi, kí pɔ̄ ubɔ mun ú nīn nyí kí gàntī Unimbɔti Fam tundi nì arasiniibi tuuŋŋi, ní kí pɔ̄ ubɔ ní úǹ sòoǹ isooncaan kupaau, ní kí pɔ̄ ubɔ ní úǹ ń gbìl̄ isooncaan taapu kí nàatī. 11 Unimbɔti Fam mbaantiimee di tūǹ an tuuŋŋi kɔkɔ. Mì nín lēē miŋyee ní mì yàkatī mi-pɔl ki tìì báà ŋma^b.

Tiwumbaantiil, ama ajan kupaau

12 Kii tiwun nín sá tibaantiil ki cáá ajan kupaau puee, nì min kɔkɔ ajan gbanti bí a-ba a-ba, ŋi-kɔkɔ kpáfì ki ŋá tiwumbaantiilee, míǹ ní ti nì Kriisitoo sá^c. 13 Míǹ ní bin sá Juuda yabee nì bin kaa sée, nì bin sá iyumbuee nì bin kaa sée, Unimbɔti Fam mbaantiim ní bi fùl̄ ti-kɔkɔ ti kpántì tiwumbaantiil. Míǹ ní Unimbɔti tīī ti-kɔkɔ u-Fam gbanti mbaantiim.

14 Tiwun kaa sá mbaantiim, an yākatì ajan kupaau ní. 15 Ditaal yaa bí yii: «Man kaa sá ŋŋal, an puee maa kútì tiwun pu», mimmee dàa lafun kútì tiwun puɔɔɔ? 16 Àá ditafal yaa bí yii: «Man kaa sá dinimbil, míǹ puee maa kútì tiwun pu», mimmee dàa lafun kútì tiwun puɔɔɔ? 17 Tiwun kɔkɔ yaa sá dinimbilee, tì bàà ŋáań mana kí nīn gbìl̀? Àá tiwun kɔkɔ yaa bàà sá ditafalee, mana ní tì bàà ŋáań kí nīn gbìl̀ nsɔnsɔfi? 18 Ama min Unimbɔti lèe ní u kāaǹ tiwun jaŋŋi tiwun pu. 19 Ajan kɔkɔ yaa dūu ŋá dijambaantiilee, tiwun kaa bàà bí deeyaa! 20 Tiŋmanee unil wunti jaŋŋi bí kupaau, ama ní ki sá tiwumbaantiil.

21 An puee, dinimbil kaa ŋūǹ kí lì ŋŋal yii: «Maa là-si,» míǹ ní diyil mun kaa tí ŋūǹ kí lì ataa yii: «Maa là-ni.» 22 Unil wunti jaŋŋi ŋin bi kpèé yii ŋaa pɔ̄ɔ̄yee, ŋíǹ di nín kèetī. 23 Ní ŋin ti kpèé ki ŋèen̄ee, ŋíǹ ní ti tìì tinyool, ní ŋin bɔti taa lèe, ŋíǹ ní ti kpèé tiŋan. 24 Ama ajan ŋin sá amɔntee kaa nyàab̀ bí tīī-ŋi tinyool, Unimbɔti ŋá tiwun míǹ kí tīī dijandi din lóò tinyoolee tinyool ní, 25 án nín làá ŋá pu digàntil ń taa nín̄ bí tiwun jaŋŋi kansikin ŋi-kɔkɔ ń nīn sūǹ tɔb puee. 26 Falaa yaa cúú dijandi dibee, an cúú ki kpáaǹ ajan kɔkɔ dee. Bi yaa tí bíi pàkà dijandi dibee, ŋin kɔkɔ kíǹee fàal̀ ní.

27 Ni-kɔkɔ sá Kriisitoo wunti ní, ní ni-kansikin báà ŋma sá tiwun jandi diba. 28 Míǹ ní Unimbɔti péé péé ki kāaǹ akpambal Kriisitoo nikitil kansikin, nliliitiimee, Unimbɔti bɔnaatiliibi, ntataatiimee, bidakaliibi^d, boonee ní u dū bin kíǹee ki páaǹ. U pú biba bí nīn ŋáań maamaacib, ki pú biba bí nīn cāantí bibunliibi, ní ki tīī biba ŋŋmam bí nīn tútúǹ binib, ní ki pú biba bí nīn kpòotī binib, ní ki pú biba bí nīn sòoǹ isooncaan kupaau. 29 Bi-kɔkɔ di sá akpambalaaa? Bi-kɔkɔ di sá Unimbɔti bɔnaatiliibaaa? Bi-kɔkɔ di sá bidakaliibaaa? Bi-kɔkɔ di ŋáań maamaacibaaa? 30 Bi-kɔkɔ ní Unimbɔti pú bí nīn cāantí bibunliibaaa? Bi-kɔkɔ di sòoǹ isooncaanaaa? Bi-kɔkɔ di gbìl̀ isooncaan taapu ki nàatāaa? 31 An puee, ní nyàab̀ Unimbɔti ń pɔ̄-ni dipɔl din jítiǹ ŋin kíǹeeyee.

Ama m làá gíti dàkà-ni nsan ŋun jítiǹ i-kɔkɔee.