1 Kɔranti 13

Dineendi di jítiǹ tikɔkɔ

1 Báà m yaa sòoǹ isooncaan, binib nì ituun sooŋyi, ní kaa cáá dineendee, tin m sòoǹee sá fám ní kii dawula àá diwaŋkilindi nín sūǹ pu fám an kaa cáá taapu puee ní. 2 M ŋūǹ kí fōō dipɔl kí nīn nàatī Unimbɔti nyɔɔbundi, ki ŋūǹ kí nīn cáá dinyil kɔkɔ nì di-nyɔkɔm kí béé tin kɔkɔ bí dibalinee, kí nīn cáá fookii tiŋan án nīn kpìkitī ajoon^a, míǹ kɔkɔee m yaa kaa cáá dineendee, m sá fám ní. 3 Báà m yaa dū tiwan tin m cááyee kɔkɔ ki yākatì bifalaadambi, ki yaa dū m-ba gba ki tīī bi wùn̄ ŋŋmi, ama ní kaa cáá dineendee, tin kɔkɔ m ŋée sá fám ní, maa cáá ipaati.

4 Un cáá dineendee cáá kimɔtii ní ki cáá tiniti. Waa cáá nnimbitaataam, kaa dàkà u-ba, kaa cáá dilambil. 5 Un cáá dineendee kaa ŋáań min kaa kítèe, kaa cáá ikummunti, kaa cáá diŋuul, kaa díkì unil pu. 6 Tin kaa bí deedeeyee kaa tìì un cáá dineendee dipɔɔpindi, see tin bí deedeeyee. 7 Úǹ pūǹ binib yìntitam kɔkɔ ní, ki cáá fookii nì dimákal, nì kimɔtii ŋyunti kamaa.

8 Unimbɔti nyɔɔbundi nàatitam làá dāá gbèen̄, isooncaan sòontam làá dāá gbèen̄, dinyil làá dāá kúntí, ama dineendi kpá kí kúntí jaanjaan. 9 Di sá ti-nyil din ti nyée cáá di-gbeennyɔkɔm ní, míǹ ní Unimbɔti nyɔɔbundi nàatitam mun cáá mi-gbèenlaŋki, kun puee taa nyí ki dóò, kaa tí ŋūǹ kí sòoǹ kí dóó tikɔkɔ mun. 10 Ama tikɔkɔ yaa láa dɔ́ntì ki ŋá mmɔmmee, tin nìn wɔ̀b̄ee làá dāá wāŋkì.

11 M nín nìn dáá sá kibikee, m nìn sòoǹ kii kibikee, ní ki dàkafī kii kibikee, ní ki kítí m-bɔti kii kibikee. Ama, m nín wíiǹ ki kpántì ukpaanee, m fá m nín nìn sá kibiki ki ŋáań min miŋyee. 12 Kɔŋkɔnnee, ti nín dáá wāĺ puee bí pùuu kii bi nín kpèé digitikpil poon ki wāĺ puee ní, ama ŋyunti dòoń, ti làá dāá wāl̀ bɔ́iii. Díǹ pu nee, maa nyí ki dóò, ama ŋyunti dòoń, m làá dāá béé nyíki nyiki kii Unimbɔti nín nyí-mi pu nan ní.

13 Kɔŋkɔnnee tiwan tita di bí: fookii, dimákal nì dineendi, ama tiwan titee kansikinee, dineendi di līī.