1 Kɔranti 14

Unimbɔti Fam nín pūǹ dipɔl diŋyee tuuŋŋi

1 An puee ní péé péé kí nyàab̀ dineendi, kí nyàab̀ dipɔl din Unimbɔti Fam pūǹee, cilinjee: nyàab̀maan Unimbɔti nyɔɔbundi nàatitam pɔl. 2 Un sòoǹ isooncaanee kaa bíi sòoǹ nì binib, u sòoǹ nì Unimbɔti ní, kun puee binib kaa gbìl̀ tin u sòoǹee taapu. Unimbɔti Fam pɔŋŋu di yàntī u sòoǹ tin bí dibalinee. 3 Ama un fòol̄ Unimbɔti cee tibɔti ki nàatēe sòoǹ nì binib ní, ní bi-nimbɔtinóotam mɔ̀tīi cá nyɔkɔpu ki tìì-bi kunyannyaau ki sɔ̀ŋkī bi-pɔbiliŋ. 4 Un sòoǹ isooncaanee, úǹ baba ní an tútúǹ, ama un fòol̄ Unimbɔti cee tibɔti ki nàatēe tútúǹ Kriisitoo nikitil kɔkɔ dí cù nyɔkɔpu ní.

5 M là báà ŋma ń nīn sòoǹ isooncaan, ama tin m baasii nyàab̀ ní nīn cááyee di sá ní nīn fòol̄ Unimbɔti cee tibɔti ki nàatī. Di sá un fòol̄ Unimbɔti cee tibɔti ki nàatēe jítiǹ un sòoǹ isooncaanee, asee ubɔ yaa bí ki ŋūǹ kí nàatī isooncaan taapu án tūtuǹ báà ŋma ń cù nyɔkɔpu baba. 6 Nnabiyaamu, tí dū tibɔti nee kí ŋmàntī: tí lì yii m dɔ́miń ni-cee ní ki bí ki sòoǹ nì ni isooncaan in naa gbìl̀ee. Tin m sòoǹee yaa kaa kútì-ni tiba, àá kaa cántì, àá naa béè tiba poon, àá naa gbìl̄ Unimbɔti nín tīī dinyɔɔbundi diŋyee, àá kaa fōō didàkal diba poonee, mana ní án làá tūtuǹ-ni?

7 Tí tí dū kí ŋmàntī nì tigbiŋgbiiliwan diwul àá kubeeu. Tiwanee liitil siim yaa kaa nyēē u-ba u-bee, mana ní bi ŋūǹ kí gàntī kí béé yii diwul di sūǹ nee, àá kubeeu di sūǹ nee? 8 Ukantámbunli yaa kaa búń dijanjakantándi ki cántì, mana ní bin kíǹee làá béé kí bɔ́ntí kujaau? 9 Míǹ mbaantiim, ni yaa bíi sòoǹ isoon in baa gbìl̀ee, bi làá ŋá mana ní kí gbìl̄ taapu? Mimmee ni sòoǹ ki féeń dee. 10 M nyí yii isoon nín bí i-ba i-ba puee wīikí duulinya poon, ama isoon iba kpá kaa cáá taapu. 11 Ama, ubɔ yaa bíi sòoǹ nì mi isooncaanee, udaan sá man cee unicaan ní ma mun sá úǹ cee unicaan. 12 Kii ni nín bí ki nyàab̀ Unimbɔti Fam pɔl puee, ní nyàab̀ din làá yàntī Kriisitoo nikitil ń cù nyɔkɔpu nnimbɔtisan poonee tikpil.

13 An puee un sòoǹ isooncaanee ń mèè Unimbɔti ń pɔ̄-u ŋŋmam ú nīn nàatī tin u sòoǹee taapu. 14 Di sá yii m yaa bíi mèé nì isooncaanee, an sá m-fam di mèé, ní m-landɔkɔŋu kaa bíi ŋáań diba. 15 Mimmee, an máaǹ ḿ mèè mana? M làá mèè nì m-fam ní kí mèè nì m-landɔkɔŋu mun binib ń gbìl̄ taapu, kí gāā ilan nì m-fam ní kí tí dū m-landɔkɔŋu kí gāā binib ń gbìl̄ taapu. 16 M yaa bíi mèé ki pàkà Unimbɔti nì ŋfamin ŋmaniŋma, mana ní ubɔ un kaa gbìl̀ taapuee ŋūǹ kí kíí yii «Ameeni», ŋyunti ŋun ní waa gbìl̀ tin a sòoǹee taapuee? 17 Tiŋman a-wimmeem gbanti bàà ŋān̄, ama an kaa tútúǹ a-juti.

18 M jáaḿ Unimbɔti, di sá yii m sòoǹ isooncaan ki jítiǹ ni-kɔkɔ. 19 Ama Kriisitoo nikitil kansikinee, an yaa sá anyɔɔbun aŋmoo ní ḿ sòoǹ binib ń gbìl̄ taapu án tūtuǹ-bee, m néeń míǹ ki jítiǹ ḿ sòoǹ isooncaan poon anyɔɔbun kutukub saalaa.

20 Nnabiyaamu, ní taa nín̄ dàkafī kii mbiyaamu nín dàkafī puee, nín̄ cáámaan binicikitikaabi landɔkɔŋu. Ama ikpiti jandi púee, ní nīn bí kii mbiyaawaamuee kí taa nín̄ ŋáań ikpiti. 21 An ŋmàn̄ Unimbɔti gbɔŋku poon yii: ti-Dindaan lī yii:

«M làá dāá dī binicambi biba pu

ní bí sòoǹ nì m-samaau nee inicansoon,

ama nì míǹ kɔkɔee, baa làá pīlifiǹ-mi^a.»

22 An puee Unimbɔti Fam nín tìì isooncaan iŋyee sá Unimbɔti daaŋku kubɔ ní ki tīī bin kaa nóó Yeesuee, an kaa sá ki tīī bin nóó Yeesuee. Ama kí fōō tibɔti Unimbɔti cee kí dūú nàatēe di sá Unimbɔti daaŋku ki tīī bin nóó Yeesuee, ní kaa sá ki tīī bin kaa nyí Yeesuee.

23 An yaa sá yii Kriisitoo nikitil kɔkɔ yaa kpáfì kí jāam̀ Unimbɔti ní báà ŋma bí ki sòoǹ isooncaanee, un kaa nyí Yeesuee àá un pée kóoń kí pīlifèe yaa gbìl̄ ni nín sòoǹ miŋyee, waa yíì-ni biwaatiibaaa? 24 Ama ni-kɔkɔ yaa bí ki fòol̄ Unimbɔti cee tibɔti ki nàatēe, án làá gbēē un kaa nyí Unimbɔtee àá un pée kóoń kí pīlifèe pɔbil ní ú béé yii u sá ukpiti, kun puee u gbìl̄ tin ni sòoǹee taapu, 25 ní ki wál̀ u-landɔkɔi in bál̀ u-pɔbilinee. Niinee ní ú tātìi dòon̄ dicincibil Unimbɔti nimbiin nì ijaam ní kí bí yii: «Tiŋman, Unimbɔti lafun bí ni-kansikin.»

Fikil fikil ń taa nín̄ bí Kriisitoo nikitil kansikin

26 Mimmee nnabiyaamu, an sá tí ŋá mana ní? Ni yaa kpáfì kí jāam̀ Unimbɔtee, ubɔ ń gāā ilan, ubɔ ń dàkà Unimbɔti bɔti. Unimbɔti yaa dàkā ubɔ tiba, ú sòoǹ, ní ubɔ ń sòoǹ isooncaan, ní ubɔ ń nàatī isooncaanee taapu. Tin báà ŋma làá ŋée ń tūtuǹ Kriisitoo nikitil ń cù nyɔkɔpu nnimbɔtisan poon. 27 Ni yaa làá sòoǹ isooncaanee, án nīn sá binib bili kii bita, bí nīn sòoǹ ubɔ ubɔ, boonee ubɔ ń nàatī tin bi sòon̄ee taapu. 28 Ubɔ yaa kaa bí kí nàatī tin bi sòoǹee taapuee, un bíi sòoǹ isooncaanee ń ŋmīĺ kí nīn kíǹ ki sòoǹ úǹ nì Unimbɔti kansikin ŋmaniŋma. 29 Bin fòol̄ tibɔti Unimbɔti cee ki nàatēe máaǹ kí nīn bí bili kii bita ní bin kíǹee ń nīn pílifí ki dāantí tin bi sòoǹee. 30 Ama Unimbɔti yaa nyántì tibɔti tiba ki dàkā ni-kansikin ubɔee, un bíi sòoǹee ń ŋmīĺ. 31 Ni ŋūǹ ni-kɔkɔ ń nīn nàatī Unimbɔti nyɔɔbundi ubɔ ubɔ án nín làá ŋá pu ní béé kí ká kunyannyaauee. 32 Ubɔnaatil máaǹ kí nīn cáá Ŋfam min tìì-u tibɔti u cáa nàatēe pu mpɔn. 33 Kun puee Unimbɔti kaa sá fikil fikil Nimbɔtiu, ama ŋgbansɔŋfi Nimbɔtiu ní u sá.

Kii Unimbɔti nikitiŋ kɔkɔ poon an nín pée sá puee, 34 Kriisitoo nikitil kansikinee, binimpoobi máaǹ kí nīn kā ki ŋmí ní. Baa cáá nsan kí sòoǹ tiba. Bi máaǹ kí sìntīǹ bi-ba taapu kii Unimbɔti gbɔŋku poon nín lī puee. 35 Bi yaa kaa gbìl̄ tiba taapuee, bí tin bàlifì bi-calib mmɔŋki. An kaa ŋān̄ binimpoobi ń sòoǹ tiba Unimbɔti nikitiŋ kansikin.

36 Nimbi cee ní Unimbɔti bɔti nyáńaaa? Àá nimbi baba cee ní Unimbɔti bɔti dɔ́miń ní? 37 Un yaa nyí yii u sá Unimbɔti bɔnaatiliu àá Unimbɔti Fam tīī-u dipɔl dibee máaǹ kí béé yii tibɔti tin m ŋmàn̄ nee sá ti-Dindaan marau ní. 38 Un kaa béè yii an sá ti-Dindaan marauee, ní yàntī udaan bɔti.

39 An puee nnabiyaamu, nyàab̀maan Unimbɔti ń tīī-ni dipɔl din làá yàntī ní nīn fòol̄ u-cee tibɔti ki nàatēe, ama kí taa pìin̄ bin sòoǹ isooncaanee nsan. 40 Ní nīn ŋáań tikɔkɔ án nīn kítí ki dī nì nsan.