Room 11

Unimbɔti kaa dū Isirayeel yab ki fá

1 Mimmee, Unimbɔti fá Isirayeel yab naaa? Aayee, kpataaa! Kun puee man m-ba sá Isirayeel ní, ki sá Abraam naantiiu, ní ki sá Beenjameen naakookun^a. 2 Unimbɔti kaa fá u-nikitil din pu u pée nyí dooooyee^b. Naa kalin nyí Unimbɔti gbɔŋku nín sòon̄ pu dijandi din sòoǹ Eelii nín nìn bíi kɔ́kɔĺ Isirayeel yab Unimbɔti nimbiin pueeee? U bí yii: 3 «Ti-Dindaan, bi kūū a-bɔnaatiliibi ki wīī a-saraafaŋyi, an pée kíǹ man baba ní, ní bi nyàab̀ kí kpɔ̀ ma mun!» 4 Unimbɔti nìn kíí-u yii ba ní? U nìn bí yii: «M kpáafì binib kutukub biluli, bi sá m-yab. Bidambi tabiŋyiliŋ kaa gbāaǹ diwaal Baal nimbiin^c.» 5 Míǹ mbaantiim, ti-yuntiŋu nee, an kíǹ binib fiii bin Unimbɔti ŋá tiŋan ki lútì-bee. 6 U ŋá bidambi tiŋan ní ki lútì-bi, an kaa sá bi-tunnyaaŋku pu. An yaan sá bi-tunnyaaŋku puee, mimmee Unimbɔti kaa ti ŋá-bi tiŋan dee.

7 Tibɔti nee taapu sá yii ba dee? Isirayeel yab nín nyàab̀ kuŋyee, baa ká kudɔŋu, see bin Unimbɔti lútèe baba di ká kudɔŋu, ní u yāntì bin kíǹee kaa ŋūǹ kí gbìl̄ taapu, 8 kii an nín ŋmàn̄ puee yii: «Unimbɔti tātì bi-lammi, ki yāntì bi-nimbiliŋ kaa wāĺ, bi-tafaliŋ kpáá, áli ki dāa sāā díǹ.» 9 Daafiidi mun lī yii:

«Bi-jinti ń kpántí-bi kutaliŋŋu,

kí nīn sá-bi kulaaŋŋu,

bí lítí ikpitin kí ká ditafadaaldi din máaǹee,

10 bi-nimbiliŋ ń jɔ̀b̄ kí taa nín̄ wāĺ!

Yàntī bí nīn pée bōō baabadal^d.»

11 Ḿ bàlifì tibɔti nee: Mimmee, Juuda yab nín gbéetèe, bi lítì kɔkɔɔɔ? Aayee, kpataaa! Ama bi-lítitamee di yāntì atimbun ŋin kɔkɔ kíǹee ká difiil, án nín làá ŋá pu bi yaa ká bin béeyee, bi mun ń nyàab̀ee. 12 Bi-yìntitam yaa cáań kitiŋ kɔkɔ nib tiwammɔntiilee, ní bi nín wáŋkì puee yaa cáań bin kaa sá Juuda yabee tiwammɔntiilee, kin Juuda yab kɔkɔ yaa fātìń Unimbɔti ceeyee, kun an làá cáańee làá nīn bí mana dee?

Bin kaa sá Juuda yabee fiil

13 Kɔŋkɔnnee, m sòoǹ nì nimbi bin kaa sá Juuda yabee ní. Man sá Yeesu kpambal din u tú bin kaa sá Juuda yabee ceeyee ní, ní an mɔ̄ǹ-mi ditundi din u tīī-mee pu. 14 M-landɔkɔŋu sá yii ḿ téé m-nabiyaamu Juuda yab bí nyàab̀ kí ká kun bin béeyee cááyee, ḿ ŋmā kí fīī bi-kansikin biba. 15 Unimbɔti nín yíì Juuda yab bí taa nín̄ gíti sá u-yabee di ŋáŋkì binib bin kɔkɔ kíǹee nì Unimbɔti kansikin. Mimmee, u yaa láa fātìi fōō Juuda yabee, án làá dāá nīn bí mana dee? An dāa sá bin nìn kpíìyee dimaŋfal ní.

16 Bi yaa nìn cáań tijincɔ̀fikaal ki tīī Unimbɔtee, tin kíǹee muee, úǹ di yì. Unimbɔti di yaa yì busubu nyaaŋyee, úǹ di yì asupan mun^e. 17 Bi yaa gāā ɔliifi bumɔŋkisubu^f paŋŋi aba ní ki gāań sii kumooun subu pandi ki cáań ki túkuǹ ŋin béeyee paaŋyi pu, ní a kíǹ ki fòol̄ busumɔntiibuee nyaaŋyi kpiimee, 18 sii ń taa nín̄ lámintí ki dàkà apan ŋin bi gāā ki fée. A yaa bíi lámintée, á béé yii an kaa sá sii di tú inyaan, inyaan di tú sii.

19 A ŋūǹ kí lì yii: «Bi gāā apanee ki fá ní ki cáań man ki túkuǹ.» 20 Tiŋman bi lafun gāā-ŋi ki fá, kun puee baa cáá fookii ní sii fookiiu puee ní a túkú niin. Míǹ puee, á fàŋkì kí taa nín̄ lámintí. 21 Di sá yii Unimbɔti yaa kaa tāaǹ bumɔŋkisubu paŋŋee, á nīn nyí yii waa làá dāá tàan̄ si mun. 22 Nín̄ nyí Unimbɔti ŋanti nì u-tafadaaldi pu! U dáaĺ bin bin lítèe tafal, ní ki ŋá sii tiŋan. Á nīn gbíntìi bí u-ŋanti gbantin, an yaa kaa sá míǹ, see ú dāá gāā-si kí fá. 23 Bíǹ yaa kpántì bi-bimbim ki fōō Yeesu ki kííyee, u ŋūǹ kí fàtīí gíiǹní-bi kí túkuń laakin u nìn gāā-bee. Di sá yii Unimbɔti cáá mpɔn kí gíiǹ-bi kí túkuń mpɔm. 24 Kpèè, sii kumooun supandi din bi gāāyee, bi cáań-si ki túkuǹ bumɔŋkisubu bun kaa sá a-suyilee pu. Mimmee, an kaa pɔ̄ɔ̄ bí gíiǹní asupan ŋin bi gāāyee kí túkuń disuyil din pu ŋi nìn bí, bi gāā-ŋee.

Isirayeel yab kɔkɔ làá ká difiil

25 M-nabiyaamu, m là ní béé ibaamɔn iba i bí dibalin, án nín làá ŋá pu ní taa nín̄ yíì ni-ba yii biciŋfitiibee. Di sá yii Isirayeel yab dijandi kaa ŋūǹ kí gbìl̄ tibɔti nee taapu, kí dāá sāā ŋyunti ŋun ntimu mun kɔkɔ kíǹee yab ń dāá kɔ́ difiilinee. 26 Min ní Isirayeel yab kɔkɔ làá ká difiilee dee, kii an nín pée ŋmàn̄ puee yii:

«Ufiil làá nyānní Siiyɔn

ní kí lēē ikpiti in bí Jaakɔb yab kansikinee kí fá.

27 Man Unimbɔti yaa láa lēē bi-kpitii ki fée,

an di dāa sá dipoondi din m pōoǹ-bee^g.»

28 A yaa kpēē bi nín fá Tibɔmɔntiil puee, bi kpántì Unimbɔti nannanliibi nimbi ń ká difiil. A yaa kpēē Unimbɔti nín lútì-bi puee, bi sá bin u néeńee bi-naanjab pu. 29 Di sá yii Unimbɔti yaa pú ubɔ diyimɔɔl diba, àá u yaa tí yíiń ubɔee, waa kpántí u-landɔkɔŋu. 30 Dooooyee, naa nìn tɔ́ Unimbɔti, ama, Juuda yab nín nìn yíì, kaa fōō u-bɔti puee ní u súń ni-saai kɔŋkɔnnee ki fīī-ni. 31 Míǹ mbaantiim, Juuda yab kaa tɔ́ Unimbɔti kɔŋkɔnnee ní Unimbɔti súń ni-saai, ama an sá bi mun ń ŋmā kí ká kɔŋkɔnnee Unimbɔti saasɔl ní. 32 Mimmee, Unimbɔti yāntì binib kɔkɔ gbíntì bi-yìntitam poon, ú ŋmā kí dàkà bi-kɔkɔ u nín sūǹ binib saai puee dee.

Pɔɔl pàkà Unimbɔti ciiŋyi

33 Óo, Unimbɔti ciiŋyi nì u-nyítam nì u-ŋanti wīikéeee, an kaa cáá bi lì! U nín ŋáań u-bɔti miŋyee, unil kaa ŋūǹ kí béé, ní min min u lēē ki làá ŋée, unil kaa ŋūǹ kí gbìl̄ taapu^h, 34 kun puee, kii Unimbɔti gbɔŋku poon nín lī puee yii:

«Ŋma di ŋūǹ kí béé ti-Dindaan landɔkɔŋu?

Ŋma di ŋūǹ kí sāŋkì-u mun?

35 Ŋma di péé ki tīī-u tiba ní an sá yii ú fàtīí téeǹ udaanⁱ?»

36 Úǹ di náań tikɔkɔ, úǹ di ŋúb́ tikɔkɔ, ní an kɔkɔ bí ki tīī-u. Unimbɔti gbanti ń ká tinyool kí nīn cá jaanjaan! Ameeni.