Room 12

Dimaŋfapɔndi din ti cáá Unimbɔtinee

1 Nnabiyaamu, kii Unimbɔti nín dàkā-ti u-saasɔl puee, m mèé-ni yii ní dū ni-wunti kí tīī Unimbɔti kii saraa un bí circir kaa kpíì, ki fáatì-uee. An di làá nīn sá-ni dinimbɔtinoobaamɔndi din máaǹ ní nóóyee. 2 Taa dūmaan ni-ba kí nántíǹ waanee bimbim^a, ama ní yàntī Unimbɔti ń pɔ̄-ni ilandɔkɔpɔɔn kí kpántí ni-bimbim. Míǹ ní ni ŋūǹ kí béé min ní Unimbɔti lèe, min ŋān̄ ki fáatì-u ki sá mmɔntiimee.

3 Diyimɔɔl din Unimbɔti pú-mee puee ní m ŋūǹ kí tùkù ni-kɔkɔ yii ní taa nín̄ yòontí ni-ba yilpu min kaa máaǹee, ama nín̄ cáámaan ilandɔkɔ in kítì ki nóó nì fookii un Unimbɔti yākatì ki pú báà ŋmee. 4 Kii tiwun nín sá tibaantiil ki cáá ajan tikpil, ŋi-tuuŋŋi kaa pēē puee, 5 míǹ mbaantiim, ti nín wīikí min nee, Kriisitoo di kpáfì-ti tiwumbaantiil, ní báà ŋma túkú u-laŋki u-laŋki. 6 Unimbɔti pú-ti diyimɔɔl ki yākatì báà ŋma u-pɔl, tí nīn cáa tūǹ atuun ŋin bí aba abee. Míǹ puee, sii un u-Fam tìì tibɔti a nàatēe, nín̄ nàatī án nīn nóó nì u nín tīī-si fookii uŋyee. 7 Sii un u yaa tīī á nīn sá bin kíǹee tɔntɔnliuee, á nīn tūǹ ki tìì-bi. Sii un dàkèe, á dū a-ba kí tīī a-dàkatam. 8 Sii un tìì binib kunyannyaauee, a mun ń dū a-ba kí tīiǹ kunyannyaau ditiil. Sii un pūǹ tiwanee, á nīn pūǹ nì dipɔbil diba. Sii un kpòotēe, á nīn kpòotī nì difaŋgiil. Sii un tútúǹ bifalaadambee, á tūtuǹ-bi nì dipɔɔpindi^b.

9 Ni-neendi ń taa nín̄ cáá mpoonnyoon. Ní nīn ná ikpiti, kí dū ni-ba kí nákáǹ tiŋan mmɔntiim. 10 Nín̄ néeḿmaan tɔb tiŋan kii nnabiyaamu nín néeń tɔb puee, kí nīn sá bipeekaabi ki tɔ́ bin kíǹee. 11 Ní nīn tūm̀maan ditundi nì difaŋgiil kí taa nín̄ sá biwutijoodambi, kí nīn pɔ̄ɔntí ki tūm̀maan ti-Dindaan tundi nì ni-pɔbiliŋ kɔkɔ. 12 Án nīn mɔ̄ǹ-ni dimákal din ni cááyee pu, kí jīmaan kimɔtii falaa poon, kí nīn mèé múlmul. 13 Tūtum̀maan biwɔfib bin nóó Unimbɔtee, kí nīn fòol̄ binicambi bin kóò ni-puee nì mmɔn.

14 Mèèmaan yii Unimbɔti ń ŋá bin sàantí-nee tiŋan, ní nīn nyàab̀ bi-ŋanti kí taa nín̄ nyàab̀-bi tikpitil^c. 15 Bin yaa bí dipɔɔpindinee, ní kūtì bi-pu, ni-kɔkɔ ń fàal̀maan. Bin yaa tí bíi sūǹee, ní kūtì bi mun pu, ni-kɔkɔ ń sɔ̄. 16 Nín̄ mɔ̄maan tɔb cee. Ní taa nín̄ sá bin néeń timɔnee. Nín̄ sìntīmaan ni-ba taapu, kí taa dàkafìmaan yii ni sá biciŋfitiibi^d.

17 Ubɔ yaa ŋá-ni tikpitilee, ní taa dū tikpitil kí téeǹ-u. Pɔ́ɔm̀maan kí ŋá min kítèe binib kɔkɔ nimbiin. 18 Ni yaa ŋūǹee, ní yàntī ŋgbansɔŋfi ń nīn bí ni nì báà ŋma kansikin, tiba ń taa nyānní ni-cee. 19 M-nabineeŋkaamu, ní taa tɔ̀maan ni-ba ipɔntoon. Yàntīmaan Unimbɔti ŋuul ń tɔ̄ di-tundi, kun puee an ŋmàn̄ yii: «Ti-Dindaan bí yii: Man di làá dāá tɔ̀ ipɔntoon, man di làá dāá pà bi-tuuŋŋi paati. 20 Ama, ŋkùm yaa cáá a-nannanliu, á tīī-u tijin ú jī. Nnyinnyoo yaa tí cáá-u, á tīī-u nnyim ú nyɔ̀. A yaa bíi ŋáań mimmee, an bí kii amɔsiŋkoon ní a cáa pāantí u-yil puee^e.» 21 Ní taa yàntī tikpitil ń pɔ̄ɔkiǹ-ni, nimbi dūmaan tiŋan kí pɔ̄ɔkiǹ tikpitil.