Room 13

Unil ń nīn tɔ́ biyidambi

1 Báà ŋma ń nīn tɔ́ biyidambi bin cáá mpɔn ki kpòotī kitiŋee, kun puee uyidaan ubɔ kaa bí Unimbɔti kaa kāaǹ-u. Unimbɔti di yāntì ní biyidambi kɔkɔ bí. 2 Míǹ puee, un yaa yíì biyidambee jáaǹ mara un Unimbɔti yóoǹee dee. Bin yíití biyidambee dátiń ditafadaaldi ki tòó bi-ba pu ní. 3 Di sá yii bin bin ŋáań tiŋanee kaa fàŋkí biyidambi, bin ŋáań tikpitilee di fàŋkí-bi. A yaa là biyidambi ń taa nín̄ cáá-si tifaandee, nín̄ ŋáań tiŋan, bi làá pàkà-si. 4 Bi bíi tūǹ Unimbɔti tundi ní, ki téekí-si á ŋá tiŋan. Ama a yaa ŋá digaŋgam, see á fàŋkì, kun puee an kaa sá fám ní bi cáá mpɔn ki dátí binib tafal. Bi yaa bíi dátí ubɔ tafalee, bi bíi tūǹ Unimbɔti tundi ki dàkà u-ŋuul din u cáá digaŋgam dambi puee dee. 5 Míǹ pu ní an máaǹ yii tí nīn tɔ́ biyidambi. Tí taa fàŋkì ditafadaaldi ŋmaniŋma pu, tí nīn nyímaan yii míǹ di ŋān̄.

6 An pu ní ni pà lampoobee, bí ŋmā kí tɔ̄ ditundi gbanti mbaamɔmin, kun puee bi sá Unimbɔti tɔntɔnliibi ní. 7 Pàmaan un sá kamaa kun ni máaǹ kí pà-uee: pàmaan lampoo kí tīī un an sá ní pà lampoo kí tīīyee, kí tīī bin gífí patanti bi pèe bi-nimbiliŋ, kí fàŋkì bin bin sá ní fàŋkèe, kí nīn tɔ́ bin bin sá ní nīn tɔ́ee^a.

Tí nīn néeḿmaan ti-jutiibi

8 Ní taa nín̄ jīǹ báà ubɔ nì ubɔ apɔɔn. Dipɔndi din ni cááyee di sá ní nīn néeń tɔb. Sii un néeń a-jutiibee, sii ŋá min mara lèe kɔkɔ dee. 9 Di sá yii marab bin lì yii: «Á taa ŋá tilaakpaal, á taa kpɔ̀ unil, á taa yɔ̀, á taa nín̄ cáá nnimbitaataamee» nì marab bin kíǹee kɔkɔ taapu sá marabaanti nee ní yii: «Á nīn néeń a-juti kii sii a-bee^b.» 10 A yaa néeń a-jutee, aa ŋáań-u tikpitil. A yaa néeń binibee, a bíi ŋáań min mara lēe kɔkɔ dee.

Tí bɔ́ntí kí cīití Yeesu gítintam

11 Míǹ puee, ní nīn néeḿmaan tɔb míǹ, kun puee ni nyí ŋyunti ŋun poon ti bí nee nín sá ŋuŋyee. Ŋyunti ŋun ti máaǹ kí fìntī ŋgeeminee bāań, di sá yii Yeesu gítintam sútì ki pìlīń-ti ki jítiǹ min min ti nìn péé péé ki fōō ki kííyee. 12 Kunyeeu mɔ́ ki síitì, kutaa tóob́ diwuntil. Mimmee, tí fá dibɔmbɔndi poon tuuŋŋi ní kí dū ŋwalifin janjawanti kí pèen̄. 13 Tí còom̀maan min kítèe, kii bi nín còom̄ ŋwiimpu puee, kí taa jī kí lákatí ti-ba pu, kí taa gbí ndaam, kí taa ŋá tilaakpaal, kí taa ŋá tijɔkɔndi, kí taa nín̄ jáà, kí taa nín̄ cáá tɔb pu kudɔ̀ŋu. 14 Ní dūmaan ti-Dindaan Yeesu Kriisitoo bimbim kí pèen̄ kii tijanjawanee, kí taa fàtīí tɔ̄ ni-bimbikpitim kí ŋá mì nín là puee.