Room 10

1 Nnabiyaamu, m-pɔbil poon nín là miŋyee nì tin tin m mèé Unimbɔti Isirayeel yab puee di sá bí ká difiil. 2 M ká bi-pɔ́ɔǹtam dinimbɔtinoolin, ama, bi-pɔ́ɔǹtam gbantee, baa béè ki dóò. 3 Di sá yii baa béè min ní Unimbɔti dì ki kpántí binib deedeedambi u-nimbiinee, ní ki bíi nyàab̀ bi-ba saŋŋu ŋun bi làá dī kí kpántí deedeedambee. Bi yíì, kaa sīntì bi-ba taapu Unimbɔti ń kpántí-bi deedeedambi. 4 Kriisitoo di dɔ́miń ki kúntì marab dītam. Kɔŋkɔnnee, bin kpántì deedeedambee di sá bin kɔkɔ fōō Kriisitoo ki kííyee.

Ti-Dindaan fìil̄ bin kɔkɔ fōō-u ki kííyee

5 Mooyiisi nìn ŋmàn̄ marab dītam nín cāabìń deedee uŋyee yii: «Un yaa nóó marab deedeeyee kāntí difiil bi-pu^a.» 6 Ama deedee un nyēeń fookiinee nín sá puee sɔ̀. Unimbɔti gbɔŋku sòoǹ yii: «A-pɔbil poonee, taa lì yii, ŋma di ŋūǹ kí jɔ̄m̀ yilpu?» (Taapu sá yii bí jɔ̄m̀ kí cáań Kriisitoo), 7 kí taa tí lì yii: «Ŋma di ŋūǹ kí sìntī taapu ditaŋkpiilin?» (Taapu sá yii bí nyāntiń Kriisitoo ditaŋkpiilin.) 8 Mimmee, tí lì yii ba? Unimbɔti gbɔŋku lī yii: «Dinyɔɔbundi gbanti bí ki kɔ́ĺ-si, ki bí a-nyɔkɔn nì a-pɔbilin^b.» Dinyɔɔbundi gbanti di sá fookii bɔti tin ti sòoǹee, yii. 9 A yaa lī binib cee yii Yeesu sá a-Dindaan ki yaa fōō ki kíí a-pɔbilin yii Unimbɔti fīkitì-u ditaŋkpiilinee, a làá ká difiil. 10 Di sá yii un kamaa yaa fōō Yeesu ki kíí u-pɔbil poonee kpántí deedeedaan u-nimbiin, ní un yaa lī u-nyɔkɔn yii u fōō-u ki kííyee, udaan kāntí difiil, 11 kii Unimbɔti gbɔŋku poon nín lī puee yii: «Un kamaa yaa fōō ti-Dindaan ki kííyee, icoo kaa jīǹ udaan^c.» 12 Mimmee, digàntil kaa bí un sá Juuda yɔuee nì un kaa sá Juuda yɔuee kansikin. Bi-kɔkɔ Dindaan sá ubaanti ní. Úǹ ŋáań bin kɔkɔ yíì u-yindi ú fīī-bee tiŋan tikpil, 13 kii an nín ŋmàn̄ puee yii: «Un kamaa yaa yíiń ti-Dindaan yindee kāntí difiil^d.»

14 Ama, bi yaa kaa fōō-u ki kíí, bi làá ŋá mana kí yíiń-u? Bi yaa kaa gbìl̄ u-pu, mana ní bi làá fōō-u kí kíí? Ubɔ yaa kaa bíi sòoǹ u-pu, mana ní bi làá gbìl̄? 15 Unimbɔti yaa kaa túnní binib, mana ní bi làá sòoǹ-tì? Kii an nín ŋmàn̄ puee yii: «Bin sòoǹ Tibɔmɔntiilee nín dòoń bi-taaŋi ŋānní puee^e.» 16 Ama bi-kɔkɔ kaa fōō tibɔmɔntiilee ki kíí, kii Yeesaya nín lī puee yii: «Ti-Dindaan, an kaa sá binib fiii di fōō ti-bɔti ki kííii^f?» 17 Mimmee bi gbìl̀ ní ki nín fōō ki kíí, ní tin bi gbìl̄ ki fōō ki kííyee sá Kriisitoo bɔti.

18 Míǹ puee, Isirayeel yab kaa gbìl̄ tibɔmɔntiilee naaa? Bi gbìl̄-tì. An nóó nì min an ŋmàn̄ee dee, yii:

«Kitiŋ kɔkɔ gbìl̄ bi-neeŋyi pu,

ní tibɔti tin bi sòoǹee bàn̄ kitiŋgbeennyɔkɔ.»

19 Mimmee, Isirayeel yab kaa gbìl̄ tibɔtee taapu naaa? Dooooyee ní Mooyiisi nìn pée sòon̄ bi-pu yii:

«Man Unimbɔti làá yàntī

binib bin kaa bí tibanee ń nīn jīǹ mmɔn,

ní án nīn wù nimbi,

kí yàntī ní fōō diŋuul binib

bin kaa nyí iciinee pu.»

20 Ní Yeesaya mun sòon̄ ki cántì yii:

«Bin bin kaa nìn nyàab̀ man Unimbɔtee ká-mi,

ní m cáá m-ba ki dàkā bin kaa bàlifī m-puee.»

21 Ama tin u sòon̄ Isirayeel yab puee sèé:

«M tāntì m-ŋalii kutaafaau áli kujoou

ki yíìń bin kaa tɔ́-mi, bi-yiliŋ pɔ̄ɔ̄yee^g.»