Room 9

Unimbɔti nì dinibul din u lēēyee

1 M sòoǹ ibaamɔn kii Kriisitoo yɔu nín máaǹ kí sòoǹ puee ní. Maa mɔ́ntí, Circir Fam mun sòoǹ m-pɔbil poon yii an sá tiŋman, 2 yii m-pɔbil poon gbí kunimbaakpaaŋŋu ní m yáliŋkí baabadal. 3 M yaan ŋūǹ Unimbɔti ń ŋá-mi fám, man nì Kriisitoo ń yàkatī tɔbin, m-nabiyaamu man nì bin pēē mmaalee ń ŋmā kí ká difiilee, m bàà là. 4 M-nabiyaamu gbanti di sá Isirayeel yab bin Unimbɔti lútì bí nīn sá u-biyaamuee. U nì u-walifiŋu nìn kóò bi-kansikin, ní u nì bi ŋá mpèé. U tīī-bi marab ki dàkā-bi min ní bi làá nīn jáaḿ-uee, ki pōoǹ-bi ipoon^a. 5 Bi-naanjab sá Jaakɔb jipɔmbi saalaa nì bilee ní. A yaa kpēē tinitanee, Kriisitoo mun sá bi-maaliŋu poon, Kriisitoo un di tɔ́kɔ́ tikɔkɔ nì tikɔkɔ pu ki sá Unimbɔti un máaǹ inyɔŋki baabadal kí nīn pée cá jaanjaanee! Ameeni.

6 Isirayeel yab nín kaa fōō Yeesu ki kííyee, an kaa dàkà yii Unimbɔti poondi ŋá fám. Di sá yii an kaa sá bin kɔkɔ nyánní Isirayeel maaliŋunee^b di sá Isirayeel yab páaa. 7 Bin kɔkɔwoooo nyánní Abraam maaliŋunee kaa sá u-biyaamu páaa, kii Unimbɔti nín nìn sòon̄ nì Abraam puee yii: «See Isaaki naantiibi baba di làá fōō a-yindi^c.» 8 An dàkà yii an kaa sá mmaal ŋun ti nyí nee^d di màal̀ Unimbɔti biyaamu. Abraam naantiibi bin Unimbɔti nìn pōoǹ ki tīīyee baba di sá bimɔntiibi, 9 kii Unimbɔti nín nìn pōoǹ-u puee yii: «Ŋyunti ŋun m yóoǹee yaa bāańee, m làá dāan̄, ní a-nimpuu Saara ń màal̀ kibininjabiki^e.»

10 Tiba mun gíti sɔ̀: Reebeeka mun bɔti bí. U màl̄ ti-naanja Isaaki mbininjabiyaamu muli ní. 11-12 Kí wàatī ú màal̀ mbiyaamu gbantee, muaa láá nyáń ki ŋá tiŋanaaa, kaa láá ŋá ikpiti, ní Unimbɔti tùkū Reebeeka yii: «Ukpil di làá dāá nīn bí kiwaai taapu,» án ŋmā kí nóó nì Unimbɔti nín lēē ki síiǹ u-ban puee. Míǹ ní u yíì binib, kaa kpèé bi-tūntɔtam pu^f, 13 kii an nín ŋmàn̄ puee, yii:

«M néeń Jaakɔb, ní kaa là Eesayuu^g.»

14 Ti yaa kpēē an bɔtee, ti làá lì yii Unimbɔti kaa sá ibaamɔndaanaaa? Aayee, kpataaa! 15 Di sá u nìn tùkū Mooyiisi yii: «Un saai m yaa là kí sɔ̄ee, úǹ saai ní m sūǹ, ní un m yaa là kí ŋá tiŋanee, úǹ ní m ŋáań tiŋan^h.» 16 Mimmee, an kaa nyēeń unil nín là pueeyaaa, kaa nyēeń u-pɔ́ɔǹtam pu, Unimbɔti di sūǹ unil saai kí fīī udaan. 17 Unimbɔti gbɔŋku poonee, ti kāntí yii Unimbɔti tùkū Eejipiti bɔtiu yii: «Kun pu m baasii kāaǹ-si dibeelee di sá ḿ dī a-pu kí dàkà m-pɔŋŋu kí yàntī ntimu nib kɔkɔ ń béé m-yindiⁱ.» 18 An dàkà yii Unimbɔti yaa là kí fīī binibaaa, u yaa tí là kí nyìŋfì bi-pɔbiliŋaaa, an bí úǹ cee ní.

Unimbɔti ŋuul nì u-saasɔl

19 An yaa yíì, ubɔ ŋūǹ kí bàlifì-mi yii: «Kin mimmee, ba pu ní Unimbɔti gíti wòoǹ nnibiyaamu? Di sá ubɔ kaa yíití min Unimbɔti lèe.» 20 M làá kíí udaan yii: «Unil, a sá ŋma ní ki kpākantí Unimbɔti? Tiwan tin bi máńee kaa ŋūǹ kí tùkù un máń-tèe yii: <Ba pu ní a máń-mi yéè^j?>» 21 Uyɔɔmaati ŋūǹ kí dū kuyɔkɔu kí mā kun kun u yaa lèe: u ŋūǹ kí dū-ku kí mā dibɔmɔntiil, ki tí ŋūǹ kí dūú mā kinyinsaŋ^k.

22 Kin Unimbɔti fáà? U cáá nsan kí gíí diŋuul kí dàkà binib u-pɔŋŋu. U jíń kimɔtii tikpil bin bàà máaǹ ditafadaaldi ki ŋmāntì ú kúntí-bee pu, 23 ní ki kpáàa là kí dàkà u-nyooti nín wīikí pu tikpil tikpil ki tīī bin u fīī ki bɔ́ntì ki yóoǹ bí kɔ́ u-nyootinee. 24 Timbi bin u lútì ki yíiń Juuda yab nì bin kaa sá Juuda yabee kansikinee kɔkɔee, ti mun kútì poon. 25 Míǹ ní u lī Ooseeya gbɔŋku poon yii:

«Bin kaa nìn sá m-nibulee

làá dāá nīn kíǹ ki sá m-nibul,

ní ditimbundi din maa nìn néeńee,

m làá nīn kíǹ ki néeń-dì tikpil.

26 Ní laakin bi nìn tùkū-bi yii: <Naa sá man nibulee>,

niin ní bi làá yíiń-bi yii Unimbɔti un bí dimaŋfalinee jipɔmbi^l.»

27 Unimbɔti bɔnaatiliu Yeesaya mun báakì ki sòon̄ Isirayeel yab bɔti yii: «Báà Isirayeel naantiibi yaa wīikí kii dibul din bí tiŋku gbandee, bi-kansikin binib fiii di làá kíń kí ŋmátí. 28 Di sá yii ti-Dindaan làá ŋá tin tin kɔkɔ u sòon̄ ki síiǹ yii u làá ŋá kitiŋ puee malaa^m.» 29 Yeesaya gbanti di nìn gíti sòon̄ tibɔti nee ki yóoǹ dooooyee, yii:

«Ti-Dindaan Mpɔŋkɔdaan yaa kaa bàà kíǹ

ti-maaliŋu poon binib bibee,

ti bàà kpántì kii Soodoom tiŋkee ní,

ki bàà kíǹ ki náań nì Goomoora tiŋkeeⁿ.»

Isirayeel nì fookii un tìì difiilee

30 Tibɔti tin ti sòon̄ee, ti làá kúntí-tì yii ba? Bin kaa sá Juuda yab, kaa nìn nyàab̀ kí nīn bí deedeeyee di kpántì deedeedambi Unimbɔti nimbiin, kun puee bi fōō-u ki kíí. 31 Juuda yab bin nìn nyàab̀ kí nóó marab kí ŋmā kí kpántí deedeedambee kaa ŋúń ki ŋúb́ marab gbanti. 32 Ba yì-tì? Kun puee bi dàkafī yii bi-tuuŋŋi pu ní bi ŋūǹ kí nīn bí deedee, kaa nyàab̀ kí fōō Unimbɔti kí kíí kí nīn bí deedee. Bi gbéetì ditaŋkpal 33 din pu Unimbɔti gbɔŋku nìn ŋmàn̄ee yii:

«Kpèè, m bíl̀ ditaŋkpagbéetikaal Siiyɔn,

ditaŋkpal din líikí binibee.

Un yaa fōō-dì ki kííyee, icoo kaa làá jī udaan^o.»