Room 8

Unimbɔti Fam tīī-ti dimaŋfal

1 Kɔŋkɔnnee, bin nì Yeesu Kriisitoo ŋá ubaantee, dibɔkpil diba kaa ti dɔ̄ ki cí-bi. 2 Di sá yii Circir Fam min tīī-ti dimaŋfal Yeesu Kriisitoo puee marau nyántì-ti ikpiti nì ŋkúm marau ŋaan. 3 Di sá yii Mooyiisi marab kaa nìn ŋúń ki ŋá míǹ, kun puee binib bí iwɔfin, kaa ŋūǹ kí nóó marabee. Ama ní Unimbɔti dū úǹ u-ba Jipɔɔn ki túnní, u dɔ́miń ki cáá tiwumbaantiil kii timbi bikpitibee, ki ŋúń ki lēē ikpiti. Unimbɔti ŋá míǹ ki kúntì mpɔn ŋun ikpiti cáá binib puee. 4 Mimmee, timbi bin kaa nóó mbimbikpitim ama ní ki nóó Circir Fam nín kpòotī-ti puee, ti kpántí deedeedambi kii marab nín là puee dee. 5 Bin bin nóó mbimbikpitimee nyàab̀ kí nīn ŋáań tin fáatì-bee ní, ní bin nóó Circir Famee mun nyàab̀ kí nīn ŋáań tin Circir Fam lèe. 6 Mbimbikpitim nín là tiwan tiŋyee di cāabìń ŋkúm. Circir Fam nín là kun kuŋyee di cāabìń mmaŋfafɔkɔn nì ŋgbansɔŋfi. 7 Bin nóó bi-bimbikpitim nín là puee sá Unimbɔti nannanliibi ní. Baa sìntīǹ bi-ba ki tìì Unimbɔti marab, kaa pée ŋūǹ gba. 8 Bin nóó bi-bimbikpitim nín là puee kaa ŋūǹ kí fáatíǹ Unimbɔti.

9 Ama nimbee, nimbi kaa nóó ni-bimbikpitim nín là puee. Min min Unimbɔti Fam lèe, míǹ ní ni nóó, kun puee u-Fam kóò ni-ni. Un yaa kaa cáá Kriisitoo Famee, kaa sá u-yɔu. 10 Kriisitoo yaa bí a-ni, nì min kɔkɔ ikpiti puee a-wunti làá kpúee, Circir Fam làá tīī-si dimaŋfal, kun puee a bí deedee. 11 Unimbɔti un fīkitì Yeesu Kriisitoo ditaŋkpiilinee Fam yaa kóò a-nee, Unimbɔti gbanti un fīkitì Kriisitoo ditaŋkpiilinee làá dāá yàntī u-Fam min kóò a-nee ń tīī a-wunti tin kúùyee dimaŋfal.

12 Mimmee, m-nabiyaamu, taa ti cáá ti-bimbikpitim dipɔndi diba, kí nīn ŋáań mì nín là puee. 13 Ni yaa gbíntì ki ŋáań min ni-bimbikpitim lèe, ni kúù ní. Ama Circir Fam pɔŋŋu puee, ni yaa kūū tin ni-bimbikpitim là ní ŋée, ni kāntí dimaŋfal. 14 Di sá yii bin kɔkɔwoooo Unimbɔti Fam kpòotēe sá Unimbɔti biyaamu ní. 15 Mimmee, naa ti máaǹ kí nīn gbíntìi fàŋkí kii iyumbuee, kun puee ni fōō Unimbɔti Fam min yāntì Unimbɔti fōō-ti ti yíì-u yii ti-Baayee, 16 ní Circir Fam mi-ba tùkù ti-pɔbiliŋ poon yii ti sá Unimbɔti biyaamu. 17 Ti nín sá u-biyaamu puee, ti fòol̄ u-gaajawanti. Ti nì Kriisitoo di dāa fòol̄-tì. Ti yaa kpáfì ki jīǹ falaayee, boonee ti nì u di dāa tí fòol̄ tinyool^a.

Tinyool tin bí ki dòońee

18 M nyí yii falaa un ti bíi jīǹ ti-yuntiŋu nee kaa wīikí ki bàn̄ Unimbɔti nyooti tin u làá dāá tīī-tee. 19 Unimbɔti nín náań tiwan tin kɔkɔee jìkì ki cí ŋwiin ŋun Unimbɔti làá dāá tīī u-biyaamu tinyool báà ŋma ń kée. 20 Unimbɔti wannaaŋkaati gbanti kɔkɔ ŋá fám. Kaa sá yii tì là, Unimbɔti di yāntì an ŋá míǹ. Nì min kɔkɔ tì kpántì fámee, tì máká yii 21 tì làá dāá nyā ntimbiil gbanti yuŋkun kí kpāfì nì Unimbɔti biyaamu kí tɔ̄ ti-ba ní kí fōō tinyool. 22 Ti nyí yii Unimbɔti wannaaŋkaati gbanti kɔkɔ bí falaa ni áli ki dāa sāā díǹ kii upɔdaan nín yáliŋkí imatiŋween puee. 23 Ama an kaa sá tiwannáaŋkaal gbanti baba, ki kpáaǹ timbi bin Unimbɔti tìì u-Fam min yāntì ti dáká tin bí ki dòońee. Ti mun bí ki yáliŋkíǹ ti-ba ki cí ŋyunti ŋun ti làá kpántí Unimbɔti biyaamu mbaamɔminee, an dàkà yii ŋyunti ŋun u làá dāá fīī ti-wunti mun kí lííyee^b. 24 Mimmee, ti ká difiil, ama ní an dáá nín bí dimákalin. A yaa ká kun a mákée, an kaa ti sá dimákal, kun puee tiwan tin a fōōyee, a gíti ŋūǹ kí nīn máká ti-puɔɔɔ? 25 Ti yaa máká tin taa láá kée puee, see tí jī kimɔtii kí nīn kpèé nsan pú.

26 Míǹ mbaantiim ní Circir Fam bí ki tútúǹ-ti ti-wɔfii poon, kun puee taa nyí min máaǹ tí mèèyee, ama Ŋfamee mi-ba yáliŋkí ki jítiǹ anyɔɔbun nín ŋūǹ kí sòoǹ tibɔti tiŋyee ki mèé Unimbɔti ti-pu. 27 Ní Unimbɔti un wāĺ binib pɔbiliŋ poonee béetí kun Ŋfam lèe, di sá yii kun mì mèéyee nóó nì kun Unimbɔti là kí tīī u-yabee ní.

28 Ní ti nyí yii tin kɔkɔ pée bàń bin néeń Unimbɔtee, Unimbɔti cáa kpántí tiŋan ní ki tìì-bi. Bíǹ ní u bɔ́ntì ki lēē ki síiǹ yii bí nīn sá u-yab. 29 Bin u gāntì dooooyee ní u lēē ki yóoǹ bí kpántí kii u-Jipɔɔn nín bí puee, án nín làá ŋá pu u-Jipɔɔnee ń nīn sá ukpil u-nabiyaamu mun sá kunipaauee kansikinee. 30 Bin u lēē dooooyee ki yóoǹee, u yíiń-bi. Bin u yíińee, ní u yāntì bi kpántì deedeedambi Unimbɔti nimbiin, ní bin u yāntì bi kpántì deedeedambee, u kɔ́ǹ-bi u-nyootin.

Unimbɔti neendi wīikí

31 Ti làá gíti lì tibɔti nee pu yii ba dee? Unimbɔti yaa yú ti-boonee, ŋma di gíti ŋūǹ kí ŋá-ti tiba? 32 Timbi pu ní Unimbɔti kaa tāaǹ úǹ u-ba Jipɔɔn ki dū-u ki ŋá saraa, mana ní u ŋūǹ kí yíí kí taa tīī-ti tikɔkɔ kí kūtì u-Jipɔɔnee pu? 33 Unimbɔti bí yii bin u lútèe sá deedeedambi, kin, ŋma di gíti ŋūǹ kí ká tikpitil tiba bi-pu kí sòoǹ? 34 Yeesu Kriisitoo un kpíì ki kpáàa fīkitì mun ki kā Unimbɔti ŋaŋgiil púee bí ki mèé ki tìì-ti. Kin ŋma di gíti ŋūǹ kí kpɔ̀ ti-bɔti? 35 Dineendi din Kriisitoo cáá ti-puee, tiba ŋūǹ kí yàkatī ti-kansikinaaa? Falaa di ŋūǹ kí yàkatī-taaa, dinimbinaamandaaa, disàandaaa, ŋkùmaaa, disoolaaa, mbusuaaa, ŋkúm? 36 Kii Unimbɔti gbɔŋku poon nín lī puee yii:

«Sii ti-Dindaan pu ní, kí yòon̄ kutaafaau kí dāá mɔ́-kuee,

ti tūŋkí ŋkúm,

ní bi ŋáań-ti kii ipii in bi cáǹ kí kpɔ̀ee^c.»

37 Tíǹ kɔkɔ poonee, un néeń-tee tútúǹ-ti ti jáà ki jīǹ ki kúntí tikɔkɔ. 38 M nyí ibaamɔn poon yii tiba kaa ŋūǹ kí yàkatī dineendi din bí timbi nì ti-Dindaan kansikinee: ŋkúmaaa, dimaŋfalaaa, Unimbɔti tuuŋyaaa, an yaa tí sá abeedambi bin baa wāĺeeyaaa, tin tin poon ti bí kɔŋkɔnneeyaaa, tin bí ki dòońeeyaaa, mpɔndambaaa, 39 an yaa sá tin bí yilpuee nì tin bí taapueeyaaa, an yaa tí sá tiwannáaŋkaal tin kɔkɔ kíǹeeyaaa, báà tiba nì tiba kaa ŋūǹ kí yàkatī timbi nì dineendi din Unimbɔti dī ti-Dindaan Yeesu Kriisitoo pu ki dàkā-tee.