Atuun 28

Pɔɔl bí Maalti

1 Ti ŋmátì ki dóòyee, ní ki nín béè yii bi yíì kitiŋ gbanti Maalti. 2 Binib bin nìn kóò niinee baasii ŋúb́-ti mmɔntiimin. Utaa nìn kíĺ ki kíǹ ki nì, ní tiwool bí. Míǹ puee bi nìn kpāā ŋŋmi ní ki yíiń-ti ní ti-kɔkɔ dɔ́miń ki kāl̀ ki māntìi tú ŋŋmee ki wùl̀. 3 Ní Pɔɔl cūtìi báań tikpaŋkpaal dibɔ́ndi diba, ukoowaati kā niin, ki cáań ki tɔ́ ŋŋmin. Niinee ní ŋŋmifaam píĺ ukoowaatee, ní u nyáń ki jú u-ŋal ki báaǹ. 4 Binibee nín ká yii ukoobu lúń Pɔɔl ŋal puee, ní bi bíi lì tɔb cee yii: «Uninja nee máaǹ ki làá nīn sá unikpɔl ní. Di sá yii, min kɔkɔwoooo u ŋmátì ki nyáń tiŋkunee, ti-waal deedeedaan kaa pú-u mpaan ú tɔ̄ u-ba.» 5 Niinee ní Pɔɔl gbéeǹ ukoobuee ki fíiǹ ki tɔ́ ŋŋmin, kaa gbìl̄ tiba. 6 Ní bi kíǹ ki kā ki kpèé yii an làá díkáaa, u làá lítí kí kpú niin niin. Ama bi kāl̀ ki cíitìi kpēē ki gīī, tiba kaa ŋá-uee, ní bi kpántì bi-landɔkɔi, ki kíǹ ki bíi cáá yii an sá diwaal diba ní.

7 Niin caŋin ní kitiŋ gbanti bɔtiu un bi yíì Pubiliyusee saaku nìn bí. Kijapaayee nìn fōō-ti mmɔntiimin, ti dōoǹ u-dumpu iwiin ita. 8 Pubiliyusi baa nìn dɔ̄ u-wunti píĺ kpaŋkpam ki cɔ̀tī. Ní Pɔɔl cūtìi māntì u-pu, ní ki mēē ki tīī-u, ní ki dū u-ŋalii ki páaǹ u-pu, ní u pɔ́ɔkì. 9 Niinee ní bibunliibi bin bí niinee kɔkɔ dɔ́miń ki ká dicáaǹdi. 10 Binibee nìn ŋá-ti tiŋan tikpil, ní daliŋkin ti làá yīkèe, bi nìn tīī-ti tin kɔkɔ ti lèe.

Pɔɔl bàn̄ Room

11 Iŋmal ita boonee ní ti kɔ́ meela un nìn yúl̀ kitiŋ gbantin kuseeu jítèe. U nìn nyánní Aleekisandirii, bi kpítì awaa ali ki nántiǹ atab ki nákáǹ u-pu. 12 Ti bàn̄ Sirakuusi tiŋkinee, ní ki kāl̀ niin iwiin ita. 13 Niinee, ti yíkì ki kpàkaǹ ditiŋkugbandee, ní ki tin dūu bàn̄ Reejiyoo. Kutaa wúntèe, ní kubuŋu nyánní ti-boon pú ki kíĺ ki bíi jītí, ní ti dū iwiin ili ki dūu bàn̄ Pusɔl. 14 Kitiŋ gbantin ní ti nìn ká nnabiyaamu mubɔ, ní bi bí yii tí kàl̄ bi-cee kinyɔŋ kiba. Ti nín cōom̀ pu ki dāa bàn̄ Roomee dee. 15 Nnabiyaamu mun bí Roomee nín gbìl̄ ti-puee, ní bi yíkìi dɔ́miń áli Apiyusi nyɔŋkin nì kitimbilii kin bi yíì Inicaŋkɔŋkoon itee, ^a ki túŋkì-ti. Pɔɔl nín pée ká-bee, ní u bíi nyɔ́ŋkí Unimbɔti ní ki ká kunyannyaau. 16 Ti nín bàn̄ Roomee, ní bi pú Pɔɔl nsan ú nīn kóò u-baba sooja ń nīn cí-u.

Pɔɔl sòon̄ Unimbɔti bɔti Room tiŋkin

17 Iwiin ita boonee, ní Pɔɔl yíiń Juuda yab kpilib bin nìn kóò Roomee bí kpāfì u-cee. Bi dɔ́miń ki kpáfèe, ní u bí-bi yii: «M-nabiyaamu, maa kpáàa ŋá ti-samaau tiba, kaa yīntiǹ ti-naanjab koobiliŋ mun. Ama bi cúú-mi Jeerusaleem, ki dū-mi ki tīī Room yab. 18 Ní bíǹ bālifì-mi anyɔɔbun, ní ki bàà là kí gíiǹ-mi kí líí, kun puee baa ká kun di yì-tì ní bi máaǹ kí kpɔ̀-mee. 19 Ama Juuda yab kaa nìn kíí, yii bí taa líí-mi. An di yì-tì ní m nìn bí yii gɔminakpaan ń sòoǹ m-bɔti. Nì míǹ kɔkɔee, maa làá bīil̀ m-yab. 20 Kun pu ní m là kí ká-ni kí sòoǹ nì nee dee. Di sá yii dipoondi din pu Isirayeel yab kā ki mákée pu ní ikusaka kā m-ŋaan nee.» 21 Ní bi kíí Pɔɔl yii: «Juudee yab kaa ŋmàn̄ní-ti kugbɔŋu kubɔ ki sòon̄ a-bɔti pu tiba. Ti-nabiki kiba mun kaa tí nyánní niin ki dɔ́miń ki máafì-ti a-bɔti tiba. Ubɔ mun kaa tí tùkū-ti yii a ŋá tikpitil tiba. 22 Míǹ puee, ti bàà là kí béé tin tin a cááyee, kun puee ti nyí yii báà laakiŋyee, binib tikpil kaa là nnimbɔtisan ŋun a nóó nee.»

23 Ní bi fātìi yóoǹ-u ŋwiin, ní binib tikpil dāa dɔ́miń ŋwiin gbanti. Pɔɔl nìn kíĺ kutaafaau ki cáa sāā kujoou ki cáá Mooyiisi marab nì Unimbɔti bɔnaatiliibi gbɔnti ki sòoǹ nì bi Unimbɔti Beel bɔti taapu, ki nyàab̀ bí ŋmā kí fōō Yeesu kí kíí. 24 U nín nìn sòon̄ puee, biba nìn gbìl̄ ki fōō ki kíí, ama biba mun nìn yíì, kaa fōō ki kíí. 25 Kunikpɔŋkpɔkɔu nìn kɔ́ bi-kansikin. Bi làá nīn cée, ní Pɔɔl lī-bi dinyɔɔbundi nee yii: «Tiŋman, an sá ibaamɔn ní Unimbɔti Fam dī u-bɔnaatiliu Yeesaya pu dooooyee ki sòon̄ nì ni-naanjab, yii:

26 <Cù binib nee cee kí tùkù-bi yii:

Ni làá dāá gbìl̄ nì ni-tafaliŋ ní kaa nyí taapu,

ki làá dāá nīn kpèé nì ni-nimbiliŋ ní kaa wāĺ.

27 Di sá yii binib gbanti pɔbiliŋ gbìfì,

bi kpáá bi-tafaliŋ

ki ŋúb́ bi-nimbiliŋ.

Baa là kí nīn wāĺ,

kaa là kí nīn gbìl̀,

kaa là bi-landɔkɔi mun ń béé taapu,

bí bàà gítiń m-cee ḿ cáaǹ-bi^b!>»

28 Ní Pɔɔl gíti kútì-bi yii: «Ní nīn nyímaan yii Unimbɔti tú u-fiil nyɔɔbundi nee bin kaa sá Juuda yabee cee^c! Bíǹ làá fōō-dì.»

[ 29 Pɔɔl lī an nyɔɔbuŋŋee ki dóòyee ní Juuda yab búntì ki còom̄ ki kpákà bi-ŋmaniŋma tikpil^d.]

30 Pɔɔl nìn kāl̀ abin ali amɔn kudii kun u fōō ki pà ki kóòyee poon, ki nìn fòol̄ bin kɔkɔ dòoń u-ceeyee. 31 U nìn sòoǹ Unimbɔti Beel pu, ki dàkà ti-Dindaan Yeesu Kriisitoo bɔti nì tininjati, ubɔ kaa páb́-u.