Room 1

Kugbɔŋu kun Pɔɔl ŋmàn̄ ki tīī

Room

yabee

Pɔɔl jáaḿ Room yab

1 Man Pɔɔl un sá Yeesu Kriisitoo tɔntɔnliu, Unimbɔti yíiń-mi ki gāntì ḿ nīn sá Yeesu kpambal kí sòoǹ u-bɔmɔntiitee di jáaḿ-ni.

2 Dooooyee ní Unimbɔti nìn dī u-bɔnaatiliibi pu ki pōoǹ-ti u-bɔmɔntiiti gbanti ki ŋá u-gbɔŋku poon ki síiǹ^a. 3 U-Jipɔɔn, ti-Dindaan Yeesu Kriisitoo pu ní tibɔtee sòoǹ. Ti yaa làá kpèè tinitanee, u nyánní ubɔti Daafiidi maaliŋu poon ní. 4 Ti yaa làá tí kpèè u-Fam min sá circiree jandi púee, Unimbɔti nín fīkitì-u ditaŋkpiilinee, u dàkā nì mpɔn yii u sá u-Jipɔɔn^b. 5 U-pu ní m ká diyimɔɔl kí nīn sá u-kpambal kí tīī Kriisitoo tinyool, án nín làá ŋá pu atimbun kɔkɔ nib ń fōō-u kí kíí kí nīn tɔ́-uee. 6 Nimbi Room yab bin Unimbɔti yíiń ní nīn kíǹ ki sá Yeesu Kriisitoo yabee mun kútì poon.

7 Nimbi ní m ŋmàn̄ kugbɔŋu nee, nimbi bin kɔkɔ Unimbɔti néeń ki yíiń ní nīn sá u-yabee. Ti-Baa Unimbɔti nì ti-Dindaan Yeesu Kriisitoo ń ŋá-ni tiŋan kí tīī-ni ŋgbansɔŋfi!

Pɔɔl là kí cùú màntì Kriisitoo yab bin bí Roomee pu

8 Mpeekaaminee, m dī Yeesu Kriisitoo pu ki jáaḿ m-Nimbɔtiu ni-kɔkɔ pu, kun puee bi sòoǹ ni nín fōō Unimbɔti bɔti ki kíí puee ilaan kɔkɔ. 9 M téetí ni-pu múlmul m-wimmeem poon. Unimbɔti un m nóó nì m-pɔbil kɔkɔ ki sòoǹ u-Jipɔɔn bɔmɔntiitee nyí yii tin m lèe sá ibaamɔn. 10 Baabadal m-wimmeem poonee, m bàlifī Unimbɔti yii an yaa sá u-lammi, ú pɔ̄-mi nsan ŋyunti nee ḿ dāan̄ kí màntì ni-pu. 11 Di sá yii m-nimbiliŋ máǹ ḿ dāan̄ ni-cee kí cáań-ni Circir Fam pɔ̄kaati tiba tin ŋūǹ kí kūtì-ni mpɔnee. 12 M nín làá lì puee di sá tí ŋmā kí dū ti-fookiiu un ti-kɔkɔ cáá Unimbɔti puee kí tīī tɔb kunyannyaau.

13 Nnabiyaamu, m là ní béé yii m mākafì miŋa nì miŋa kí bàà dāan̄ ni-cee, ama nìn díǹ maa ká nsan. M bàà là yii m-tundi ń lòoǹ abil ni-cee kii dì nín lòon̄ atimbun ŋin kíǹee cee puee^c. 14 An sá-mi dipɔndi ní ḿ sòoǹ Yeesu bɔti kí tùkù báà ŋma, bin nimbiliŋ ŋúbitèe nì bin nimbiliŋ kaa ŋúbitèe, bin nyí iciinee nì bin kaa nyí tibee. 15 Míǹ pu ní m-nimbiliŋ máǹ ḿ dāan̄ kí sòoǹ Tibɔmɔntiil gbanti kí tùkù nimbi bin bí Roomee mun.

Mpɔn ŋun bí Unimbɔti Bɔmɔntiitinee

16 An kaa cáá-mi icoo ḿ sòoǹ Tibɔmɔntiil gbanti, kun puee tì sá Unimbɔti pɔŋŋu ki fìil̄ bin fòol̄-tì ki kíikée. Mpeepeekaamee, Juuda yab, ní boonee ki dāa nín kpáaǹ bin kaa sá Juuda yabee mun. 17 Tibɔtee dàkà-ti nsan ŋun Unimbɔti dì ki kpántí unil deedeedaan u-nimbiinee: an sá unil ń fōō kí kíí ní. An kífí nì fookii ní kí tin kúntí nì fookii, kii an nín ŋmàn̄ Unimbɔti gbɔŋku poon puee yii: «Deedeedaan kāntí dimaŋfal u-fookiiu pu ní^d.»

Binib nín ŋáań ikpiti puee

18 Di sá yii doooo yilpu ní Unimbɔti dàkà u-ŋuul nnibiyaamu bimbikpitim pu. Baa tɔ́ úǹ Unimbɔti ní ki ŋáań ikpiti. Bi-tuŋkpitiŋ kaa yàntī ibaamɔn ń tɔ̄ i-tundi bi-ni. 19 Kun pu ní Unimbɔti làá dáaĺ bi-tafalee di sá bi wál̀ kun unil ŋūǹ kí ká kí béé Unimbɔtee. An sá Unimbɔti di nyántì ki dàkā-bi. 20 Di sá yii doooo Unimbɔti nín náań yilpu nì taapuee, atuun ŋin u túńee ŋūǹ kí yàntī unil ń béé u-ban Unimbɔti bimbim min baa wāĺee, an dàkà yii u-pɔŋŋu ŋun kaa kúntée nì u-nimbɔtiiti. Mimmee unil kaa ŋūǹ kí ká nnaakpal yii waa nyí-u. 21 Bi nyí Unimbɔti, ní kaa pàkà-u, kaa jáaḿ-u u-ŋanti pu min máaǹ bí jāam̀-uee. Bi fá-u, ki nóó bi-landɔkɔi in kaa bí deedeeyee, ki kpántì bigbaambi, ní bi-pɔbiliŋ kɔ́ dibɔmbɔndin. 22 Bi bí ki gà bi-biŋŋi yii bi cáá iciin, kaa nyí yii bi wáatì ní. 23 An nín bàà sá bí nyɔ̄ŋkì Unimbɔti tinyooldaan un kaa kúùyee puee, ní bi nyɔ́ŋkí tiwan tin bi kpítì ki nántiǹ unil un kúùyee nì inoon nì tiwaŋkuti nì tin fù kitiŋee mun^e.

24 Kii bi-pɔbiliŋ poon bi nín lēē kí nīn ŋáań tijɔkɔndee puee, Unimbɔti dū-bi ki líiǹ tijɔkɔndi, bí nīn bíiĺ bi-ba. 25 Bi dū Unimbɔti bɔti tin sá ibaamɔnee ki fá, ki yōoǹ inyimɔn, ní ki nóó ki tòotī tiwan tin Unimbɔti náańee, ní ki fá unáanli u-ba, úǹ un máaǹ bí nīn nyɔ́ŋkí-u baabadal kí nīn cée! Ameeni.

26 Míǹ pu ní Unimbɔti dū-bi ki líiǹ kukpeeu kun kɔ̄ntí-bi icooyee. Di sá yii an nín bàà sá binimpoobi ń mɔ̄ǹ bininjabee, ní bi fàtīi cáa mɔ́ń bi-nimpujutiibi. 27 Míǹ mbaantiim, bininjab kaa ti là binimpoobi, ní ki kíǹ ki là tɔb ŋmaniŋma tikpil ki dɔ̀ nì tɔb. Bi-tuuŋŋi gbanti cáań ditafadaaldi din sá bi-paati tin máaǹ-bee ki tɔ́ bi-pu.

28 Kii bi-landɔkɔi nín sá yii Unimbɔti kaa máaǹ bí béé-uee puee, Unimbɔti dū-bi ki líì, ní bi-landɔkɔi gátì, ní bi kíǹ ki ŋáań min kaa máaǹ bí ŋée. 29 Bi kpántì binikpitib mbaamɔm, ki ŋáań min kaa ŋān̄ee, ki cáá nnimbitaataam nì ntoom, ki cáá kináŋ nì nnikpaakoon tikpil, ki néeń kujaau, ki ŋmàtíǹ tɔb, ki kíiĺ tɔb, ki sòoǹ ki bíiĺ tɔb, 30 ki sìí tɔb. Bi sá Unimbɔti nannanliibi, ki kpèé ki sɔ́kɔ̀ binib, ki yòontí bi-ba yilpu, ki dàkà bi-ba, ki nāantí isampɔɔn in pu bi dì ki ŋáań ikpitee, ní kaa tɔ́ bi-nab nì bi-baabi. 31 Baa cáá iciin. Bi yaa pōoǹee, baa ŋáań tin bi pōoǹee. Baa cáá dineendi, kaa sūǹ bin kíǹee saai. 32 Nì min kamaa bi baasii nyí tiŋan yii Unimbɔti bí yii bin bin ŋáań ikpiti gbantee máaǹ ŋkúmee, bi gbíntì ki ŋáań ikpiti gbanti. Tin gíti lákatèe di sá bi bí yii bin ŋáań ikpiti gbantee di ŋáań min kítèe.