Plɛbʋbɔ 'jrʋpafɛnyüü
12
1 'I ‑sia' nɩ, Jesu 'pala 'üün tapönänë 'klɩ ɔ: «Nyɔɔ 'doo pla kä viinyëputu†, 'ɔ klu 'uun 'klɩ, 'ɔnya ma 'wlitʋŋlɔ 'kpa kpakë 'ɔmä putu ‑gälɩ ‑glaara, 'ɔnya ‑goolo 'lɩ 'bütügbalä kä 'mlɩ 'ümäa' rɛsɛɛn† pɔtrɔ, 'ɔnya tɩ 'ua 'mlɩ 'jrʋpafɛnyüü 'ɔnya mi nyɔtugbabre†. 2 Rɛsɛɛn a 'sasataɩn jräa' 'lɩ nɩ, 'ɔnya blɔ 'ɔa 'jrʋpafɛnyɔɔ 'doo nyüülü ‑fɛɛɛrɛa' putulua 'mlɩ 'jrʋpa, ü ‑nyɩ 'ɔɔn 'ɔa nɛ rɛsɛɛn, ɔ ja 'ɔmɩ 'ɛɛn. 3 'Ü 'kplaa' nyɔɔlɔ nɩ, bɔtɔ 'ü bɔtɔ 'ɔɔn, 'ünyɩ 'ɔɔn dɛɛ ‑a ‑nyɩ 'ünya prɛ 'ɔɔn. 4 'Ɔnya 'patä 'ɔnya blɔ 'lɩ 'jrʋpafɛnyɔɔ ‑moloo; 'ünya be be 'ɔɔn 'täkë†, 'ünya bɔtrɔ 'ɔɔn 'wli bɔtrɔ, 'ünya ‑jejre 'ɔɔn. 5 'Ɔnya blɔ 'sɔɔwʋ ‑moloo, 'ünya 'bla 'ɔɔn; ‑mölöö nya 'trorolɩ; bɔtɔ 'üün bɔtɔ, ‑a 'blaa ‑mölöö. 6 'Ɔa ‑wawajʋa 'doo tɩɔ 'lɩ. 'Ɔa plɛ 'klɩ 'ɔ ‑nëma: ‹Ama blɔ 'na 'jʋ, 'ünya 'ɔɔn nyɔɔwʋbaa.› 'Ɔnya 'pala 'jʋlɔ ‑gälɩ 'tä, 'ɔnya blɔ 'ɔɔn nyüülüa ‑nyɛɛ. 7 ‑Maa 'jrʋpafɛnyüülüa plɛ 'klɩ 'ü ‑nëma nɩ: ‹‑Jää 'jʋlɔ nëmäa' ‑jaaa ji; 'ba ji a 'bla 'ɔɔn, ‑bɛ amä ‑jaalä ji!› 8 'Ünya 'kpla 'ɔɔn, 'ünya 'cie 'ɔɔn viinyëputu 'lɩ, 'ünya 'bla 'ɔɔn.9 «‑Asɩ putukänyɔɔlɔ nya ‑plɩɩ nʋ ɔ le? 'Ɔnya jia, 'kä 'ɔnya 'jrʋpafɛnyüülü 'bla; 'kä 'ɔnya 'lɩ 'jrʋpafɛnyüü ‑mölöö ‑tʋ. 10 'Amä 'daa 'a ‑kaapɩɔ ‑taa waklüülü ‑jɩjraa' nyɔsʋapɔɔkʋ 'lɩ ‑täsä?
'Täkälä nyëkapanyüü be käa' 'klʋɛɛ nɩ,
'ää nʋ 'tasɩrɩ nyukua ‑gɔmʋʋ†.
11 'A ‑pɩ 'Pläkänyɔɔ ‑tʋ 'iin;
'ia 'mʋfadɛɛ 'nyɩ bä ‑a bä ana ‑gʋ!»
12 'Ü jre 'iin 'sɩrɩ tapönänälä Jesu 'paa' käläa' 'üün ‑gba. 'Ia ‑gʋ 'ü 'bata 'ümä 'ɔɔn 'kpla, ‑maa nyüülü ‑gblɔɔa' ‑plɩɩ 'kä 'üa ŋalɛ 'blaa 'üün. 'Ünya 'cɛrɛ 'ɔɔn ‑wälɩ 'ünya mi.
Dapooa 'pɛpɛɛkʋ
13 'Ünya blɔ 'ɔɔn Farisinyüü 'doorodoo nyra Erɔɔdëa nyüü 'doorodoo dɛrɩ 'ümä 'ɔa 'papawii kälɩ ‑srörö 'ümä 'ɔɔn 'kpla. 14 'Ünya ji Jesu 'bete: «'Kpɩkpɩanyɔɔ, a jre 'sɩrɩ ‑saaa' 'lɩ 'cɩcasa, ‑bɛ ‑kpɩaa' 'cɩcasa Nyɔsʋaa 'nyʋfɔ. Nyɔɔ 'nyɩ ‑mɩ ŋalɛ 'wʋ ‑a kä, ‑nyɩ ‑gbasa nyüü 'lɩ ‑a. A kä amä Sesaa dapoo kälɩ 'pɛɛrɛ? ‑Yɛɛ ‑ale 'Woo?» 15 Jesu jrea' ‑gʋ 'iin 'sɩrɩ 'ü bäa' ‑glagälɩsrörönyüü nɩ, 'ɔnya ‑gbala 'üün: «Dɛplɛɛ kä ‑gʋ 'a ji 'mɩ 'lɩtɛ le? 'Ba ja 'mɩ denie 'dee† 'mä 'ɛɛn 'jä.» 16 'Ünya ja 'ɔmɩ 'iin; Jesu nya 'bete 'üün: «Nyɔɔ 'plɛɛ kä 'pike nyra ‑jɩjradii bä 'lɩ ‑gälɩ le?» 'Ü ‑nëma: «Sesaalɔ.» 17 'Ia ‑gʋ 'ɔnya ‑gbala 'üün: «Dɛɛlɛ bäa' Sesaa dɛɛ, 'ba ‑nyɩ 'ɛɛn Sesaa, ‑bɛ dɛɛ bäa' Nyɔsʋaa dɛɛ 'ba ‑nyɩ 'ɛɛn Nyɔsʋa.» 'Ɔnya kala 'üün plɛ 'klɩ.
Jäjänyüü nya ‑srɩɩ 'kuaabre sɔa?
18 Sadusinyüülü 'daaa' ‑maa nyɔɔ ma jä 'ɔ ‑kanyɩ sɔ 'kuaabre ‑a nɩ†, 'ünya jijrö Jesu ‑gba, 'ünya 'bete 'ɔɔn: 19 «'Kpɩkpɩanyɔɔ, ‑jää 'sɩ Moisëa ‑dɔ ‑gbalaa' amɩ nɩ: ‹Nyɔɔa ‑wlajʋ nyra 'ɔa 'ŋlʋʋ ma 'nyɩ 'jʋ ‑a ‑gu ‑bɛ ɔma jä nɩ, 'ɔa ‑wlajʋ kä 'kusroŋlʋʋlɔ 'ɔ nyra 'ɔɔn 'mä 'ɔa ‑wlajʋa 'jü ‑gu†.› 20 ‑Jää ‑wlajü ‑uunsɔɔ. Kpaköa nɔ ‑kätɩ 'ti, 'ɔnyɩ 'jʋ ‑a ‑gu 'ɔnya jä. 21 'Ɔa ‑wlajʋ nya dɔrɔ 'kusroŋlʋʋlɔ 'wʋ 'ɔnya kä 'ɔɔn. 'Ɔnyɩ 'jʋ ‑a ‑gu 'ɔnya jä bɩa. Tääa nɔa 'mʋgbɛ, 'a dɛɛ 'dee. 22 'Üa ‑uunsɔɔlü 'nyɩ 'jü ‑a ‑gu 'ünya jä. 'Üa 'fɩɔ nya bɩa, 'ŋlʋʋlɔ nya jä bɩa. 23 'Üa 'fɩɔ ma sɔ ‑srɩɩ 'kuaabre, ‑mɔ 'plɛɛ nya 'ŋlʋʋlɔ kä ɔ le? 'Be 'ɔ kä 'üa ‑uunsɔɔa 'fɩɔ ‑o?» 24 'Iibäa' Jesu nɩ: «‑Mää dɛɛlɛ kä ‑gʋ 'anyɩ 'nua' nyɔsʋapɔɔkʋ 'wli, ‑bɛ 'anyɩa' Nyɔsʋaa 'klü jre nɩ, ‑mää 'ia ‑gʋ 'anyɩ ‑trɔɔrɔ ‑plɩɩ 'ana nyüfë? 25 'Taɩn 'lɩ jäjänyüü 'mäa' ‑srɩɩ 'kuaabre sɔ nɩ, 'titikʋ ‑ka ‑nëmä 'lɩ ‑a bä; ‑maa 'ünya ‑beere 'aanjëlü bäa' cɛlɩ. 26 Wiili bäa' jäjänyüüa 'kuaabrea sɔsɔkʋ nɩ, 'amä 'daa 'a ‑kaapɩɔ 'iin Moisëa ‑pɔɔkʋ 'lɩ ‑täsrä? 'Pɛlɛ 'paaa' tiijiea fifikʋa ‑gä, 'ɛa 'mlɩ Nyɔsʋa ‑gbala Moisë: ‹'Mɔɔ bä Abraamëa Nyɔsʋa, Isaakëa Nyɔsʋa 'nyaa bä Jakɔɔbëa Nyɔsʋa†?› 27 Nyɔsʋa 'nyɩ jäjänyüüa Nyɔsʋa ‑a bä, ‑maa 'lɩbänyüüa Nyɔsʋa 'ɔ bä. 'A ‑trɔɔrɔ 'ana nyüfë ‑gböösa.»
‑Dɔlʋ ‑sia' 'wʋ
28 'Ü ‑topoa', ‑dɔkpɩanyɔɔ 'doo po 'üün 'nyakli. Jesu 'saa' Sadusinyüü ‑gälɩ 'cɩcasa nɩ, ‑dɔkpɩanyɔɔlɔ nya jijrö Jesu ‑gba 'ɔnya 'bete 'ɔɔn: «‑Dɔa 'fɩɔa ‑tɔrʋpɩɔ, ‑mʋ 'plɛɛ ‑siwʋ le?» 29 'Iibäa' Jesu nɩ: «‑Jää ‑dɔlʋ ‑sia' 'wʋ: ‹Israɛɛlë, 'ba ponyakli. Ana 'Pläkänyɔɔ Nyɔsʋa, 'ɔa 'doo bä 'Pläkänyɔɔ 30 'kä ‑nya ‑na plɛa 'fɩɔ nʋ, ‑na ‑susu, ‑na bobowli nyra ‑na 'klüa 'fɩɔ, 'kä ‑nya ‑na 'Pläkänyɔɔ Nyɔsʋa ‑wa†.› 31 ‑Jää 'ua 'sɔɔa nu: ‹'Sɩrɩ ‑waa' ‑na nyufa, ‑wa 'saa ‑na ‑moloo†.› ‑Dɔ ‑moloo ‑kanyɩ 'lɩ ‑a bä 'unyɩ 'ia 'sɔɔlʋ 'wʋ ‑a ‑si.» 32 'Iibäa' ‑dɔkpɩanyɔɔlɔ nɩ: «'Kpɩkpɩanyɔɔ, 'cɩcasa ‑saalɩ Nyɔsʋa bä 'doo; ‑moloo ‑kanyɩ 'lɩ ‑a bä†, 33 nʋ ‑na plɛa 'fɩɔ, ‑na bobowlia 'fɩɔ, ‑na ‑susu nyra ‑na 'klüa 'fɩɔ ‑a ‑wa 'ɔɔn; 'sɩrɩ ‑waa' ‑na nyufa, ‑wa 'saa ‑na ‑moloo. 'I ‑si Nyɔsʋaa 'nyrɩklɩa mlaa 'pütökʋ 'wʋ, 'inya ‑si ‑gbɔa 'fɩɔwʋ†.» 34 Jesu 'jäa' nyɔɔlɔa 'lɩgaglakʋ 'ɔa 'lɩsasawiia 'mlɩ nɩ, 'ɔnya ‑gbala 'ɔɔn: «‑Nyɩ 'lɩ Nyɔsʋaa 'kamaplä dɛrɩ ‑a tʋŋlɔ.» 'Bala 'lɩ ‑gälɩ, nyɔɔ ‑kanyɩ 'ɔɔn 'bete ‑a 'bete.
Nyɔɔ 'plɛɛ kä 'jʋ bä Jesu le?
35 Jesu 'kpɩaraa' Nyɔsʋaanyuku ‑wälɩ nɩ 'ɔnya 'bete: «'A jre ‑gbaalä kä ‑gʋ ‑dɔkpɩanyüü 'daaa' ‑maa 'Kriisë bä Daviidëa 'jʋ? 36 'Nyüna ‑Susu 'cerea' Daviidë ‑gälɩ 'ɔa 'mʋgbɛ nɩnɩa:
'Pläkänyɔɔ ‑gbala 'na 'Pläkänyɔɔ: 'A ‑pɩ 'na 'dupa 'lɩ ‑a kʋ kʋ,
'kä 'n 'pie ‑na 'nyüamlɩjraranyüü ‑na bökli ‑wälɩ
‑beere bökligälɩtʋkpö†.
37 Daviidëa 'mʋgbɛ 'dara 'ɔɔn 'Pläkänyɔɔ; ‑bɛ ‑asɩ 'ɔ nʋ ‑bɛ 'ɔ bä bɩa 'ɔa 'jʋ le?» ‑Jria kpakö po 'ɔɔn 'nyakli dɔrʋsa.
‑Dɔkpɩanyüüa bʋbɔgbi
38 'Ɔ 'kpɩaa' 'üün nɩ, 'ɔ ‑gbala 'üün: «'Ba ‑tre 'ana nyüfë ‑dɔkpɩanyüüa ‑gʋ. ‑Panë 'ü 'palɩ ‑bɛ 'ü ‑piie, ‑bɛ ü ‑waa' ‑saplɛ 'klɩa 'trɔrʋ, 39 nyra 'sraaplanyuku ‑wälɩa 'klɔɔtrʋa 'kpatëa ‑gälɩa kʋkʋkʋ. ‑Glɩsɩglɩsɩ ma jrälɩ nɩ, tuponyüüa 'kpatë ‑gälɩ 'ü kɔ kɔ. 40 'Ü bɩa 'kusroŋlëgë diia 'fɩɔ kälɩ, ‑bɛ üma bibie Nyɔsʋa 'ü ‑wlɛlɩ ‑beere 'cɩcanyüü, nyüü 'mä ‑gʋ 'üün 'jäjrä. 'Üa ‑gäa ‑tʋtʋkʋ nya 'lɩklaa ‑gböösa.»
'Pʋablakusroŋlʋʋ
41 Jesu 'prɛrɛa' ‑plɩɩ nyüü 'pɛɛrɛa' nyɔsʋamöliia ‑gba nɩ, 'ii 'ɔ kʋ ‑bɛ 'ɔ tɛ 'üün 'klɩ 'ü 'pa 'pa 'lɩ mölii. 'Bɩɔjinyüü 'kɔkɔmlɛ 'saa mölii 'kɔkɔmlɛ. 42 'Pʋablakusroŋlʋʋ 'doo nya ji 'ɔnya 'palɩ möliieju 'sɔɔ 'nyɩa' ‑tɔɔɔ kä. 43 Jesu nya we 'ɔa 'wʋnyɛrɛnyüü, 'iibä: «'Cɩcasa 'n ‑gbala 'amɩ, 'pʋablakusroŋlʋʋlɔ kʋa' ‑pɩ, 'ɔɔ 'sa mölii 'ɔnya ‑si nyüülü kä 'fɩɔ 'paa' ‑tɛ mölii 'wʋ, 44 ü kä 'fɩɔ 'paa' ‑tɛ mölii nɩ, 'inyɩ 'üa 'nyü ‑gälɩ dɛɛ ‑a bä, ‑maa 'ɔɔlɔ nɩ, dɛɛlɛ tɩɔa' 'lɩ 'ɔɔn 'ɔmäa' dɛɛji, 'ɛɛ 'ɔ 'sa.»