JESUA 'JRƲPAA BƖARAFA
21–28
Jesu 'jraa' Jerusalɛɛmë
21
1 'Ü möa' Jerusalɛɛmë 'tɔ nɩ, ‑bɛ 'ü jijröa' Bɛtëfajëbätä ‑gba, ‑nyɛɛ Oliivëtiia 'Dʋgbaa 'pɛlɩ nɩ, Jesu nya blɔ 'ɔa 'wʋnyɛrɛnyüüa ‑tɔrʋpɩɔa nyüü 'sɔɔ. 2 'Ɔnya ‑gbala 'üün: «'Ba mi bätälä 'a 'jääa' 'wʋ 'lee 'äa 'mlɩ. 'Ama 'jra 'lɩ dotro, ‑sʋbre nyra 'ɛa 'jʋ kpasra ‑plɩɩ; 'ba ‑jejie 'üün 'kä 'a ja 'mɩ 'üün. 3 Nyɔɔ ma 'bete 'amɩ, 'ba ‑gbala 'ɔɔn: ‹'Pläkänyɔɔ 'bata 'üün.› 'Ɔnya ‑plɩɩ 'amɩ ‑wälɩcɛrɛa.» 4 'Asɩ 'ia 'fɩɔ nʋ ‑sisidɛɛ, 'kä 'Pläkänyɔɔa wiili nyɔsʋaamlɩpalanyɔɔ 'sa käa' 'lɩ 'mä nrörö. 'Ɔ nɩnɩa kä:5 «'Ba ‑gbala Siɔɔnbätäa 'yria:†
‑Jää ‑na 'kɩɩ; plɛblösa 'ɔ jö ‑na ‑nyɛɛ!
‑Sʋbrea 'jʋ ‑gälɩ 'ɔ kʋ,
‑sʋbrea 'ŋlʋʋa nɛa 'jʋ†!»
6 Nyüülü nya mi 'ünya nʋ 'sɩrɩ Jesu ‑gbala ɩa' 'üün. 7 'Ünya fa 'ɔɔn ‑sʋbre nyra 'ɛa 'jʋ, 'ünya 'pepe mlaalüa ‑gälɩ 'üa 'koti 'ünya 'sri 'lɩ Jesu ‑gälɩ 'kä. 8 Nyüü 'kɔkɔmlɛ nya 'pepe 'üa 'sosroodii 'nyʋfɔ 'wʋ, ‑bɛ ‑mölöö 'böbö katë 'jɩjarɛ sʋsʋ tii 'wli ‑bɛ 'ü 'pepe 'üün 'nyʋfɔ mlɩ. 9 Nyüülü 'nyɛrɛa' 'ɔa 'klɩ nyra ‑mülü bäa' 'ɔa dɛrɩ 'kpöö ‑bɛ 'ü nö:
«Osana†, Daviidëa 'Jʋ!
‑Jɔrʋ pala nyɔɔlɔ jröröa' 'Pläkänyɔɔa 'nyrɩklɩ!
Osana, a 'bʋala Nyɔsʋalɔ bäa' cɛlɩ†!»
10 Jesu 'tɔa' Jerusalɛɛmë nɩ, bätäa 'fɩɔ ‑sesregba ‑bɛ 'ü nö: «Nyɔɔ 'plɛɛ kʋ ‑pɩ le?» 11 ‑Jria 'lɩa nyüü ‑nëmä: «Jesu, nyɔsʋaamlɩpalanyɔɔlɔ sɔa' Nasarɛɛtë, Galileea ‑tʋtʋ ‑gälɩ, 'ɔɔ bäsaa.»
'Perupanyüülü Jesu prɛrɛa' Nyɔsʋaanyuku kpaku ‑wälɩ
12 Jesu nya pa Nyɔsʋaanyuku kpaku ‑wälɩ. 'Ɔnya prɛ nyüülü kä 'fɩɔ 'palaa' 'lɩ 'peru nyra ü jöa' 'lɩ 'makatɩ 'pala. 'Ɔ 'kpakpa mölii 'cicinyüüa 'töwlü 'kä, nyra ‑mülü 'palaa' 'lɩ ‑sögü 'peru 'üa 'kpatë†. 13 'Ɔnya ‑gbala 'üün: «'I ‑jɩjra nyɔsʋapɔɔkʋ 'lɩ 'kä:
'Na nyukua 'nyrɩ bä nyɔsʋabibienyuku†. ‑Maa 'amɔlɔ nɩ, 'a nrörö 'uun 'jejienyüüa trarafa 'lɩ.»
14 'Nɔnɔnyüü nyra kpakpanyüü nya jijrö 'ɔɔn ‑gba Nyɔsʋaanyuku kpaku ‑wälɩ 'ɔnya 'pʋɔ 'üün. 15 ‑Maa ‑gbɔsapɛrɩnyüü kpakü nyra ‑dɔkpɩanyüü 'jäa' plɛklɩkalawiili 'ɔ nʋa' nyra 'sɩrɩ nyɔkɔsʋsʋ 'kpööa' Nyɔsʋaanyuku kpaku ‑wälɩ ‑bɛ 'ü nöa' «Osana Daviidëa 'Jʋ,» 'i kä 'ümɩ 'crɛ 'wʋ. 16 'Ünya 'bete Jesu: «‑Nöö wiili 'ü 'paaa' 'wli?» 'Iibäa' Jesu nɩ: «‑Yɛɛ. 'A ‑kaapɩɔ ‑taa waklüülü ‑jɩjraa' nyɔsʋapɔɔkʋ 'lɩ ‑täsä?
‹Nyɔkɔsʋsʋ nyra 'jüplüjiea mlɩ ‑srörö ‑nya 'bʋala ‑na 'nyrɩ†.›»
17 'Ɔnya tɩ ‑plɩɩ 'üün 'ɔnya 'cie bätä 'ɔnya mi Betaniibätä. 'A ‑nyɛɛ 'ɔ 'prere.
'Figietuulu Jesu busua'
18 ‑Srɩ ‑gbaa' 'kä ‑bɛ 'ɔ 'blööa' bätä dɛrɩ nɩ, ‑gbëka nya 'bla 'ɔɔn. 19 'Ɔnya 'jä figietuu 'nyʋfɔ ‑gba, ‑maa 'ɔmä 'uun ‑gbajijrökalɩ mi nɩ, 'napɩa 'kpɔ bä 'ua 'wli. 'Ɔnya ‑gbala 'uun ‑maa: «Figiebö ‑kä ‑nëmä ‑na 'wli ‑a trɔrɔ 'plɔʋ!» 'A ‑plɩɩ figietuulu kʋ 'unya 'fu.
20 'Wʋnyɛrɛnyüü 'jäa' 'iin nɩ, 'üa plɛ 'klɩ kala: «Wii 'plɛɛ bälɩ ‑bɛ figietuulu 'daa 'fla ‑bɛ 'u 'fu le?» 21 Jesu nya ‑gbala 'üün: «'Cɩcasa 'n ‑gbala 'amɩ, 'ama toro Nyɔsʋa plɛ ‑bɛ 'ana plɛ ma 'nyɩ ‑pilɩklɩ ‑a nɩ, 'anya i 'n nʋa' ‑taa figietuulu ‑gba nʋa, ‑mää ‑plɩɩa 'doo 'a ‑nëmä 'blörö, ‑maa 'anya bɩa 'dʋgbalä kʋa' ‑pɩ ‑gbalaa: ‹Sɔ ‑pɩ, mi ‑a blö 'tanie 'lɩ›, 'kä 'inya nrörö. 22 'Ama toro Nyɔsʋa plɛ nɩ, dɛɛ o dɛɛ 'a nëmäa' Nyɔsʋa 'lɩ 'betre nɩ, 'ɔnya 'amɩ 'ɛɛn ‑nyɩa.»
Jesua 'kamakʋ
23 Jesu paa' Nyɔsʋaanyuku kpaku ‑wälɩ nɩ, nyüü 'ɔ 'kpɩa. ‑Gbɔsapɛrɩnyüü kpakü nyra juifënyüüa tagbü nya jijrö 'ɔɔn ‑gba, 'ünya 'bete 'ɔɔn: «‑Na 'ciö 'plɛɛ ‑bɛ ‑nö 'saa le? Nyɔɔ 'plɛɛ ‑gbala 'saa ‑mɩ le?» 24 'Iibäa' Jesu nɩ: «'Na 'mʋgbɛ wii 'doo 'nëmä 'amɩ 'lɩbetre, 'ba 'sa 'mɩ ‑gälɩ ‑bɛ 'mä 'amɩ nyɔɔlɔ ‑gbalaa' 'saa 'mɩ 'ɔa 'nyrɩ ‑nyɩ. 25 ‑A 'plɛɛ Jaan a nyüüa 'nɩwlipajrʋpa sɔrɔ le? Cɛlɩ ‑maa nyüü kälɩ? 'Üa 'kpɔa ‑tɔrʋpɩɔ 'ü 'pawii ɔ: Ama 'daa: ‹Nyɔsʋa blɔ kä 'ɔɔn›, 'ɔnya 'daa: ‹‑Bɛ dɛplɛɛ kä ‑gʋ 'anyɩ wiili Jaan 'saalɩ wiidara le?› 26 ‑Maa ama 'daa: ‹Nyüü blɔ kä 'ɔɔn› nɩ, anya 'a nyüüa ‑gbʋʋ 'jä, 'be 'üa 'fɩɔ 'dara Jaan nyɔsʋaamlɩpalanyɔɔ.» 27 'Iibäa' 'üün nɩ: «Anyɩ 'iin jre ‑a jre.» 'Ɔnya ‑gbala 'üün: «'Na 'mʋgbɛ, nyɔɔlɔ blɔa' 'mɩ 'nëmä 'amɩ 'ɔa 'nyrɩ ‑a ‑nyɩ.»
'Jü 'sɔɔa tapönänä
28 Jesu nya 'bete 'üün 'sɩrɩ 'ü boboa' wiili 'ɔ nëmäa' 'lɩsa: «Nyɔɔ 'doo kä kä 'jü 'sɔɔ. 'Ɔnya ‑gbala ‑kätɩa nɔ: ‹'Na 'jʋ, mi ‑a ‑fɛɛɛrɛ 'saarɩ 'na viinyëputu 'lɩ 'jrʋpa.› 29 'Iibäa' 'jʋlɔ: ‹'N blara.› Fɩɩɩn 'ɔnya 'cici 'ɔa bobowli, 'ɔnya mi. 30 Tʋ nya ‑gbala bɩa 'saa ‑mɔlɔ 'troroa' 'ɔɔn 'klɩ, 'ia nɔ ‑nëmä: ‹‑Woo 'Pläkänyɔɔ, 'nyaa 'lɩ mia.› ‑Maa 'ɔnyɩ mia ‑a mi. 31 'Üa 'sɔɔlüa ‑tɔrʋpɩɔ ‑mɔ 'plɛɛ ‑träärälɩ tʋ le?» 'Üa 'fɩɔ ‑nëma: «‑Kätɩa nɔ.» 'Iibäa' Jesu nɩ: «'Cɩcasa 'n ‑gbala 'amɩ, dapookälɩpɛrɛnyüü nyra 'tutuŋlëgë ‑kätɩ nëmä Nyɔsʋaa 'kamapläa 'mlɩ pa. 32 'Be Jaanlɔ nɩ, 'klɩgä 'nyʋfɔ 'ɔ ji 'amɩ srara, ‑maa 'anyɩ 'ɔɔn plɛ ‑a toro. ‑Maa dapookälɩpɛrɛnyüü nyra 'tutuŋlëgë toro 'ɔɔn plɛ. 'Amɔlɔ 'jäa' 'ia 'fɩɔlʋ nɩ, 'anyɩ 'cici ‑a 'cici 'amä 'ɔɔn plɛtoro.»
Plɛbʋbɔ 'jrʋpafɛnyüüa tapönänä
33 «'Ba po tapönänä ‑mɩdoo 'nyakli. Putukänyɔɔ 'doo bälɩ, 'ɔ pla kä viinyëputu, 'ɔnya klu 'uun 'klɩ, 'ɔnya ‑goolo 'lɩ 'bütügbalä kä 'mlɩ 'ümäa' rɛsɛɛn† pɔtrɔ, 'ɔnya 'pa ‑gbagbɔ 'ɔmä putu ‑gälɩ ‑glaara. 'Ɔnya tɩ 'ua 'mlɩ 'jrʋpafɛnyüü 'ɔnya mi nyɔtugbabre. 34 Rɛsɛɛn a 'sasataɩn jräa' 'lɩ nɩ, 'ɔnya blɔ 'ɔa nyüü nyüülü ‑fɛɛɛrɛa' putulua 'mlɩ 'jrʋpa, 'üa ‑nyɛɛ, ü ‑nyɩ 'üün 'ɔa nɛ rɛsɛɛn, ü ja 'ɔmɩ 'ɛɛn. 35 Nyüülü mia' nɩ, ‑jää 'üü nyüülü ‑fɛɛɛrɛa' putulua 'mlɩ 'jrʋpa 'kpla. 'Ü bɔtɔ 'doo, 'ünya 'bla 'sɔɔa nɔ, 'ünya 'kakla tääa nɔ 'täkë. 36 'Ɔnya 'patä 'ɔnya blɔ 'lɩ 'jrʋpafɛnyüü ‑mölöö, 'ü ‑sümlö 'ünya ‑si kätɩa nü 'wʋ. 'Asɩɛ nyüülü ‑fɛɛɛrɛa' putulua 'mlɩ 'jrʋpa nya nʋ 'ümɩ dɛɛ 'dee ‑gba. 37 'I mia' blökalɩ nɩ, 'ɔnya blɔ 'lɩ 'ɔa 'jʋ, 'ɔ ‑nëma: ‹‑Bɛ 'ünya ‑plɩɩ 'ɔɔn nyɔɔwʋbaa!› 38 ‑Maa 'jrʋpafɛnyüü 'jäa' 'jʋlɔ nɩ, 'üa plɛ 'klɩ 'ü ‑nëma: ‹‑Jää 'jʋlɔ nëmäa' ‑jaaa ji; 'ba ji a 'bla 'ɔɔn, ‑bɛ amä ‑jaalä ji!› 39 'Ünya 'kpla 'ɔɔn, 'ünya 'cie 'ɔɔn viinyëputu 'lɩ, 'ünya 'bla 'ɔɔn.» 40 Jesu nya 'bete 'üün: «Viinyëputukänyɔɔ ma ji nɩ, dɛplɛɛ 'ɔmä 'ia 'jrʋpafɛnyüülü ‑gba nʋ le?» 41 'Iibäa' 'üün nɩ: «Nyatɛrɩ ‑nëmä 'nɩmɩ 'ɔɔn 'bla ‑a 'bla 'kä 'ɔnya 'jrʋpafɛnyüülü 'blaa, 'kä 'ɔnya 'lɩ 'jrʋpafɛnyüü ‑mölöö ‑tʋ, 'ü nëmä 'ɔɔn 'ɔa nɛ ‑nyɩ 'ɛa 'sasataɩn.»
42 'Ɔnya ‑gbala 'üün: «Wiili ‑jɩjraa' nyɔsʋapɔɔkʋ 'lɩ, 'a ‑kaapɩɔ 'iin ‑täsä?
'Täkälä nyëkapanyüü be käa' 'klʋɛɛ nɩ,
'ää nʋ 'tasɩrɩ nyukua ‑gɔmʋʋ.
'A ‑pɩ 'Pläkänyɔɔ ‑tʋ 'iin;
'ia 'mʋfadɛɛ 'nyɩ bä ‑a bä ana ‑gʋ†.»
43 'A 'ia ‑gʋ 'n ‑gbala 'amɩ 'sɔɔwʋ: «'Ünya 'amɩ Nyɔsʋaa 'kamaplä kälɩ 'baa, 'kä 'ünya 'ään nyüülü käa' 'cɩcagbi kälɩ ‑nyɩ. 44 Nyɔɔlɔ nëmäa' 'ia 'täkälä ‑gälɩ blö nɩ, 'ɔa ‑gbaa dii nya 'katraa; ‑bɛ äma blö nyɔɔ ‑gälɩ nɩ, 'änya 'ɔɔn fɛtrɔa†.»