Putu 'lɩa 'jrʋpafɛnyüü
20
1 «'Be cɛɩɩa 'kamaplä ‑beere 'sɩrɩ ‑gböökänyɔɔ 'doo mia' ‑suwla ‑ŋʋɩsɩɩ 'jrʋpafɛnyüü 'bata 'ümä 'ɔa viinyëputu† 'lɩ 'jrʋpa ‑fɛɛɛrɛ. 2 'Ünya 'nönröwli 'ɔmä 'üün denie 'dee 'pɛɛ ‑srɩa 'mlɩ. 'Ɔnya fa 'üün 'jrʋpa 'lɩ 'ɔa viinyëputu 'lɩ. 3 ‑Srɩwlaa ‑gliiibei ‑uunmlɔɔ† 'lɩ 'ɔnya sɔ putu 'lɩ; 'ɔnya 'järä nyüü ‑mölöö bätäa ‑saplɛ 'lɩ ‑mää dɛɛ 'ünyɩ nʋ. 4 'Ɔnya ‑gbala 'üün: ‹'Amɔlɔ nɩ, 'ba mi bɩa 'na viinyëputu 'lɩ, ‑bɛ 'mä 'amɩ 'ia mölii 'pɛɛ.› 5 'Jrʋpafɛnyüülü nya mi. ‑Srɩa 'lɩmɩmrɛ 'taɩn 'lɩ nɩ, nyra ‑srɩwlaa ‑gliiibei ‑pʋ ‑bɛ ‑gböö 'lɩ nɩ, 'ɔnya ji 'sɔɔwʋ ‑mölööa 'klɛɛ. 6 'Jrʋ 'pia', 'ɔnya mi 'sɔɔwʋ bätäa ‑saplɛ 'lɩ 'ɔnya jrä 'lɩ nyüü ‑mölöö 'nyɩ nʋa' dɛɛ. 'Ɔnya 'bete 'üün: ‹Dɛplɛɛ kä ‑gʋ 'anyɩ nʋ dɛɛ ‑srɩa 'mlɩ le?› 7 'Iibäa' 'üün nɩ: ‹Nyɔɔ 'nyɩ ‑nyɩ amɩ 'jrʋpa ‑a 'ia ‑gʋ.› 'Ɔnya ‑gbala 'üün: ‹'Ana 'mʋgbɛ 'ba mi 'na putu 'lɩ, ‑bɛ 'mä 'amɩ 'ia mölii 'pɛɛ†.› 8 ‑Gbiajrʋ mia' nɩ, nyɔɔlɔ käa' putulu nya ‑gbala 'ɔa 'jrʋpafɛnyüüa 'wliklɩanyɔɔ ‑maa: ‹We 'jrʋpafɛnyüülü 'kä ‑pɛɛɛ 'üün, 'bala ‑kätɩ ‑mülü 'paa dɛrɩtä ‑gälɩ 'kä 'wlara ü ‑kätɩ jia' ‑gälɩ.› 9 'Jrʋpafɛnyüülü jia' 'jrʋpa 'lɩ 'jrʋa 'pipitaɩn 'lɩ nya ji, 'ünya ‑nyɩ 'üün denie 'deeredee. 10 ‑Mülü ‑kätɩ mia' putulua 'mlɩ jia', 'üa plɛɛ nɩnɩa 'üa ni nya ɩ 'wʋsia, ‑maa denie 'deeredee 'ü 'jä bɩa. 11 'Ü dɔrɔa' 'iin 'wʋ nɩ, ‑plɛlɩ 'ü 'pala wii ‑bɛ 'ü 'daa ‑gböökänyɔɔlɔ, 12 ‑jää wiili 'ü 'paa': ‹Ü 'paa' dɛrɩtä 'ü jia', ‑gliiibɔʋ 'dooa 'jrʋpa 'ü ‑fɛ, ‑bɛ a nyra 'üün 'mɩmrɛ mölii 'lɩ; amɔ nyüülü jia' ‑suwla ɔ ‑ka ‑fɛɛɛrɛa' ‑mla 'jrʋ 'klɩ 'jrʋpa!› 13 ‑Maa putukänyɔɔ nya ‑gbala 'üün: ‹'Na ‑bei, 'nyɩ ‑mɩ bʋbɔgbi ‑gba ‑a nʋ. Anyɩ 'wli ‑a nönrö 'sɩrɩ 'mäa' ‑mɩ denie 'dee 'pɛɛ ‑srɩ 'lɩ? 14 Dɔrɔ ‑na ni 'wʋ ‑mä mi. Dɛɛlɛ 'n ‑nyɩa' ‑mɩ 'ɛɛ 'n 'bata 'mä 'ɔɔn ‑nyɩ. 15 Wiili 'n 'bataa' 'mäa' 'na mölii ‑gba nʋ 'nyɩ kä ‑a kä ‑a nʋ 'lɩ 'iin? ‑Maa 'na ‑gbinanakʋ kä ‑mɩ wasä 'wʋ?›16 «'Asɩ 'i bä: dɛrɩtäpanyüülü nɩ, 'ünya ‑srɩɩ 'wliklɩ bäa, 'kä ‑mülü bäa' 'wliklɩ nya ‑srɩɩ dɛrɩtäpa. 'Be tuponyüü ‑sümlö, ‑maa ‑mülü 'ü 'baa' 'lɩ 'nyɩ ‑sümlö ‑a ‑sümlö†.»
Jesu 'paa' tääfawʋ 'ɔa jäjäkʋ nyra 'kuaabrea sɔsɔkʋa ‑gä
17 Jesu mö ɩ Jerusalɛɛmë, 'ɔnya we 'ɔa 'wʋnyɛrɛnyüü ‑pʋ nyüüsɔɔ ‑gasë ‑gba 'nyʋfɔ 'wʋ 'ɔnya ‑gbala 'üün ‑maa: 18 «‑Jää, Jerusalɛɛmë a 'jraa, Nyɔɔa 'Jʋ nya ‑gbɔsapɛrɩnyüü kpakü nyra ‑dɔkpɩanyüü kälɩ 'saraa; 'ünya 'ɔɔn jäjä ‑jie 'lɩ 'paa. 19 'Ünya 'ɔɔn nyüülü 'nyɩa' juifë bä kälɩ 'saraa, 'kä 'ünya 'ɔɔn srörö. 'Ünya 'ɔɔn ‑gbalɛfi ‑gälɩgbaa, 'kä 'ünya 'ɔɔn krʋa ‑gälɩ kolo 'kä 'ɔnya jä. Jrüü tääa ‑srɩ 'lɩ nɩ, 'kä 'ɔnya 'kuaabre sɔ.»
Wiili Sebedeea 'jüa 'yio 'betrea' Jesu 'lɩ
20 'I ‑sia' nɩ, Sebedeea 'jüa 'yio nyra 'ɔa nyɩbɛjü nya jijrö Jesu ‑gba, 'ŋlʋʋ nya 'pa Jesua 'klɩ kotifli 'ɔmä 'ɔɔn dɛɛ 'lɩ 'betre. 21 Jesu nya 'bete 'ɔɔn: «Dɛplɛɛ ‑baata le?» 'Iibäa' 'ŋlʋʋlɔ nɩ: «'Nyie abɩa 'na nyɩbɛjü 'sɔɔ kʋ ‑na ‑gba ‑na 'kamapläa 'mlɩ; 'doo ‑na 'dupa 'lɩ, 'kä 'doo kʋä ‑na kʋmla 'lɩ.» 22 Jesu nya ‑gbala 'üün: «Wiili 'a 'daaa' ‑a nʋa' 'anyɩ 'iin jre ‑a jre ‑bɛ 'a 'bete 'iin. ‑Sʋɩa ‑köwölä 'nëmäa' 'mla, 'a bɩalɩ 'amä 'ään 'mla? 'Aiɛ 'sɩrɩ 'mäa' 'nɩwlipala, 'kä 'anya 'saa 'nɩwlipaa†?» 'Ünya 'nyie: «A bɩalɩ.» 23 'Ɔnya ‑gbala 'üün: «'Kasa 'anya 'na ‑köwölä 'mlaa, 'sɩrɩ 'nëmäa' ‑sʋɩa 'nɩwlipala 'kä 'anya 'sa 'nɩwlipalaa†; ‑maa wiili bäa' 'na 'dupa 'lɩ nyra 'na kʋmla 'lɩa kʋkʋkʋ nɩ, 'inyɩ 'mɩ ‑gba ‑a kälä, 'na Tʋ 'ɔɔ ‑tʋ ‑plɩɩ kʋfëlë nyüü ‑mölööa ‑gʋ.»
24 'Ɔa 'wʋnyɛrɛnyüü ‑pʋ ‑mülü kʋa' ‑plɩɩ 'nua' 'iin 'wli nɩ, 'ünya ‑träärä ‑wlajü 'sɔɔlü 'crɛ ‑gba. 25 Jesu nya we 'üün, 'ɔnya ‑gbala 'üün: «'A jre 'iin nyüülü 'nyɩa' juifë bä, 'üa 'kamanyüü, 'üü ‑siie 'plä ‑sʋɩ, ‑bɛ nyüü kpakü fala 'üa 'kamadɛɛ 'plä ‑gälɩ. 26 'Inyɩ bä 'ana ‑tɔrʋpɩɔ. ‑Maa nyɔɔlɔ 'bataa' 'ɔmäa' kpaköa nɔ bä 'ana ‑tɔrʋpɩɔ nɩ, ɔ bä 'ana 'jrʋpafɛnyɔɔ; 27 ‑bɛ nyɔɔ o nyɔɔ bäa' 'ana ‑tɔrʋpɩɔ ɔ 'bataa' 'wliklɩa kʋkʋkʋ nɩ, ɔ bä 'ana ‑geei. 28 'Asɩ Nyɔɔa 'Jʋ 'nyɩ bɩa ji ‑a ji 'ɔmä 'jrʋpafɛnyüü kä, ‑maa 'ɔ ji 'ɔmä 'jrʋpafɛnyɔɔ bä, ‑bɛ 'ɔmä 'ɔa 'klä 'sa 'kɔkɔmlɛ 'mä 'lɩmlɩwʋ.»
'Nɔnɔnyüü 'sɔɔlü Jesu 'pʋɔa' Jerikoobätä
29 Jesu nyra 'ɔa 'wʋnyɛrɛnyüü 'cie Jerikoobätä, ‑bɛ nyüü 'kɔkɔmlɛ bä 'ɔɔn dɛrɩ. 30 ‑Jää 'nɔnɔnyüü 'sɔɔ kʋ ‑plɩɩ 'nyʋfɔ ‑gba. 'Ü 'nua' 'sɩrɩ Jesu ‑sööö ɩa' nɩ, 'ünya ‑gbolomlɩ 'ünya we: «'Pläkänyɔɔ, Daviidëa 'Jʋ, 'jä ana nyatɛrɩ!» 31 ‑Jria nya fa 'üün 'mä dɛrɩ ü 'kpla 'mä; ‑maa 'ünya 'kpölɩkä ‑gböösa: «'Pläkänyɔɔ, Daviidëa 'Jʋ, 'jä ana nyatɛrɩ!» 32 Jesu nya 'nyüglö, 'ɔnya we 'üün: «Dɛplɛɛ 'a 'bata ‑a nʋ 'amɩ ‑gba le?» 33 'Ü ‑nëma: «'Pläkänyɔɔ, ‑jie ana 'nyü!» 34 'Üa nyatɛrɩ nya ‑sie Jesu 'wli, 'ɔnya ‑fɛ 'üa 'nyü ‑gba. 'A ‑plɩɩ 'üa 'nyü kʋ 'ünya ‑jieroklɩ, 'ünya prɛ Jesu dɛrɩ.