Kpakpanyɔɔlɔ Jesu 'pʋɔa'
9
1 Jesu nya 'jra ‑gɔlʋ 'lɩ, 'ɔnya 'pɩ 'tanie, 'ɔnya 'jra 'ɔa bätä.2 Nyüü nya 'pie kpakpanyɔɔ 'doo 'wʋpidɛɛ ‑gälɩ 'ünya ja 'ɔmɩ 'ɔɔn. Jesu 'jäa' 'üa nyɔsʋaplɛ nɩ, 'ɔnya ‑gbala nyɔɔlɔ: «'Na 'jʋ, 'pa ‑na nyufa 'klü 'lɩ! ‑Na ‑balʋ 'a ‑mɩ cere.» 3 'Ia ‑gʋ ‑dɔkpɩanyüü ‑mölöö 'pala plɛ 'klɩ wii ‑bɛ 'ü nö: «‑Taa nyɔɔlɔ nɔpɔ Nyɔsʋa!» 4 ‑Maa Jesu jrea' 'üa bobowli nɩ, 'ɔnya 'bete 'üün: «Dɛplɛɛ kä ‑gʋ 'a 'pala 'samaa bʋbɔwii 'ana plɛ 'klɩ le? 5 ‑Gbala nyɔɔ ‑maa ‹‑Na ‑balʋ 'a ‑mɩ cere›, ‑bɛ ‑a ‑gbala 'ɔɔn: ‹Sɔwʋ ‑a ‑nyɛɛ!› ‑Mɩ 'plɛɛ 'nyɩ 'lɩkla le? 6 ‑Maa 'amä 'saa jre 'sɩrɩ Nyɔɔa 'Jʋ† käläa' ‑tʋtʋ ‑gälɩ 'kamakʋ. 'Ɔ 'mrɛɛ 'ɔ cere ‑balʋ.»
'Ia ‑gʋ 'ɔ ‑gbala nyɔɔlɔ: «Sɔwʋ! Dɔrɔ ‑na 'wʋpidɛɛ 'wʋ, 'kä mö ‑gbööli!»
7 'Ɔnya sɔwʋ, 'ɔnya mi ‑gbööli. 8 ‑Jria 'lɩa nyüü 'jäa' 'imɩ nɩ, 'üa plɛklɩkala ‑bɛ 'ü 'bʋala Nyɔsʋalɔ ‑nyɩa' nyüü 'ia 'samaa 'kamakʋlʋ.
Jesu we Levii
9 Jesu nya mi. 'Ɔ mia' nɩ, 'ɔnya 'jä nyɔɔ 'doo, 'ɔ kʋ ‑plɩɩ 'lɩ 'ü 'pɛɛrɛa' dapoo, 'ɔ 'ü 'daraa' Matiö. Jesu nya we 'ɔɔn: «Ji 'nyraa ‑mɔ 'mä 'nyɛ!» 'Ɔ sɔa' 'wʋ, ‑gälɩ 'ɔ ‑mɛ 'ɔɔn.
10 'Pɩrɩgälɩ nɩ, Jesu jö ɩ dɛɛ nyuku ‑wälɩ, dapookälɩpɛrɛnyüü 'kɔkɔmlɛ nyra ‑balʋnyüü ‑mölöö nya ji; 'üü ‑bɛ Jesu nyra 'ɔa 'wʋnyɛrɛnyüü nya tara 'wʋ. 11 Farisinyüü 'jäa' 'üün nɩ, 'ünya 'bete 'ɔa 'wʋnyɛrɛnyüü ‑maa: «Dɛplɛɛ kä ‑gʋ 'ana 'kpɩkpɩanyɔɔ nyra dapookälɩpɛrɛnyüü nyra ‑balʋnyüü ‑mölöö tara 'wʋ le?»
12 Jesu 'nua' 'iin 'wli nɩ, 'ɔnya ‑gbala 'üün: «Nyüülü kä fugbë 'naa' nɩ, ‑mää 'üün 'nyɩ mi ‑dɔta 'lɩ; ‑maa ‑wusublanyüü, 'üü mö 'lɩ. 13 'Ba mi 'ba 'bata ‑taa wiili kʋa' ‑pɩa ‑gbaa: ‹Nyatɛplɛ 'n 'bata, ‑maa ‑mää ‑gbɔ 'sasakʋ 'nyɩ 'bata†.› 'Nyɩ nyüülü ‑gäa' 'klɩ wekalɩ ‑a ji, ‑maa ‑balʋkänyüü 'n ji we 'ümä ‑balʋ 'pie.»
Jesu nyra sua papakʋ
14 Jrüü 'doo 'lɩ nɩ, Jaan a 'wʋnyɛrɛnyüü ji Jesu 'bete: «Dɛplɛɛ kä ‑gʋ amɔ ‑bɛ Farisinyüü pa su 'plɔʋplɔʋ ‑bɛ ‑na nyüü 'nyɩ pa su le?» 15 Jesu nya ‑gbala 'üün: «Nyɔɔ ma 'ti ‑bɛ üma 'brere 'ɔɔn 'klɩ nɩ, 'kä 'ɔa ‑mülü bäa' 'ɔɔn ‑gba nya 'kpɔɔ? ‑Maa jrüülü kä 'mlɩ 'ümäa' 'ɔɔn 'üa ‑tɔrʋpɩɔ 'ba nɩ, 'bala 'ia jrüülüa 'mlɩ nɩ, 'ünya su paa. 16 Nyɔɔ 'nyɩ nʋ dapɛ dëdrä 'ɔnyɩ 'pa dafʋ 'pakɩ ‑a. Ɔma nʋ 'imɩ nɩ, dapɛ dëdrä nya dafʋlʋ 'ŋlaraa, 'kä 'ua 'ŋlarakʋ nya 'wlisie. 17 'Asɩ nyɔɔ 'nyɩ 'pa bɩa ‑duvɛɛn 'jɩjarɛ 'klɩbɩa mlafikpalë 'lɩ ‑a. Ɔma nʋ 'iin nɩ, ‑duvɛɛn 'jɩjarɛ nya 'kpalëlë wa wa, 'kä ‑duvɛɛnlɛ nya 'kägblɔɔ, 'kä 'kpalëlë nya bʋblɔ. Mlafikpalë dëdrëa 'mlɩ 'ü 'paa ‑duvɛɛn 'jɩjarɛ, 'ia 'taɩn 'lɩ 'ia 'sɔɔ 'nyɩ bʋblɔ bʋblɔ ‑a.»
'Ŋlʋʋlɔ Jesu 'pʋɔa' nyra 'ŋlëkayrialɔ jäa' ‑bɛ Jesu tɛrɛa' 'kä
18 Jesu 'pala ɩ nyüü wii ‑gba ‑bɛ 'kamanyɔɔ 'doo ji 'ɔa 'klɩ kotifli 'pala, ‑bɛ 'ɔ bibie 'ɔmɩ: «'Na 'ŋlëkayria jä ‑plɩɩ 'köklesa. Ji ‑a ‑piie 'ɔɔn klʋgbë ‑gälɩ 'ɔmä 'kätɛ.» 19 Jesu nya sɔwʋ 'ɔɔ ‑bɛ 'ɔa 'wʋnyɛrɛnyüü nya ‑mɛ nyɔɔlɔ ‑gälɩ.
20 'Ŋlʋʋ 'doo bä ɩ ‑plɩɩ, ‑toru 'ciea' 'ɔɔn 'lɩ 'ia ‑sɩ ‑pʋ ‑sɩ 'sɔɔ. 'Ɔnya ja Jesua dɛrɩ 'ɔnya ‑fɛ 'ɔa 'lɩpadɛɛa 'mäklɩ ‑gba. 21 'Be 'ɔa plɛklɩ 'ɔ nɩnɩa: «Ama nya ɩ dɩɛ 'ɔa 'lɩpadii ‑gbafɛ, 'nyaa 'pʋa!» 22 Jesu nya ‑siekälɩ, 'ɔ 'jäa' 'ɔɔn 'ɔ ‑nëmä: «'Na 'ŋlëkayria, 'pa ‑na nyufa 'klü 'lɩ! ‑Na nyɔsʋaplɛtorokʋ 'a ‑mɩ 'pʋɔ.» 'A ‑plɩɩ 'ŋlʋʋlɔ kʋ dotro 'ɔnya 'pʋ. 23 Jesu 'tɔa' 'wliklɩanyɔɔlɔa ‑gbööli nɩ, 'ɔ jrä 'lɩ ‑gbaprʋkɔbönyüü nyra 'wuwunyüü, 24 'ɔnya ‑gbala 'üün: «'Ba sɔ ‑plɩɩ! 'Ŋlëkayrialɔ 'nyɩ jä ‑a jä, 'mʋmɔ 'ɔ 'mʋmɔ!» Nyüü ‑gölöa' srörö 'ü srörö 'ɔmɩ. 25 'Ɔ bea' nyüülüa 'fɩɔ ‑fälɩ nɩ, 'ɔnya pa ‑plɩlɩ 'ŋlëkayrialɔ 'pia', 'ɔnya 'kpla 'ɔa 'darʋ, 'ŋlëkayrialɔ nya sɔwʋ. 26 'Ia wiili nya ‑gbaala ‑tʋtʋa 'fɩɔa ‑gälɩ 'kä.
'Nɔnɔnyüü 'sɔɔlü Jesu 'pʋɔa'
27 Jesu sɔa' nyɔɔlɔa ‑nyɛɛ ‑bɛ 'ɔ möa' nɩ, 'nɔnɔnyüü 'sɔɔ prɛ 'ɔɔn dɛrɩ ‑bɛ 'ü we ‑gböösa: «Daviidëa 'Jʋ, 'jä ana nyatɛrɩ!» 28 Jesu 'tɔa' ‑gbööli nɩ, 'ünya jijrö 'ɔɔn ‑gba. Jesu nya 'bete 'üün: «'A boboa' 'n 'mrɛɛ ‑a nʋ wiili 'a 'bataa'?» 'Iibäa' nyüülü: «‑Yɛɛ! 'Pläkänyɔɔ.» 29 Jesu nya ‑fɛ 'üa 'nyü ‑gba, 'ɔnya ‑gbala 'üün: «Wiili 'a 'bataa' i nrörö 'sɩrɩ 'ana nyɔsʋaplɛtorokʋ bäa'!» 30 'Ünya 'jäkä. Jesu nya ‑flɔɔrɔ 'üün 'nyüa 'mlɩ 'ɔnya ‑gbala 'üün ‑maa: «'Amɔ 'n ‑gbala, nyɔɔ 'doo 'nyɩ jre wiili nröröa' 'plɔʋ!» 31 ‑Maa 'ü 'ciea' dotro, 'ü 'pala Jesua ‑gä 'ia ‑tʋtʋlʋa 'fɩɔ ‑gälɩ.
Jesu prɛ domoolɔ kaa' nyɔɔ 'dooa 'mä
32 'A 'cie Jesu 'cie ɩ ‑bɛ nyüü ja 'ɔɔn nyɔɔ 'doo kä 'mä domoo kaa'. 33 Jesu prɛa' domoolɔ dotro, nyɔɔlɔ nya 'pawii. 'I kalaa' nyüüa 'fɩɔ plɛklɩ nɩ, 'ü ‑nëma: «'Samaa wii ‑kaapɩɔ ‑tɛklɩ Israɛɛlë jrä!» 34 ‑Maa Farisinyüü ‑nëma: «Domüüa 'cifi 'ɔ ‑srörö kälɩ ‑bɛ 'ɔ prɛ domüü!»
Jesu 'jäa' ‑jria
35 'I ‑sia' nɩ, Jesu mö bätë jie nyra bätë kpaküa 'mlɩ ‑bɛ 'ɔ 'kpɩa nyüü 'üa 'sraaplanyëkaa ‑wälɩ, 'ɔ 'sara 'lɩ 'üün 'Kamapläa 'Mʋfagogo, ‑bɛ 'ɔ ‑futo nyüüa ‑wusua 'fɩɔ nyra 'üa mɩmɩakʋa 'fɩɔ.
36 'Ɔ 'jäa' nyüü 'kɔkɔmlɛa ‑jria, 'üa nyatɛrɩ nya ‑sie 'ɔɔn 'wli, 'üa sɩsɩakʋ nyra 'üa 'klüa 'lɩjäjäkʋa ‑gʋ. 'Ü ‑beere ‑bablëëlë 'nyɩa' ‑gbanyɛrɛnyɔɔ kä. 37 'Ii känyrɩ 'ɔnya ‑gbala 'ɔa 'wʋnyɛrɛnyüü: «Putulu nëmäa' 'bölö, 'u 'bʋa ‑maa 'ua 'böbönyüü 'nyɩ ‑sümlö ‑a ‑sümlö. 38 'Ii känyrɩ, 'ba bibie Nyɔsʋa ɔ bäa' putukänyɔɔ, 'ɔmä 'jrʋpafɛnyüü ‑mölöö ja, 'ümä ji 'ümä 'uun 'bö.»