Nyüüpʋnyüüsɔɔlü Jesu 'baa' 'lɩ
10
1 Jesu nya we 'ɔa 'wʋnyɛrɛnyüü nyüüpʋnyüüsɔɔ, 'ɔnya ‑nyɛnyɛ 'üün ‑gälɩkamladɛɛ 'ümä ‑frepasisi prɛ, ‑bɛ 'ümä ‑wusua 'kaɩn 'kaɩn nyra ‑nɩarakʋa 'fɩɔ ‑futo.2 ‑Jää apotrë ‑pʋ ‑bɛ 'sɔɔlüa 'nyrɩ: 'klɩsaa nɔ 'ü 'dara Simɔɔ, 'ɔɔ 'ü 'dara bɩa Piɛɛrë, nyra 'ɔa ‑wlajʋ 'ü 'daraa' Andree, nyra nyɔɔlɔ 'ü 'daraa' Sebedee, 'ɔa 'jü Jaakë nyra 'ɔa ‑wlajʋ Jaan, 3 Filipë, Batëlemii, Tomaa, Matiölɔ 'ü 'pɛrɛa' dapoo kälɩ, Jaakë Alëfeea 'jʋ, nyra Lebeelɔ 'ü 'daraa' Tadee†, 4 nyra Kananyɔɔ† 'ü 'daraa' Simɔɔ, ‑a ‑paalɩ Judaa Isëkariolɔ 'mäa' Jesu 'sa.
Nyüüpʋnyüüsɔɔlü Jesu blɔa' nyɔsʋajrʋpa 'lɩ
5 'A nyüüpʋnyüüsɔɔlü Jesu blɔa'. ‑Jäsɩ 'ɔ ‑gbalaa' 'üün: «'Anyɩ fa nyüülü 'nyɩa' juifë bä 'üa ‑nyɛɛ; 'anyɩ pa bɩa Samariinyüüa bätëa 'mlɩ.
6 «‑Maa Israɛɛlëa nyüülü 'mɔlɔa' ‑beere ‑bablëë, 'üa ‑nyɛɛ 'ba mi.
7 «‑Plɩɩlɩ kä 'fɩɔ 'a nëmäa' ‑srörö nɩ, 'ba ‑gbala nyüü ‑maa: ‹Cɛɩɩa 'kamaplä 'a 'amɩ ‑gbajijrö.› 8 'Ba 'pʋɔ ‑wusublanyüü, 'ba tɛrɛ jäjänyüü 'kä, 'ba ‑futo nyüülü 'jrʋ 'klaaa', 'ba prɛ bɩa domüü. 'Flɛɛlɩ 'a 'jä 'ia 'klülü, 'ii känyrɩ 'ba ‑fɛ bɩa 'ia 'jrʋpalä 'flɛɛlɩ.
9 «'Anyɩ fa ‑sika, 'anyɩ fa 'pɔlɔsika nyra mölii 'ana keiwaa 'mlɩ; 10 'anyɩ fa sakɔsʋ, 'anyɩ fa 'koti 'sɔɔ, 'anyɩ fa 'sii nyra 'sɩsɩa; 'be 'jrʋpafɛnyɔɔ kä 'ɔmä dɛɛji.
11 «Bätä o bätä kä 'mlɩ 'amäa' pa nɩ, 'ba 'bata 'cɩcanyɔɔlɔ 'mäa' 'amɩ 'lɩkʋɛɛ; 'ii 'ba kʋ kʋ 'kä 'a 'cie bätäläa 'mlɩ.
12 «'Ama pa nyukua ‑wälɩ nɩ, 'ba 'trɛɛ; 13 ‑gbööläa nyüü ma bä 'cɩcanyüü nɩ, üma 'kʋɛɛlɩ 'amɩ nɩ, 'ba bibie 'üa 'wli 'lɩ plɛgälɩflɛrɛkʋ 'mä 'üa ‑gbööli bä. ‑Maa 'üma 'nyɩ 'cɩcanyüü ‑a bä, ‑bɛ 'üma 'nyɩ 'lɩ 'amɩ ‑a 'kʋɛɛ nɩ, abɩa 'ana mlɩa wii 'blöö 'amɩ bei 'wʋ dɛrɩ.
14 «‑Maa nyüü ma 'nyɩ 'lɩ 'amɩ ‑a 'kʋɛɛ, ‑bɛ üma 'nyɩ po 'amɩ 'nyakli ‑a nɩ, 'ba 'cie ‑gböölä 'aiɛ bätäläa 'mlɩ, 'kä 'a ‑gbɔplɔ 'lɩ 'ana bökli ‑wälɩa ‑tʋtʋ†. 15 'Cɩcasa 'n ‑gbala 'amɩ, jrüülü kä 'mlɩ Nyɔsʋa 'mäa' ‑gä ‑tʋ nɩ, Sodɔɔmë nyra Gomɔɔrëbätäa ‑gä ‑nëmä dɛɛ ‑a bä 'kä 'ia në bätäläa ‑gʋ.
‑Sʋɩlɩ 'mäa' ji
16 «'Ba mi! Blɔ 'n blɔ 'amɩ ‑beere ‑bablëëjü bä 'klʋɛɛa ‑fäa ‑tɔrʋpɩɔ. 'Ia ‑gʋ 'ba ‑tre 'ana nyüfë ‑beere ‑trii ‑bɛ 'ba 'wlalɩkä ‑beere ‑sögü.
17 «‑Maa 'ba ‑gäälä 'ana nyüfë 'nyiöli nyüüa ‑gʋ. 'Ünya 'amɩ juifëa tropina 'lɩa nyüü kälɩ 'saraa, 'kä 'ünya 'amɩ ‑gbalɛfi ‑gälɩgbagba 'üa 'sraaplanyukua ‑wälɩ. 18 'Ünya 'amɩ ‑gʋmlanyüü nyra 'kɩɩɩ 'klɩ faa 'na ‑gʋ. ‑Bɛ 'üa 'klʋɩ, 'üü ‑bɛ nyüülü 'nyɩa' juifënyüü bä, 'amä 'üün 'cɩcasalä 'a 'järäa' 'mɩ 'lɩ ‑gbala. 19 'Taɩn 'lɩ 'ümäa' 'amɩ 'sakalɩ fa nɩ, 'ana plɛ 'nyɩ ‑taaralɩ wiili 'a nëmäa' 'pa 'ia ‑gʋ. 'Papawii nya 'amɩ ‑nyɛɛrɛa 'ia ‑gliiilɛa 'mlɩ. 20 ‑Mää 'ana 'mʋgbɛ ‑nëmä 'iin 'pa, 'ana Tʋa ‑Susu nëmä 'amɩ 'iin mlɩ 'pa.
21 «‑Wlajʋ nya ‑wlajʋ ‑moloo jäjä mlɩ 'saraa, tʋ nya 'ɔa 'jʋ 'saa; 'jü nyra 'üa tʋɩɩ nya 'wlitotroa, 'kä 'ünya 'üün 'bla†. 22 Nyüüa 'fɩɔ nëmä 'amɩ 'nyüamlɩjraraa 'na 'nyrɩa ‑gʋ, ‑maa nyɔɔlɔ ‑nëmäa' 'iin 'klɩfɔlɔ, ɔmäa' 'ia bɩarafa 'wʋ 'tɔ nɩ, 'ɔnya 'lɩmlɩwʋa.
23 «Üma nʋ 'amɩ ‑gbigba bätälä kä 'mlɩ 'a bäa' nɩ, 'ba sɔ 'lɩ, 'ba mi bätä ‑mölööa 'mlɩ; 'cɩcasa 'n ‑gbala 'amɩ: 'a ‑nëmä Israɛɛlëa bätëa 'fɩɔa 'mlɩ ‑srörökʋ ‑a bɩa 'kä Nyɔɔa 'Jʋ nya ji.
24 «‑Sukujʋ 'nyɩ 'ɔa 'kpɩkpɩanyɔɔ 'wʋ ‑a ‑si, 'asɩ 'jrʋpafɛnyɔɔ 'nyɩ bɩa 'ɔa 'kamanyɔɔ 'wʋsi. 25 'I 'na 'kä ‑sukujʋ 'mä 'ɔa 'kpɩkpɩanyɔɔ ja, ‑bɛ 'jrʋpafɛnyɔɔ 'mä bɩa 'ɔa 'kamanyɔɔ ja. ‑Bɛ 'ü werea' nyukukänyɔɔ Bɛlësebuulë nɩ†, ‑asɩ 'ü ‑nëmä 'ɔa nyuku ‑wälɩa nyüü ‑jejre le?
Nyɔɔlɔ a käa' amäa' pɩ
26 «'Ii känyrɩ 'anyɩ pɩ 'üün, 'be diili kä 'fɩɔ ‑sisiea' nya 'wʋcrɛrɛa, ‑bɛ wiili 'nyɩa' 'lɩsara nya jrerea. 27 Wiili 'n ‑gbalaa' 'amɩ 'jöjrüükpü 'lɩ nɩ, 'ba 'pala 'iin ‑srɩ 'klɩ; ‑bɛ wiili 'ü ‑ŋuŋloa' 'amɩ nɩ, 'ba 'pala 'iin ‑fälɩ. 28 'Anyɩ pɩ nyüülü 'blaaa' 'jajɛa 'doo, ‑bɛ 'ünyɩa' 'lɩbɩa 'ümäa' ‑gälɩa ‑susu 'bla. Nyɔsʋaa pɩpɩkʋ ‑siwʋ, 'ɔɔ 'mrɛɛ ɔ be 'jajɛ nyra ‑gälɩa ‑susu kapulu 'nyɩ 'nyrɔlɔa' 'plɔʋa 'mlɩ. 29 Nyɔɔ 'nyɩ 'pa 'fɩfɩɛ ‑jie 'sɔɔ 'perua ‑flaaeji 'deea ‑gʋ ‑a? ‑Maa 'asɩɛ 'üa ‑tɔrʋpɩɔa 'doo 'nyɩ blöblö ‑a 'kä 'ana Tʋ 'nyɩ jre 'iin. 30 'Ŋueili bäa' 'nɩmɩ 'ana 'wli, ‑srülü 'i bäa' 'ɔ jre 'ia 'fɩɔ. 31 'Ia ‑gʋ, 'anyɩ kä ŋalɛ, 'be 'a ‑si 'fɩfɩɛ ‑jie 'kɔkɔmlɛ 'wʋ.
32 «Nyɔɔ o nyɔɔ 'mäa' 'mɩ jre nyüüa 'klɩ nɩ, 'na 'mʋgbɛlɔ nɩ, 'nyaa 'ɔɔn jrea 'na Tʋlɔ bäa' cɛlɩ, 'ɔa 'klɩ. 33 ‑Maa nyɔɔ o nyɔɔ 'mäa' 'daa 'ɔnyɩ 'mɩ ‑a jre nyüüa 'klɩ nɩ, 'na 'mʋgbɛ, 'nëmä bɩa 'ɔmɩ ‑a jre 'na Tʋlɔ bäa' cɛlɩ, 'ɔa 'klɩ.
Jesua ‑gʋ nyüü 'bölötɩa
34 «'Anyɩ bobo ‑maa 'wlinönrökʋ 'n ja ‑tʋtʋ ‑gälɩ. 'Nyɩ 'wlinönrökʋ ‑tʋtʋ ‑gälɩ ‑a ja, ‑maa ‑jɛrɛ 'n ja. 35 Ji 'n ji nyüü 'mä ‑tɩabölö: \qt Tʋ ‑bɛ 'ɔa nyɩbɛjʋ ‑nëmä 'wli ‑a 'nönrö, 'ŋlëkayriajʋ nyra 'ɔa 'yio ‑nëmä 'wli ‑a 'nönrö, 'kä 'jʋa 'ŋlʋʋ nyra ŋʋtayio ‑nëmä 'wlinönrö. 36 Ana ‑gböölia nyüü nëmä ana 'nyüamlɩjraranyüü bä†.\qt*
'Sɩrɩ Jesua 'wʋnyɛrɛnyüü käa' 'ümäa' bä
37 «Nyɔɔlɔ ‑waa' 'ɔa tʋ 'aiɛ 'ɔa 'yio, ɔ ‑sia' 'mɩ 'wʋ nɩ, 'ia nyɔɔlɔ 'nyɩ 'mɩ 'klɩ ‑a 'wʋ. ‑Bɛ nyɔɔlɔ ‑waa' 'ɔa nyɩbɛjʋ 'aiɛ 'ɔa 'ŋlëkayria ɔ ‑sia' 'mɩ 'wʋ nɩ, 'ia nyɔɔlɔ 'nyɩ bɩa 'mɩ 'klɩ ‑a 'wʋ. 38 Nyɔɔlɔ 'nyɩ ‑gbötöa' 'ɔa krʋa† ‑bɛ ɔ 'daaa' 'ɔmä 'mɩ dɛrɩprɛ nɩ, 'ɔnyɩ 'mɩ 'klɩ ‑a 'wʋ. 39 Nyɔɔlɔ 'bataa' 'ɔa 'kläa ‑wälɩtʋtʋkʋ, 'ɔnya 'ään 'mɔlɔa. ‑Maa nyɔɔlɔ 'mɔlɔa' 'ɔa 'klä 'na ‑gʋ nɩ, 'ɔnya 'ään 'jäa.
Nyɔɔ ma 'kʋɛɛlɩ 'amɩ, 'mɔɔ 'ɔ 'kʋɛɛlɩ
40 «Nyɔɔ ma 'kʋɛɛlɩ 'amɩ nɩ, 'mɔɔ 'ɔ 'kʋɛɛlɩ; ‑bɛ nyɔɔ ma 'kʋɛɛlɩ 'mɩ nɩ, nyɔɔlɔ blɔa' 'mɩ, 'ɔɔ 'ɔ 'kʋɛɛlɩ. 41 Nyɔɔlɔ 'kʋɛɛa' 'lɩ nyɔsʋaamlɩpalanyɔɔ 'ɔa nyɔsʋamlɩpala 'jrʋpaa ‑gʋ nɩ, nyɔsʋaamlɩpalanyɔɔa 'sa 'ia nyɔɔlɔ 'mä 'pɛrɛ. ‑Bɛ nyɔɔlɔ 'kʋɛɛa' 'lɩ 'klɩgänyɔɔ, 'ɔa 'klɩgäjrʋpaa ‑gʋ nɩ, 'klɩgänyɔɔa 'sa 'ia nyɔɔlɔ 'mä 'pɛrɛ. 42 Nyɔɔ o nyɔɔ nëmäa' ‑taa 'jülü kʋa' ‑pɩa ‑tɔrʋpɩɔa 'jʋ 'doo 'mamlanɩa ‑glasɩ 'deedee ‑nyɩ, 'kä 'na 'wʋnyɛrɛnyɔɔ 'ɔ bäa' 'ia ‑gʋ nɩ, 'cɩcasa 'n ‑gbala 'amɩ, 'ia nyɔɔlɔ nya 'pɛɛrɛa 'mʋfagbili 'ɔ nʋa' 'ia ‑gʋ.»