'Pʋablakusroŋlʋʋ
21
1 Jesu nya dɔrɔ 'wli 'wʋ, ‑bɛ 'ɔ tɛ 'bɩɔjinyüü 'klɩ, ‑bɛ 'ü 'pa 'pa mölii ‑plɩɩlɩ 'ü 'pɛɛrɛa' nyɔsʋamölii. 2 'Ɔnya 'jä bɩa 'pʋablakusroŋlʋʋ 'doo, 'ɔnya 'palɩ möliieju 'sɔɔ†. 3 'Ɔ ‑nëma nɩ: «'Cɩcasa 'n ‑gbala 'amɩ, 'pʋablakusroŋlʋʋlɔ kʋa' ‑pɩ, 'ɔɔ 'sa mölii 'ɔnya ‑si 'üa 'fɩɔwʋ; 4 'be ‑mülü kä 'fɩɔ 'paa' ‑tɛ nyɔsʋamölii nɩ, 'a ‑mɩlɩ tɩɔrɔa' 'lɩ ‑gälɩ nɩ, 'ii 'ü ja. ‑Maa 'ɔɔlɔ nɩ, dɛɛlɛ tɩɔa' 'lɩ 'ɔɔn 'ɔmäa' dɛɛji, 'ɛɛ 'ɔ 'sa.»Jerusalɛɛmëa ‑gbogblookʋ nyra Nyɔɔa 'Jʋa dɛrɩböblöökʋ
5 'Ia 'taɩn 'lɩ nɩ, nyüü ‑mölöö bä ɩ 'üa ‑tɔrʋpɩɔ 'ü 'paa Nyɔsʋaanyuku kpakua ‑gä. 'Ü nɩnɩa 'täkëlë 'ü nʋa' ‑bɛ 'ü 'paa nyukulu, nyra diili nyüü 'saa Nyɔsʋaa 'nyrɩklɩ nɩ, 'i 'na 'mʋfasa. Jesu nya ‑gbala 'üün: 6 «Diili 'a tɛa' 'klɩ nɩ, jrüü nya jia, nyukupatäkä 'döö ‑nëmä 'döö ‑gälɩ ‑a tɩɔ; 'üa 'fɩɔ nya ‑gbloooa.» 7 'Ünya 'bete 'ɔɔn: «'Kpɩkpɩanyɔɔ, ‑gbala amɩ 'taɩn 'plɛɛ 'lɩ 'imä 'lɩjrä le, ‑bɛ ‑asɩ anya 'iin jre 'sɩrɩ 'ia 'fɩɔ 'mäa' nrörö le?»
8 'Ɔ ‑nëma: «'Ba ‑tre 'ana nyüfë! Nyɔɔ 'nyɩ 'pa 'amɩ mlüülɩ. Nyüü 'kɔkɔmlɛ nya 'na 'nyrɩ jaa 'kä 'ünya 'daa: ‹'Mɔɔ bä 'ɔɔn,› ‑bɛ: ‹'Taɩn 'a 'wlijrä!› 'Anyɩ prɛ 'üün dɛrɩ! 9 ‑Srɩ 'lɩ 'ümäa' 'amɩ ‑gbala ‑maa tou ‑flooro, 'crɛ 'a 'wʋsɔ nɩ, 'ana plɛ 'nyɩ ‑gbakä; 'i kä 'imä 'lɩjrä ‑kätɩ, ‑maa ‑mää 'pläa bɩarataɩn ‑kaaŋlʋ 'saabä.» 10 'Ɔnya ‑gbala 'üün: «‑Glügbö ‑bɛ ‑glügbö nya 'wlitotroa, 'kɩɩɩ ‑bɛ 'kɩɩɩ nya 'wlitotroa; 11 ‑tʋtʋ nya ‑pɩɔ 'kɔkɔmlɛ tɩtrɛa; ‑gbëka nyra ‑wusu nya paa. ‑Bɛ wii kpakülü bäa' ŋalɛ 'wʋ nya jia, ‑saragbia tie kpakü nya cɛa 'mlɩ nröröa.
Nyɔsʋa nya 'ɔa ‑glügbö ‑gbajia
12 «‑Maa 'ia 'fɩɔlʋ ma nëmä 'lɩjrä nɩ, 'ünya 'amɩ 'kplaa, 'ünya 'amɩ juifëa 'sraaplanyukua 'wliklɩa nyüü 'klɩ faa, 'kä 'ünya 'amɩ ‑jie 'lɩ 'pa. 'Na 'nyrɩa ‑gʋ, 'ünya 'amɩ 'kɩɩɩ nyra 'cifu 'klɩ faa. 13 'Ii nëmä 'amɩ 'tuto 'amä 'üün 'cɩcasalä 'a 'järäa' 'mɩ 'lɩ ‑gbalaa. 14 'Ia 'taɩn 'lɩ nɩ, 'ba ‑tʋ 'ana plɛklɩ wiili kʋa' ‑pɩ: 'anyɩ kä ‑a kä 'amä 'ana plɛklɩ wiili 'amäa' 'lɩsa ‑ëlere. 15 'Be 'mɔɔ nëmä 'ana mlɩ wii 'pa; 'mɔɔ nëmä 'amɩ 'lɩgaglakʋ ‑nyɩ. 'Ana 'nyüamlɩjraranyüüa 'fɩɔ ‑nëmä 'amɩ ‑a du 'papawii 'lɩ, 'ü ‑nëmä 'amɩ 'klɩ ‑a 'nyüglö. 16 'Ana tʋɩɩ nyra 'ana 'yioɩɩ, 'ana ‑wlajü, 'ana nyüüa 'fɩɔ nyra 'ana ‑gbötümü nya amɩ 'saa. 'Ünya 'kɔkɔmlɛ 'blaa 'ana ‑tɔrʋpɩɔ. 17 Nyüüa 'fɩɔ nëmä 'amɩ 'nyüamlɩjraa 'na 'nyrɩa ‑gʋ. 18 ‑Maa 'ana 'wlia 'ŋueieji 'dee ‑nëmä 'mɔlɔ ‑a 'mɔlɔ. 19 'Ii känyrɩ 'a 'nɩ fɔlɔ 'iin 'klɩ: 'asɩ 'anya 'lɩmlɩwʋ.
Jerusalɛɛmëa ‑gbogblookʋ
20 «‑Srɩ 'lɩ 'amäa' Jerusalɛɛmë 'jä ‑bɛ 'sʋgɩa 'mäa' 'ään 'klɩtrara nɩ, 'ba jresaa 'äa ‑gbogblootaɩn 'a 'lɩjrä. 21 ‑Mülü 'mäa' Judee bä, ü fɔlɔ 'dʋgbë 'lɩ; ‑mülü 'mäa' Jerusalɛɛmëa ‑tɔrʋpɩɔ bä, 'kä 'ü sɔ 'lɩ; ‑mülü 'mäa' pütia 'lɩ bä, 'ünyɩ ji bätä. 22 'Be 'ia jrüülü bä Nyɔsʋaa 'crɛa 'kpasajrü, 'kä wiili ‑jɩjraa' 'mä nrörö†. 23 'Ia ‑srɩ 'lɩ ‑nëmä nʋgblaŋlëgë nyra ü 'nyaaa' 'jü kälɩ ‑a 'nara. ‑Sʋɩ kpakü nya ‑tʋtʋlʋa ‑gälɩ bäa. Nyɔsʋaa nya 'ɔa 'crɛ ‑glügbölä ‑gälɩ 'sɔrɔa. 24 Nyüülü 'nyɩa' juifë bä nya ‑jɛrɛ nʋa 'kä 'ünya nyüü ‑mölöö 'blaa 'üa ‑tɔrʋpɩɔ, 'kä 'ünya ‑mölöö toua 'jienyüü 'lɩnrörö 'blɩa 'fɩɔ ‑gälɩ, 'kä nyüülü 'nyɩa' juifë bä nya Jerusalɛɛmë 'käwawla wawla, 'kä jrüülü Nyɔsʋa ‑nyɩa' 'üün nya 'wlijrä.
25 «‑Saragbia tie nya 'jrʋa 'klɩ nröröa, 'inya ‑seple nyra ‑särëa 'mlɩ nröröa 'kä 'inya 'amɩ plɛklɩ kalaa†. ‑Bɛ ŋalɛ nya ‑glügbüa 'fɩɔ 'blaa ‑gböösa, 'sɩrɩ 'ümäa' nʋ 'ü ‑nëmä 'iin ‑a jre, 'tanie nyra 'ɛa dakëa ‑yrɛa ‑gʋ. 26 Nyüü ma bobo wiili nëmäa' 'lɩjräa ‑gä, 'ünya böblöa ŋalɛa ‑gʋ, 'be cɛa 'mlɩa 'klü nya 'kädögöa. 27 'Ia 'taɩn 'lɩ, 'ünya Nyɔɔa 'Jʋ ‑gbru ‑gälɩ 'järäa ‑bɛ 'ɔnya ji†, 'ɔ ‑bɛ 'ɔa 'klü nyra 'wliklɩa 'bʋabʋakʋ. 28 'Ia wiili ma cɛtɛ jijikʋ nɩ, 'ba ‑sɔɔrɔwʋ, 'kä 'a dɔrɔ 'wli 'wʋ, 'be 'ana 'lɩmlɩbabakʋ jö.»
‑Ëlerekʋ
29 'I ‑sia' nɩ, 'ɔnya 'pala 'üün tapönänä 'klɩ 'ɔ ‑nëma: «'Ba 'jä figietuu, nyra tii ‑mɩdooa 'fɩɔ: 30 'ama 'jä 'ia 'napɩ ima ‑ga, 'a jre 'iin 'sɩrɩ 'ia tʋtʋ 'taɩn 'a 'lɩjrä. 31 'Asɩ 'ama 'jä 'ia wiili, ima jrälɩ nɩ, 'ba jresa Nyɔsʋaa 'kamaplä ‑kanyɩ 'lɩdɛrɩ ‑a tʋŋlɔ. 32 'Cɩcasa 'n ‑gbala 'amɩ: ‑taa nyüüglügbölä kʋa' ‑pɩa 'fɩɔ ‑nëmä bɩa ‑a bɩa 'kä 'ia 'fɩɔ nya 'lɩjrä. 33 Cɛ nyra ‑tʋtʋ nya ‑sia, ‑maa 'na mlɩa wii ‑nëmä ‑si ‑a ‑si 'plɔʋ. 34 'Ba ‑tre 'ana nyüfë jijria 'wlisierekʋ 'lɩ, 'nʋa 'mamlakʋ 'lɩ, ‑tʋtʋ ‑gälɩa wiia bobokʋ 'nyɩ 'si 'ana 'wlia 'mlɩ, 'a ‑pɩ 'ia 'mlɩ kʋ ‑bɛ 'ia ‑srɩlɩ ‑pɩ 'amɩ ‑wälɩfu, 35 'be 'inya ‑beere ‑tata, 'änya nyüülü kä 'fɩɔ bäa' ‑tʋtʋ ‑gälɩ blöa. 36 'Ia ‑gʋ, 'ba ‑tre 'ana nyüfë, 'ba bibie Nyɔsʋa 'amä 'cɩcanyüü bä, 'amä 'ia wiili kä 'fɩɔ 'mäa' 'lɩjrä mlɩ 'wʋ, ‑bɛ 'amä Nyɔɔa 'Jʋ 'klɩ 'nyüglö.»