Jaan Batiisëa jäjäkʋ
14
1 'Ia 'taɩn 'lɩ nɩ, 'kɩɩlɔ† 'ü 'daraa' Erɔɔdë, 'ɔɔ ma 'kama Galileea ‑tʋtʋ. 'Ɔnya 'nu Jesua 'nyrɩ 'wli. 2 'Ɔnya ‑gbala 'ɔa 'jrʋpafɛnyüü: «Jaan Batiisë bäsaa; 'kuaabre 'ɔ 'sɔa' 'ia 'klü 'ɔ 'klaa ‑bɛ 'ɔ nö ‑saragbi!»3 'A Erɔɔdëlɔ 'ɔɔ 'nyüglö kä Jaan, 'ɔa ‑wlajʋ Filipëa 'ŋlʋʋ Erɔdiadëa ‑gʋ. 4 'Be Jaan ‑gbala kä 'ɔɔn ‑maa: «‑Nyɩ kä ‑a kä ‑mä Erɔdiadë ‑na 'ŋlʋʋ 'lɩnrörö.» 5 'A 'ia ‑gʋ Erɔɔdë 'bata ɔ 'bla Jaan, ‑maa nyüüa ŋalɛ 'bla 'ɔɔn, 'be 'üa 'fɩɔ 'dara Jaan nyɔsʋaamlɩpalanyɔɔ.
6 ‑Bɛ ‑srɩlɩ bäa' Erɔɔdëa ‑gloorosrɩa ‑glɩsɩglɩsɩ nɩ, Erɔdiadëa 'ŋlëkayria nya yɛrɛ nyüülü jia' 'klɩ. 'Inya kä Erɔɔdë 'tʋ, 7 'ɔnya 'sɔrɩ 'ɔnya ‑gbala 'ŋlëkayrialɔ: «'Betre 'mɩ dɛɛ o dɛɛ ‑baataa' 'lɩ, 'nyaa ‑mɩ 'ɛɛn ‑nyɩa.» 8 'Ŋlëkayrialɔa 'yio nya ‑gbala 'ɔa 'jʋ ɔ 'daa: «‑Nyɩ 'mɩ ‑pɩklɩ Jaan Batiisëa 'wli ‑pöööa 'mlɩ!» 9 'I pa 'kɩɩ ‑gba, ‑maa 'be tuponyüüa 'fɩɔa 'klɩ 'ɔnya 'pa kä wiili, 'ia ‑gʋ 'ɔ ‑nëma 'ü ja 'iin 'ŋlëkayrialɔ. 10 'Ɔnya blɔ nyüü ü 'bölö Jaan a 'wli ‑nyɛɛ ‑jienyüköli. 11 'Ünya ja 'ɔa 'wlili ‑pööö 'lɩ, 'ünya ‑nyɩ 'iin 'ŋlëkayrialɔ, 'ŋlëkayria nya ‑nyɩ 'iin 'ɔa 'yio. 12 Jaan a 'wʋnyɛrɛnyüü nya dɔrɔ 'ɔa jäjäa nɔ 'wʋ 'ünya fa 'ɔɔn 'ünya ‑tʋ 'ɔɔn. 'Ünya mi wiili ‑sia' Jesu 'lɩsarakalɩ.
Jesu 'fini nyüüa ‑diipʋ ‑diisɔɔ ‑glʋɩpʋ (5 000) 'klɩ
13 Jesu 'nua' 'iin 'wli nɩ, 'ɔnya 'jra ‑gɔlʋ 'lɩ 'ɔnya sɔ 'lɩ, 'ɔnya bereklɩ ‑aaga 'lɩ. ‑Maa nyüü 'kɔkɔmlɛ 'nua' 'iin 'wli nɩ, 'ünya 'cie 'ia bätëlë bä bäa' 'lɩ ‑gbaa 'mlɩ, ‑bɛ 'ü ‑gblaara 'nie 'ü ‑mɛɛɛ Jesu ‑gälɩ. 14 Jesu 'mä ‑gɔlʋ 'lɩ 'ciekalɩ mi nɩ, nyüü 'kɔkɔmlɛa ‑jria 'ɔ 'jä, 'üa nyatɛrɩ nya ‑sie 'ɔɔn 'wli. 'Ɔnya 'pʋɔ 'üa ‑wusublanyüü.
15 ‑Gbiaa 'jrʋ möa' ɔ nɩ, 'ɔa 'wʋnyɛrɛnyüü nya jijrö 'ɔɔn ‑gba, 'ünya ‑gbala 'ɔɔn: «‑Plɩɩlɩ a bäa' nɩ, ‑aaga 'lɩ bäsaa ‑bɛ 'taɩn 'a ‑si. ‑Gbala 'üün ü mi bätëa 'mlɩ 'ümä 'üa jijri ‑su.» 16 Jesu nya ‑gbala 'üün: «'Ünyɩ mi, 'amɔ 'ba ‑nyɩ 'üün jijri.» 17 'Ü ‑nëma: «Anyɩ dɛɛ ‑a 'klaa ima 'nyɩ 'flɔɔbü ‑gböö nyra ‑srü 'sɔɔ ‑a bä.» 18 'Iibäa' Jesu nɩ: «'Ba ja 'mɩ 'imɩ.» 19 'Ɔnya ‑gbala nyüü ü 'wawla 'sipi ‑gälɩ 'kä. 'Ɔ dɔrɔa' 'flɔɔbü ‑gböölü nyra ‑srü 'sɔɔlü 'wʋ nɩ, 'ɔnya 'jrara cɛ 'nyü 'kä 'ɔnya 'trɛɛ Nyɔsʋa. 'Ɔ bɩaa' Nyɔsʋaa 'tɛtrɛɛkʋ nɩ, 'ɔnya 'böblö 'flɔɔ nyra ‑srülü ‑tɩa, 'ɔnya ‑nyɩ 'iin 'ɔa 'wʋnyɛrɛnyüü 'ümä 'iin nyüülü 'lɩ ‑päälä. 20 'Üa 'fɩɔ nya jidɛɛ 'ünya dö. 'Ü ‑nyɩglaa' jijrili tɩɔa' 'lɩ 'kä nɩ, 'i 'sie dɔgbɩ ‑pʋ ‑bɛ 'sɔɔ! 21 Nyüülü jia' jijrili 'üa nyɩberüa 'kpɔ bä ‑diipʋ ‑diisɔɔ ‑glʋɩpʋa 'samaa dɛɛ (5 000), 'ŋlëgë nyra nyükue 'nyɩ 'lɩ 'mlɩ ‑a ‑täsrä.
Jesu 'nyɛrɛ 'nie 'klɩ
22 'Ii ‑sia' dotro Jesu nya kʋ 'ɔa 'wʋnyɛrɛnyüü 'klɩ ü 'jra ‑gɔlʋ 'lɩ, ü ‑ta 'nyʋfɔ ü 'pɩ 'nie ‑bɛ 'ɔmä nyüülü ‑gbala 'ümä 'üa ‑nyɛɛ mö mö. 23 Nyüü ‑gbagbaa' 'kä nɩ, 'ɔa 'doo 'ɔnya 'jra 'dʋgba 'wli 'ɔmä Nyɔsʋa bibie. ‑Gbia kaklaa' 'klɩ nɩ, 'ɔa 'doo bälɩ.
24 ‑Maa 'ia 'taɩn 'lɩ ‑gɔlʋlʋ bä ɩ 'niea ‑tɔrʋpɩɔ. 'Niea dakë sɩara 'üün, 'be ‑fʋflʋ 'jrara 'üün 'klɩ. 25 ‑Srɩkägbalawlaa 'jöjrüükpü ‑ka pa† Jesu nya 'nyɛrɛ 'nie 'klɩ, 'ɔnya mi 'üa 'pɛlɩ, 26 ‑bɛ 'wʋnyɛrɛnyüü 'jäa' 'ɔɔn ‑bɛ 'ɔ 'nyɛrɛa' 'nie 'klɩ nɩ, 'üa plɛɛ ‑gbakä ‑bɛ 'ü nö: «Papadɛɛ bäsaa!» 'Ünya 'kpö ŋalɛa ‑gʋ. 27 'A ‑plɩɩ Jesu kʋ dotro 'ɔnya ‑gbala 'üün: «'Ba 'pa plɛ 'mlɩ, ŋalɛ 'nyɩ 'bla 'amɩ, 'mɔɔ bäsaa.» 28 Piɛɛrë nya ‑gbala 'ɔɔn: «'Pläkänyɔɔ! Ima 'daa ‑mɔ nɩ, ‑gbala 'mɩ ‑a 'nyɛrɛ 'nie 'klɩ ‑a ji ‑na 'pɛlɩ!» 29 Jesu nya ‑gbala 'ɔɔn: «Ji!» Piɛɛrë nya 'cie ‑gɔlʋ 'lɩ, 'ɔnya 'nyɛrɛ 'nie 'klɩ 'ɔnya mi Jesua 'pɛlɩ. 30 ‑Maa ‑fʋflʋ ‑sɔɔrɔa' 'wʋ nɩ, ŋalɛ nya 'bla 'ɔɔn. 'Ɔ paa' 'nɩ ‑fli ‑bɛ 'ɔ möa' nɩ, 'ɔnya 'kpö ‑gböösa 'ɔ ‑nëma: «'Pläkänyɔɔ! 'Balɩ 'mɩ mlɩ!» 31 'Köklesaplɩɩ Jesu nya to 'ɔɔn 'darʋ 'klɩ, 'ɔnya 'kpla 'ɔɔn, 'ɔ ‑nëma: «‑Na nyɔsʋaplɛ 'nyɩ 'wʋ ‑a ‑sɔɔrɔ! Dɛplɛɛ kä ‑gʋ ‑na plɛ ‑pie 'lɩklɩ le?» 32 'Ü 'jraa' ‑gɔlʋ 'lɩ, ‑fʋflʋ nya 'nyüglö. 33 'Ii känyrɩ nyüülü bä ɩa' ‑gɔlʋ 'lɩ nya ji 'ɔa 'klɩ 'kägbegbre, ‑bɛ 'ü nö: «'Cɩcasa, ‑mɔ bä Nyɔsʋaa 'Jʋ!»
Nyüülü Jesu 'pʋɔa' Genesarɛtëa ‑tʋtʋ ‑gälɩ
34 'Ü 'pɩa' 'nie nɩ, Genesarɛtëa ‑tʋtʋ ‑gälɩ 'ü 'nyüglö. 35 'Ia nyüü ‑tʋa' Jesu 'nyü ‑gba, 'ünya blɔ nyüü ü ‑gbala wiili ‑tʋtʋ ‑gälɩa nyüüa 'fɩɔ. Nyüü nya ja 'ɔɔn 'üa ‑wusublanyüüa 'fɩɔ. 36 'Ü bibie 'ɔɔn ɔ 'cɛrɛ 'üün ‑wälɩ ü ‑fɛ 'ɔa 'lɩpadɛɛa 'mäklɩ ‑gba. Nyüülü kä 'fɩɔ ‑fɛɛɛa' 'ɔɔn ‑gba nɩ, 'ü 'pʋɔ.