Nasarɛɛtënyüü 'nyɩ Jesu ‑a ‑wa
6
1 'Ɔnya sɔ 'lɩ, 'ɔɔ ‑bɛ 'ɔa 'wʋnyɛrɛnyüü nya mi bätälä kä 'mlɩ 'ɔ 'bʋalaa'. 2 ‑Fʋflʋpasrɩ 'lɩ nɩ, 'ɔ ‑tʋ 'lɩ 'kpɩkpɩakʋ 'sraaplanyüköli. Nyüülü poa' 'ɔɔn 'nyakli nɩ, 'kɔkɔmlɛa plɛ 'klɩ kala, ‑jää 'sɩ 'ü ‑gbaaa' nɩ: «‑A 'plɛɛ ‑taa në nyɔɔlɔ 'ba 'ia ni le? ‑A 'plɛɛ 'ɔ 'ba 'sama 'lɩgaglakʋ nyra ‑saragbili 'ɔ nöa' le! 3 ‑Mää Mariia nyɩbɛjʋlɔ bäa' 'kamëdɛ, ‑mɔ ‑a? ‑Mää Jaakë, Josɛɛsë, Judë nyra Simɔɔɩɩa nɔ ‑wlajʋlɔ ‑a? ‑Mää ‑mɔlɔ kä ‑wlayörü a nyra 'üün kʋa' bätä ‑a†!» 'A 'ia 'fɩɔlʋa ‑gʋ 'ünyɩ 'ba 'ɔa mlɩa wii nyɔɔ 'wʋ ‑a. 4 Jesu nya ‑gbala 'üün ‑maa: «‑Pɩɔ o ‑pɩɔ nyɔsʋaamlɩpalanyɔɔ ‑sröröa' 'ü 'dara 'ɔɔn nyɔɔ; ‑maa 'ɔa 'brea nyüü, 'ɔa ‑gböölia nyüü nyra 'ɔa nyükölia nyüü, 'üa 'doo 'üü 'nyɩ 'dara 'ɔɔn nyɔɔ†.» 5 'Ia ‑gʋ 'ɔnyɩ 'lɩ ‑saragbi ‑a nrörö ‑bɛ 'asɩɛ 'ɔ 'pie ‑wusublanyüü ‑mölöö 'dari ‑gälɩ 'ɔnya 'pʋɔ 'üün. 6 'Ünyɩ 'ɔɔn plɛ ‑a toro; 'i 'kala 'ɔɔn plɛklɩ. 'Ɔnya ‑gblaara bätëlë kɔkɔa' 'lɩ ‑gba, ‑bɛ 'ɔ 'kpɩa.Nyüüpʋnyüüsɔɔlü Jesu blɔa' 'jrʋpa 'lɩ
7 Jesu nya we nyüüpʋnyüüsɔɔlü, 'ɔnya blɔ 'üün 'sɔɔrɔsɔɔ, 'ɔnya ‑nyɛnyɛ 'üün ‑gälɩkamladɛɛ 'ümä ‑frepasisi 'klü ‑gälɩ kälä. 8 'Ɔnya ‑gbala 'üün ünyɩ fa dɛɛ, ima 'nyɩ sɩsɛ ‑a bä. 'Ünyɩ fa jijrɛ, 'ünyɩ fa sakɔsʋ, 'ünyɩ 'pa 'üa keiwaa 'mlɩ mölii, 9 'Ünyɩ fa 'koti 'sɔɔ, ‑maa 'ü pa 'siilɩ. 10 Jesu nya ‑gbala 'üün: «Nyuku o, nyuku kä ‑wälɩ nyüü nëmäa' 'amɩ pla nɩ, 'ii 'ba kʋ kʋ, 'kä 'ana mimitaɩn jräwli. 11 ‑Pɩɔ o ‑pɩɔ 'a nëmäa' 'tɔ 'ia nyüü ma 'nyɩ 'amɩ nyuku ‑a ‑nyɩ, ‑bɛ üma 'nyɩ po 'amɩ 'nyakli ‑a nɩ, 'ba sɔ 'lɩ, 'kä 'a ‑gbɔplɔ 'lɩ 'ana böklölia ‑tʋtʋ†, 'ii 'mä 'üün ‑gbala 'sɩrɩ 'üa nʋnʋgbi 'nyɩa' 'na. 'Cɩcasa 'n ‑gbala 'amɩ, jrüülü kä 'mlɩ Nyɔsʋa 'mäa' ‑gä ‑tʋ nɩ, Sodɔɔmë nyra Gomɔɔrëbätäa ‑gä ‑nëmä dɛɛ ‑a bä 'kä 'ia në bätäläa ‑gʋ†.» 12 Nyüüpʋnyüüsɔɔlü ‑gbala nyüü, ü 'cici 'üa bobowli 'ümä nyɔsʋaawii 'klɩ 'nyiere. 'Asɩ ü ‑gbala nyüü ‑bɛ 'ü ‑piie. 13 ‑Bɛ 'ü prɛ domüü 'kɔkɔmlɛ, 'ü 'paa ‑wusublanyüü 'kɔkɔmlɛ 'kpɩ 'wʋ, ‑bɛ 'ü 'pʋɔ 'üün.
Erɔɔdë 'dara Jesu Jaan Batiisë
14 'Kɩɩlɔ 'ü 'daraa' Erɔɔdë†, 'ɔ 'nua' Jesua 'nyrɩ mimikʋ 'wli nɩ, 'iibä: «Jaan Batiisë bäsaa, 'kuaabre 'ɔ sɔa' 'ia 'klü 'ɔ 'klaa ‑bɛ 'ɔ nö ‑saragbi!» 15 ‑Mölöö nö: «Elii bäsaa.» ‑Bɛ ‑mölöö nö: «Nyɔsʋaamlɩpalanyɔɔ bäsaa; 'ɔ ‑beere Nyɔsʋaamlɩpalanyüülü ‑kätɩ ji käa' 'üa ‑tɔrʋpɩɔa nyɔɔ 'doo.» 16 Erɔɔdë 'nua' 'ia 'fɩɔ 'wli nɩ, 'iibä: «Jaanlɔ kä 'wli 'n 'böa' 'lɩ, 'ɔɔ sɔ 'kuaabre!»
17 Jaan ‑ka bä käa' 'lɩ nɩ, Erɔɔdë 'ɔɔ 'pa kä 'ɔɔn 'cɩ 'ɔnya 'pa 'ɔɔn ‑jie 'lɩ, Erɔɔdëa ‑wlajʋ Filipëa† 'ŋlʋʋ Erɔdiadëa ‑gʋ. 'Ŋlʋʋlɔ nɩ, 'ɔɔ Erɔɔdë ma kä: 18 «‑Nyɩ kä ‑a kä ‑mä ‑na ‑wlajʋa 'ŋlʋʋ ‑na 'ŋlʋʋ 'lɩnrörö†.» 'A wiili Jaan ma ‑gbala Erɔɔdë. 19 'Ia ‑gʋ Erɔdiadë 'pa Jaan a 'crɛ 'mlɩ, ‑bɛ 'ɔ 'bata ɔ 'bla 'ɔɔn, ‑maa 'ɔnyɩ 'lɩ ‑a bɩa. 20 Erɔɔdë jre 'iin 'sɩrɩ Jaan bäa' 'klɩgänyɔɔ, 'sɩrɩ 'ɔ bäa' 'nɩmɩ 'nyünanyɔɔ, 'ia ‑gʋ 'ɔ ma ‑träärälɩ Jaan ‑bɛ 'ɔnyɩ 'bata 'bata ‑a wii 'mä Jaan ‑gälɩjrä. Erɔɔdë ma po 'ɔɔn 'nyakli nɩ, 'ɔa plɛ 'cakla 'lɩ, ‑maa 'asɩɛ 'ɔ ma ‑wa 'ɔa 'nyaklipopokʋ.
21 'Inya kä 'taɩn 'doo, 'i bä kä Erɔɔdëa 'klɩbreresrɩ, 'taɩnlɩ kä 'mlɩ 'ü ‑gu käa' 'ɔɔn. 'Ɔnya tupo kä 'ɔa tagbü, 'sʋgɩaa 'kamanyüü nyra Galileea 'lɩträäränyüüa 'fɩɔ. 22 Erɔdiadëa 'ŋlëkayria nya pa 'ɔnya yɛ. 'Ɔa yɛyɛbei kä Erɔɔdë nyra 'ɔa tuponyüü 'tʋ. 'Kɩɩ nya ‑gbala kɔklʋayrialɔ: «Dɛɛlɛ ‑baataa', ‑ga 'ɛmɩ 'nyrʋ 'mä ‑mɩ 'ɛɛn ‑nyɩ.» 23 'Ɔ 'sɔrɩ 'ɔnya ‑gbala 'ŋlëkayrialɔ: «Dɛɛlɛ ‑nëmäa' 'nyrʋga 'nyaa 'ɛɛn ‑mɩ ‑nyɩa, ‑bakää 'i bä 'plälä 'n ‑gbaaa' 'mäklɩ, 'äa 'pɛ ‑mɩdee.» 24 Kɔklʋayrialɔ 'ciea' 'ɔnya 'bete 'ɔa 'yio: «Dɛplɛɛ 'nëmä 'nyrʋga le?» 'Iibäa' 'ɔa 'yio nɩ: «'Daa, Jaan Batiisëa 'wli ‑baata.» 25 'Köklesaplɩɩ 'kɩɩa ‑nyɛɛ 'ɔ 'blöödɛrɩ 'ɔnya ‑gbala 'ɔɔn: «'N 'bata 'köklesaplɩɩ Jaan Batiisëa 'wli ‑pöööa 'mlɩ.» 26 'I pa 'kɩɩ ‑gba, ‑maa 'be tuponyüüa 'fɩɔa 'klɩ 'ɔnya 'pa kä wiili, 'üa ‑gʋ, 'ɔnyɩ 'lɩ ‑a bɩa ɔ blara 'ŋlëkayrialɔ 'klɩ. 27 'A ‑plɩɩ 'ɔ kʋ dotro 'ɔnya blɔ 'sʋgɩanyɔɔ 'doo, ɔ mi ɔ ja 'ɔɔn Jaan Batiisëa 'wli. 'A ‑nyɛɛ ‑jienyüköli nyɔɔlɔ 'bölö 'iin. 28 'Ɔnya 'pa Jaan a 'wli ‑pööö 'lɩ 'ɔnya ja 'iin, 'ɔnya ‑nyɩ 'iin 'ŋlëkayrialɔ, 'ŋlëkayria nya ‑nyɩ 'iin 'ɔa 'yio. 29 Jaan a 'wʋnyɛrɛnyüü 'nua' 'iin 'wli nɩ, 'ünya fa 'ɔa jäjäa nɔ 'ünya 'pie 'ɔɔn 'kuyu 'lɩ.
Jesu 'fini nyüüa ‑diipʋ ‑diisɔɔ ‑glʋɩpʋ (5 000) 'klɩ
30 Apotrëlü Jesu blɔ käa' nya trara 'ɔɔn 'klɩ ‑bɛ 'ü 'saa 'ɔɔn ‑gogo, wiili kä 'fɩɔ 'ü nʋa' nyra 'ii kä 'fɩɔ 'ü 'kpɩaa' nyüü. 31 'Ü 'nɩ jä 'taɩn ‑a 'ümä dɛɛji, nyüülü jöa' ü möa' 'üa ‑gʋ; Jesu nya ‑gbala 'üün: «'Ba ji amä 'klɩbere ‑aaga 'lɩ, 'amä ‑fʋflʋ 'pa jie.» 32 'Ünya 'jra ‑gɔlʋ 'lɩ 'ünya mi ‑aaga 'lɩ 'ünya bereklɩ. 33 Nyüü 'jä 'üa mimidɛɛ; 'kɔkɔmlɛ ‑tʋ 'üün 'nyü ‑gba. Nyüü sɔsɔ bätëa 'mlɩ 'ünya fa bei 'ünya 'bösrö 'üün ‑aaga 'lɩ.
34 Jesu 'mä ‑gɔlʋ 'lɩ 'ciekalɩ mi nɩ, nyüü 'kɔkɔmlɛa ‑jria 'ɔ 'jä, 'üa nyatɛrɩ nya ‑sie 'ɔɔn 'wli. 'Ü ‑beere ‑bablëëlë 'nyɩa' ‑gbanyɛrɛnyɔɔ† kä. 'A ‑plɩɩ 'ɔ 'bala 'üa wii 'kɔkɔmlɛa 'kpɩkpɩakʋ. 35 ‑Bɛ 'taɩn ‑söööa' nɩ, Jesua 'wʋnyɛrɛnyüü nya jijrö 'ɔɔn ‑gba 'ünya ‑gbala 'ɔɔn: «‑Plɩɩlɩ a bäa' nɩ, ‑aaga 'lɩ bäsaa; ‑bɛ 'taɩn 'a ‑si! 36 'Cɛrɛ 'üün ‑wälɩ, 'ümä bätë nyra 'kpafëlë bäa' ‑pɩklɩa 'mlɩ mi 'ümä 'üa jijri ‑su, 'be 'ünyɩ jijri ‑a kä 'ümä dɛɛji†.» 37 'Ɔnya ‑gbala 'üün: «'Amɔ, 'ba ‑nyɩ 'üün jijri.» 'Iibäa' 'üün nɩ: «‑Yaa! ‑Bakää anyɩ ‑su deniea ‑glʋɩsɔɔa† 'flɔɔ, 'kä 'unya 'üün mlɩ bɩaa?» 38 Jesu nya 'bete 'üün: «'Flɔɔbü ‑srüplɛɛ 'a 'klaa le?» 'Ü tɛa' 'lɩ, 'iibä: «'Flɔɔbü ‑gböö nyra ‑srü 'sɔɔ.» 39 Jesu nya ‑gbala 'üün ü 'sesre nyüü 'klɩkä, 'kä ü ‑gbala 'üün ü kɔkɔ 'sipi ‑gälɩ. 40 'Ünya 'sesre nyüülü 'klɩkä, 'ünya kɔkɔwälɩ. 'Üa ‑glügbö ‑mölöö bä ‑glʋɩgböö (100), ‑mölöö bä ‑glʋɩsɔɔ ‑bɛ ‑pʋ (50). 41 Jesu nya dɔrɔ 'flɔɔbü ‑gböö nyra ‑srü 'sɔɔlü 'wʋ, 'ɔnya 'jrara cɛ 'nyü 'kä, 'ɔnya 'trɛɛ Nyɔsʋa. 'Ɔ bɩaa' Nyɔsʋa 'tɛtrɛɛkʋ nɩ, 'ɔnya 'böblö 'flɔɔ nyra ‑srülü ‑tɩa, 'ɔnya ‑nyɩ 'iin 'ɔa 'wʋnyɛrɛnyüü 'ümä 'iin nyüülü 'lɩ ‑päälä. 42 'Üa 'fɩɔ nya jidɛɛ 'ünya dö. 43 'Ü ‑nyɩglaa' ‑srü nyra 'flɔɔ klüülü tɩɔa' 'lɩ 'kä nɩ, 'ü 'sie dɔgbɩ ‑pʋ ‑bɛ 'sɔɔ†. 44 Nyüülü jia' jijrili 'üa nyɩberüa ‑diipʋ ‑diisɔɔ ‑glʋɩpʋ (5 000)†.
Jesu 'nyɛrɛ 'nie 'klɩ
45 'Ia 'fɩɔ ‑sia dotro Jesu nya ‑gbala 'ɔa 'wʋnyɛrɛnyüü, ü 'jra ‑gɔlʋ 'lɩ, ü ‑ta 'nyʋfɔ ü mi 'nie dɛrɩ, bätälä 'ü 'daraa' Bɛtësaidaa 'mlɩ, ‑bɛ 'ɔmä nyüülü ‑gbala 'ümä 'üa ‑nyɛɛ mömö. 46 'Ü 'dɛrɩa' 'ɔɔn 'lɩ, 'ɔnya 'jra 'dʋgba 'wli 'ɔnya mi Nyɔsʋa bibie. 47 ‑Gbia kakla 'klɩ ä jö, ‑gɔlʋ 'a 'niea ‑tɔrʋpɩɔ 'tɔ, ‑bɛ Jesua 'doo bä 'nie 'mäklɩ 'dʋgbalä 'wli. 48 ‑Srɩkägbalawlaa, 'jöjrüükpü ‑ka pa†; Jesu 'jäa' 'ɔa 'wʋnyɛrɛnyüü 'wʋ 'lee nɩ, 'üa 'dudukʋa ‑gʋ sɩa; ‑fʋflʋ 'jrara 'üün 'klɩ. Jesu nya 'nyɛrɛ 'nie 'klɩ, 'ɔnya mi 'üa 'pɛ 'lɩ, 'ɔmä ɩ 'üün ‑gbasi ‑o nɩ, 49 'ü 'jäa' 'ɔɔn ‑bɛ 'ɔ 'nyɛrɛa' 'nie 'klɩ nɩ, 'ünya 'kpö, 'üa plɛɛ papadɛɛ. 50 'Üa 'fɩɔ 'jäa' 'ɔɔn, 'üa 'fɩɔ tɩtrɛ ŋalɛa ‑gʋ. 'A ‑plɩɩ Jesu kʋ dotro, 'ɔnya ‑gbala 'üün: «'Ba 'pa plɛ 'mlɩ, ŋalɛ 'nyɩ 'bla 'amɩ, 'mɔɔ bäsaa.» 51 'Ɔnya 'jra 'üa ‑gɔlʋ 'lɩ, ‑fʋflʋ nya 'nyüglö. 'I kala 'üün plɛklɩ ‑gböösa, 52 ‑bɛ 'ünyɩa' bobokʋ kä nɩ, 'flɔɔa ‑saragbili Jesu nʋa', 'ünyɩ 'ia ‑gbaa 'wli ‑a 'nu.
Nyüülü Jesu 'pʋɔa' Genesarɛtëa ‑tʋtʋ ‑gälɩ
53 Jesu nyra 'ɔa 'wʋnyɛrɛnyüü 'pɩa' 'nie nɩ, Genesarɛtëa ‑tʋtʋ ‑gälɩ 'ü 'nyüglö. 54 'Ü 'ciea' ‑gɔlʋ 'lɩ nɩ, 'ia nyüü ‑tʋ Jesu 'nyügba, 55 'ü ‑gbaala 'ia ‑tʋtʋa 'fɩɔ ‑gälɩ 'kä, 'ü 'pepe ‑wusublanyüü ‑gbituu ‑gälɩ, ‑bɛ 'ü fafa 'ɔmɩ 'üün ‑pɩɔ o ‑pɩɔ 'ɔ bäa'. 56 ‑Pɩɔ o ‑pɩɔ 'ɔ 'tɔɔa', ‑kä bätëa 'mlɩ, bätë kpaküa 'mlɩ, ‑kä 'kpafëa 'mlɩ, 'ü 'pepe ‑wusublanyüü ‑saplɛ 'lɩ, ‑bɛ 'ü bibie 'ɔɔn: «'Cɛrɛ 'üün ‑wälɩ ü ‑fɛ ‑na 'lɩpadɛɛa 'mäklɩ ‑gba.» Nyüülü kä 'fɩɔ ‑fɛɛɛa' 'ɔɔn ‑gba nɩ, 'ü 'pʋɔ.