Farisinyüüa ‑dɔ
7
1 Farisinyüü nyra ‑dɔkpɩanyüü 'doorodoo nya sɔ Jerusalɛɛmë 'ünya ji Jesu 'jä. 2 'Ü ‑tʋ Jesua 'wʋnyɛrɛnyüü ‑mülü 'nyügba ünyɩa' ‑gbafuto ‑bɛ 'ü jöa' dɛɛ. 'Ia ‑gbaa bä 'ünyɩ 'üa 'bisa wlu ‑a su. ‑Bɛ 'ü nɩnɩa ‑balʋ 'ü nö†. 3 'Palɩ Farisinyüü ‑a ‑paalɩ juifë ‑mülüa 'fɩɔ, 'ü ‑träärälɩ 'üa tʋɩɩa 'taɩn 'lɩa wii: üma 'nyɩ 'üa 'bisa wlu ‑gba ‑a ‑futo, 'ünyɩ jidɛɛ ‑a. 4 Üma sɔ 'makatɩ 'klɩ üma ji nɩ, 'ü ‑futogba 'fɩɔwʋ 'kä 'ü jödɛɛ. 'Üa 'brea ‑dɔ 'kɔkɔmlɛ ‑moloo ‑ka bälɩ; 'plëë kä 'üa në 'lɩkpëtäkʋ, 'lɩmlaradii kä 'ia në 'lɩkpëtäkʋ, 'plëtë kä 'üa nü 'lɩkpëtäkʋ†. 5 'Ia ‑gʋ Farisinyüü nyra ‑dɔkpɩanyüü 'bete 'ɔɔn: «Wii 'plɛɛ kä ‑gʋ ‑na 'wʋnyɛrɛnyüü 'nyɩ ‑träärälɩ ana tʋɩɩa ‑dɔ le? Wii 'plɛɛ kä ‑gʋ 'üa wlu pa ‑fre ‑bɛ 'ü jödɛɛ le?» 6 'Iibäa' Jesu nɩ: «‑Glagälɩsrörönyüü! Wiili Esaii tɩ käa' ‑srɩ dɛrɩ 'ɔ 'paa 'ana ‑gʋ, 'ɔ kä kä ‑gä. 'Asɩ 'i ‑jɩjra:Mlɩa 'doo ‑glügbölä kʋa' ‑pɩ ‑träärälɩ 'mɩ;
‑maa 'üa polu tʋŋlɔ 'mɩ 'lɩdɛrɩ.
7 'Fʋflɛsa 'ü ‑pʋpʋa 'mɩ,
'üa 'brea ‑dɔ 'üa 'mlɔɔ 'paa' 'lɩ 'uu 'ü 'kpɩa nyüü†.
8 'A ‑plɩɩ 'a tɩɛ Nyɔsʋaa ‑dɔ ‑bɛ 'a ‑träärälɩ nyüüa në 'brea ‑dɔ. 'Plëë nyra 'lɩmlaradii kä 'üa në 'lɩkpëtäkʋ, ‑bɛ 'a 'samaa bʋbɔgbi 'kɔkɔmlɛ 'a nö†.» 9 'Ɔnya ‑gbala 'üün 'sɔɔwʋ: «'A ‑sɔɔrɔwʋ, Nyɔsʋaa ‑dɔ 'a 'baa ‑plɩɩ 'amä ‑gʋ 'lɩ 'ana 'brea ‑dɔ ‑träärä! 10 ‑Bɛ ‑jää 'sɩ Moisë ‑gbaa' nɩ: ‹‑Träärälɩ ‑na tʋ nyra ‑na 'yio,› ‑bɛ 'sɔɔwʋ nɩ: ‹Nyɔɔlɔ nëmäa' 'ɔa tʋ, 'aiɛ 'ɔa 'yio bʋbɔ 'mä dɛrɩ fa nɩ, 'ɔ bä jäjänyɔɔ†.› 11 ‑Maa 'a nɩnɩa: ‹Nyɔɔ ma ‑gbala 'ɔa tʋ 'aiɛ 'ɔa 'yio ‑maa: Dɛɛlɛ 'nëmä ɩa' ‑mɩ ‑nyɩ, kɔrëban† bäsaa, 'i 'na. 'Ia ‑gbaa bä 'nyaa 'iin Nyɔsʋa ‑nyɩ.› 12 'Sɩrɩ 'a nöa' nyüüa 'klü 'a 'jrara, 'ü ‑ka ‑pɩ 'üa 'yio, 'aiɛ 'ɔa tʋ ‑gbaji. 13 Nyɔsʋawii 'a ‑pi 'lɩ; 'a ‑tʋʋä 'ana 'brea ‑dɔ. 'A 'samaa bʋbɔgbi 'kɔkɔmlɛ 'a nö.»
Nʋnʋgbili plaa' nyɔɔ ‑fre 'lɩ
14 'I ‑sia' nɩ, Jesu nya we ‑jriaa 'fɩɔ†, 'ɔnya ‑gbala 'üün: «'Ana 'fɩɔ 'ba po 'mɩ 'nyakli, 'ba 'nu 'mɩ 'wli! 15 Dɛɛlɛ möa' nyɔɔa mlɩ, ‑mää 'ɛɛ 'nyɩ pla 'ɔɔn ‑fre 'lɩ. ‑Maa ɛ jaa' 'ɔa mlɩ, 'ɛɛ pla 'ɔɔn ‑fre 'lɩ. 16 ‑Moloo ma bä 'nununyɔɔ, 'ɔnya 'nua.» 17 Jesu sɔa' ‑jria 'lɩ ‑bɛ 'ɔ mia' ‑gbööli nɩ, 'ɔa 'wʋnyɛrɛnyüü nya 'bete 'ɔɔn: «Wiili ‑paaplaa' 'klɩ, 'ia ‑gba le?» 18 'Ɔnya ‑gbala 'üün: «'Ana 'mʋgbɛ ‑kaaŋlʋ 'saa 'lɩgla? 'Anyɩ 'saa ‑a jre 'sɩrɩ dɛɛlɛ sɔa' ‑fälɩ ɛ möa' nyɔɔa 'mlɩ, ‑mää 'ɛɛ 'nyɩ pla 'ɔɔn ‑fre? 19 Dɛɛlɛ nyɔɔ jöa', ‑mää 'ɔa plɛa 'mlɩ 'ɛnyɩ mi, 'ɔa 'mlɩ 'ɛ 'cere, 'kä 'ɔ mö 'ɛɛ 'klʋɛɛ tɩ.» ‑Gbala 'ɔ ‑gbala 'üün 'sɩrɩ jijria 'fɩɔ bäa' jijisa. 20 'Ɔ ‑nëma nɩ: «‑Mɩlɩ plaa' nyɔɔ ‑fre 'lɩ nɩ, 'a ‑mɩlɩ 'ciea' 'ɔa mlɩ. 21 Nyɔɔa plɛklɩ 'ii ‑balʋwiia bobokʋ sɔ: bätësa, ‑sagbili Nyɔsʋa 'nyɩ 'bataa', nyüübablakʋ†, 22 'jejiekʋ†, tɛkäkäkʋ, plɛbʋbɔkʋ, yrʋkäkäkʋ, mlüüjrarakʋ, dɛɛnyükäkäkʋ, 'nyrɩbʋblɔkʋ, ‑tɔklʋbɔtɔkʋ, nyɔkɔgbia nʋnʋkʋ. 23 'Ia bʋbɔgbilia 'fɩɔ plɛ 'klɩ 'i sɔ; 'a 'ii pla nyɔɔ ‑fre 'lɩ.»
Nyɔtugbaŋlʋʋ toroa' Jesu plɛ
24 'I ‑sia' nɩ, Tiirë nyra Sidɔɔn† a ‑tʋtʋ ‑gälɩ Jesu mi. 'Ɔ mia', nyüköli 'ɔ kʋ, 'ɔnyɩ 'bata 'bata ‑a nyɔɔ 'mä 'ɔɔn 'jä. ‑Maa 'ü 'jä 'ɔɔn. 25 'Be 'ŋlʋʋ 'dooa 'ŋlëkayria ‑frepasusu bäa' 'lɩ nɩ, 'ɔ 'nua' 'ɔa 'nyrɩ 'wli nɩ, 'ɔnya ji 'ɔɔn bei 'wʋ blö. 26 'Ŋlʋʋlɔ bä grɛɛkëŋlʋʋ, Sirofenisia 'bre 'ɔ sɔ. ‑Bɛ 'ɔ bibie Jesu, 'ɔ prɛ domoolɔ bäa' 'ɔa 'jʋlɔ ‑gälɩ. 27 ‑Jää 'sɩ 'ɔ ‑gbalaa' 'ɔɔn nɩ: «Sɔ ‑kätɩ 'jüjie ‑gba ü dö; nyɔɔ 'mä 'jüjiea jijrɛ 'wʋdɔrɔ, 'ɔmä 'ɛɛn ‑fäjie ‑nyɩ nɩ, 'inyɩ 'na ‑a 'na.» 28 'Iibäa' 'ŋlʋʋlɔ nɩ: «'Cɩcasa bäsaa 'Pläkänyɔɔ, ‑maa ‑fäjielë bäa' 'töwlö ‑wälɩ nɩ, 'taɩn 'lɩ 'jüjie jöa' dɛɛ, 'a ‑fäjielë 'üü jö ‑mɩlɩ böblöa'.» 29 ‑Jää 'sɩ Jesu ‑gbala 'ɔɔn nɩ: «Mi! ‑Na 'papawiia ‑gʋ domoo 'a ‑na 'jʋ 'lɩ ‑gälɩ sɔ.» 30 'Ŋlʋʋlɔ mia', ‑bɛ 'ɔ paa' 'ɔa nyüköli nɩ, 'ɔ jrä 'ɔa 'jʋ ‑pɔkɩ ‑gälɩ. Domoo nya 'ɔɔn 'lɩ ‑gälɩ sɔ.
'Susunyɔɔlɔ 'nyɩ 'paa' wii ‑bɛ Jesu 'pʋɔa'
31 Jesu sɔa' Tiirë nyra Sidɔɔn a ‑tʋtʋ ‑gälɩ, ‑bɛ 'ɔ möa' 'nielɛ 'ü 'daraa' Galilee 'äa 'pɛlɩ nɩ, Dekapɔlë 'ɔ ‑gölɩ. 32 Nyüü nya ja 'ɔɔn 'susunyɔɔ 'doo ɔ kä wiipapakʋ klaa' 'lɩ, ‑bɛ 'ü bibie Jesu ɔ 'pie nyɔɔlɔ klʋgba ‑gälɩ. 33 'Ɔ 'kplaa' nyɔɔlɔ, 'ünya tʋŋlɔlɩ ‑jria dɛrɩ. 'Ɔ plaa' 'ɔa 'nyakli 'lɩ wlu nɩ, 'ɔnya 'ku nyɔɔlɔa mɛ ‑tatʋ. 34 'Ɔnya 'jrara cɛ 'nyükä, 'ɔ ‑gblɔɔa' ‑fʋflʋ kä, 'iibä: «Efata!» 'Ia ‑gba bä: «'Ba ‑jieroklɩ!» 35 'A ‑plɩɩ nyɔɔlɔ kʋ dotro 'ɔnya 'nu, 'ɔnya 'pawii 'cɩcasa. 36 Jesu nya ‑gbala 'üün: «'Anyɩ ‑gbala 'iin nyɔɔ.» ‑Plɩɩ 'lɩ ‑mɔmɔɔ 'ɔ ‑gbala 'üün 'ünyɩ ‑gbala 'iin nyɔɔ nɩ, 'a ‑plɩɩ 'ü 'saralɩ 'iin nyüü ‑gböösa. 37 Dɛɛlɛ 'lɩ 'i kala 'üün plɛ 'klɩ nɩ, 'a ‑plɩɩ 'ü kʋ ‑bɛ 'ü nö: «Diili kä 'fɩɔ 'ɔ nöa', 'i 'na. 'Ɔ 'pʋɔ 'susunyüü nyra nyüülü kä wiipapakʋ klaa' 'lɩ.»