Jesu 'fini nyüüa ‑diipʋ (4 000) 'klɩ
8
1 'A 'ia 'taɩn 'lɩ nɩ, nyüüa ‑jria kpakö nya trara 'sɔɔwʋ. ‑Bɛ jijrɛ 'nyɩa' 'lɩbä nɩ, Jesu nya we 'ɔa 'wʋnyɛrɛnyüü 'ɔnya ‑gbala 'üün: 2 «Nyüülü kʋa' ‑pɩ kä 'mɩ nyatɛrɩ 'wʋ, 'nyraa 'üün kʋa' ‑wälɩ 'ia jrüü tää ‑bɛ 'ünyɩ jijrɛ ‑a 'klaa 'ümä dɛɛji. 3 Ama 'nyɩ 'üün jijrɛ ‑a ‑nyɩ ‑bɛ ama 'daa ü 'blöö 'üa ‑nyɛɛ dɛrɩ nɩ, ü ‑nëmä 'nyʋfɔ mlɩ ‑a bɩa, 'be 'kɔkɔmlɛ sɔ tʋŋlɔ ‑pɩɔ.» 4 'Iibäa' 'ɔa 'wʋnyɛrɛnyüü nɩ: «‑Taa ‑aagalä kä 'mlɩ a bäa' ‑plɩɩ, ‑a 'plɛɛ amä jijrɛ 'järä amä 'üa 'fɩɔ 'klɩfini le?» 5 Jesu 'bete 'üün: «'Flɔɔbü ‑srüplɛɛ 'a 'klaa le?» 'Iibä: «A 'klaa 'flɔɔbü ‑uunsɔɔ.» 6 'Ɔnya ‑gbala nyüülüa 'fɩɔ 'ü 'wawlakä. 'Ɔnya dɔrɔ 'flɔɔbü ‑uunsɔɔlʋ 'wʋ, 'ɔ bɩaa' Nyɔsʋa 'tɛtrɛɛkʋ 'ɔnya 'böblö 'uun ‑tɩa 'ɔnya ‑nyɩ 'uun 'ɔa 'wʋnyɛrɛnyüü 'ümä 'uun ‑jria 'lɩ ‑päälä. 'Ünya ‑päälä 'uun ‑jria 'lɩ. 7 'Ü 'klaa ɩ bɩa ‑srü jie kälɩ, 'ɔ 'trɛɛa' Nyɔsʋa, 'ɔnya ‑gbala 'ɔa 'wʋnyɛrɛnyüü: «'Ba ‑pä 'üün bɩa.» 8 'Ü jidɛɛ jiji 'ünya dö; jijrili tɩɔa' 'lɩ 'sie ‑kätë ‑uunsɔɔ. 9 Ü jia' jijrili 'ü 'mrɛɛ ü jrä nyüüa ‑diipʋ (4 000). 'I 'wlaraa' Jesu nya ‑gbala 'üün ü mömö 'üa ‑nyɛɛ. 10 Dotro, ‑gɔlʋ 'lɩ 'ɔ 'jra 'ɔɔ ‑bɛ 'ɔa 'wʋnyɛrɛnyüü nya mi Dalëmanutaa ‑tʋtʋ ‑gälɩ.Farisinyüü nɩnɩa abɩa Jesu nʋ ‑saragbia tie
11 Farisinyüü jia' nɩ, 'üü ‑bɛ Jesu ‑tʋ 'lɩ wiia 'lɩkʋɛɛkrʋɛɛkʋ. 'Ümä ‑gʋ 'ɔɔn bɔʋdɛrɩ 'pa, 'iibä: «Nʋ ‑saragbia tie amä 'iin 'jä.» 12 Jesu nya ‑gblɔɔ ‑fʋflʋ 'kä, 'iibä: «Dɛplɛɛ kä ‑gʋ ‑taa nyüüglügbölä kʋa' ‑pɩ 'bata ‑saragbia tie le? 'Cɩcasa 'n ‑gbala 'amɩ ‑saragbi ‑nëmä ‑taa nyüüglügböläa 'klʋɩ ‑a nrörö.» 13 'A ‑plɩɩ 'ɔ ‑gba 'üün 'kä, 'ɔɔ ‑bɛ 'ɔa 'wʋnyɛrɛnyüü nya 'blöö ‑gɔlʋ 'lɩ dɛrɩ 'ünya mi 'niea 'pɛ ‑mɩdee ‑gälɩ.
14 'Ümäa' 'nie 'pɩ nɩ, Jesua 'wʋnyɛrɛnyüü ‑trɔ, 'ünyɩ jijri ‑a fa ima 'nyɩ 'flɔɔbö 'döö ‑a bä. 15 Jesu nya 'pa 'üün ‑tɔɔɔ 'lɩ: «'Ba ‑tre 'ana nyüfë Farisinyüü nyra Erɔɔdëa levurëa ‑gʋ.» 16 'Ɔa 'wʋnyɛrɛnyüüa 'kpɔ ‑toplo 'lɩ ‑bɛ 'ü nö: «Anyɩ 'flɔɔ ‑a 'klaa, 'a 'ia ‑gʋ 'ɔ ‑gba 'iin.» 17 Jesu nya ‑tʋ 'üün 'nyü ‑gba, 'iibä: «'Sɩrɩ 'anyɩa' 'flɔɔ 'klaa 'ii 'a ‑toplo le? 'A ‑kaaŋlʋ 'saa wiia ‑gbaa jre? 'A ‑kaaŋlʋ 'saa 'nu, 'aiɛ 'a ‑kaaŋlʋ boboplɛ ‑a kä? 18 'A kä 'nyü, ‑maa 'anyɩ 'jäkä ‑a? 'A kä 'nyakli, ‑maa 'anyɩ 'nu 'nu ‑a†? 'Ba 'pa plɛ 'la! 19 'Taɩn 'lɩ 'n 'böblöa' 'flɔɔbü ‑gböölü ‑tɩa ‑bɛ 'n 'finia' nyüüa ‑diipʋ ‑diisɔɔ ‑glʋɩpʋ (5 000) 'klɩ nɩ, ‑kakë ‑srüplɛɛ 'si jijri 'klɩ 'a fa le?» 'Iibä: «A fa ‑kakë ‑pʋ ‑bɛ 'sɔɔ.» 20 'Ɔnya 'bete 'üü 'sɔɔwʋ: «‑Bɛ 'n 'böblöa' 'flɔɔbü ‑uunsɔɔ ‑tɩa ‑bɛ 'n 'finia' nyüüa ‑diipʋ (4 000) 'klɩ, ‑kakë ‑srüplɛɛ 'si jijri 'klɩ 'a fa le?» 'Iibä: «A fa ‑kakë ‑uunsɔɔ.» 21 'Iibäa' Jesu nɩ: «'A ‑kaaŋlʋ 'sa ‑a 'nu?»
'Nɔnɔnyɔɔlɔ Jesu 'pʋɔa' bätälä 'ü 'daraa' Bɛtësaidaa, 'äa 'mlɩ
22 'I ‑sia' nɩ, Jesu nyra 'ɔa 'wʋnyɛrɛnyüü nya mi bätälä 'ü 'daraa' Bɛtësaidaa. Nyüü nya ja 'nɔnɔnyɔɔ 'doo, ‑bɛ 'ü bibie Jesu 'ɔmä 'ɔɔn klʋgbë ‑gälɩ 'pie. 23 'Ɔnya 'kpla nyɔɔlɔa 'darʋ 'ɔ nyra 'ɔɔn nya 'cie bätä, 'ɔnya 'pa 'ɔa 'nyü 'klɩ ‑tatʋ, 'ɔ 'piea' nyɔɔlɔ klʋgbë ‑gälɩ, 'ɔnya 'bete 'ɔɔn: «‑Jäää dɛɛ 'wʋ.» 24 Nyɔɔlɔ ‑pʋpɔa' 'iibä: «'N 'jää nyüüa 'nyɛnyɛdɛɛ 'wʋ, ‑maa 'ü ‑beere tii.» 25 Jesu nya ‑tʋ 'sɔɔwʋ nyɔɔlɔa 'nyü 'klɩ wlu, 'ɔ ‑pʋpɔa' tee; 'ɔ 'jääkä 'cɩcasa. 26 Jesu nya ‑gbala 'ɔɔn ɔ 'blöö 'ɔa nyüköli dɛrɩ, ‑maa 'ɔnyɩ ‑gö bätä 'lɩ, 'ɔnyɩ ‑gbala 'iin nyɔɔ†!
Jesu 'bete 'ɔa 'wʋnyɛrɛnyüü
27 'I ‑sia' nɩ, Jesu nyra 'ɔa 'wʋnyɛrɛnyüü mö ɩ Filipëa ‑gbaa bätälä 'ü 'daraa' Sesaree, 'äa 'mlɩ. 'Ü 'nyɛɛa' ‑bɛ 'ü möa' 'lɩ nɩ, Jesu nya 'bete 'ɔa 'wʋnyɛrɛnyüü: «‑Asɩ nyüü ‑gbaaa 'na ‑gʋ le?» 28 'Iibäa' 'ɔa 'wʋnyɛrɛnyüü nɩ: «'Ü nɩnɩa ‑mɔ bä Jaan Batiisë, ‑mölöö nö Elii, ‑bɛ ‑më nö nyɔsʋaamlɩpalanyüüa ‑tɔrʋpɩɔa nyɔɔ ‑bä.» 29 Jesu nya 'bete 'üün bɩa: «‑Bɛ 'amɔ le? ‑Asɩ 'a ‑gbaaa 'na ‑gʋ le?» ‑Jäsɩ Piɛɛrë ‑gbaa' ‑bɛ 'ɔ 'saa' 'ɔɔn ‑gälɩ nɩ: «‑Mɔ bä Nyɔsʋaa 'Kriisë†.» 30 Jesu nya ‑gbala 'üün 'ünyɩ ‑gbala 'iin nyɔɔ.
Jesu ‑gbala 'ɔa 'wʋnyɛrɛnyüü 'sɩrɩ 'ɔmäa' jä
31 Jesu 'bala 'ɔa 'wʋnyɛrɛnyüüa 'kpɩkpɩakʋ 'sɩrɩ 'ɔɔ Nyɔɔa 'Jʋ käa' 'ɔmäa' ‑sʋɩ 'jä ‑gböösa, 'sɩrɩ juifëa tagbü, ‑gbɔsapɛrɩnyüü kpakü, nyra ‑dɔkpɩanyüü nya 'ɔɔn 'nyüamlɩjraraa; 'ünya 'ɔɔn 'blaa, 'kä 'ɔnya 'kuaabre sɔ jrüü tääa ‑srɩ 'lɩ. 32 'Ɔ nöa' ‑plɩɩ 'saa ‑bɛ 'ɔ 'saaa' 'lɩ nɩ, ‑mää wii 'ɔ ‑kanyɩ 'paplaklɩ. Piɛɛrë nya fa 'ɔɔn 'ünya bereklɩ ‑bɛ 'ɔ 'daa 'ɔɔn. 33 Jesu nya ‑siekälɩ 'ɔnya tɛ 'ɔa 'wʋnyɛrɛnyüü 'klɩ, 'ɔnya ‑gbala Piɛɛrë: «Tʋŋlɔ 'mɩ 'lɩdɛrɩ, Sataan! Wiili ‑klaaa' ‑plɩɩ, nyüüa ni ‑klaaa, ‑maa ‑mää Nyɔsʋaa ni ‑nyɩ 'klaa!»
34 'Ɔnya we 'ɔa 'wʋnyɛrɛnyüü nyra ‑jria 'ɔnya ‑gbala 'üün: «Nyɔɔ o nyɔɔ 'bataa' nyra 'ɔɔn 'mä 'wʋnyɛrɛ nɩ, ɔ ‑trɔ 'ɔa nyufaa ‑gä, ɔ 'pie 'ɔa krʋaa ‑plɩ ‑gälɩ† 'kä 'ɔ jö ‑bɛ 'nyraa 'ɔɔn 'mä 'nyɛ. 35 ‑A ‑gbala 'amɩ, nyɔɔ o nyɔɔ 'bataa' 'ɔa 'kläa ‑wälɩtʋtʋkʋ nɩ, 'ɔnya 'ään 'mɔlɔa. ‑Maa nyɔɔ o nyɔɔ 'mɔlɔa' 'ɔa 'klä 'na ‑gʋ nyra 'mʋfagogoa ‑gʋ nɩ, 'ɔnya 'ɔa 'klä ‑wälɩtʋa. 36 ‑Bɛ 'sɔɔwʋ nɩ, nyɔɔ ma ji 'plä 'wʋa 'bɩɔa 'fɩɔ, ‑bɛ 'ɔa 'klä ma 'nyɩ 'lɩmlɩ ‑a 'wʋ, 'jrʋpa 'plɛɛ 'ɔa 'bɩɔ ‑ka kä le? 37 Nʋnʋdɛɛ 'plɛɛ ‑ka bä ‑plɩɩ 'lɩ ɛ 'ɔmä nʋ, ‑bɛ 'ɔmä 'lɩ 'ɔa 'klä mlɩ 'ba le? 38 'Ia ‑gʋ nyɔɔ o nyɔɔ 'mɔɔ ‑bɛ 'na mlɩa wii 'mäa' 'nyüsü 'wʋ kä, nyüüglügbölä kʋa' ‑pɩ, ä kä 'mlɩa nyüü 'sia' ‑balʋ 'klɩ, ä sɔa' Nyɔsʋa dɛrɩ nɩ, 'taɩn 'lɩ Nyɔɔa 'Jʋ 'mäa' 'ɔa tʋa 'wliklɩ 'bʋabʋakʋ ja 'ɔɔ ‑bɛ 'nyüna 'aanjëɩɩ 'mäa' ji nɩ, 'ɔnya ‑srɩ 'ɔa 'nyüsü käa bɩa.»