Jesu 'cicria' 'ɔa 'wʋnyɛrɛnyüü ‑tääa 'klɩ
9
1 Jesu nya ‑gbala 'üün 'sɔɔwʋ: «'Cɩcasa 'n ‑gbala 'amɩ, ‑mölöö bä ‑pɩ 'ana ‑tɔrʋpɩɔ, 'ünya Nyɔsʋaa 'kamapläa 'klü 'jäa 'fɩɔwʋ 'kä 'ünya jä.»2 Jrüü ‑uundoo 'mä ‑si nɩ, Jesu nya dɔrɔ Piɛɛrë, Jaakë nyra Jaan 'wʋ, 'ɔ nyra 'üün nya bereklɩ 'dʋgba kpakö 'döö 'wli. Jesu nya 'cicri 'üa 'klɩa 'mʋgbɛ. 3 'Ɔa 'lɩpadii plö† 'inya 'pɔlɔ 'pʋɩɩ ‑beere sɩɔa ‑gbru†. 'Pɔlɔnyülü 'i 'klaaa' nɩ, 'ia nyɔɔ 'nyɩ ‑tʋtʋ ‑gälɩ ‑a bä 'ɔmä dɛɛ pɔtɔ ‑bɛ 'ɛmä 'saa 'pɔlɔ. 4 'Ümä 'saa nʋkalɩ mi nɩ, Elii nyra Moisë 'ü 'jää, 'üü nyra Jesu dɛtɛ. 5 'Iibäa' Piɛɛrë nɩ: «Rabii†, ‑tɛ a jia' 'i 'na; amä ‑tetu tää 'pa, ‑na nɛ 'dee, Moisëa nɛ 'dee, nyra Eliia nɛ.» 6 ‑Bɛ ŋalɛ 'blaaa' 'üa täälä nɩ, wiili 'ɔmäa' 'pa 'ɔnyɩ jre ‑a jre. 7 ‑Gbru nya ‑gblɔɔ 'üün ‑gälɩ 'kä; mlɩa wii nya ja cɛlɩ: «'Na plɛ ‑gälɩa 'Jʋ kʋ ‑pɩ: 'ba po 'ɔɔn 'nyakli†!» 8 Jesua 'wʋnyɛrɛnyüü 'mä 'üa ‑gba 'kätɩtrɛkalɩ mi nɩ, 'ü ‑kanyɩ 'jä nyɔɔ ‑a, Jesua 'doo 'ü nyra 'ɔɔn kʋ ‑plɩɩ.
Eliia jijiwii
9 'Ü 'ciea' 'dʋgba nɩ, Jesu nya ‑gbala 'üün ‑maa: «wiili 'a 'jäa' 'anyɩ ‑gbala 'iin nyɔɔ, 'kä Nyɔɔa 'Jʋ sɔ 'kuaabre.» 10 'Ü ‑träärälɩ wiili 'ɔ 'saalɩ, ‑maa 'üa 'kpɔ ‑toplo 'lɩ: «Nyɔɔ 'mä jä, ‑bɛ 'ɔmä 'täpa 'ɔmä 'kuaabre sɔ; 'ia ‑gbaa le?» 11 'Ünya 'bete Jesu, 'ü ‑nëma: «‑Bɛ dɛplɛɛ kä ‑gʋ ‑dɔkpɩanyüü nö ‑maa Elii ‑kätɩ nëmä ji† 'fɩɔwʋ le?» 12 'Iibäa' Jesu nɩ: «'Asɩ 'i bä, Elii ‑kätɩ jö 'ɔmä diia 'fɩɔ 'ia kʋfa 'wʋ ‑tätä. ‑Bɛ dɛplɛɛ kä ‑gʋ ‑jɩjradii 'daa bɩa Nyɔɔa 'Jʋ nya ‑sʋɩ 'jäa ‑gböösa, kä 'ünya 'ɔɔn 'nyüamlɩjraraa le†? 13 'Amɔ 'n ‑gbala, Elii 'a kä ji, 'sɩrɩ nyüüa plɛ ‑waa' 'ü 'a kä 'lɩ 'ɔɔn nʋ. 'Sɩrɩ 'i ‑jɩjraa' nyɔsʋapɔɔkʋ 'lɩ, 'asɩ 'ü nʋ 'ɔɔn.»
'Jʋlɔ Jesu 'baa' bʋbɔsusu ‑gälɩ
14 Jesu nyra ‑mülü jöa' 'ɔa 'wʋnyɛrɛnyüü ‑mülüa ‑nyɛɛ nɩ, nyüü 'kɔkɔmlɛ trara 'üün 'klɩ, ‑bɛ 'üü ‑bɛ ‑dɔkpɩanyüü ‑topo. 15 Nyüü 'jäa' Jesu nɩ, 'üa 'fɩɔa plɛ 'klɩ kala. 'Ünya fɔ 'ünya mi 'ɔɔn 'trɛɛ. 16 Jesu nya 'bete: «Wii 'plɛɛ 'a nyra 'üün ‑toplo 'lɩ le?» 17 'Iibäa' nyɔɔ 'doo nɩ: «'Kpɩkpɩanyɔɔ, 'na 'jʋ ‑balʋsusu bälɩ, 'uu ka 'ɔa 'mä, 'ɔɔ 'n ja ‑mɩ. 18 ‑Pɩɔ ‑mɩ uma jrä 'ɔɔn, 'u 'kpaaa' 'ɔɔn 'kä, 'kä ‑tatrii 'cie 'ɔa mlɩ, ‑bɛ 'ɔ jö ‑gla 'kä 'ɔa 'fɩɔ tiolɩ. 'Nyaa bibie ‑na 'wʋnyɛrɛnyüü ü 'ba 'ɔmɩ 'uun ‑gälɩ, ‑maa 'ünyɩ 'lɩ ‑a bɩa.» 19 'Iibäa' Jesu nɩ: «'Amɔ nyüü ‑glügbölä kʋa' ‑pɩ, ünyɩ toroa' Nyɔsʋa plɛ. 'Taɩn 'plɛɛ 'a ‑ka 'batra 'saa 'mɩ 'ana ‑tɔrʋpɩɔ le? 'Taɩn 'plɛɛ 'a ‑ka 'bata 'saa ‑a ‑gbötö 'amɩ le? 'Ba ja 'mɩ 'jʋlɔ.» 20 'Ünya ja 'ɔmɩ 'ɔɔn. ‑Susulu 'jäa' Jesu dotro, 'u trara 'jʋlɔ, 'unya 'kpa 'ɔɔn 'kä, ‑bɛ 'ɔ 'kpakpakä, 'ɔa mlɩ 'cie ‑tatrii. 21 Jesu nya 'bete 'jʋlɔa tʋ: «I nöa' 'ɔɔn 'ia jrüü ‑si?» 'Iibäa' 'jʋa tʋ nɩ: «'Ɔ ‑ka bä nyʋklɔ 'unya 'bla 'ɔɔn, 22 ‑srɩ ‑mɩdoo 'lɩ, uma blö 'ɔɔn ‑gälɩ: 'u be be 'ɔɔn kapu 'lɩ, 'u be be 'ɔɔn 'nie 'lɩ 'umä 'ɔɔn 'bla. ‑Ama 'mrɛɛ ‑mä dɛɛ nʋ nɩ, 'jä ana nyatɛrɩ ‑a ji amɩ ‑gba.» 23 'Iibäa' Jesu nɩ: «‑Ama 'mrɛɛ ‑mä Nyɔsʋa plɛtoro! Nyɔɔlɔ toroa' Nyɔsʋa plɛ, 'ɔ 'mrɛɛ ɔ nʋ diia 'fɩɔ.» 24 'A ‑plɩɩ 'jʋlɔa tʋ kʋ dotro 'ɔ ‑nëma: «'N toro Nyɔsʋa plɛ, ‑maa ji 'mɩ ‑gba, 'na nɩ plɛtorokʋ 'nyɩ 'klʋɛɛ 'lɩ ‑a tʋŋlɔ!»
25 Jesu 'jääa' nyüü, 'ü 'jajraa' ‑gälɩ 'ü jöa' nɩ, 'ɔnya nyrara ‑frepasusulu 'wli 'ɔ ‑nëma: «‑Susu, ‑mɔ 'nyɩ 'paa' wii ‑bɛ ‑nyɩ 'nua', ‑mɔ 'n ‑gbala, 'wʋ 'jʋlɔ 'lɩ, ‑ka 'nɩ blö 'ɔɔn ‑gälɩ dɛrɩ!» 26 'U nëmäa' 'cie, 'u 'pa 'popowle, 'unya trara 'jʋlɔ ‑gböösa. 'U 'ciea' 'ɔɔn 'lɩ, 'ɔ ‑beere jäjänyɔɔ, 'kɔkɔmlɛ nɩnɩa 'nɩmɩ: «'Ɔ 'a jä.» 27 ‑Maa Jesu nya 'kpla 'ɔa 'darʋ 'ɔnya dɔrɔ 'ɔɔn 'wʋ; 'ɔnya sɔ 'wʋ 'ɔnya 'nyüglö.
28 Jesu paa' nyukua ‑wälɩ nɩ, 'ɔa 'wʋnyɛrɛnyüü nya 'bete 'ɔɔn 'üa 'kpɔa ‑tɔrʋpɩɔ: «Dɛplɛɛ kä ‑gʋ a prɛ ‑susulu ‑bɛ 'unyɩ mi le?» 29 'Ɔ ‑nëma nɩ: «Nyɔsʋabibiekʋa 'doo 'mrɛɛ 'samaa ‑susulua pɛprɛkʋ 'mlɩ.»
Jesu 'paa 'sɔɔwʋ 'ɔa jäjäkʋ nyra 'ɔa 'kuaabresɔsɔkʋa ‑gä
30 Jesu nyra 'ɔa 'wʋnyɛrɛnyüü sɔa' ‑plɩɩ nɩ, Galilee 'ü ‑gblaara ‑bɛ 'ü mö. 'Ɔ 'nɩ 'bata 'bata ‑a nyüü 'mä 'iin jre. 31 'Ɔa 'wʋnyɛrɛnyüü 'ɔ 'kpɩa ‑bɛ 'ɔ ‑gbala 'üün ‑maa: «'Ünya Nyɔɔa 'Jʋ nyüü kälɩ 'saraa, 'ünya 'ɔɔn 'blaa, 'kä 'ɔnya ‑fälɩ dɛrɩ 'blöö jrüü tääa ‑srɩ 'lɩ.» 32 ‑Maa wiili 'ɔ 'paaa' nɩ, 'ɔa 'wʋnyɛrɛnyüü 'nyɩ 'ɔɔn 'wli ‑a 'nu, ‑bɛ ŋalɛ 'blaa 'üün 'ümä 'ɔɔn 'bete.
Nyɔɔlɔ bäa' kpaköa nɔ
33 'Ünya 'tɔ Kapɛrënaumë. 'Ü paa' nyüköli nɩ, Jesu nya 'bete 'üün: «Wii 'plɛɛ 'a ‑toplo ɩ 'lɩ 'nyʋfɔ mlɩ le?» 34 'Ünyɩ 'ɔɔn mɛ dɛrɩ ‑a cɛrɛ. Wiili 'üa 'kpɔ ‑toplo ɩa' 'lɩ 'nyʋfɔ mlɩ nɩ, 'iibä: «‑Mɔ 'plɛɛ ‑si ‑mɔ 'wʋ ana 'fɩɔa ‑tɔrʋpɩɔ le?» 35 'Ɔnya kʋwälɩ 'ɔnya we nyüüpʋnyüüsɔɔlü, 'ɔnya ‑gbala 'üün: «Nyɔɔ ma 'bata 'ɔɔ 'mä ‑kätɩa nɔ bä nɩ, ɔ bä nyüüa 'fɩɔa 'täpaa nɔ; ɔ bä nyüüa 'fɩɔa 'jrʋpafɛnyɔɔ.» 36 Jesu nya ‑tʋ 'jʋjɔ 'doo 'üa ‑tɔrʋpɩɔ, 'ɔnya dɔrɔ 'ɔɔn 'wʋ, 'iibä: 37 «'Sɩrɩ 'jʋjɔlɔ kʋa' ‑pɩ bäa', nyɔɔ o nyɔɔ 'kʋɛɛa' 'lɩ 'jʋlɔ 'na 'nyrɩklɩa ‑gʋ nɩ, 'mɔɔ 'ɔ 'kʋɛɛlɩ bɩa. Nyɔɔ o nyɔɔ 'kʋɛɛa' 'lɩ 'mɩ nɩ, ‑mää 'na 'doo 'ɔnyɩ 'lɩkʋɛɛ, ‑maa nyɔɔlɔ blɔa' 'mɩ 'ɔɔ 'ɔ 'kʋɛɛlɩ.»
Nyɔɔlɔ 'nyɩ jraraa' amɩ 'nyüa 'mlɩ bä ana nyɔɔ
38 Jaan ‑gbala Jesu: «'Kpɩkpɩanyɔɔ, a 'jä nyɔɔ 'doo, ‑na 'nyrɩklɩ 'ɔ prɛrɛ domüü; ‑bɛ 'ɔnyɩa' ana ‑tɔrʋpɩɔa nyɔɔ bä nɩ, anya ‑gbala 'ɔɔn ɔ fio 'ia ‑gʋ.» 39 'Iibäa' Jesu nɩ: «'A 'nɩ 'nyüglö 'ɔɔn. Nyɔɔ nöa' ‑saragbi 'na 'nyrɩklɩ nɩ, 'ɔnyɩ 'lɩ ‑a bɩa ɔ ‑siekälɩ 'sɔɔwʋ ɔ 'pa 'na ‑gʋ bʋbɔwii. 40 Nyɔɔlɔ 'nyɩ jraraa' amɩ 'nyüa 'mlɩ nɩ, 'ɔɔ bä ana nyɔɔ. 41 Nyɔɔ o nyɔɔ nëmäa' 'amɩ 'mamlanɩa ‑glasɩ 'dee ‑nyɩ 'kä 'Kriisëa nyüü 'a bäa' 'ia ‑gʋ nɩ; 'cɩcasa 'n ‑gbala 'amɩ, 'ia nyɔɔlɔ nya 'pɛɛrɛa 'mʋfagbili 'ɔ nʋa' 'ia ‑gʋ.»
‑Plɩɩ ‑balʋ blöröa' nyüü
42 «‑Maa nyɔɔ ma 'tutro ‑taa 'jülü toroa' 'mɩ plɛ, 'üa ‑tɔrʋpɩɔa 'doo ‑balʋ 'lɩ nɩ, 'i ‑siwʋ ü 'pa 'ɔɔn diisrorotäkä† ‑susugbee ‑plɩ 'lɩ 'kä 'ü bere 'ɔɔn 'taniea 'mlɩ. 43 ‑Na 'darʋa ‑gʋ ‑ama nʋ ‑balʋ nɩ, 'bölɩ 'uun; fa 'darʋ 'doo ‑a mi Nyɔsʋa 'klɩ ‑siwʋ 'kä ‑mä 'dari 'sɔɔ kä ‑bɛ ‑mä kapulu 'nyɩ 'nyrɔlɔa' 'plɔʋa 'mlɩ mi,
44 u kä 'mlɩa tʋa 'nyɩ jäa', ünyɩ sɩaa' nyüüa jijikʋa ‑gʋ, i kä kapu 'nyɩ 'nyrɔlɔa' 'plɔʋ†.
45 ‑Na bɔʋa ‑gʋ ‑ama nʋ ‑balʋ nɩ, 'bölɩ 'uun; fa bɔʋ 'doo ‑a mi Nyɔsʋa 'klɩ ‑siwʋ 'kä ‑mä bei 'sɔɔ kä ‑bɛ 'ümä ‑mɩ kapulu 'nyɩ 'nyrɔlɔa' 'plɔʋa 'mlɩ be,
46 u kä 'mlɩa tʋa 'nyɩ jäa', ünyɩ sɩaa' nyüüa jijikʋa ‑gʋ, i kä kapu 'nyɩ 'nyrɔlɔa' 'plɔʋ†.
47 ‑Na 'nyiöa ‑gʋ ‑ama nʋ ‑balʋ nɩ, 'balɩ 'ään; fa 'nyiö 'döö ‑a mi Nyɔsʋaa 'kamaplä 'lɩ ‑siwʋ 'kä ‑mä 'nyü 'sɔɔ kä ‑bɛ ‑mä kapulu 'nyɩ 'nyrɔlɔa' 'plɔʋa 'mlɩ bere,
48 u kä 'mlɩa tʋa 'nyɩ jäa', ünyɩ sɩaa' nyüüa jijikʋa ‑gʋ, i kä kapu 'nyɩ 'nyrɔlɔa' 'plɔʋ†.