Jesu 'cicria' 'ɔa 'wʋnyɛrɛnyüü ‑tääa 'klɩ
17
1 Jrüü ‑uundoo 'mä ‑si nɩ, Jesu nya dɔrɔ Piɛɛrë, Jaakë nyra 'ɔa ‑wlajʋ Jaan 'wʋ, 'ɔ nyra 'üün nya bereklɩ 'dʋgba kpakö 'döö 'wli. 2 Jesu nya 'cicri 'üa 'klɩa 'mʋgbɛ; 'ɔa 'klʋɩ ŋʋa ‑beere 'jrʋ, 'ɔa 'lɩpadii nya plö 'inya 'pɔlɔ ‑beere ‑srɩ†. 3 Elii nyra Moisë nya 'tɔrɔ 'üa 'klɩ, ‑bɛ 'üü nyra 'ɔɔn dɛtɛ. 4 Piɛɛrë nya 'pawii 'ɔnya ‑gbala Jesu: «'Pläkänyɔɔ, ‑tɛ a jia' 'i 'na, ‑ama 'nyie 'mä ‑tetu tää 'pa; ‑na nɛ 'dee, Moisëa nɛ 'dee, nyra Eliia nɛ.» 5 'Ɔ ‑ka 'paa wii ‑bɛ pöplö ‑gbru ‑gblɔɔ 'üün ‑gälɩ 'kä, mlɩa wii nya ja ‑gbrulua 'mlɩ 'i ‑nëma: «'Na plɛ ‑gälɩa 'Jʋ kʋ ‑pɩ, 'ɔɔ 'lɩ 'n ‑tʋ 'na dɔrʋa 'fɩɔ. 'Ba po 'ɔɔn 'nyakli!»6 'Ɔa 'wʋnyɛrɛnyüülü 'nua' 'papawiili 'wli ŋalɛ nya 'bla 'üün ‑gböösa, 'ünya 'pi ‑gu ‑gälɩ 'ünya ‑gbri 'üa 'klʋɩ 'kä. 7 Jesu nya jijrö 'üün ‑gba, 'ɔnya ‑fɛ 'üün ‑gba, 'ɔ ‑nëma: «'Ba sɔwʋ! Ŋalɛ 'nyɩ 'bla 'amɩ!» 8 'Ü dɔrɔa' 'klʋɩ 'wʋ, 'ü ‑kanyɩ ‑pasanyɔɔ ‑moloo ‑a 'jä ima 'nyɩ Jesua 'doo ‑a bä.
9 'Ü 'ciea' 'dʋgba nɩ, 'ɔnya ‑gbala 'üün ‑maa: «Wiili 'a 'jäa' 'anyɩ ‑gbala 'iin nyɔɔ 'kä Nyɔɔa 'Jʋ sɔ 'kuaabre.»
'Wʋnyɛrɛnyüü 'bete Jesu Eliia ‑gʋ
10 'Ɔa 'wʋnyɛrɛnyüü nya 'bete 'ɔɔn, 'ü ‑nëma: «‑Bɛ dɛplɛɛ kä ‑gʋ ‑dɔkpɩanyüü nö ‑maa Elii ‑kätɩ nëmä ji† 'fɩɔwʋ le?» 11 Jesu nya ‑gbala 'üün: «'Asɩ 'i bä, Elii ‑kätɩ jö 'ɔmä diia 'fɩɔ 'ia kʋfa 'wʋ ‑tätä. 12 ‑Maa 'amɔ 'n ‑gbala: Elii 'a kä ji, ‑maa nyüü 'nyɩ 'ɔɔn 'nyügba ‑a ‑tʋ 'ünya nʋ 'ɔɔn wiili 'ü ‑waa' ‑gba. 'A dɛɛ 'deelɛ 'ümä bɩa Nyɔɔa 'Jʋ ‑gba nʋ; 'ünya 'ɔɔn ‑sʋɩ ‑siea.» 13 'Fɩɔwʋ 'a 'wʋnyɛrɛnyüü ‑ka jre ɩa' 'saa 'sɩrɩ 'ɔɔ 'paaa' Jaan Batiisëa ‑gä.
'Jʋlɔ Jesu 'baa' ‑balʋsusu ‑gälɩ
14 'Ü 'tɔa' ‑jria ‑gba nɩ, nyɔɔ 'doo nya ji 'ɔnya 'pa 'ɔa 'klɩ kotifli 'ɔnya bibie 'ɔmɩ: 15 «'Pläkänyɔɔ, 'jä 'na 'jʋa nyatɛrɩ. ‑Patɛɛ 'blaa 'ɔɔn ‑bɛ 'ɔ 'jä ‑sʋɩ ‑gböösa. ‑Srɩ ‑mɩdoo 'ɔ böblö kapu 'lɩ 'aiɛ 'nie 'lɩ. 16 'N ja 'ɔɔn ‑na 'wʋnyɛrɛnyüü ‑maa 'ünyɩ 'ɔɔn 'pʋɔ ‑a 'pʋɔ.» 17 'Iibäa' Jesu nɩ: «'Amɔ nyüü ‑glügbölä kʋa' ‑pɩ, ünyɩ toroa' Nyɔsʋa plɛ, ü nöa' ‑balʋ! 'Taɩn 'plɛɛ 'a ‑ka 'bata 'saa ‑a ‑gbötö 'amɩ le? 'Ba ja ‑pɩklɩ 'mɩ 'jʋlɔ!» 18 Jesu nya ‑sɔɔrɔ wii 'wʋ domoo nya 'cie 'jʋlɔ 'lɩ. 'A ‑plɩɩ 'jʋlɔ kʋ dotro 'ɔnya 'pʋ.
19 'I ‑sia' nɩ, 'wʋnyɛrɛnyüülü nya jijrö Jesu ‑gba 'ünya 'bete 'ɔɔn 'üa 'kpɔa ‑tɔrʋpɩɔ: «Dɛplɛɛ kä ‑gʋ a prɛ domoolɔ ‑bɛ 'ɔnyɩ mi le?» 20 Jesu nya ‑gbala 'üün: «'Ana nyɔsʋaplɛ 'nyɩ 'bʋa ‑a 'bʋa, 'ia ‑gʋ. 'Cɩcasa 'n ‑gbala 'amɩ, 'ama kä nyɔsʋaplɛ, ɛma bä dɩjɔ ‑beere mutarëdëeji nɩ, 'anya ‑taa 'dʋgbalä ‑gbalaa: ‹Sɔ ‑pɩ, mi ‑nyɛɛ!› 'Kä 'änya 'kousɔ. Dɛɛ 'nyɩ 'lɩ ‑a bä 'ɛmä 'amɩ 'nyüglö. 21 ‑Maa 'ia 'samaa domoolɔ nɩ, nyɔsʋabibiekʋ nyra su 'ii 'mrɛɛ i prɛ 'ɔmɩ†.»
Jesu 'paa' 'sɔɔwʋ 'ɔa jäjäkʋ nyra 'kuaabresɔsɔkʋa ‑gä
22 'Taɩn 'lɩ 'ü traraa' Galilee nɩ, Jesu nya ‑gbala 'üün ‑maa: «'Ünya Nyɔɔa 'Jʋ nyüü kälɩ 'saraa, 'kä 23 'ünya 'ɔɔn 'blaa; ‑maa 'ia jrüü tääa ‑srɩ 'lɩ nɩ, 'ɔnya 'kuaabre sɔa.» 'I pa 'wʋnyɛrɛnyüü ‑gba ‑gböösa.
Nyɔsʋaanyuku dapooa 'pɛpɛɛkʋ
24 'Ü 'tɔa' Kapɛrënaumëbätä nɩ, Nyɔsʋaanyukua dapookälɩpɛrɛnyüü nya jijrö Piɛɛrë ‑gba 'ünya 'bete 'ɔɔn: «'Ana 'kpɩkpɩanyɔɔ 'nyɩ 'pɛɛ Nyɔsʋaanyuku dapoo ‑a?» 25 'Iibäa' Piɛɛrë: «‑Yɛɛ.» Piɛɛrë 'paa' nyüköli dotro Jesu ‑kätɩ 'bete 'ɔɔn: «Simɔɔ, nyüü 'plɛɛ kä 'ümä ‑pɩ ‑tʋtʋ ‑gälɩa 'kɩɩ dapookälɩpɛrɛ le, bätäläa 'mʋgbɛa nyüü ‑maa nyɔtugbanyüü? ‑Asɩ bobo 'iin le?» 26 'Iibäa' Piɛɛrë: «Nyɔtugbanyüü bäsaa.» Jesu ‑nëma: «‑Bɛ, bätäläa 'mʋgbɛa nyüü 'nyɩ 'pɛɛ dɛɛ ‑a. 27 ‑Maa nyüüa 'fɩɔ ‑pɩa' amɩ 'nyügba ‑tʋ nɩ, mi 'nie ‑gba, be 'faflɛ 'nie 'lɩ. ‑Srelɛ ‑kätɩ ‑nëmäa' fɩa nɩ, tɛ 'ɛa mlɩ, ‑nya 'lɩ mölii 'järäa. Dɔrɔ 'iin 'wʋ 'kä ‑pɛɛ ‑na dapoo nyra 'na nä.»