Farisinyüü nyra Sadusinyüü 'pa Jesu bɔʋdɛrɩ
16
1 Farisinyüü nyra Sadusinyüü nya ji Jesu bɔʋdɛrɩ 'pa. 'Ü ‑gbala 'ɔɔn ɔ srara 'üün ‑saragbia tielɛ sɔa' cɛlɩ. 2 ‑Jäsɩ Jesu ‑gbalaa' 'üün nɩ: «‑Gbiajrʋ ma mi ‑bɛ cɛlɩ ma ‑flɔɔɔ 'a nö: ‹‑Srɩakäpɩa ‑srɩ nya 'naa.› 3 ‑Suwla 'kä 'a nö: ‹'Nʋŋlʋ nya daa, 'be cɛlɩ 'kpörö.› ‑Glagälɩsrörönyüü†! 'Ama tɛ cɛ 'klɩ 'a jre wiili nëmäa' 'lɩjrä, ‑maa wiili ‑sööa' 'anyɩ 'lɩ ‑a bɩa 'amä 'iin 'klɩtɛ 'amä 'lɩ wiili nëmäa' 'lɩjrä ‑taa 'taɩnlɩa 'mlɩ, 'amä 'iin 'lɩsa! 4 Nyüüglügbölä kä plɛ bʋbɔa', ä sɔa' Nyɔsʋa dɛrɩ, 'ää 'bata ‑saragbia tie. ‑Maa ‑saragbi ‑mɩdoo ‑nëmä nrörö ‑a nrörö ima 'nyɩ ‑saragbili jräa' nyɔsʋaamlɩpalanyɔɔ Jonaasë ‑gälɩ ‑a bä.» 'Ɔnya tɩ ‑plɩɩ 'üün 'ɔnya mi.Farisinyüü nyra Sadusinyüüa levurë
5 'Wʋnyɛrɛnyüü 'tɔa' 'niea 'pɛ ‑mɩdee ‑gälɩ nɩ, 'ünya 'pa plɛ 'sɩrɩ 'ünyɩa' 'flɔɔ fa. 6 Jesu nya ‑gbala 'üün: «'Amɔ 'n ‑gbala! 'Ba ‑tre 'ana nyüfë Farisinyüü nyra Sadusinyüüa levurëa ‑gʋ!» 7 'Üa 'kpɔ ‑toplo 'lɩ ‑bɛ 'ü nö: «Anyɩa' 'flɔɔ ja, 'a 'ia ‑gʋ 'ɔ ‑gba 'iin.» 8 Jesu 'nu wiili 'ü 'paaa' 'wli, 'ɔnya 'bete 'üün: «Dɛplɛɛ kä ‑gʋ 'a 'paa 'samaa wii le 'amɔ kä nyɔsʋaplɛ 'nyɩa' 'bʋa; 'sɩrɩ 'anyɩa' 'flɔɔ ja 'ii 'a ‑toplo 'lɩ? 9 'A ‑kaaŋlʋ 'saa wiia ‑gbaa jre? 'Ba 'pa 'flɔɔbü ‑gböölü plɛ 'ü 'n nʋa' ‑bɛ 'n 'finia' nyüüa ‑diipʋ ‑diisɔɔ ‑glʋɩpʋ (5 000) 'klɩ; nyra ‑mɩlɩ tɩɔa' 'lɩ 'ia ‑gä plɛ; jijria ‑kätë ‑srüplɛɛ 'a fa le? 10 ‑Bɛ 'n 'böblöa' 'flɔɔbü ‑uunsɔɔ ‑tɩa nyüüa diipʋa ‑gʋ nɩ (4 000), ‑kätë ‑srüplɛɛ 'a fa le? 11 Wiili 'n 'daa, ‑mää 'flɔɔa wii 'inyɩ bä. 'Anyɩ wiia ‑gbaa ‑a jre? 'Ba ‑tre 'ana nyufa Farisinyüü nyra Sadusinyüüa levurëa ‑gʋ!» 12 'A ‑plɩɩ ü 'nu 'sɩrɩ 'ɔnyɩ 'paa' 'flɔɔa levurëa ‑gä, ‑maa ü ‑tre 'üa nyüfë, ü tʋŋlɔlɩ Farisinyüü nyra Sadusinyüüa 'kpɩkpɩakʋlʋ 'ü 'kpɩaa' nyüüa dɛrɩ.
Piɛɛrë nɩnɩa Jesu bä Nyɔsʋaa 'Lɩbanyɔɔ 'Kriisë
13 Jesu 'tɔa' Sesareea ‑tʋtʋ ‑gälɩa bätälä 'ü 'daraa' Filipë nɩ, 'ɔnya 'bete 'ɔa 'wʋnyɛrɛnyüü: «‑Asɩ nyüü ‑gbaaa 'na ‑gʋ le, 'mɔɔ Nyɔɔa 'Jʋ?» 14 'Iibäa' 'ɔa 'wʋnyɛrɛnyüü nɩ: «'Ü nɩnɩa ‑mɔ bä Jaan Batiisë, ‑mölöö nö Elii, ‑mölöö nö Jeremii 'aiɛ nyɔsʋaamlɩpalanyüüa ‑tɔrʋpɩɔa nyɔɔ 'doo ‑bä.» 15 'Ɔnya 'bete 'üün: «‑Bɛ 'amɔ le? ‑Asɩ 'a ‑gbaaa 'na ‑gʋ le?» 16 Simɔɔ Piɛɛrë nya 'saa 'ɔɔn ‑gälɩ 'ɔ ‑nëma: «‑Mɔ bä 'Kriisë†, 'Lɩbä Nyɔsʋaa 'Jʋ.» 17 Jesu nya ‑gbala 'ɔɔn ‑maa: «Simɔɔ, Jonasëa 'Jʋ, abɩa dɔrʋ 'bla ‑mɩ, 'be ‑mää nyɔɔ† 'nyɩ ‑mɩ 'iin mlɩ 'pa, ‑maa 'na Tʋlɔ bäa' cɛlɩ, 'ɔɔ 'pa ‑mɩ 'iin mlɩ. 18 'Na 'mʋgbɛ ‑jäsɩ 'n ‑gbalaa' ‑mɩ nɩ: ‑Mɔ bä Piɛɛrë† ‑bɛ 'a 'ia 'täkäläa ‑gälɩ 'mä 'na 'cɛcɩ 'pala. 'Kuaabrea 'klü 'nyɩ 'lɩ ‑a bɩa ü 'kpa 'uun 'kä. 19 'Nyaa ‑mɩ cɛɩɩa 'kamapläa 'sapu ‑nyɩa; diili kä 'fɩɔ ‑nëmäa' ‑pɩ ‑tʋtʋ ‑gälɩ kpasra nɩ, 'inya cɛa 'mlɩ kpasraa. Diili kä 'fɩɔ ‑nëmäa' ‑jejie ‑pɩ ‑tʋtʋ ‑gälɩ nɩ, 'inya cɛa 'mlɩ ‑jejroa.» 20 'Pɩrɩgälɩ nɩ, Jesu nya ‑gbala 'ɔa 'wʋnyɛrɛnyüü ünyɩ ‑gbala 'iin nyɔɔ 'sɩrɩ 'ɔɔ Jesu bäa' 'Kriisë.
Jesu 'paa 'ɔa jäjäkʋ nyra 'ɔa 'kuaabrea sɔsɔkʋa ‑gä
21 'Bala ‑plɩlɩ ɔ nɩ, Jesu ‑gbala 'ɔa 'wʋnyɛrɛnyüü 'sɩrɩ 'ɔ käa' 'ɔmäa' Jerusalɛɛmë mi, ‑bɛ 'ɔmäa' ‑sʋɩ 'jä ‑gböösa; juifëa tagbü, ‑gbɔsapɛrɩnyüü kpakü nyra ‑dɔkpɩanyüüa ‑gʋ; 'sɩrɩ 'ümäa' 'ɔɔn 'blaa ‑bɛ 'ɔmäa' kuaabre sɔ 'ia jrüü tääa ‑srɩ 'lɩ. 22 Piɛɛrë nya fa 'ɔɔn 'ünya bereklɩ, ‑bɛ 'ɔ 'daa 'ɔɔn: «'Pläkänyɔɔ, 'ba 'iin mlɩ. 'I ‑nëmä ‑srɩɩ ‑mɩ ‑gälɩ ‑a jrä!» 23 Jesu nya ‑siekälɩ 'ɔnya ‑gbala Piɛɛrë: «Tʋŋlɔ 'mɩ 'lɩdɛrɩ, Sataan! 'Mɔɔ ‑ji bɔʋdɛrɩ 'pa! Wiili ‑klaaa' ‑plɩɩ, nyüüa ni ‑klaaa, ‑maa ‑mää Nyɔsʋaa ni ‑nyɩ 'klaa!»
Jesua 'wʋnyɛrɛkʋ
24 'I ‑sia' nɩ, Jesu nya ‑gbala 'ɔa 'wʋnyɛrɛnyüü: «Nyɔɔ o nyɔɔ 'bataa' nyra 'ɔɔn 'mä 'wʋnyɛrɛ nɩ, ɔ ‑trɔ 'ɔa nyufaa ‑gä, ɔ 'pie 'ɔa krʋaa ‑plɩ ‑gälɩ† 'kä 'ɔ jö ‑bɛ 'nyraa 'ɔɔn 'mä 'wʋnyɛrɛ. 25 ‑A ‑gbala 'amɩ, nyɔɔ o nyɔɔ 'bataa' 'ɔa 'kläa ‑wälɩtʋtʋkʋ nɩ, 'ɔnya 'ään 'mɔlɔa. ‑Maa nyɔɔ o nyɔɔ 'mɔlɔa' 'ɔa 'klä 'na ‑gʋ nɩ, 'ɔnya 'ään 'jäa. 26 ‑Bɛ 'sɔɔwʋ nɩ, nyɔɔ ma 'sa 'ɔa 'klä ‑bɛ ɔma ji 'plä 'wʋa 'bɩɔa 'fɩɔ nɩ, ‑gbaa 'plɛɛ 'u kä le? Dɛplɛɛ 'ɔ ‑ka 'mä ‑plɩɩ 'sa, ‑bɛ 'ɔmä 'lɩ 'ɔa 'klä mlɩ 'ba le? 27 'Be Nyɔɔa 'Jʋ nyra 'ɔa 'aanjë nëmä 'ɔa Tʋa 'wliklɩbʋabʋakʋ ja ‑bɛ 'ɔmä ji ‑o. 'Ia 'taɩn 'lɩ nɩ, ‑moloa nʋnʋgbi 'ɔmä 'klɩtɛ ‑bɛ 'ɔmä 'ɔɔn 'pɛɛ. 28 'Cɩcasa 'n ‑gbala 'amɩ, ‑mölöö bä ‑pɩ 'ana ‑tɔrʋpɩɔ, 'ünya Nyɔɔa 'Jʋa jijidɛɛ 'jäa 'ɔa 'Kamapläa 'mlɩ 'fɩɔwʋ ‑a ji 'ümä jä.»