Farisinyüüa ‑dɔ
15
1 'I ‑sia' ‑dɔkpɩanyüü nyra Farisinyüü nya sɔ Jerusalɛɛmë, 'ünya ji Jesu 'jä. 'Ünya 'bete 'ɔɔn: 2 «Wii 'plɛɛ kä ‑gʋ ‑na 'wʋnyɛrɛnyüü 'pɩɛ ana tʋɩɩa ‑dɔ ‑gälɩ le? Dɛplɛɛ kä ‑gʋ 'ünyɩ su wlu ana 'brea 'sa ‑bɛ 'ü jödɛɛ le?» 3 Jesu nya ‑gbala 'üün ‑maa: «‑Bɛ 'amɔ le, dɛplɛɛ kä ‑gʋ 'a 'pɩɛ Nyɔsʋaa ‑dɔ ‑gälɩ, 'ana 'brea ‑dɔa ‑gʋ le? 4 'Be Nyɔsʋa nɩnɩa: ‹‑Träärälɩ ‑na tʋ nyra ‑na 'yio.› ‑Bɛ 'sɔɔwʋ nɩ: ‹Nyɔɔlɔ nëmäa' 'ɔa tʋ 'aiɛ 'ɔa 'yio bʋbɔ 'mä dɛrɩ fa nɩ, 'ɔ bä jäjänyɔɔ†.› 5 ‑Maa 'amɔlɔ nɩ, 'a nɩnɩa: ‹Nyɔɔ o nyɔɔ ma ‑gbala 'ɔa tʋ 'aiɛ 'ɔa 'yio ‑maa: Dɛɛlɛ 'nëmä ɩa' nʋ 'mä ɩa' ‑mɩ ‑gbaji, 'ɛɛ 'n ‑nyɩ Nyɔsʋa.› 6 'A nöa' 'saa nɩ, Nyɔsʋaa ‑dɔ 'a 'pɩɛ ‑gälɩ ‑bɛ 'a ‑träärälɩ 'ana 'brea ‑dɔ. 7 ‑Glagälɩsrörönyüü! Wiili Esaii tɩ käa' ‑srɩ dɛrɩ 'ɔ 'paa 'ana ‑gʋ, 'ɔ kä kä ‑gä. 'Ɔ nɩnɩa kä:8 'Lɩsawiia 'mlɩ ‑glügbölä ‑kʋa' ‑pɩ jijrö 'mɩ ‑gba†,
mlɩa 'doo 'ü ‑träärälɩ 'mɩ;
‑maa 'üa polu tʋŋlɔ 'mɩ 'lɩdɛrɩ.
9 'Fʋflɛsa 'ü ‑pʋpʋa 'mɩ,
'üa 'brea ‑dɔ 'üa 'mlɔɔ 'paa' 'lɩ, 'uu 'ü 'kpɩa nyüü†.»
Nʋnʋgbili plaa' nyɔɔ ‑fre 'lɩ
10 'I ‑sia' nɩ, Jesu nya we ‑jriaa 'fɩɔ, 'ɔnya ‑gbala 'üün: «'Ba po 'mɩ 'nyakli, 'amä 'nu 'cɩcasa. 11 Dɛɛlɛ möa' nyɔɔa mlɩ nɩ, ‑mää 'ɛɛ 'nyɩ pla 'ɔɔn ‑fre 'lɩ. ‑Maa dɛɛlɛ plaa' 'ɔɔn ‑fre 'lɩ nɩ, 'a ɛ 'ciea' 'ɔa mlɩ.»
12 'Ii känyrɩ 'ɔa 'wʋnyɛrɛnyüü nya jijrö 'ɔɔn ‑gba, 'ü ‑nëma: «‑Tʋ ‑plɩɩ Farisinyüü 'nyü ‑gba? 'Ü 'nua' wiili ‑paa' 'wli nɩ, 'i pa 'üün ‑gba ‑gböösa?» 13 Jesu ‑nëma: «Papladɛɛ bäa' papladɛɛ, ɛ 'na Tʋ 'nyɩa' pla nɩ, 'ɛnya ‑fli 'wʋa. 14 'Ba 'cɛrɛ 'üün ‑wälɩ; 'nɔnɔnyüü 'ü bä ‑bɛ 'ü 'tiere 'nɔnɔnyüü! 'Nɔnɔnyɔɔ ma 'tiere 'nɔnɔnyɔɔ ‑moloo nɩ, 'üa 'sɔɔ nya 'bütügba 'lɩ blöa.»
15 Piɛɛrë nya dɔrɔ wii 'wʋ 'ɔ ‑nëmä: «‑Gbala amɩ tapönänäläa ‑gbaa.» 16 'Iibäa' Jesu nɩ: «'Ana 'mʋgbɛ ‑kaaŋlʋ 'saa 'lɩgla? 17 'Anyɩ 'saa ‑a jre 'sɩrɩ diili kä 'fɩɔ ‑sröröa' nyɔɔa mlɩ ‑bɛ i möa' 'ɔa 'mlɩ 'cie 'ɔa fugba 'lɩ? 18 ‑Maa wiili sɔa' plɛ ‑gälɩ 'ii jara mlɩ, 'a 'ii pla nyɔɔ ‑fre 'lɩ. 19 Nyɔɔa plɛklɩ, 'ii ‑balʋwiia bobokʋ sɔ: nyüübablakʋ, bätësa, ‑sagbili Nyɔsʋa 'nyɩ 'bataa', 'jejiekʋ, nyɔɔa ‑gbagblɛ ‑gälɩtʋtʋkʋ nyra nyüüa bʋbɔnyrɩa 'papakʋ. 20 ‑Jää ‑gbili plaa' nyɔɔ ‑fre 'lɩ! ‑Maa ‑nyɩ su wlu ‑bɛ ‑a jidɛɛ nɩ, ‑mää 'iin 'nyɩ pla nyɔɔ ‑fre 'lɩ.»
Nyɔtugbaŋlʋʋlɔ toroa' Jesu plɛ
21 'I ‑sia' nɩ, Jesu nya sɔ 'lɩ 'ɔnya mi Tiirë nyra Sidɔɔn a ‑tʋtʋ ‑gälɩ. 22 ‑Jää Kanaan† a 'brea 'ŋlʋʋ 'doo ma bäa' 'lɩ, 'ɔnya jijrö 'ɔɔn ‑gba 'ɔnya 'pawii ‑gböösa 'ɔ ‑nëmä: «'Pläkänyɔɔ, Daviidëa 'Jʋ, 'jä 'na nyatɛrɩ! Domoo sɩara 'na 'ŋlëkayria ‑gböösa!» 23 ‑Maa 'ɔnyɩ 'ɔɔn ‑yru 'wʋ ‑a 'pa. 'Ɔa 'wʋnyɛrɛnyüü nya jijrö 'ɔɔn ‑gba 'ü ‑nëma: «Prɛ 'ɔɔn! Dɛplɛɛ kä ‑gʋ 'ɔ 'kpöö ‑bɛ 'ɔ prɛ amɩ dɛrɩ le?» 24 Jesu ‑nëma: «Nyɔsʋa blɔ 'mɩ Israɛɛlëa nyüülü 'mɔlɔa' ‑beere ‑bablëë 'üa 'dooa ‑gʋ.» 25 'Ŋlʋʋlɔ nya 'pala 'ɔa 'klɩ kotifli, 'ɔ ‑nëma: «'Pläkänyɔɔ ji 'mɩ ‑gba!» 26 'Iibäa' Jesu nɩ: «Nyɔɔ 'mä 'jüjiea jijrɛ 'wʋdɔrɔ 'ɔmä 'ɛɛn ‑fäjie ‑nyɩ nɩ, 'inyɩ 'na ‑a 'na.» 27 'Iibäa' 'ŋlʋʋlɔ nɩ: «'Cɩcasa bäsaa 'Pläkänyɔɔ, ‑maa 'a jijrili sɔsɔa' 'üa 'kamanyɔɔa 'töwlö ‑gälɩ i böblöa' nɩ, 'a 'ii ‑fäjielë jö.» 28 Jesu nya ‑gbala 'ɔɔn: «'Ŋlʋʋ ‑o, ‑na nyɔsʋaplɛtorokʋ 'bʋa! Abɩa wiili ‑baataa', nrörö ‑o.» 'Ɔ 'paa 'imɩ dotro 'a ‑plɩɩ 'ɔa 'ŋlëkayrialɔ kʋ dotro 'ɔnya 'pʋ.
‑Wusublanyüülü Jesu 'pʋɔa'
29 Jesu nya sɔ 'lɩ 'ɔnya mi Galileea 'niea ‑gba. 'Ɔnya 'jra 'dʋgba 'wli, 'ɔnya kʋwälɩ. 30 Nyüü 'kɔkɔmlɛ nya mi 'lɩ 'lee, 'ü jaja 'ɔɔn kpakpanyüü, 'nɔnɔnyüü, 'susunyüü, nyüülü kä ‑gbaa dii jäa', nyra ‑wusublanyüü ‑mölöö 'kɔkɔmlɛ. 'Ünya 'pie 'üün Jesu bei 'wʋ 'ɔnya 'pʋɔ 'üün. 31 Nyüülü bä ɩa' ‑plɩɩa ‑gälɩa 'ku fɔ; nyüülü 'sua' ‑bɛ ünyɩ 'paa wii, 'paa wii, nyüülü kä ‑gbaa dii jäa' 'pʋ, kpakpanyüü 'nyɛɛ ‑bɛ 'nɔnɔnyüü 'jääkä. ‑Jriaa ‑tʋ 'lɩ Israɛɛlëa Nyɔsʋaa 'bʋalakʋ.
Jesu 'fini nyüüa ‑diipʋ (4 000) 'klɩ
32 Jesu nya we 'ɔa 'wʋnyɛrɛnyüü 'ɔnya ‑gbala 'üün: «Nyüülü kʋa' ‑pɩ kä 'mɩ nyatɛrɩ 'wʋ, 'nyraa 'üün kʋa' ‑wälɩ 'ia jrüü tää ‑bɛ 'ünyɩ jijrɛ ‑a 'klaa 'ümä dɛɛji. ‑Gbëka ‑nëmä 'üün 'bla ‑a 'bla ‑bɛ 'mä 'üün ‑gbala ü 'blöödɛrɩ; 'kɔprʋ ‑pɩ 'üün 'nyʋfɔ 'wʋ 'kplara.» 33 'Ɔa 'wʋnyɛrɛnyüü nya 'bete 'ɔɔn: «‑Taa ‑aagalä kä 'mlɩ a bäa' ‑plɩɩ ‑a 'plɛɛ amä jijrɛ 'järä amä nyüü 'kɔkɔmlɛlü kʋa' ‑pɩ 'klɩfini le?» 34 Jesu nya 'bete 'üün: «'Flɔɔbü ‑srüplɛɛ 'a 'klaa le?» 'Iibä: «'Flɔɔbü ‑uunsɔɔ, nyra ‑srü sʋsʋ jie.» 35 'Ɔnya ‑gbala nyüülüa 'fɩɔ ü 'wawlakä. 36 'Ɔnya dɔrɔ 'flɔɔbü ‑uunsɔɔlʋ nyra ‑srülü 'wʋ, 'ɔ 'bɩaa' Nyɔsʋa 'tɛtrɛɛkʋ, 'ɔnya 'böblö 'iin ‑tɩa 'ɔnya ‑nyɩ 'iin 'ɔa 'wʋnyɛrɛnyüü ü ‑päälä 'ümɩ 'iin 'lɩ. 37 'Üa 'fɩɔ jidɛɛ ji ji 'ünya dö. Jijrili tɩɔa' 'lɩ 'sie ‑kätë ‑uunsɔɔ. 38 Nyüülü jia' jijrili 'ü bä nyɩberüa ‑diipʋ (4 000), 'ŋlëgë nyra 'jü 'nyɩ 'lɩmlɩ ‑a ‑täsrä.
39 'Ɔ bɩa nyüü ‑gbalakʋ ü 'blöö 'üa ‑nyɛɛ dɛrɩ nɩ, 'ɔnya 'jra ‑gɔlʋ 'lɩ, 'ɔnya mi Magëdalaa† ‑tʋtʋ ‑gälɩ.