Jesu 'kpɩaa' 'ɔa 'wʋnyɛrɛnyüü nyɔsʋaabibiekʋ
11
1 'Taɩn 'doo 'lɩ nɩ, Jesu bereklɩ 'ɔnya mi Nyɔsʋa bibiekalɩ. 'Ɔ 'wlaraa' nɩ, 'ɔa 'wʋnyɛrɛnyüü ‑mölöö nya ‑gbala 'ɔɔn: «'Pläkänyɔɔ, 'kpɩa amɩ nyɔsʋaabibiekʋ, 'sɩrɩ Jaan 'kpɩaa' 'ɔa 'wʋnyɛrɛnyüü.» 2 'Ɔnya ‑gbala 'üün: «'Ama bibie Nyɔsʋa nɩ, 'ba 'daa:Ana Tʋ, ɔ bäa' cɛa 'mlɩ†,
abɩa ‑na 'nyünanyrɩ 'bʋala;
abɩa ‑na 'kamadɛɛ 'tɔ ‑tʋtʋ ‑gälɩ.
Wiili ‑baataa', i nrörö ‑tʋtʋ ‑gälɩ 'sɩrɩ 'i nröröa' cɛa 'mlɩ†.
3 ‑Nyɩ amɩ ana ‑srɩa jijrɛ.
4 Cere amɩ ana ‑balʋ, 'be ana 'mʋgbɛ,
a cere nyüülü nöa' amɩ ‑balʋ ‑gba, 'üa ‑balʋ.
'Nyɩ tɛ bɩa amɩ 'klɩ anyɩ mi ‑balʋ 'lɩ,
‑maa 'ba amɩ Plɛbʋbɔsusu kälɩ†.»
5 'Ɔnya ‑gbala 'üün 'sɔɔwʋ: «'Ana ‑tɔrʋpɩɔa nyɔɔ 'plɛɛ 'mä 'ɔa ‑beia ‑nyɛɛ mi ‑srɩlɩtʋŋlʋwlaa ‑bɛ 'ɔmä 'ɔɔn ‑gbala: ‹'Na ‑bei ‑nyɩ 'mɩ 'flɔɔbü tää. 6 'Na ‑moloo ji 'mɩ 'jä, ‑bɛ 'nyɩ jijrɛ ‑a 'klaa 'mä 'ɔɔn ‑nyɩ.› 7 'Kä ‑na ‑mɔlɔ nya nyuku ‑wälɩ 'lee kʋ 'ɔnya 'daa ‑maa: ‹‑Nɩ 'yagba 'mɩ! Tatu 'a blörö, 'nyraa 'na 'jü 'a 'pi; 'nyɩ 'lɩ ‑a bɩa 'mä 'wʋsɔ 'mä ‑mɩ dɛɛlɛ ‑baata ‑nyɩ.› 8 ‑Maa 'amɔ 'n ‑gbala, ‑bakää 'ɔ ‑nëmä 'wʋsɔ 'ana ‑gbötüdɛɛa ‑gʋ nɩ, 'ɔnya 'wʋsɔa, 'be ‑nɩ 'nyüglö 'ɔa ‑sɛsɛkʋa ‑gʋ ‑a, 'kä 'ɔnya ‑mɩ diili kä 'fɩɔ ‑baataa' ‑nyɩ. 9 'A 'ia ‑gʋ 'n ‑gbala 'amɩ: 'Ba ‑sɛ, ‑bɛ Nyɔsʋa 'mä 'amɩ ‑nyɩ; 'ba 'bata 'anya 'ɛɛn 'jäa; 'ba bɔtɔ tatu, 'ɔnya 'amɩ tatu 'klɩ 'saa. 10 'Be nyɔɔ o nyɔɔ ‑sɛa', Nyɔsʋa ‑nyɛɛ 'ɔɔn; nyɔɔlɔ 'bataa', 'ɔ 'jää dɛɛlɛ 'ɔ 'bataa'; 'kä nyɔɔlɔ bɔtɔa' tatu, 'ɔ 'saa 'ɔɔn tatu 'klɩ. 11 Tʋ 'plɛɛ bä 'ana ‑tɔrʋpɩɔ, ɔ 'ɔa 'jʋ ma ‑sɛ 'flɔɔ, 'ɔmä 'ɔɔn 'täkä ‑nyɩ le†? 'Aiɛ 'ɔma ‑sɛ 'ɔmɩ ‑sre, ‑bɛ 'ɔmä 'ɔɔn trɔɔ ‑nyɩ le? 12 'Aiɛ, ɔma ‑sɛ 'ɔɔn sapëgɩ nɩ, 'kä 'ɔnya 'ɔɔn ‑gbätä ‑nyɩ? 13 'Amɔ kä plɛ bʋbɔa', 'a jre 'ana 'jüa 'mʋfadiia ‑nyɩnyɩkʋ. ‑Maa 'ana Tʋlɔ bäa' cɛlɩ 'ɔɔ ‑nëmä 'Nyüna ‑Susu nyüülü ‑sɛɛɛa' 'ɔmɩ 'uun ‑nyɩ!»
‑Dɔkpɩanyüü srörö Jesu
14 Jrüü 'doo 'lɩ nɩ, Jesu prɛ ɩ domoo 'doo kaa' nyɔɔ 'dooa 'mä. 'U sɔa' nyɔɔlɔ ‑gälɩ nɩ, 'a ‑plɩɩ 'ɔ kʋ 'ɔnya 'pawii. 'Ii kala nyüüa 'fɩɔ plɛklɩ. 15 ‑Maa 'üa ‑tɔrʋpɩɔa ‑mölöö ‑nëma: «'A domüülüa 'cifi Bɛlësebuulë† 'ɔ ‑srörö kälɩ ‑bɛ 'ɔ prɛ domüü.» 16 Nyüü ‑mülü 'mäa' ‑gʋ 'ɔɔn 'traɩn nɩ, 'ünya ‑gbala 'ɔɔn ɔ nʋ ‑saragbia tielɛ sɔa' cɛlɩ†. 17 ‑Maa Jesu jre wiili 'ü boboa', 'ɔnya ‑gbala 'üün: «‑Glügbö 'dööa 'mlɩa nyüü ma kä toufujrʋpa nɩ, 'ia ‑glügbölä nya blöa. ‑Bɛ ‑gbööö 'dööa 'mlɩa nyüü ma 'bölötɩa nɩ, 'ia ‑gbööölä nya blöa. 18 Sataan nyra Sataan ma 'bölötɩa nɩ, ‑asɩ 'ɔa 'plä nya ‑wɩara le? 'Be 'a nɩnɩa ‑maa Bɛlësebuulë 'ɔ ‑nyɛɛ 'mɩ 'klü ‑bɛ 'n prɛ domüü o! 19 ‑Bɛ 'mɔɔlɔ nɩ, ama nʋ Bɛlësebuulëa 'klü ‑bɛ ama prɛ domüü nɩ, ‑bɛ 'ana 'jü le, nyɔɔ 'plɛɛ ‑nyɛɛ 'üün 'klü ‑bɛ 'ü prɛ 'üün le? 'A 'ia ‑gʋ, 'ana 'jüa 'mʋgbɛ nëmä 'amɩ ‑gbala 'sɩrɩ 'a bäa' ‑gbagblɛ 'lɩ. 20 ‑Maa ima 'daa Nyɔsʋaa 'klü† 'n nö ‑bɛ 'n prɛ domüü nɩ, 'ba jresaa Nyɔsʋaa 'kamaplä 'a 'ana ‑nyɛɛ 'tɔ.
21 «'A 'taɩn 'lɩ 'wʋsɔɔrɔnyɔɔ 'klaa tafudii kpakü ‑bɛ 'ɔ ‑glaaraa' 'ɔa käkädii ‑gba nɩ, 'a ‑plɩɩ nyɔɔ ‑nëmä 'iin 'jie. 22 ‑Maa nyɔɔ ‑moloo ma ‑sɔɔrɔwʋ, ɔma ‑si 'ɔɔn 'wʋ ma ji nɩ, 'ɔ bɔtɔ 'ɔɔn, 'kä 'ɔ 'ba 'ɔmɩ tafudiili kä 'fɩɔ 'ɔ toro ɩa' plɛ kälɩ, 'kä 'ɔ ‑päää 'iin. 23 Nyɔɔlɔ nyra 'mɔɔ 'nyɩa' po nɩ, 'na 'nyüamlɩjraranyɔɔ 'ɔ bä. ‑Bɛ nyɔɔlɔ 'nyɩ jia' 'mɩ ‑gba amäa' ‑gbapapla nɩ, 'pläkägbanyɔɔ 'ɔ bä.
‑Balʋsusu ma 'blöö nyɔɔa 'kläa 'mlɩ dɛrɩ
24 «‑Frepasusu ma sɔ nyɔɔ 'lɩ nɩ, ‑aaga 'lɩ 'u mö kʋfa 'batra. Uma 'nyɩ kʋfa ‑a 'jä, 'kä 'u nö: ‹'Mä 'na nyukulu kä ‑wälɩ 'n sɔa' dɛrɩblöö.› 25 Uma 'blöödɛrɩ nɩ, nyukulua ‑wälɩ wɔplɔ, 'ua ‑wälɩ ‑nyɩglakä 'mʋfasa. 26 'Kä 'u mö 'u we ‑sisi ‑uunsɔɔ ‑mɩdoo, i bʋbɔa' i ‑sia' 'uun 'wʋ, 'kä 'i pa, 'kä 'i kʋä nyukulua ‑wälɩ. ‑Sʋɩlɩ 'ia nyɔɔlɔ 'mäa' 'jä nya ‑kätɩa ni ‑sʋɩ 'wʋsia.» 27 Jesu ‑ka 'paa ɩ wii ‑bɛ 'ŋlʋʋ 'doo dɔrɔ wii 'wʋ nyüüa ‑tɔrʋpɩɔ. 'Ɔ ‑nëma: «‑Jɔrʋ pala ‑gulu ‑gbötöa' ‑mɩ, nyra nyëtëlë 'nyaaa' ‑mɩ!» 28 ‑Maa Jesu nya ‑gbala 'ɔɔn: «Nyüülü poa' nyɔsʋaawii 'nyakli, ‑bɛ ü ‑trääräa' 'lɩ 'imɩ nɩ, 'üü ‑jɔrʋ pala!»
Farisinyüü nɩnɩa abɩa Jesu nʋ ‑saragbia tie
29 Nyüü 'kɔkɔmlɛ trara Jesu ‑gba, 'ɔnya 'daa: «Nyüüglügbölä kʋa' ‑pɩa plɛ bʋbɔ. ‑Saragbia tie 'ü 'bata. ‑Maa ‑saragbi ‑mɩdoo ‑nëmä nrörö ‑a nrörö, ima 'nyɩ ‑saragbili jräa' Jonaasë ‑gälɩ ‑a bä. 30 'N ‑gbaa' 'iin nɩ, 'sɩrɩ Niniivëa nyüü 'jä käa' ‑saragbia tie jrä käa' Jonaasë ‑gälɩ nɩ†, 'asɩ ‑taa nyüüglügbölä kʋa' ‑pɩ 'mä bɩa ‑saragbi Nyɔɔa 'Jʋ 'lɩ 'järä. 31 ‑Srɩlɩ kä 'mlɩ Nyɔsʋa 'mäa' nyüüa ‑gä ‑tʋ nɩ, 'ŋlʋʋlɔ 'kamaa' Saba† nya 'wʋsɔa, 'kä 'ɔnya ‑taa nyüüglügbölä kʋa' ‑pɩ srara 'sɩrɩ 'ünyɩa' ‑gä kä. 'Ɔɔlɔ nɩ, 'ɔ sɔ 'blɩa blöröfa 'wʋ 'ɔnya ji kä 'Kɩɩ Salomɔɔa 'lɩgaglakʋ 'nyaklipo†; ‑bɛ nyɔɔ bä ‑pɩ 'ɔ ‑si Salomɔɔ 'wʋ! 32 ‑Srɩlɩ kä 'mlɩ Nyɔsʋa 'mäa' nyüüa ‑gä ‑tʋ nɩ, Niniivëa bätäa nyüü nya 'wʋsɔa, 'kä 'ünya 'üün 'klɩ 'nyüglö 'ümä 'üün ‑gbala 'sɩrɩ 'ünyɩa' ‑gä kä. 'Be Niniivëa nyüülü, 'ü poa' Jonaasëa 'papawii 'nyakli, 'ü toro 'lɩ ‑balʋ ‑gälɩ†; ‑bɛ nyɔɔ bä ‑pɩ 'ɔ ‑si Jonaasë 'wʋ!
33 «Nyɔɔ 'nɩ ‑gölö 'napɛ ‑a 'ɔmä 'ɛɛn ‑sisie, 'aiɛ 'ɔmä 'ɛɛn ‑soru ‑gälɩ 'kägbri. 'Napua tii ‑gälɩ 'ü 'sree 'ɛɛn 'kä nyɔɔ o nyɔɔ paa' nyukua ‑wälɩ 'mä 'käjä 'cɩcasa. 34 'Nyiö bä nyɔɔa fugbaa 'napɛ. ‑Na 'nyü ma 'na nɩ, ‑na fugbaa 'fɩɔ bä ‑srɩ 'klɩ. ‑Maa ‑na 'nyü ma 'nyɩ 'na ‑a 'na nɩ, ‑na fugbaa 'fɩɔ nya 'jöjrüükpü 'lɩbäa. 35 'Ii känyrɩ ‑tre ‑na nyufa 'napɛlɛ bäa' ‑mɩ 'lɩ ‑pɩ 'jöjrüükpü nʋ. 36 'Ima 'daa ‑na fugbaa 'fɩɔ bä ‑srɩ 'klɩ, 'äa 'pɛ 'dee ma 'nyɩ 'jöjrüükpü 'lɩ ‑a bä nɩ, ‑na fugbaa 'fɩɔ nya ‑srɩ 'klɩ 'sia, ‑beere 'sɩrɩ 'napɛ ŋʋalaa' 'amɩ ‑gälɩ.»
Farisinyüüa ‑dɔ
37 Jesu ‑ka 'paa ɩ wii, Farisinyɔɔ 'doo nya tupo 'ɔɔn 'ɔa ‑nyɛɛ 'ɔmä dɛɛji. Jesu nya pa 'ɔmä dɛɛji. 38 Farisinyɔɔlɔ 'jäa' 'ɔɔn 'ɔnyɩa' wlu su 'fɩɔwʋ ‑bɛ jijri 'mäa' ji nɩ, 'i kala 'ɔɔn plɛklɩ. 39 'Iibäa' 'Pläkänyɔɔ nɩ: «'Amɔ Farisinyüülü nɩ, ‑köwü nyra 'plëëa ‑gälɩlɩ nyüü 'jääa' 'wʋ nɩ, 'ii 'a kpëtä, ‑maa 'ana 'mlɩ 'si 'jejiekʋ nyra bʋbɔwii. 40 'A pa mlüü! ‑Mää Nyɔsʋalɔ nʋa' ‑fälɩ, ‑mää 'ɔɔn 'nyɩ 'mlɩ nʋ? 41 'Ba ‑nyɩ 'ana plɛ 'pʋablanyüü, ‑bɛ 'ia 'fɩɔ 'mä ‑fre 'lɩ 'wʋ 'ana ‑gʋ.
42 «Busukʋ bä 'amɩ ‑gälɩ Farisinyüü 'amɩ! 'Ana papladiia 'sipijiea ‑tɔrʋpɩɔ 'a 'baalɩ ‑pʋa në 'pɛ 'kä 'trɛɛ Nyɔsʋa: 'maatë, peganɔɔ†, nyra 'napɩjielɩa 'fɩɔ 'paaa' 'nɔnʋ, 'asɩ 'a nö. ‑Maa 'a ‑fɛrɛ nyüüa nyɔɔwʋbabakʋ nyra Nyɔsʋaa ‑wawakʋ, 'a 'ii 'a kä 'amä nʋ, ‑maa 'anyɩ ‑trɔ bɩa ‑mɩlɩ.
43 «Busukʋ bä 'amɩ ‑gälɩ Farisinyüü 'amɩ. 'Sraaplanyuku ‑wälɩ 'a ‑wa 'klɔɔtrʋa 'wʋkʋdii, ‑bɛ 'a 'bata abɩa nyüü 'trɛɛ 'amɩ ‑saplɛ 'klɩ.
44 «Busukʋ bä 'amɩ ‑gälɩ ‑dɔkpɩanyüü nyra Farisinyüü, ‑glagälɩsrörönyüü†! 'A ‑beere 'dasili 'nyɩa' tie kä ‑bɛ nyüü 'nyɩa' jre 'ü 'nyɛɛa' ‑gälɩ†.»
45 ‑Dɔkpɩanyɔɔ 'doo nya ‑gbala Jesu: «'Kpɩkpɩanyɔɔ, ‑ama nʋ 'saa ‑ama 'pawii nɩ, amɔ ‑jree bɩa!» 46 Jesu nya ‑gbala 'ɔɔn: «Busukʋ bä bɩa 'amɩ ‑gälɩ, ‑dɔkpɩanyüü 'amɩ, 'be ‑gblalë kä ‑gbötökʋ 'klaa' 'lɩ, 'üü 'a tro nyüü 'wli, 'ana wli 'dee 'nyɩ ‑fɛ 'nɩmɩ 'imɩ ‑gba ‑a! 47 Busukʋ bä 'amɩ ‑gälɩ, 'be 'a ma nyɔsʋaamlɩpalanyüüa 'dasi, ‑bɛ 'ana tʋɩɩ 'üü 'bla 'üün! 48 'A nöa' 'saa nɩ, 'jrʋpalä 'ana tʋɩɩ ‑fɛa', 'ä kä 'amɩ 'tʋ. 'Ü 'bla nyɔsʋaamlɩpalanyüü, ‑bɛ 'amɔ ma 'üa 'dasi! 49 'A 'ia ‑gʋ Nyɔsʋaa 'lɩgaglakʋ 'lɩ nɩ, ‑bɛ 'ɔ 'daa: ‹'Nyaa 'üün 'na nyɔsʋaamlɩpalanyüü nyra apotrëɩɩ jaa. 'Ünya 'üa ‑tɔrʋpɩɔ ‑mölöö 'blaraa, 'kä 'ünya ‑mölöö prɛ› 50 'kä nyɔsʋaamlɩpalanyüülü kä 'fɩɔa ‑toru ‑gblɔɔkäa' 'kä 'pläa 'käkolofa 'wʋ ‑a jrä 'saarɩ ‑gälɩ nɩ, Nyɔsʋa nëmä 'üa ‑toru 'lɩbetre. 51 'Bala Abɛɛlëa 'babla 'taɩn 'lɩ ‑a jrä Sakarii ‑gälɩ, ɔ 'ü 'blaraa' ‑gbɔsatöwlö nyra Nyɔsʋaanyuku kpakua ‑tɔrʋpɩɔ nɩ, 'amɔ 'n ‑gbala 'cɩcasa: 'a ‑taa nyüüglügbölä kʋa' ‑pɩ Nyɔsʋa 'mä 'üa ‑gälɩ 'betre†. 52 Busukʋ bä 'amɩ ‑gälɩ ‑dɔkpɩanyüü 'amɩ! 'Amɔ fa 'sapɛlɛ 'saaa' Nyɔsʋaa jejrekʋa tatu. 'Ana 'mʋgbɛ 'nyɩ pa ‑a pa, ‑bɛ ‑mülü 'bata ɩa' papakʋ, 'anya ka 'üün 'nyʋfɔ.» 53 Wiili 'ɔ 'paaa', 'ia ‑gʋ nɩ†, ‑dɔkpɩanyüü nyra Farisinyüü 'betre 'ɔɔn kɔsrɩ 'lɩ wii 'kɔkɔmlɛ ‑gälɩ. 54 'Ümä 'ɔɔn bɔʋdɛrɩ 'pa 'ia ‑gʋ 'ü nö 'saa. ‑Gbagblɛ ma bä 'ɔa 'papawiia 'mlɩ nɩ, 'ümä 'ɔɔn 'kpla.