Nyɔɔlɔ kä 'damäklɩ jäa' ‑bɛ Jesu 'pʋɔa'
3
1 'I ‑sia' nɩ, Jesu nya pa 'sɔɔwʋ juifëa 'sraaplanyuku ‑wälɩ. 'Ua ‑wälɩ nyɔɔ 'doo bä ɩ 'lɩ 'ɔa klʋgba jä. 2 'Ü 'järä Jesu 'nyü ‑glɛ 'lɩ ɔma nya nyɔɔlɔ 'pʋɔ ‑fʋflʋpasrɩ 'lɩ, 'ümä 'ɔɔn wii 'kplara. 3 Jesu nya ‑gbala nyɔɔlɔ kä klʋgba jäa': «Sɔwʋ ‑a 'nyüglö, nyüüa 'fɩɔ 'mä ‑mɩ 'wʋjä.» 4 'Ɔ sɔa' 'wʋ nɩ, Jesu nya 'bete 'üün: «'Cɩcagbi nyra bʋbɔgbi 'sɔ, ‑mɩ 'plɛɛ nyɔɔ 'mä ‑plɩ nʋ ‑fʋflʋpasrɩ 'lɩ le? Nyɔɔ 'mrɛɛ ɔ 'pʋɔ nyɔɔ, ‑maa ɔ 'cɛrɛ 'ɔɔn ‑wälɩ ɔ jä?» 'Ünyɩ mɛ ‑a cɛ. 5 'Üa plɛbʋbɔkʋ pa 'ɔɔn ‑gba 'crɛsa 'ɔnya ‑piie 'üün 'nyü ‑gälɩ, 'ɔnya ‑gbala nyɔɔlɔ: «To ‑na klʋgba.» Nyɔɔlɔ toa' 'ɔa klʋgba, 'änya 'pʋ ‑beere klʋgba ‑mälä†. 6 Farisinyüü 'ciea' juifëa 'sraaplanyuku ‑wälɩ nɩ, 'a ‑plɩɩ 'üü ‑bɛ Erɔɔdëa nyüü kɔsɔ 'pla 'sraa 'sɩrɩ 'ümä 'ɔɔn 'bla.Nyüü 'kɔkɔmlɛ prɛ Jesu dɛrɩ
7 Jesu ‑bɛ 'ɔa 'wʋnyɛrɛnyüü nya bereklɩ 'ünya mi 'nie ‑gba. Nyüülü prɛa' 'ɔɔn dɛrɩ ‑mää 'üa ‑srɩ 'nyɩ ‑pɛ. 'Ü sɔ Galileea ‑tʋtʋ ‑gälɩ, 'ü sɔ Judee, 8 'kɔkɔmlɛ nya sɔ bɩa Jerusalɛɛmë, ‑më sɔ Idumee†, ‑mölöö nya sɔ Jurëdɛɛn a 'pɛ ‑medee ‑gälɩ, ‑më sɔ bɩa Tiirë nyra Sidɔɔn. 'Ia nyüüa 'fɩɔ ji 'jrʋpalä 'ɔ ‑fɛɛɛa' 'ü 'nua' 'äa ‑gä 'wli, 'iɛ 'ü ji 'ɔɔn 'jä. 9 Jesu nya ‑gbala 'ɔa 'wʋnyɛrɛnyüü, ü tɛrɛ 'ɔɔn ‑gɔlʋ 'doo, 'sɩrɩ nyüü ‑pɩa' 'ɔɔn 'lɩkʋɛɛkrʋɛɛ 'üa ‑sümlökʋa ‑gʋ. 10 'Ɔ 'pʋɔa' ‑wusublanyüü 'kɔkɔmlɛ nɩ, nyüülü kä 'fɩɔ ‑wusu 'blaaa' nɩnɩa 'ümä 'ɔɔn ‑gbafɛ. 11 ‑Frepasisi ‑mɔmɔɔ, 'asɩ 'i 'jääa' 'ɔɔn 'asɩ 'i 'paa 'ɔa 'klɩ kotifli 'kä 'i ma 'kpökpölɩkä: «‑Mɔ bä Nyɔsʋaa 'Jʋ!» 12 Jesu ma ‑sɔɔrɔ wii 'wʋ 'kä 'ɔ ma ‑gbala 'iin, 'inyɩ ‑srara 'ɔɔn nyüü 'klɩ.
Jesu 'balɩ Nyüüpʋnyüüsɔɔ
13 Jesu nya 'jra 'dʋgba 'wli, 'ɔnya were 'lɩ 'ɔa 'wʋnyɛrɛnyüü† 'ɔ 'bataa', 'ünya mi 'ɔa 'pɛ 'lɩ. 14 'Ɔnya tɛ 'üa ‑tɔrʋpɩɔ 'ɔnya 'balɩ nyüüpʋnyüüsɔɔ, 'ü nyra 'ɔɔn 'mä 'nyɛ, ‑bɛ 'ɔmä 'üün blɔ 'ümä nyɔsʋaawii 'pa. 15 'Ɔnya ‑nyɩ 'üün 'klü 'ümä ‑wusublanyüü 'pʋɔ† ‑bɛ 'ümä domüü prɛ. 16 Nyüüpʋnyüüsɔɔlü Jesu ‑tʋa' 'ɔa nyufa ‑gba, ‑jää 'üa 'nyrɩ†: Simɔɔlɔ 'ɔ 'daraa' bɩa Piɛɛrë†, 17 Sebedeea 'jü Jaakë nyra 'ɔa ‑wlajʋ Jaan, 'üü Jesu 'dara Boanɛɛsë, 'ia ‑gba bä ‑mamɛɛa 'jü; 18 'ɔ we bɩa Andree, Filipë, Batëlemii, Matiö, Tomaa, Alëfeea 'jʋ Jaakë, Tadee, Kananyɔɔ† 'ü 'daraa' Simɔɔ, 19 nyra Judaa Isëkario, ɔmäa' Jesu 'sa.
Jesua ‑gböölia nyüü ji 'ɔa 'klɛɛ
20 Jesu nyra 'ɔa 'wʋnyɛrɛnyüü nya mi ‑gbööli. Nyüü 'kɔkɔmlɛ nya 'si 'sɔɔwʋ nyuku 'klɩ; 'ü ‑kanyɩ 'taɩn ‑a 'jä 'ümä dɛɛji nyüüa ‑sümlökʋa ‑gʋ. 21 Jesua nyüü 'nua' 'iin 'wli nɩ, 'iibä: «'Ɔa 'wlia 'mlɩ 'a 'kousɔ» 'a 'ia ‑gʋ 'ü jö 'ɔɔn nyüüa ‑tɔrʋpɩɔ 'bakalɩ.
‑Dɔkpɩanyüü srörö Jesu
22 ‑Dɔkpɩanyüülü sɔa' Jerusalɛɛmë ü jia', 'ü ‑nëma nɩ: «Bɛlësebuulë† bä 'ɔɔn 'lɩ», ‑bɛ 'sɔɔwʋ nɩ: «Domüüa 'cifi 'ɔ ‑srörö kälɩ ‑bɛ 'ɔ prɛ domüü!» 23 Jesu 'nua' 'iin 'wli, 'ɔnya we 'üün, 'ɔnya 'pala 'üün tapönänä 'klɩ: «Sataan 'mrɛɛ ɔ prɛ 'ɔa nyufa? 24 ‑Glügbö 'dööa 'mlɩa nyüü ma kä toufujrʋpa nɩ, 'ia ‑glügbölä 'nyɩ ‑wɩara ‑wɩara ‑a; 25 ‑bɛ ‑gbööö 'döö 'lɩa nyüü ma 'nyɩ 'jäjrä bɩa 'nyüa 'mlɩ ‑a nɩ, 'ia ‑gbööö 'nyɩ ‑wɩara ‑wɩara ‑a. 26 ‑Bɛ Sataan ma be 'ɔa 'mʋgbɛa ‑glügbölä 'ɔ 'kamaa' 'äa ‑tɔrʋpɩɔ tou nɩ, ‑tɩa ‑glügbölä 'mä 'bölö, 'ä ‑nëmä ‑wɩara ‑a ‑wɩara, 'a 'ɔa nia 'fɩɔ! 27 Nyɔɔ 'nyɩ 'mrɛɛ ‑a 'mrɛɛ 'ɔmä 'wʋsɔɔrɔnyɔɔa nyüköli pa 'ɔmä 'ɔa käkädii 'jie ɔma 'nyɩ 'wʋsɔɔrɔnyɔɔlɔ ‑a kpasa. 'Ia 'taɩn 'lɩ 'ɔ 'mrɛɛ ɔ 'jie nyükölia dii.»
28 «'Cɩcasa 'n ‑gbala 'amɩ: Nyɔsʋa 'mrɛɛ ɔ cere nyüü 'üa ‑balʋa 'fɩɔ nyra srörö ‑mülü kä 'fɩɔ 'ümäa' 'ɔɔn dɛrɩ fa, 29 ‑maa nyɔɔ o nyɔɔ nëmäa' 'Nyüna ‑Susu nɔpɔ nɩ, 'ɔ ‑nëmä 'ɔmɩ 'ia nu ‑balʋlʋ ‑a cere. 'Ɔa 'pɔnɩkʋ† nya tɩɔrɔ 'ɔɔn ‑gälɩ 'plɔʋplɔʋ.» 30 Wiili kä ‑gʋ 'ü 'daaa' ‑maa: «‑Frepasusu bä 'ɔɔn 'lɩ» nɩ, 'a 'ia ‑gʋ Jesu nʋ 'saa ‑bɛ 'ɔ 'pawii.
Jesua ‑gbööö 'döö 'lɩa nyüü
31 Jesua 'yio nyra 'ɔa ‑wlajü jia' nɩ, ‑fälɩ 'ü 'nyüglö ‑bɛ 'ɔ bä nyüköli. 'Ünya blɔ 'ɔɔn nyɔɔ dɛrɩ 'ɔmä 'ɔɔn we. 32 Nyüü trara ɩ Jesu 'klɩ, 'ɔnya ‑gbala 'ɔɔn: «Tɛrɩkä ‑o, ‑na 'yio nyra ‑na ‑wlajü† bä ‑fälɩ; ‑na ‑gʋ 'ü 'bete.» 33 'Iibäa' Jesu nɩ: «Ɔ bä 'na 'yio le? Ɔ bä 'na ‑wlajü le?» 34 'Ɔnya ‑piie nyüülü kä 'fɩɔ traraa' 'ɔɔn 'klɩ 'nyü ‑gälɩ, 'ɔ ‑nëma: «‑Jää 'na 'yio nyra 'na ‑wlajü! 35 Nyɔɔ o nyɔɔ nöa' wiili Nyɔsʋa 'daaa', 'ɔɔ bä 'na ‑wlajʋ, 'ɔɔ bä 'na ‑wladia nyra 'na 'yio.»