Paplanyɔɔa tapönänä
4
1 'I ‑sia' nɩ, Jesu 'prɛrɛa' 'nie ‑gba, 'kpɩa 'ɔ 'kpɩa. Nyüü 'kɔkɔmlɛ nya trara 'ɔɔn 'klɩ. 'Üa ‑sümlökʋa ‑gʋ nɩ, 'ɔnya 'wla ‑gɔlʋ 'lɩ 'kä ‑bɛ 'ɔ kʋ 'nie 'klɩ. Nyüülü kä 'fɩɔ jia', 'a ‑plɩɩ 'kɔtʋ 'wli 'ü kɔ kɔ. 2 'Ɔ 'kpɩa 'üün wii 'kɔkɔmlɛ. Tapönänä 'ɔ 'paa ‑bɛ 'ɔ ‑gbala 'üün. 'Ɔ nɩnɩa: 3 «'Ba ponyakli 'cɩcasa. ‑Jää paplanyɔɔ 'doo mi 'ɔa putu 'lɩ papladii ‑gbagba. 4 'Asɩ 'ɔ ‑gbaaa' 'iin ‑bɛ 'ɔ möa' nɩ, 'jaju ‑moloo böblö 'nyʋfɔ 'mlɩ, 'kä nyisie jö 'ua 'fɩɔ. 5 ‑Moloo böblö 'täkë ‑tʋtʋ 'lɩ, ‑tɛ 'lɩ ‑tʋtʋ 'nyɩa' ‑sümlö. 'Ua nu ‑gaaa sɔsɔ, 'be ‑tʋtʋ 'nyɩ 'lɩ ‑a ‑sümlö. 6 ‑Maa 'ua tigblii 'nyɩa' ‑gʋ 'lɩtʋŋlɔ nɩ, 'jrʋ 'pʋa', 'unya jä. 7 'Jaju ‑moloo böblö nänë 'lɩ. 'U mia' ‑ga, 'uu ‑bɛ nänë ‑gaala ‑pɩɔ 'doo 'wʋ, 'unyɩ ‑fɔfrɔ ‑a ‑fɔfrɔ, 'unyɩ dɛɛ ‑a tʋ. 8 ‑Moloo nya böblö 'mʋfa ‑tʋtʋ 'lɩ; 'unya ‑ga, 'unya tʋ 'mʋfasa. ‑Gö ‑mölöö tʋä 'jaju ‑glʋ 'jaju ‑pʋ (30), ‑mölöö tʋä 'jajua ‑glʋɩtää (60) ‑bɛ ‑mölöö tʋä ‑glʋɩgböö (100).» 9 Jesu nya ‑gbala 'üün: «‑Moloo ma kä 'nununyakli, ɔ 'nu!»Jesua 'wʋnyɛrɛnyüü 'bete 'ɔɔn wiili 'ɔ 'paplaa' 'klɩ, 'ia ‑gbaalɩ
10 Jesu tʋŋlɔa' 'lɩ nyüü dɛrɩ nɩ, 'ɔa 'wʋnyɛrɛnyüü nyra nyüüpʋnyüüsɔɔlü nyra nyüülü prɛa' 'ɔmɩ dɛrɩ nya 'betre 'ɔɔn tapönänëlëa ‑gbaa. 11 'Ɔnya ‑gbala 'üün: «'Amɔlɔ nɩ, 'ana 'nyü ‑jieroklɩ, 'a jre Nyɔsʋaa 'kamapläa wiili ‑sisiea'. ‑Maa nyüü ‑mülü 'nyɩ 'nyɛrɛa' 'mɩ ‑gba nɩ, wiili kä 'fɩɔ 'n 'paaa', tapönänë 'n 'pala 'üün 'klɩ, 12 'sɩrɩ 'i ‑jɩjraa':
'Ü ‑pʋpɔ, ‑maa 'ünyɩ 'jäkä ‑a;
'ü ponyakli, ‑maa 'ünyɩ 'nunu ‑a;
'ü ‑pɩ Nyɔsʋaa ‑nyɛɛ kälɩsie,
'ɔ ‑pɩ 'üa ‑balʋ cere†.»
13 'Ɔnya ‑gbala 'üün: «'Ama 'nyɩ 'i kʋa' ‑pɩ 'wli ‑a 'nu, ‑asɩ 'anya tapönänë ‑mülüa 'fɩɔ 'wlinu le? 14 Jijrili paplanyɔɔ ‑gbaaa' nɩ, nyɔsʋaawii bäsaa. 15 I böblöa' 'nyʋfɔ ‑gba nɩ, 'a nyüülü üma 'nua' nyɔsʋaawii dotro ‑bɛ Sataan jöa' 'iin 'üa plɛ ‑gälɩ 'bakalɩ. 16 'Asɩ i böblöa' bɩa 'täkëtʋtʋ 'lɩ nɩ, 'a nyüülü üma 'nua' nyɔsʋaawii 'wli dotro ‑bɛ ü 'kplaaa' 'iin dɔrʋsa, 17 ‑maa 'üa plɛ 'nyɩ 'iin 'kpla ‑a 'kpla 'cɩcasa, 'ünyɩ ‑tʋ wii 'nyügba; 'pɩrɩgälɩ nɩ, üma bä ‑sʋɩ 'lɩ, 'aiɛ üma jrara 'üün 'nyüamlɩ nyɔsʋaawiia ‑gʋ nɩ, 'köklesaplɩɩ 'ü 'wʋä nyɔsʋaawii dɛrɩ. 18 I böblöa' nänä 'lɩ nɩ, 'a nyüülü 'nööa' nyɔsʋaawii, 19 ‑maa 'ü kä plɛ ‑ka bäa' ‑tʋtʋ ‑gälɩa dii dɛrɩ, ü ‑ka fɔlɔa' 'bɩɔ dɛrɩ 'fʋflɛsa, nyra dɛɛnyükäkäkʋ. 'Ii kakla nyɔsʋaawii 'klɩ, 'a 'ia ‑gʋ 'inyɩ 'lɩ ‑a bɩa i tʋ. 20 ‑Maa i böblöa' 'mʋfa ‑tʋtʋ ‑gälɩ nɩ, 'a nyüülü 'nöa' nyɔsʋaawii 'wli ‑bɛ 'ü toroa' 'iin plɛ. ‑Gö 'döö tʋä ‑glʋ ‑bɛ ‑pʋ (30), ‑mölöö tʋä ‑glʋɩtää (60) ‑bɛ ‑mölöö tʋä ‑glʋɩgböö (100).»
'Napɛa tapönänä
21 Jesu nya 'bete 'üün 'sɔɔwʋ: «'Ü ja 'napɛ 'kä 'ü ‑gbreee 'ɛa ‑gälɩ ‑soru 'kä? 'Aiɛ 'kä 'ü pla 'ɛɛn ‑pɔkɩ ‑wälɩ? ‑Maa ‑mää 'napua tii 'wli 'ünyɩ 'sree 'ɛɛn 'kä? 22 Diili kä 'fɩɔ ‑sisiea' nya 'wʋcrɛrɛa, ‑bɛ ‑mɛlɛ bäa' 'jöjrüükpü 'lɩ 'mä ‑fälɩ blö. 23 ‑Moloo ma bä 'nununyɔɔ ɔ ponyakli!» 24 Jesu nya ‑gbala 'üün 'sɔɔwʋ: «Wiili 'a poa' 'nyakli, 'ba 'nu 'iin 'wli 'cɩcasa. Dɛɛlɛ 'a nöa' ‑bɛ 'a nyakaa' 'ana ‑mölöö, 'ɛɛ Nyɔsʋa 'mä nʋ 'ɔmä 'amɩ nyaka; 'asɩ 'ɔmä 'ana ni 'wlibɩa. 25 'Be nyɔɔlɔ 'klaaa' diijie, Nyɔsʋa nya 'iin 'wlibɩaa; ‑maa nyɔɔlɔ 'nyɩa' dɛɛ 'klaa nɩ, 'ɔnya 'nɩmɩ 'ɔɔn ‑mɛlɛ 'ɔ 'klaaa' kälɩ 'baa.»
'Jajulu kä 'kpɔ ‑gaaa', 'ua tapönänä
26 'Ɔnya ‑gbala 'üün 'sɔɔwʋ: «Nyɔsʋaa 'kamaplä ‑beere 'sɩrɩ nyɔɔ ‑gbaa' 'ɔa putu 'lɩ ‑bleeea 'jaju. 27 ‑Gbia ma ka, 'ɔ 'mʋmɔ o, 'aiɛ 'ɔ tɛkä ‑srɩwlaa o, 'sɩrɩ 'u ‑gaaa' ‑bɛ 'u 'bʋaa' 'ɔnyɩ 'iin jre ‑a jre. 28 ‑Tʋtʋa 'mlɔɔ 'uu ‑gaala papladɛɛ, 'napɩ ‑kätɩ 'cie, 'kä kpatʋ 'tɔɔ, 'kä 'jaju 'tɔtrɔ 'ua 'wli. 29 Uma ‑flɔɔɔ dotro 'lɩkpripaka 'ü nö ‑bɛ 'ü 'böö 'uun, 'ua 'böbötaɩn 'a 'lɩjrä.»
Mutarëdëa 'jajua tapönänä
30 Jesu ‑nëma 'sɔɔwʋ nɩ: «Dɛplɛɛ a 'mrɛɛ amä Nyɔsʋaa 'kamaplä 'klɩ 'papla le? 'Aiɛ wii 'plɛɛ anya ‑plɩɩ 'ään 'klɩpapla le? 31 'Ä ‑beere mutarëdë 'jaju. Mutarëdë 'jaju bä sʋsʋ; 'unya ‑si ‑tʋtʋ ‑gälɩa 'jajua 'fɩɔwʋ. 32 ‑Maa 'üma pla 'uun nɩ, 'ua ‑gö 'bʋa 'kä 'ä ‑sööö putulɩa 'sʋsʋa tiia 'fɩɔwʋ; 'ä ‑gaaa katë kpakü, 'sɩrɩ nyisie 'mäa' 'äa katëa pɩpɛ 'lɩ 'dëdrëë 'palakalɩ ji.»
33 'A 'samaa tapönänë 'kɔkɔmlɛ Jesu nö ‑bɛ 'ɔ 'paa nyɔsʋaawii. 'Sɩrɩ 'ɔmäa' nʋ ‑bɛ 'ümäa' 'nu, 'a 'ia 'saa 'ɔ nö; 34 'Ɔ 'nyɩa' wii 'klɩpapla 'ɔ ‑kaaŋlʋ 'üün ‑a ‑gbala. ‑Maa 'üa 'kpɔa ‑tɔrʋpɩɔ 'kä 'ɔ ‑gbala 'ia ‑gba 'ɔa 'wʋnyɛrɛnyüü.
‑Püpölä Jesu kaa' 'klɩ
35 'Ia ‑srɩ 'doolʋa ‑gbiajrʋ 'lɩ nɩ, Jesu nya ‑gbala 'ɔa 'wʋnyɛrɛnyüü: «A 'pɩ amä 'niea 'pɛ ‑mɩdee ‑gälɩ mi.» 36 'Ünya sɔ nyüüa ‑tɔrʋpɩɔ, ‑gɔlʋlʋ kä 'mlɩ Jesu bäa' nɩ, 'ua 'mlɩ 'ɔa 'wʋnyɛrɛnyüü 'jra ‑bɛ 'ü nyra 'ɔɔn 'pɩɛ 'nie. ‑Pasa ‑goli ‑mɩdoo nyra 'ɔɔn mlörölɩ. 37 ‑Jää 'üü ‑püpö kpakö jrä 'nie 'klɩ, 'niea dakë 'kakla ‑gɔlʋ 'klɩ. 'Nɩ 'kɔkɔmlɛ papa 'ua 'mlɩ, ‑bɛ 'u 'sie 'nɩ 'klɩ. 38 'Ia 'taɩn 'lɩ nɩ, Jesua 'mʋgbɛ 'pi ‑gɔlʋa ‑togoklɩ. 'Ɔ 'pie 'ɔa 'wli 'pina ‑gälɩ ‑bɛ 'ɔ 'mʋmɔ. 'Ünya tɛrɛ 'ɔɔn 'kä: «'Kpɩkpɩanyɔɔ! A nëmäa' 'nie 'lɩ järä nɩ, ‑nyɩ 'jä 'iin 'wʋ ‑a?» 39 Jesu tɛa' 'kä, 'ɔnya 'nyüglö ‑püpö, 'ɔnya ‑sɔɔrɔ wii 'wʋ 'ɔnya ‑gbala 'nielɛ: «‑Tuuan! 'Nyüglö!» ‑Püpö nya 'nyüglö, 'ia 'fɩɔ nya bä ‑pio. 40 'Ɔnya 'bete 'üün: «‑Asɩ 'a nʋ ‑bɛ 'a kä 'saa ŋalɛ le? 'A ‑kaaŋlʋ 'saa Nyɔsʋa plɛtoro?» 41 Ŋalɛ 'si 'ɔa 'wʋnyɛrɛnyüü 'klɩ, 'ünya 'betre 'lɩ: «Nyɔɔ ‑glügbö 'plɛɛ kʋ ‑pɩ ‑gbaa 'iin, ‑bɛ ‑fʋflʋ nyra 'nie 'baa 'ɔa wii wii 'wʋ le?»