'Jrʋklanyɔɔlɔ Jesu 'pʋɔa'
8
1 Jesu 'ciea' 'dʋgba 'wli nɩ, nyüü 'kɔkɔmlɛ nya prɛ 'ɔɔn dɛrɩ. 2 'Jrʋklanyɔɔ 'doo nya jijrö 'ɔɔn ‑gba, 'ɔnya 'pa 'ɔa 'klɩ kotifli, ‑bɛ 'ɔ bibie 'ɔmɩ: «'Pläkänyɔɔ, ‑ama 'bata 'na 'pʋpʋɔkʋ, ‑mrɛɛ ‑a ‑futo 'mɩ.» 3 Jesu nya to 'darʋ, 'ɔnya ‑fɛ 'ɔɔn ‑gba, 'ɔnya ‑gbala 'ɔɔn: «'N 'bata ‑na 'pʋpʋɔkʋ; 'pʋ!» 'A ‑plɩɩ nyɔɔlɔ kʋ dotro 'ɔnya 'pʋ. 4 Jesu nya ‑gbala 'ɔɔn: «‑Nyɩ ‑gbala 'iin nyɔɔ, ‑maa mi ‑a ‑srara ‑na nyufa ‑gbɔsapɛrɩnyɔɔ 'klɩ, 'kä ‑saaa ‑gbɔlʋ Moisë 'daaa' 'ba 'saa'; 'uu nëmä 'nyrɩkä, 'kä nyüüa 'fɩɔ nya 'iin jre 'sɩrɩ 'jrʋ ‑kanyɩa' ‑mɩ kla†.»Rɔmëa 'sʋgɩanyɔɔa ‑geeilɛ Jesu 'pʋɔa'
5 Jesu paa' Kapɛrënaumëbätä nɩ, 'sʋgɩanyɔɔ kpakö nya 'jrara 'ɔɔn 'klɩ, 'ɔnya bibie 'ɔɔn 6 ‑maa: «'Pläkänyɔɔ, 'na 'jrʋpafɛnyɔɔ 'pi nyüköli, 'ɔa ‑gbaa dii jä ‑bɛ 'ɔ sɩa ‑gböösa!» 7 'Iibäa' Jesu nɩ: «'Nyaa jia, 'nyaa 'ɔɔn 'pʋɔa.» 8 ‑Maa 'sʋgɩanyɔɔlɔ nya ‑gbala Jesu: «'Pläkänyɔɔ, 'nyɩ 'iin 'klɩ ‑a 'wʋ ‑mä 'na nyuku ‑wälɩ pa. ‑Maa 'pa waklöö 'döö ‑bɛ 'na 'jrʋpafɛnyɔɔ 'mä 'pʋ. 9 'Be 'na 'mʋgbɛ 'n kä 'kamanyüü ‑bɛ 'n 'kama 'sʋgɩa. Ama ‑gbala 'doo: ‹Mi ‑tɛ›, 'ii 'ɔ mö; ama ‑gbala ‑moloo: ‹Ji›, jö 'ɔ jö. ‑Bɛ ama ‑gbala 'na 'jrʋpafɛnyɔɔ: ‹Nʋ 'saa›, 'ii 'ɔ nö.» 10 Jesu 'nua' 'iin 'wli nɩ, 'i kala 'ɔɔn plɛklɩ. 'Ɔnya ‑gbala nyüülü prɛa' 'ɔɔn dɛrɩ ‑maa: «'Cɩcasa 'n ‑gbala 'amɩ, 'nyɩ 'samaa plɛtoronyɔɔ Israɛɛlënyüüa 'mʋgbɛa ‑tɔrʋpɩɔ ‑a 'järä. 11 'Amɔ 'n ‑gbala: nyüü nya ‑pɩɔa 'fɩɔ sɔa 'kä 'unya ji, sɔ 'jrʋa 'wʋsɔrɔfa 'wʋ ‑a mi 'ua 'prerefa 'wʋ. 'Kä 'ü nyra Abraamë, Isaakë nyra Jakɔɔbë nya 'wʋtara cɛɩɩa 'kamapläa 'mlɩ. 12 ‑Maa 'kamapläa 'jülü nëmä ɩa' pa nɩ, 'ünya ‑fälɩ berea 'jöjrüükpü 'lɩ; 'a ‑plɩɩ 'amä 'wloro, 'a ‑plɩɩ 'amä ‑gla jrörö.» 13 Jesu nya ‑gbala 'sʋgɩanyɔɔ kpakö: «Mi ‑na ‑nyɛɛ, ‑na nyɔsʋaplɛtorokʋa ‑gʋ dɛɛlɛ ‑baataa' ‑nya 'ɛɛn 'lɩjräa.» 'A 'ia ‑gliiilɛa 'mlɩ 'jrʋpafɛnyɔɔlɔ 'plʋɔrɔ.
Jesu 'pʋɔ ‑wusublanyüü 'kɔkɔmlɛ
14 Jesu nya pa Piɛɛrëa nyuku ‑wälɩ, 'ɔnya 'jä Piɛɛrëa ŋʋtayio, 'ɔa fugba fumö, 'ɔ 'pi ‑pɔkɩ ‑gälɩ. 15 Jesu nya ‑fɛ 'ɔa 'darʋ ‑gba, ‑wusulu nya sɔ 'ɔɔn 'lɩ. 'Ɔ sɔa' 'wʋ dotro Jesua ‑gä 'ɔ 'pa†.
16 ‑Gbia kaklaa' 'klɩ nɩ, 'ünya ja 'ɔɔn nyüü 'kɔkɔmlɛlü kä 'fɩɔ domüü bäa' 'lɩ. 'Ɔa 'papawii 'ɔ nö ‑bɛ 'ɔ prɛ domüü, 'kä 'ɔ 'pʋɔ ‑wusublanyüülüa 'fɩɔ. 17 'Asɩ wiili nyɔsʋaamlɩpalanyɔɔ Esaii ‑gba käa' nrörö; 'ɔ nɩnɩa kä:
«'Ɔ ‑gbötö ana ‑sʋɩ
'ɔnya dɔrɔ ana ‑wusu 'wʋ†.»
Nyüülü 'bataa' 'ümäa' Jesu ‑gälɩ ‑mɛ
18 Jesu 'jäa' nyüü 'kɔkɔmlɛ traraa' 'ɔɔn 'klɩ nɩ, 'ɔnya ‑gbala 'ɔa 'wʋnyɛrɛnyüü: «A 'pɩ amä 'niea 'pɛ ‑mɩdee ‑gälɩ mi.» 19 ‑Dɔkpɩanyɔɔ 'doo nya jijrö Jesu ‑gba 'ɔnya ‑gbala 'ɔɔn: «'Kpɩkpɩanyɔɔ, ‑plɩɩ 'lɩ kä 'fɩɔ ‑nëmäa' mi 'nyraa ‑mɔ 'sɔɔ mö.» 20 'Iibäa' Jesu nɩ: «'Klʋɛɛa ‑fä† kä 'pifa, 'nyisie kä 'dëdrëë, ‑maa Nyɔɔa 'Jʋ 'nyɩ 'wlipiefa ‑a kä.» 21 'Ɔa 'wʋnyɛrɛnyɔɔ ‑moloo nya bibie 'ɔɔn: «'Pläkänyɔɔ, 'mɔɔ jö, ‑a mi ‑a ‑tʋ ‑kätɩ 'na tʋ.» 22 ‑Maa Jesu nya ‑gbala 'ɔɔn: «‑Mɛ 'mɩ ‑gälɩ, 'cɛrɛ jäjänyüü ‑wälɩ 'ümä 'üa jäjänyüü ‑tʋ.»
‑Püpölä Jesu kaa' 'klɩ
23 'Ɔnya 'jra ‑gɔlʋ 'lɩ, 'ɔa 'wʋnyɛrɛnyüü nya ‑mɛ 'ɔɔn ‑gälɩ. 24 ‑Jää 'üün ‑püpö kpakö jrä 'nie 'klɩ. Jesu 'mʋmɔ ɩ ‑bɛ 'niea dakë 'sie ‑gɔlʋ 'klɩ. 25 'Ɔa 'wʋnyɛrɛnyüü nya jijrö 'ɔɔn ‑gba, 'ünya tɛrɛ 'ɔɔn 'kä: «'Pläkänyɔɔ, 'balɩ amɩ mlɩ; ‑maa jä a nëmä jä!» 26 'Ɔ ‑nëma: «Dɛplɛɛ kä ‑gʋ 'a kä 'saa ŋalɛ le? Dɛplɛɛ kä ‑gʋ 'ana nyɔsʋaplɛ 'nyɩ 'bʋa le?» 'Ɔ sɔa' 'wʋ, 'ɔnya ‑sɔɔrɔ wii 'wʋ 'ɔnya 'pala ‑püpö nyra 'nie wii ‑gba. 'Ia 'fɩɔ nya bä ‑pio. 27 'Üa plɛklɩ kalaa' nɩ, 'ü ‑nëma: «Nyɔɔ ‑glügbö 'plɛɛ kʋ ‑pɩ, ɔ 'pala ‑püpö nyra 'nie wii ‑gba, ‑bɛ 'i 'baa 'ɔa wii wii 'wʋ le?»
Nyüü 'sɔɔlü Jesu 'baa' ‑balʋsisi ‑gälɩ
28 Jesu 'prɛrɛa' 'niea 'pɛ ‑mɩdee ‑gälɩ Gadaranyüüa† ‑tʋtʋ ‑gälɩ, nyüü 'sɔɔ domüü bäa' 'lɩ nya sɔ 'dasi 'lɩ, 'ünya 'jrara 'ɔɔn 'klɩ. 'Üa plɛbʋbɔkʋa ‑gʋ nyɔɔ ma 'nyɩ fa 'ia 'nyʋfɔlʋ ‑a. 29 'Üa 'kpökpöwiia 'mlɩ, 'ü ‑nëma: «Wii 'plɛɛ bä a nyra ‑mɔ 'sɔa ‑tɔrʋpɩɔ le, Nyɔsʋaa 'Jʋ Jesu†? Amɔ ‑ji ‑gbi ‑gba nʋ 'fɩɔwʋ ‑bɛ ana ‑sʋɩa ‑srɩ 'mä 'lɩjrä ‑ale?» 30 'Bösaru 'kɔkɔmlɛ bä ɩ ‑nyɛɛ 'lee, 'u jö ɩ dɛɛ. 31 Domüü nya bibie Jesu: «‑Ama prɛ amɩ nɩ, prɛrɛ amɩ 'bösarulu kɔkɔa' ‑nyɛɛ 'lee 'ua ‑tɔrʋpɩɔ, amä 'uun 'lɩcecre.» 32 'Ɔnya ‑gbala 'iin: «'Ba mi!» Domüülü nya 'cie nyüülü 'lɩ, 'unya pa 'bösarulu 'kɔkɔmlɛlu 'lɩ. 'Bösarulu nya 'ba fʋfɔlʋ ‑nyɛɛ 'dʋgba 'wli 'unya bebre 'ua nyüfë 'nie 'lɩ 'unya jä jä. 33 'Bösarulua ‑gbaglaaranyüü nya fɔ, 'ünya mi wiili kä 'fɩɔ ‑sia' bätäa nyüü ‑gbalakalɩ. 'Ünya ‑gbala 'üün bɩa wiili nröröa' nyüülü domüü ma bäa' ‑gälɩ, 'üa 'kläa 'mlɩ. 34 'Ii känyrɩ, bätäa nyüüa 'fɩɔ nya 'cie bätä 'ümä Jesu 'jä. 'Ü 'jäa' 'ɔɔn nɩ, 'ünya bibie 'ɔɔn ɔ sɔ 'üa 'bre.