Jaan 4

Jesu ‑bɛ Samariiŋlʋʋ 'doo

Esaii 55.1-3; Jaan 7.37-39

1 'Pläkänyɔɔ Jesu jre 'iin 'sɩrɩ 'nua' ‑maa 'ɔ kä 'kɔkɔmlɛ, 'sɩrɩ 'ɔ 'paaa' nyüü 'kɔkɔmlɛ 'nɩ 'wli ‑bɛ 'ɔ ‑sia' Jaan 'wʋ. 2 ‑Bɛ ‑mää Jesu 'nyɩ 'paa nyüü 'nɩ 'wli ‑maa 'ɔa 'wʋnyɛrɛnyüü 'üü 'paa nyüü 'nɩ 'wli. 3 'Ia ‑gʋ 'ɔnya sɔ ‑tʋtʋ ‑gälɩ, 'ɔnya 'blöö Galilee dɛrɩ.

4 'Ɔ kä 'ɔmä ‑tʋtʋ ‑gälɩ ‑srörö. 5 'Ɔnya 'tɔ Samariia bätälä 'ü 'daraa' Sisaa, Jakɔɔbëa putulu 'ɔ ‑nyɩ käa' 'ɔa 'jʋ Josɛɛfë, 'ua ‑gba. 6 'A ‑plɩɩlɩ Jakɔɔbëa 'nɩbutugba bä kä. Jesu 'nyɛa' 'nyɛ ‑bɛ 'ɔ sɩaa' nɩ, 'a ‑plɩɩ 'nɩbütöläa ‑gba 'ɔ 'pala ‑fʋflʋ. 'Jrʋ 'a ‑sopuplö.

7 Samariiŋlʋʋ 'doo nya ji 'nɩ 'pri. 'Iibäa' Jesu nɩ: «‑Nyɩ 'mɩ 'nɩ ‑a 'mla.» 8 'Ia 'taɩn 'lɩ 'ɔa 'wʋnyɛrɛnyüü mi bätä jijri ‑su. 9 'Iibäa' Samariiŋlʋʋlɔ nɩ: «‑Asɩ 'i nʋ ‑bɛ ‑mɔ bäa' juifënyɔɔ nɩ, ‑bɛ ‑sɛɛɛ 'mɩ 'nɩ le? 'Be Samariiŋlʋʋ 'n bä!» Juifë nyra Samariinyüü 'nyɩ 'nönrö 'wli ‑a. 10 'Iibäa' Jesu nɩ: «‑Ama jre ɩ dɛɛlɛ Nyɔsʋa ‑nyɩa' ‑mɩ nɩ, ‑bɛ ‑ama jre ɩ nyɔɔlɔ 'daaa': ‹‑Nyɩ 'mɩ 'nɩ ‑a 'mla› nɩ, ‑na 'mʋgbɛ ‑tɛɛ, ‑mä nëmä 'ɔɔn ‑sɛ ‑mä 'mla 'kä 'ɔnya ‑mɩ 'nɩlɩ ‑nyɛɛa' 'klä ‑nyɩ.» 11 'Iibäa' 'ŋlʋʋlɔ nɩ: «, 'nɩbütölä tʋŋlɔlɩ, ‑bɛ ‑nyɩa' dɛɛ 'klaa ‑mä 'ään 'pri nɩ, ‑a 'plɛɛ ‑nëmä 'nɩlɩ ‑nyɛɛa' 'klä 'ba le? 12 ‑Mä 'daa ‑bʋa ‑nya ‑si ana tʋ Jakɔɔbëlɔ ‑nyɩa' amɩ 'nɩbütölä kʋa' ‑pɩ 'wʋ? 'Ɔa 'mʋgbɛ 'mla 'ään, 'ɔa 'jü nyra 'ɔa mlaa nya 'mla 'ään.» 13 Jesu nya ‑gbala 'ɔɔn: «Nyɔɔ o nyɔɔ 'mlaaa' 'äa 'nɩ nɩ, 'mamlatʋ nya 'ɔɔn 'blaa 'sɔɔwʋ; 14 ‑maa nyɔɔ o nyɔɔ nëmäa' 'nɩlɩ 'nëmäa' 'ɔɔn ‑nyɩ 'mla nɩ, 'mamlatʋ ‑ka ‑nëmä 'ɔɔn 'bla ‑a 'bla 'plɔʋ, ‑bɛ 'nɩlɩ 'nëmäa' 'ɔɔn ‑nyɩ nɩ, 'inya 'ɔa 'kläa 'mlɩ ‑gbaalaa ‑beere 'niea sɔrɔfa, 'kä 'inya 'ɔɔn 'klälä 'nyɩa' blöröfa kä ‑nyɩ.» 15 'Iibäa' 'ŋlʋʋlɔ nɩ: «'Pläkänyɔɔ, ‑nyɩ 'mɩ 'ia 'nɩlɩ, 'mamlatʋ ‑ka ‑pɩ 'mɩ 'bla, 'n ‑ka ‑pɩ ‑tɛ 'nɩ 'prerekalɩ ji.»

16 'Iibäa' Jesu nɩ: «Mi ‑a ‑we ‑na dʋɔ, 'kä 'a jö.» 17 'Ŋlʋʋlɔ ‑nëma: «'Nyɩ dʋɔ ‑a kä.» 'Iibäa' Jesu nɩ: «‑Ama 'daa: ‑Nyɩ dʋɔ ‑a kä, ‑kä ‑gä, 18 'be ‑jää dʋɔɩɩ ‑gböö, ‑bɛ ɔ nyra ‑mɔ 'sɔ kʋa' ‑plɩɩ ‑wälɩ nɩ, 'ɔnyɩ ‑na dʋɔ ‑a bä. 'Iili nɩ, ‑saalɩ 'cɩcasa.» 19 'Iibäa' 'ŋlʋʋlɔ nɩ: «'N jresaa, ‑bä. 20 'Dʋgbalä kʋa' ‑pɩ 'äa 'klɩ ana tʋɩɩ ma bibie Nyɔsʋa, ‑maa 'amɔlɔ nɩ, 'a nɩnɩa Jerusalɛɛmë 'iibä Nyɔsʋaa bibiefa.» 21 'Iibäa' Jesu nɩ: «'Ŋlʋʋ o, 'tasɩrɩa 'cɩcasa 'n ‑gbala ‑mɩ, 'taɩn jö 'a ‑ka ‑nëmä Tʋ 'dʋgba 'wli ‑a bibrie, 'i ‑ka ‑nëmä bɩa Jerusalɛɛmë ‑a bä. 22 Dɛɛlɛ 'anyɩa' jre, 'ɛɛ 'a bibie, amɔlɔ nɩ, ɛ a jrea' 'ɛɛ a bibie, 'be juifë kälɩ 'lɩmlɩwʋwʋkʋ jara. 23 ‑Maa 'taɩn jö, ‑bɛ 'i 'a 'lɩjrä, ü bibiea' Tʋ 'cɩcasa, ma ‑ka nëmä Tʋ bibie nɩ, ‑susu 'lɩ nyra 'cɩcasa 'lɩ 'ümä 'ɔɔn bibrie. 'A 'samaa bibienyüü Tʋ 'bata. 24 Nyɔsʋa bä ‑susu, ü kä 'fɩɔ wea' 'ɔɔn kä 'ümä 'ɔɔn ‑susu nyra 'cɩcasa 'lɩ were.» 25 'Iibäa' 'ŋlʋʋlɔ nɩ: «'N jre 'iin nya jia, ɔ 'ü 'daraa' , 'taɩn 'lɩ 'ɔmäa' ji nɩ, 'ɔnya amɩ wiia 'fɩɔ ‑gbalaa.» 26 Jesu nya ‑gbala 'ɔɔn: «'Mɔɔlɔ 'palaa' ‑plɩɩ ‑mɩ wii ‑gba nɩ, 'ɔɔ 'n bä.»

27 'Ü ‑ka bä 'iin ‑gälɩ ‑bɛ Jesua 'wʋnyɛrɛnyüü 'tɔ. 'Ü 'jäa' 'ɔɔn ‑bɛ 'ɔ nyra 'ŋlʋʋ dɛtɛa' nɩ, 'i kala 'üün plɛ 'klɩ. ‑Maa 'ünyɩ Jesu ‑a 'bete wiili 'ɔ 'betre 'ɔɔn le, 'aiɛ, wii 'plɛɛ 'ɔ nyra 'ɔɔn dɛtɛ le? 28 'A ‑plɩɩ 'ŋlʋʋlɔ ‑gba 'ɔa bëtä 'kä, 'ɔnya fa fʋfɔlʋ, 'ɔnya mi bätäa nyüü ‑gbala: 29 «'Ba ji 'amä nyɔɔlɔ ‑gbalaa' 'mɩ wiili kä 'fɩɔ 'n nʋa' 'jä! ‑Mää 'Kriisë ‑a ‑plɩɩ?» 30 'Üa 'fɩɔ nya 'cie bätä ‑bɛ 'ü jö ‑tɛ Jesu bäa'. 31 'Ɔa 'wʋnyɛrɛnyüü 'soso 'ɔɔn 'wʋ bɩa: «Rabii, jidɛɛ.» 32 ‑Maa 'ɔnya ‑gbala 'üün: «Jijrɛlɛ 'nëmäa' ji 'ɛ bälɩ, 'anyɩ 'ɛɛn jre ‑a jre.» 33 'Ɔa 'wʋnyɛrɛnyüüa 'kpɔa ‑tɔrʋpɩɔ 'ü 'paa wii ɔ: «‑Ii! Nyɔɔ ‑moloo ‑beere dɛɛ ja 'ɔɔn jijrɛ?» 34 Jesu nya ‑gbala 'üün: «'Na jijrɛ bä ‑a nʋ wiili nyɔɔlɔ blɔa' 'mɩ 'daaa', ‑bɛ ‑a 'wlara 'ɔa 'jrʋpa.» 35 'Ɔ ‑nëma 'sɔɔwʋ nɩ: «'Anyɩ 'daa: ‹‑Söplü mlɔɔ tɩɔ 'lɩ pütia 'mä ‑flɔɔɔ.› 'Ba ‑jää, 'amɔ 'n ‑gbala; 'ba dɔ 'nyü 'wʋ 'ba ‑pʋpɔ pütia: 'ü 'a ‑flɔɔɔ, 'ü 'a 'böbösa bä! 36 Nyɔɔlɔ möa' ‑gbaakalɩ, 'ü 'baalɩ 'kä 'ü ‑nyɛɛɛ 'ɔɔn, 'ɛɛ 'ɔ ‑tʋʋä ‑wälɩ 'klälä 'nyɩa' blöröfa käa ‑gʋ. 'Ia 'taɩn 'lɩ, nyɔɔlɔ ‑goooa' ‑bɛ ‑mɔlɔ 'bööa' nö dɔrʋ. 37 Tapönänälä 'daaa' ‑maa: ‹‑Gogoa nɔ bälɩ, ‑bɛ 'böböa nɔ bälɩ› nɩ, 'cɩcasa bäsaa. 38 ‑Tɛ 'lɩ 'anyɩa' ‑goolo nɩ, 'ii 'n blɔ 'amɩ ‑gbaalakalɩ; ‑mölöö ‑fɛ 'jrʋpalä 'anya mi 'ään ‑gälɩ blö.»

39 Wiili 'ŋlʋʋlɔ 'pa ɩa' ‑bɛ 'ɔ 'daaa' ‑maa Jesu ‑gbala 'ɔɔn wiili kä 'fɩɔ 'ɔ nʋa' nɩ, 'ia ‑gʋ, Samariinyüü 'kɔkɔmlɛ toro Jesu plɛ. 40 Samariinyüüa 'mʋgbɛ jia', ‑bɛ 'ü 'tɔa' 'ɔɔn ‑gba nɩ, bibie 'ü bibie 'ɔɔn 'ɔmä 'üün jrüü jie ‑gbasi. 'Ɔnya ‑si 'lɩ jrüü 'sɔɔ. 41 'Ɔa 'papawiia ‑gʋ nyüü 'kɔkɔmlɛ nya toro 'sɔɔwʋ 'ɔɔn plɛɛ; 42 ‑bɛ 'ü ‑gbala 'ŋlʋʋlɔ ‑maa: «‑Mää wiili ‑gbaa', ‑mää 'ia ‑gʋ a ‑kanyɩ toro 'ɔɔn plɛ, ‑maa ana 'mʋgbɛ nya 'ɔɔn 'nyaklipo, a jre 'iin ɔ 'sɩrɩ 'ɔ bäa' 'kasa 'pläa 'fɩɔa 'Lɩmlɩbanyɔɔ 'Kriisë.»

'Kɩɩ ‑gälɩglaaranyɔɔ kpaköa 'jʋlɔ Jesu 'pʋɔa'

Lukë 7.1-10; 17.5

43 Jesu ‑sia' jrüü 'sɔɔ nɩ, 'ɔnya mi Galilee; 44 'be 'ɔa 'mʋgbɛ 'pa kä 'iin. 'Ɔ nɩnɩa: Nyɔsʋaamlɩpalanyɔɔa 'brea nyüü 'nyɩ 'dara 'ɔɔn nyɔɔ ‑a. 45 'Ɔ 'tɔa' Galilee nɩ, 'ia nyüü 'kpla 'ɔɔn 'cɩcasa; 'ü 'jä wiili kä 'fɩɔ 'ɔ nrörö käa' Jerusalɛɛmë, ‑glɩsɩglɩsɩa 'taɩn 'lɩ. 46 Jesu nya 'blöö Galileea Kanaa dɛrɩ, i 'ɔ 'cicri käa' 'nɩ ‑duvɛɛn 'lɩ. 'Kɩɩa ‑gälɩglaaranyɔɔ 'doo bä kä Kapɛrënaumëbätä, 'ɔa 'jʋ 'nyɩ kä ‑ya ‑a ‑ya. 47 'Ɔ 'nua' ‑maa Jesu 'a 'sɔ, 'ɔ 'a Galileea ‑tʋtʋ ‑gälɩ ji nɩ, 'ɔnya mi 'ɔɔn bibie, ɔ 'cie ɔ ji ɔ 'pʋɔ 'ɔa 'jʋlɔ bäa' jäjä 'nyʋfɔ mlɩ. 48 Jesu nya ‑gbala 'ɔɔn: «'A ‑kaaŋlʋa' nyra plɛklɩkalawii 'jä nɩ, 'a ‑nëmä 'mɩ plɛ ‑a toro.» 49 'Iibäa' 'kɩɩa ‑gälɩglaaranyɔɔ kpakölɔ nɩ: «'Pläkänyɔɔ, 'cie ɔ, ‑a ji 'na 'jʋ ‑pɩ jä.» 50 'Iibäa' Jesu nɩ: «Mi, ‑na 'jʋ bä 'plä 'wʋ.» 'Ɔnya toro Jesua mlɩa wii plɛ, ‑bɛ 'ɔ mö ‑gbööli. 51 'A mö nyɔɔlɔ mö ɩ, ‑bɛ 'ɔ nyra 'ɔa 'jrʋpafɛnyüü traraklɩ, 'ü jö ɩ 'ɔɔn ‑gbala: «‑Na 'jʋ 'a 'pʋ.» 52 'Ɔnya 'bete 'üün: «‑Gliii 'plɛɛ 'lɩ 'ɔa fugba 'na le?» 'Iibäa' nyüülü nɩ: «Braasrɩɩa ‑gbiajrʋa ‑gliiibɔʋ 'doo 'lɩ, 'fʋgbalʋ sɔ 'ɔa fugba 'lɩ.» 53 'Ü ‑gbaa' 'iin nɩ, 'jʋlɔa tʋ nya 'pa plɛ 'sɩrɩ 'ia ‑gliii 'deelɛa 'mlɩ Jesu ‑gbala 'ɔɔn ‑na 'jʋ bä 'plä 'wʋ. 'Ɔɔ ‑bɛ 'ɔa ‑gbööö nya toro 'ɔɔn plɛ. 54 Jesu sɔa' Judee ‑bɛ 'ɔ jia' Galilee nɩ, 'a 'sɔɔa ni ‑saragbia tielɛ 'ɔ nʋa'.