'Sraalä Jesu ‑bɛ Nikodɛɛmë plaa'
3
1 Nyɔɔ 'doo bä kä Farisinyüüa ‑tɔrʋpɩɔ, 'ɔɔ 'ü 'dara Nikodɛɛmë; 'ɔ bä juifënyüüa 'wliklɩnyɔɔ. 2 'Ɔɔ ji ‑gbiara Jesu 'jäkalɩ, 'iibä: «Rabii†, a jre 'iin, Nyɔsʋa blɔ ‑mɩ ‑mä amɩ 'kpɩa. ‑Saragbia tielë kä 'fɩɔ ‑nöa' nɩ, Nyɔsʋa ma 'nyɩ nyɔɔ dɛrɩ ‑a bä 'ɔnyɩ 'lɩ ‑a bɩa ɔ nʋ 'iin.» 3 Jesu nya ‑gbala 'ɔɔn: «'Tasɩrɩa 'cɩcasa 'n ‑gbala ‑mɩ, nyɔɔ ma 'nyɩ ‑glooro ‑a ‑glooro 'sɔɔwʋ, 'ɔnyɩ 'lɩ ‑a bɩa ɔ 'jä Nyɔsʋaa 'kamaplä†.» 4 Nikodɛɛmë nya 'bete 'ɔɔn: «Nyɔɔlɔ nyaa' 'klɩbɩa nɩ, ‑asɩ 'ünya 'ɔa ‑gugudɛɛ nʋ le? 'Ɔ ‑ka 'mrɛɛ ɔ 'blöö 'sɔɔwʋ 'ɔa 'yioa 'mlɩ dɛrɩ ‑bɛ 'ɔmä 'sɔɔwʋ 'ɔɔn ‑gu?» 5 'Iibäa' Jesu nɩ: «'Tasɩrɩa 'cɩcasa 'n ‑gbala ‑mɩ, nyɔɔlɔ 'nyɩa' 'nɩ nyra ‑susu† 'lɩ ‑glooro, 'ɔnyɩ 'lɩ ‑a bɩa ɔ pa Nyɔsʋaa 'kamaplä 'lɩ. 6 Dɛɛlɛ nyɔɔ ‑gua' bä nyɔɔa dɛɛ, ‑maa ‑mɛlɛ ‑Susu ‑gua' bä ‑susua dɛɛ. 7 Ama 'daa: ‹'Ba ‑glooro 'wʋ 'sɔɔwʋ› nɩ, 'inyɩ kala ‑mɩ plɛ 'klɩ. 8 ‑Plɩɩlɩ ‑fʋflʋ ‑waa' 'ii 'u fa, ‑nööö 'ua wii 'wli, ‑maa ‑plɩɩlɩ 'u sɔa', ‑plɩɩlɩ 'u möa' ‑nyɩ 'lɩ ‑a jre. 'Asɩ nyɔɔlɔ ‑glooroa' ‑Susu 'lɩ bä.»9 Nikodɛɛmë nya 'bete Jesu: «‑Asɩ 'ia 'fɩɔlʋ 'mä nrörö le?»
10 'Iibäa' Jesu nɩ: «‑Mɔ bäa' 'sɔɔwʋ Israɛɛlëa 'kpɩkpɩanyɔɔ kpakö nɩ, ‑mɔ 'nyɩ 'iin jre! 11 'Tasɩrɩa 'cɩcasa 'n ‑gbala ‑mɩ, wiili a jrea' 'ii a 'saalɩ, wiili ana 'nyü 'jäa', 'ia ‑gä a 'paa; 'asɩɛ 'anyɩ 'dara 'iin wii ‑a. 12 'Jä ‑pɩ, ‑tʋtʋ ‑gälɩa wiili 'n ‑gbalaa' 'amɩ, 'anyɩ 'dara 'iin wii ‑a. ‑Asɩ 'anya cɛlɩa ni wii 'dara le? 13 Nyɔɔ ‑kaapɩɔ cɛa 'mlɩ 'jra; Nyɔɔa 'Jʋlɔ bäa' cɛlɩ 'ɔa 'doo 'ɔ sɔ 'lɩ. 14 'Sɩrɩ Moisë 'jraraa' trɔɔ† ‑aaga 'lɩ, 'asɩ Nyɔɔa 'Jʋ kä 'ɔmä bɩa 'saa 'jrara, 15 ‑bɛ ü kä 'fɩɔ toroa' 'ɔɔn plɛ ‑pɩ jä, ‑maa† 'ümä 'klälä 'nyɩa' blöröfa kä 'jä. 16 'Be Nyɔsʋa ‑wa 'plä ‑gböösa, 'ɔnya 'sa 'ɔa 'jʋ 'doo 'doo, 'ia ‑gʋ nyɔɔ o nyɔɔ toroa' 'ɔɔn plɛ ‑pɩ jä, ‑maa 'ɔmä 'klälä 'nyɩa' blöröfa kä 'jä. 17 ‑Mää 'pläa ‑gätʋtʋkʋa ‑gʋ Nyɔsʋa 'nyɩ 'Jʋ 'pläa 'mlɩ ja. 'Ɔ ja 'ɔɔn 'plä 'mä 'ɔɔn kälɩ ‑srörö 'ämä 'lɩmlɩwʋ. 18 ‑Mɔlɔ toroa' 'ɔɔn plɛ, 'ɔa ‑gä 'nyɩ ‑trääräkʋ ‑a kä 'plɔʋ; ‑maa ‑mɔlɔ 'nyɩ toroa' 'ɔɔn plɛ, 'ɔa ‑gä 'a kä 'bölö, 'be 'ɔnyɩ Nyɔsʋaa 'Jʋ 'doo 'doo plɛ ‑a toro. 19 ‑Srɩ jia' 'pläa mlɩ nɩ, 'jöjrüükpü nyüü ‑wa 'ünya tɩ ‑plɩɩ ‑srɩ, 'üa bʋbɔgbi ‑a ‑gʋ. 'A 'ia ‑gʋ 'üa ‑gä 'mä ‑träärä. 20 Nyɔɔ o nyɔɔ nöa' ‑balʋ, 'ɔnyɩ ‑srɩ ‑a ‑wa. 'Ɔ 'nɩ ji bɩa ‑srɩ 'klɩ ‑a, 'ɔa bʋbɔgbili 'ɔ nöa', 'ia ŋalɛ 'blaa 'ɔɔn, 'i ‑pɩ ‑fälɩ blö. 21 ‑Maa ‑mɔlɔ käa' 'cɩcagbi, 'ɔɔ jö ‑srɩ 'klɩ, nyüüa 'fɩɔ 'mä 'iin 'jä 'sɩrɩ Nyɔsʋa 'klü bäa' 'ɔɔn 'lɩ, ‑bɛ 'ɔ nöa' 'cɩcagbi.»
Jaan 'paa 'sɔɔwʋ Jesua ‑gä
22 'I ‑sia' nɩ, Jesu nyra 'ɔa 'wʋnyɛrɛnyüü nya mi Judeea ‑tʋtʋ ‑gälɩ; 'ii 'ɔ nyra 'üün kʋ ‑bɛ 'ɔma 'paa nyüü 'nɩ 'wli. 23 ‑Bɛ Jaan 'paa bɩa nyüü 'nɩ 'wli ‑plɩɩlɩ 'ü 'daraa' Ainɔɔ, Saliimëa ‑gba, 'be 'ii 'nie ‑sümlö. 'Ii nyüü mö 'nɩ 'wli 'pala. 24 'Ia 'taɩn 'lɩ 'ü ‑kaaŋlʋ Jaan ‑jie 'lɩ 'pa. 25 ‑Jää 'üa 'bisaa ‑fre 'lɩ 'wʋwʋkʋa ‑topokʋ blö Jaan a 'wʋnyɛrɛnyüü nyra juifënyɔɔ 'dooa† ‑tɔrʋpɩɔ. 26 'Ünya ji ‑tɛ Jaan bäa', 'iibä: «Rabii, ‑jää nyɔɔlɔ nyra 'ɔɔ bäa' ‑mla Jurëdɛɛn a 'wlugba, ɔ kä ‑gä ‑paaa', ‑jää 'ɔɔ 'paa nyüü 'nɩ 'wli. 'A 'ɔa ‑nyɛɛ nyüüa 'fɩɔ mö.» 27 'Iibäa' Jaan nɩ: «Dɛɛlɛ cɛ† ‑nyɛɛa' nyɔɔ nɩ, 'ɛɛ 'ɔ 'jää. 28 'Ana 'mʋgbɛa 'klɩ 'nyaa 'daa kä: ‹‑Mää 'mɔɔ 'nyɩ 'Kriisë bä. Bɔblɔnyɔɔ 'n bä, 'mɔɔ ‑ta 'ɔɔn 'nyʋfɔ 'klɩ.› 29 Nyɔɔlɔ jaa' 'ŋlʋʋ 'sruwʋ 'ɔɔ bä 'ɔa dʋɔ. Dʋɔa ‑beilɔ kʋa' ‑plɩɩ ma po 'ɔɔn 'nyakli, dɔrʋ 'blaa 'ɔmɩ. 'Asɩ dɔrʋ 'si bɩa 'mɩ 'klɩ. 30 'Ɔɔlɔ nɩ, 'ɔ kä ɔ 'bʋa, ‑bɛ 'mɔɔ ‑a 'ciewʋ.
31 «‑Mɔlɔ sɔa' cɛlɩ, 'ɔ ‑si ana 'fɩɔwʋ; ‑tʋtʋ ‑gälɩa nɔ bä ‑tʋtʋ ‑gälɩa nɔ. 'Sɩrɩ 'ɔ bäa' ‑tʋtʋ ‑gälɩa nɔ, 'ia 'sa 'ɔ 'paa wii. ‑Mɔlɔ sɔa' cɛlɩ, 'ɔ ‑si ana 'fɩɔwʋ. 32 Wiili 'ɔ 'jäa' ‑bɛ 'ɔ 'nua' 'ii 'ɔ 'saalɩ, ‑maa nyɔɔ 'nyɩ 'dara 'iin wii ‑a. 33 Nyɔɔlɔ 'baaa' 'ɔa mlɩa wii nyɔɔ 'wʋ nɩ, 'ia nyɔɔlɔ srara amɩ 'sɩrɩ Nyɔsʋa bäa' 'cɩcasa. 34 'Be nyɔɔ Nyɔsʋa blɔa' nɩ, Nyɔsʋaa mlɩa wii 'ɔ 'paa, Nyɔsʋa 'nyɩ nyaka 'ɔa ‑Susua 'kä 'ɔ 'cere 'ɔmɩ 'uun ‑gälɩ. 35 Tʋ ‑wa 'Jʋ, 'ɔnya ‑nyɩ 'ɔɔn diia 'fɩɔ kälɩ. 36 Nyɔɔlɔ toroa' 'Jʋ plɛ nɩ, 'ɔ kä ‑wɩara 'klä; nyɔɔlɔ 'nyɩ toroa' 'Jʋ plɛ nɩ, 'ɔ ‑nëmä 'klä ‑a 'jä, ‑maa Nyɔsʋaa 'crɛ bä 'ɔɔn ‑gälɩ 'plɔʋplɔʋ.»