JESU KA ‑UUNSƆƆ 'ƆNYA NƲ DIILI ‑SIA' NYÜÜA BOBOWLI 'WƲ
2.1–12.50
'Nɩlɩ Jesu nröröa' ‑duvɛɛn 'lɩ
2
1 Jrüü tääa ‑srɩ 'lɩ nɩ, ‑jiwälɩ bä Galileea ‑tʋtʋ ‑gälɩa bätälä 'ü 'daraa' Kanaa; Jesua 'yio bä ɩ 'lɩ. 2 'Ü tupo bɩa Jesu ‑bɛ 'ɔa 'wʋnyɛrɛnyüü. 3 'Ü ‑ka bä 'ia ‑jria 'lɩ, ‑duvɛɛn nya bɩa. Jesua 'yio nya ‑gbala 'ɔɔn ‑maa: «'Üa 'nʋ 'a bɩa.» 4 'Iibäa' Jesu nɩ: «'Ŋlʋʋ o, ‑mɔ ‑nëmä 'mɩ ‑gbalaa? 'Na 'taɩn ‑kaaŋlʋ 'lɩjrä.» 5 'Ɔa 'yio nya ‑gbala 'jrʋpafɛnyüü: «Wiili kä 'fɩɔ 'ɔ nëmäa' 'amɩ ‑gbala, 'ba nʋ 'iin.»6 'Täkë bëtë ‑uundoo bä ɩ ‑plɩɩ juifëa ‑gbafutrokʋa ‑gʋ. 'Ia bëtä 'döö 'mrɛɛ ä pla 'nɩ 'kpalëa ‑glʋɩgbööa 'samaa dɛɛ. 7 Jesu nya ‑gbala 'jrʋpafɛnyüülü: «'Ba 'sie bëtëlë 'nɩ 'klɩ.» 'Ünya 'sie 'üün ‑pɩtrɩɩ. 8 'Ɔnya ‑gbala 'üün: «'Ba 'pri, 'ba fa nyɔɔlɔ käläa' ‑jiwälɩa wii ‑gba.» 'Ünya fa 'ɔmɩ 'iin. 9 Nyɔɔlɔ 'jäa' 'nɩlɩ nʋa' ‑duvɛɛn mlɩ nɩ, 'ɔnyɩ 'ɛa sɔfa ‑a jre, ‑maa 'jrʋpafɛnyüülü 'pria' 'nɩlɩ nɩ, 'ü jre 'ɛa sɔfa. 'Ɔnya we nyɔɔlɔ 'tiea'. 10 'Iibä nɩ: «'Cɩca ‑duvɛɛn ‑kätɩ 'ü ‑päää 'plɔʋ, ɛma 'bla nyüü 'fɩɔwʋ 'kä 'ü ‑päää ‑mɛlɛ 'nyɩa' 'saa 'na. ‑Mɔlɔ nɩ, ‑duvɛɛnlɛ 'naa' 'ɛɛ ‑paala 'tä.» 11 'A Jesua 'klɩsa ‑saragbia tielɛ† ‑kätɩ 'ɔ nröröa' Kanaa, Galileea ‑tʋtʋ ‑gälɩ. 'Asɩ 'ɔ srara 'ɔa 'wli 'klɩ 'bʋabʋakʋ, 'ɔa 'wʋnyɛrɛnyüü nya toro 'ɔɔn plɛ.
'Perupanyüülü Jesu prɛrɛa' Nyɔsʋaanyuku kpaku ‑wälɩ Jerusalɛɛmë
12 'I 'wlaraa', 'ɔɔ ‑bɛ 'ɔa 'yio, 'ɔa ‑wlajü nyra 'ɔa 'wʋnyɛrɛnyüü nya mi bätälä 'ü 'daraa' Kapɛrënaumë, 'ünya ‑si 'lɩ jrüü jie. 13 Juifëa ‑glɩsɩglɩsɩlɛ 'ü 'daraa' 'Paakë, 'ɛa 'taɩn 'cicrewälɩ ɔ, Jesu nya 'jra Jerusalɛɛmë. 14 'Ɔ jrä Nyɔsʋaanyuku kpaku ‑wälɩ, bruu 'perupanyüü, ‑bablëë 'perupanyüü, ‑sögü 'perupanyüü nyra mölii 'cicinyüü†; ‑moloo ma bälɩ 'ɔa 'perupadii ‑gba 'ɔ kʋ. 15 Jesu nya nʋ 'büblia ‑gbalɛfu, 'ɔnya prɛ 'üa 'fɩɔ Nyɔsʋaanyüköli, 'palɩ ‑bablëë nyra bruu, ‑gbagba mölii 'cicinyüüa mölii 'kä, ‑a ‑kpaakpa 'töwlü 'kä. 16 'Ɔnya ‑gbala nyüülü 'paaa' ‑sögü 'peru: «'Ba 'ba ‑tɛ 'ümɩ, 'anyɩ nrörö 'na Tʋa nyuku 'makatɩ 'lɩ!» 17 'Ɔ nʋa' ‑plɩ 'saa nɩ, 'ɔa 'wʋnyɛrɛnyüü nya 'pa wiili ‑jɩjraa' nyɔsʋapɔɔkʋ 'lɩ plɛ: «‑Na nyukua ‑wawakʋa ‑gʋ 'na plɛɛ fie†.»
18 Juifë nya 'bete 'ɔɔn: «Nʋ ‑saragbia tie ‑bɛ amä 'saa jre i nöa' nɩ, ‑mɔ kä ‑mä 'iin nʋ.» 19 'Iibäa' Jesu nɩ: «'Ba ‑gblooo Nyɔsʋaanyuku kpakulu kʋa' ‑pɩ, ‑bɛ 'mä 'uun 'jrara jrüü tääa 'mlɩ.» 20 'Iibäa' juifë nɩ: «Nyɔsʋaanyuku kpakulu kʋa' ‑pɩ, u a 'paa' ‑sɩa ‑glʋɩsɔɔ ‑sɩ ‑uundoo nɩ, 'uu ‑jäää ‑mä 'jrara jrüü tääa mlɩ!» 21 ‑Maa nyukulu Jesu 'daaa' nɩ, 'ɔa fugba 'ɔ 'daa. 22 'A 'ia ‑gʋ 'ɔ sɔa' 'kuaabre nɩ, 'ɔa 'wʋnyɛrɛnyüü nya 'pa plɛ 'sɩrɩ 'ɔ 'pa käa' 'iin; 'ünya 'dara nyɔsʋapɔɔkʋ nyra wiili Jesu 'paa' wii.
Jesu jre nyüüa plɛ 'klɩa wii
Jeremii 17.9-10; Ebröönyüü 4.12-13; 'Nyügälɩjawii 2.23