JESUA ‑GÄLƖBLÖRÖ 'SƆRƐ ‑TƲTƲ ‑GÄLƖ//'ƆA ‑GÄA ‑SRƖƖ NYRA 'ƆA JÄJÄKƲ
11.1–15.47
'Sɩrɩ Jesu 'jraa' Jerusalɛɛmë
11
1 'Ü möa' Jerusalɛɛmë 'tɔ nɩ, ‑bɛ 'ü jijröa' Bɛtëfajëbätä nyra Betaniibätä†‑gba nɩ, ‑nyɛɛ Oliivëtiia 'dʋgbaa 'pɛlɩ nɩ, Jesu nya blɔ 'ɔa 'wʋnyɛrɛnyüüa ‑tɔrʋpɩɔa nyüü 'sɔɔ, 2 'ɔ ‑gbala 'üün: «'Ba mi bätälä 'a 'jääa' 'wʋ 'lee 'äa 'mlɩ. 'Ama 'jra 'lɩ dotro, ‑sʋbrejʋ kä ‑gälɩ nyɔɔ ‑kaapɩɔa' 'jra kpasra ‑plɩɩ, 'ba ‑jejie 'ɔɔn 'kä 'a ja 'ɔɔn. 3 Nyɔɔ ma 'bete 'amɩ: ‹Dɛplɛɛ kä ‑gʋ 'a nö 'saa le?› 'Ba ‑gbala 'ɔɔn: ‹'Pläkänyɔɔ 'bata 'ɛɛn.› 'Ɔnya ‑plɩɩ 'amɩ ‑wälɩcɛrɛa, 'kä 'anya 'ɛɛn ja.» 4 'Ü mia', 'ü jrä ‑plɩɩ ‑sʋbrejʋ ‑fälɩ, 'ɔ kpasra tatu 'mä 'klɩ 'nyʋfɔ ‑gba; 'ünya ‑jejie 'ɔɔn. 5 Nyüülü bä ɩa' ‑plɩɩ nya 'bete: «Dɛplɛɛ 'a nö le? Dɛplɛɛ kä ‑gʋ 'a ‑jejie ‑sʋbrejʋlɔ le?» 6 'Sɩrɩ Jesu ‑gbala ɩa' 'üün nɩ, 'ünya nʋ 'saa 'ünya ‑gbala nyüülü. 'Ünya 'cɛrɛ 'üün ‑wälɩ 'ünya mi. 7 'Ünya fa Jesu ‑sʋbrejʋ. 'Ünya 'pepe 'ɔa ‑gälɩ 'üa 'koti, Jesu nya 'jra 'lɩ ‑gälɩ. 8 Nyüü 'kɔkɔmlɛ 'pepe 'üa 'sosroodii 'nyʋfɔ 'wʋ, ‑bɛ ‑mölöö 'pepe 'lɩ 'wawë 'jɩjarɛlë 'ü 'bölöa' 'klʋɛɛ†. 9 Nyüülü bäa' Jesua 'klɔɔtrʋ nyra ‑mülü bäa' 'ɔa dɛrɩ 'bʋala 'ɔɔn:«Osana!
‑Jɔrʋ pala nyɔɔlɔ jröröa' 'Pläkänyɔɔa 'nyrɩklɩ ‑gälɩ†!
10 Abɩa Nyɔsʋa 'pa 'kɩɩa 'kamaplälä jöa' 'nɩ†,
ana tʋ Daviidëa 'kamaplä!
Osana! A 'bʋala Nyɔsʋalɔ bäa' cɛlɩ†!»
11 Jesu 'tɔa' Jerusalɛɛmë nɩ, 'ɔnya pa Nyɔsʋaanyuku ‑wälɩ. 'Ɔmä 'ua 'fɩɔa ‑wälɩ 'jäjräkʋ bɩa nɩ, ‑gbiajrʋ 'a mi, 'ɔɔ ‑bɛ 'ɔa nyüüpʋnyüüsɔɔ nya mi Betanii.
'Figietuulu Jesu busua'
12 ‑Srɩ ‑gbaa' 'kä, ‑bɛ 'ü 'ciea' Betanii nɩ, ‑gbëka nya 'bla Jesu. 13 'Ɔ tʋŋlɔlɩdɛrɩ 'ɔnya 'järä figietuua† 'wli 'napɩ. 'Ɔa plɛ 'ɔnya 'lɩ 'bü ‑jie 'järäa, ‑maa 'ɔmä 'uun ‑gbajijrökalɩ mi nɩ, 'napɩa 'kpɔ bä 'ua 'wli. ‑Mää 'ua tʋtʋ 'taɩn ‑a. 14 'Iibäa' Jesu: «Nyɔɔ ‑ka ‑nëmä ‑na 'wlia 'bö ‑a ji!» 'Ɔa 'wʋnyɛrɛnyüü nya 'nu 'iin 'wli. 15 'Ü 'tɔa' Jerusalɛɛmë, Jesu nya pa Nyɔsʋaanyuku kpaku ‑wälɩ. 'Ɔnya prɛ nyüülü 'palaa' 'lɩ 'üa dii 'peru, nyra ü jöa' 'lɩ 'makatɩ 'pala. 'Ɔ 'kpakpa mölii 'cicinyüüa 'töwlü 'kä, nyra ‑mülü 'palaa' 'lɩ ‑sögü 'peru 'üa 'kpatë†. 16 'Ɔ 'nɩ 'nyie 'nyie ‑a nyɔɔ 'mä dɛɛ 'klaa 'ɔmä Nyɔsʋaanyuku 'lɩgö. 17 'Pɩrɩgälɩ nɩ, 'kpɩa 'ɔ 'kpɩa 'üün; 'ɔ ‑nëma: «'I 'nɩ nyɔsʋapɔɔkʋ 'lɩ ‑a ‑jɩjra 'kä: ‹'Na nyukua 'nyrɩ bä ‑glügbüa 'fɩɔa nyɔsʋabibienyuku†.› ‑Maa 'amɔlɔ nɩ, 'a nrörö 'uun 'jejienyüüa trarafa 'lɩ!» 18 ‑Gbɔsapɛrɩnyüü kpakü nyra ‑dɔkpɩanyüü 'nua' 'iin 'wli nɩ, 'ümä 'ɔɔn 'bla 'ia bei 'ü 'srikä, ‑maa 'ɔa 'kpɩkpɩakʋ pa nyüüa plɛ ‑gba, 'ia ‑gʋ 'ɔa ŋalɛ 'bla 'üün.
19 ‑Gbiajrʋ mia' nɩ, Jesu nya 'cie bätä.
Nyɔsʋaplɛtorokʋa 'klü
20 ‑Srɩ ‑gbaa' 'kä ‑bɛ 'ü ‑sööa' 'ü möa' nɩ, 'ɔa 'wʋnyɛrɛnyüü nya 'jä figietuulu; 'u 'fu, 'ua tigbliia 'fɩɔ 'fu. 21 Piɛɛrë 'paa' plɛ nɩ, 'ɔ ‑nëma: «Rabii†, tɛ ‑nyɛɛ figietuulu ‑busua', 'u 'a 'fu!» 22 Jesu nya ‑gbala 'üün: «'Ba toro Nyɔsʋa plɛ! 23 'Cɩcasa 'n ‑gbala 'amɩ, nyɔɔ ma ‑gbala 'dʋgbalä kʋa' ‑pɩ: ‹Sɔ ‑plɩɩlɩ kʋa', mi ‑a blö 'tanie 'lɩ›, 'ɔa plɛ ma ‑si, ɔma jresaa wiili 'ɔ 'saalɩ nya nröröa nɩ, 'ɔa 'klɩ 'kä 'inya nrörö. 24 'A 'ia ‑gʋ 'n ‑gbala 'amɩ: Dɛɛ 'a nëmäa' Nyɔsʋa 'lɩ 'betre, abɩa 'ana plɛ jresaa 'anya 'ɛɛn 'jä, 'ia 'taɩn 'lɩ 'ɔnya 'amɩ ‑nyɩa. 25 'Asɩ 'a nëmäa' 'nyüglö 'amä Nyɔsʋa bibie nɩ, nyɔɔa wii ma bä 'ana 'mlɩ nɩ, 'ba cere 'ɔmɩ 'iin, ‑bɛ 'ana Tʋlɔ bäa' cɛa 'mlɩ 'mä bɩa 'ana ‑balʋ cere. 26 ‑Maa 'ama 'nyɩ cere 'ana ‑mëa ‑balʋ ‑a, 'ana Tʋlɔ bäa' cɛlɩ ‑nëmä bɩa 'amɩ 'ana ‑balʋ ‑a cere.»
Jesua 'kamakʋ
27 'Ünya 'blöö 'sɔɔwʋ Jerusalɛɛmë dɛrɩ, Jesu ‑piie ɩ Nyɔsʋaanyukua ‑glɔ 'lɩ, ‑bɛ ‑gbɔsapɛrɩnyüü kpakü, ‑dɔkpɩanyüü, nyra tagbü 'tɔ 'ɔɔn ‑gba, 28 'ünya 'bete 'ɔɔn: «‑Na 'ciö 'plɛɛ ‑bɛ ‑nö 'saa le? Nyɔɔ 'plɛɛ ‑gbala 'saa ‑mɩ le?» 29 'Iibäa' Jesu nɩ: «'Na 'mʋgbɛ wii 'doo 'nëmä 'amɩ 'lɩbetre, 'ba 'sa 'mɩ ‑gälɩ ‑bɛ nyɔɔlɔ ‑gbalaa' 'saa 'mɩ 'mä 'amɩ 'ɔa 'nyrɩ ‑nyɩ. 30 ‑A 'plɛɛ Jaan a nyüüa 'nɩwlipajrʋpa sɔrɔ le? Cɛlɩ ‑maa nyüü kälɩ? 'Ba 'sa 'mɩ ‑gälɩ.» 31 'Üa 'kpɔa ‑tɔrʋpɩɔ 'ü 'pawii ɔ: «Ama 'daa: ‹Nyɔsʋa blɔ kä 'ɔɔn›, 'ɔnya 'daa: ‹‑Bɛ dɛplɛɛ kä ‑gʋ 'anyɩ wiili Jaan 'saalɩ wiidara le?› 32 ‑Maa ama 'daa: ‹Nyüü blɔ kä 'ɔɔn.› » Nyüülü kä 'fɩɔ kʋa' ‑plɩ 'üa ŋalɛ 'blaa 'üün; nyüülüa 'fɩɔ jre 'iin 'sɩrɩ Jaan bäa' 'tasɩrɩ nyɔsʋaamlɩpalanyɔɔ. 33 'Iibäa' 'üün nɩ: «Anyɩ 'iin jre ‑a jre.» 'Ɔnya ‑gbala 'üün: «'Na 'mʋgbɛ, nyɔɔlɔ blɔa' 'mɩ 'nëmä 'amɩ 'ɔa 'nyrɩ ‑a ‑nyɩ.»