Jesu ‑bɛ ‑Sakee
19
1 Jesu nya 'jra Jerikoobätä ‑bɛ 'ɔ ‑göööɩ 'ään 'lɩ. 2 Nyɔɔ 'doo bälɩ 'ɔɔ 'ü 'dara ‑Sakee†. 'Ɔ bä dapookälɩpɛrɛnyüüa 'cifi. 'Ɔnya ji 'bɩɔ. 3 'Ɔ 'bata 'ɔmä nyɔɔlɔ bäa' Jesu jre, ‑maa nyüüa ‑sümlökʋa ‑gʋ 'ɔnyɩ 'mrɛɛ ‑a 'mrɛɛ, 'be 'ɔ ‑köwö. 4 'Ɔnya 'bösrö 'ɔmɩ, 'ɔnya 'jra tuu 'wli, 'uu 'ü 'dara sikomɔrë†, 'ɔmä Jesu 'jä, 'be 'ii 'ɔ nëmä ‑srörö. 5 Jesu 'tɔa' ‑plɩɩ nɩ, 'ɔnya dɔ 'nyü 'wʋ 'ɔnya 'jä nyɔɔlɔ, 'ɔnya ‑gbala 'ɔɔn: «‑Sakee, 'kökle ‑a 'cie! 'Saarɩa ‑srɩ 'lɩ 'n kä ‑na ‑nyɛɛa 'prerekʋ.» 6 ‑Sakee nya 'kökle 'ɔnya 'cie, dɔrʋsa 'ɔ 'kʋɛɛ 'lɩ 'ɔɔn. 7 Nyüü 'jäa' 'iin nɩ, ‑srɛɛɛ 'üa 'fɩɔ ‑srɛɛɛ 'ɔɔn ‑bɛ 'ü nö: «‑Taa ‑balʋnyɔɔlɔa ‑nyɛɛ 'ɔ mö kʋ!» 8 ‑Sakee nya sɔwʋ 'ɔnya ‑gbala 'Pläkänyɔɔ: «'Pläkänyɔɔ, ‑jää 'na 'bɩɔa klöö, 'pʋablanyüü 'n ‑nyɛɛ 'uun. ‑Bɛ nyɔɔlɔ 'n 'saraa' ‑gbagblɛ ‑bɛ 'n 'baa' mölii kälɩ nɩ, 'n ‑nyɛɛ 'ɔmɩ 'iin 'wʋ mlɔɔ 'wʋ!» 9 Jesu ‑nëma: «Nyɔsʋa 'a 'lɩ nyukulu kʋa' ‑pɩ mlɩba 'saarɩ. Nyɔɔlɔ kʋa' ‑pɩ bä bɩa Abraamëa 'jʋ. 10 Nyɔɔa 'Jʋ ji 'ɔmä nyüülü 'mɔlɔa' 'bata, 'ɔmä 'üün 'pʋɔ.»'Jrʋpafɛnyüü tääa tapönänä
11 Nyüü ‑ka poa' Jesu 'nyakli nɩ, 'ɔnya ja tapönänä ‑mölöö, 'be 'ɔ ‑kanyɩ 'lɩ Jerusalɛɛmë dɛrɩ ‑a tʋŋlɔ ‑bɛ nyüüa plɛ nɩnɩa ɩ 'a ‑plɩɩ Nyɔsʋaa 'kamaplä 'mä kʋ 'ämä 'äa nyufa srara. 12 ‑Jää wiili 'ɔ 'saalɩ: «Nyɔɔ 'doo bä kä nyüü kpaküa ‑gböölia nyɔɔ, 'ɔ kä 'ɔmä tʋŋlɔ 'blɩ ‑gälɩ mi 'ümä 'ɔɔn 'ia 'kamadɛɛ ‑nyɩ ‑bɛ 'ɔmä ji. 13 'Ɔnya we 'ɔa 'jrʋpafɛnyüüa ‑tɔrʋpɩɔa nyüü ‑pʋ. 'Ɔnya ‑nyɩ ‑moloo minë† ‑pʋ, 'ɔnya ‑gbala 'üün ‑maa: ‹'Ba 'pa 'peru pa pa 'kä 'n jö.› 14 ‑Maa 'ɔa 'blɩlɩ ‑gälɩa nyüü 'nyɩ 'bata 'ɔɔn ‑a. 'Ünya blɔ 'ɔɔn nyüü ‑tɛ 'lɩ 'ɔ mia 'ü ‑gbala 'üün ‑maa: ‹Anyɩ 'bata 'bata ‑a ‑taa nyɔɔlɔ 'mä ana 'bɩɔ bä.› 15 'Ü nröröa' 'ɔɔn 'bɩɔ 'lɩ, ‑bɛ 'ɔ jia' nɩ, 'ɔnya we 'jrʋpafɛnyüülü 'ɔ ‑nyɩ käa' mölii, 'ü ji ü ‑gbala 'ɔɔn mölii ‑srülü ‑moloo 'jäa'. 16 ‑Mɔlɔ ‑kätɩ jia', ‑nëma: ‹'Pläkänyɔɔ, ‑na minëlë nɩ, 'i 'jä ‑pʋ ‑mölöö.› 17 Nyɔɔlɔ ‑nëma: ‹'I 'na 'mʋfasa, 'cɩca 'jrʋpafɛnyɔɔ ‑bä! ‑Sraraa' 'mɩ 'sɩrɩ bäa' plɛtoronyɔɔ diijie 'lɩ 'n ‑nyɩa' ‑mɩa 'mlɩ nɩ, 'n ‑nyɛɛ ‑mɩ bätë ‑pʋa 'kamakʋ.› 18 'Sɔɔa nʋ jia' 'ɔ ‑nëma: ‹'Pläkänyɔɔ, ‑na minëlë nɩ, 'i 'jä ‑gböö ‑mölöö.› 19 'Ɔnya ‑gbala bɩa 'ɔɔn: ‹'N ‑nyɛɛ ‑mɩ bätë ‑gböö.› 20 ‑Moloo nya ji, 'ɔ ‑nëma: ‹'Pläkänyɔɔ, ‑jää ‑na minë. 'N 'pa 'iin dafʋa 'mlɩ 'nyaa ‑tʋ 'ɛɛn ‑wälɩ, 21 'be ‑na ŋalɛ 'bla 'mɩ. ‑Klalɩ, dɛɛlɛ ‑nyɩa' 'käsri, 'ɛɛ ‑fa, 'kä ‑plɩɩlɩ ‑nyɩa' ‑goolo, 'ii ‑böölö.› 22 'Ɔnya ‑gbala 'ɔɔn: ‹Plɛbʋbɔjrʋpafɛnyɔɔ! ‑Na 'papawii ‑gälɩ 'mä tɛ 'mä ‑na ‑gä tʋ. ‑Jre 'imɩ 'sɩrɩ 'n klaa' 'lɩ, 'sɩrɩ 'n faa' dɛɛlɛ 'nyɩa' 'käsri ‑bɛ 'n 'bölöa' ‑plɩɩlɩ 'nyɩa' ‑goolo, 23 ‑bɛ dɛplɛɛ 'kä ‑gʋ ‑nyɩ 'na mölii möliianyuku ‑wälɩ fa le? ‑Ama nʋ ɩ 'imɩ nɩ, 'inya ‑gälɩ 'paplaa, ama ji 'kä 'nyaa 'iin 'lɩbaa!› 24 'Ɔnya ‑gbala nyüülü kä 'fɩɔ bäa' ‑plɩɩ: ‹'Ba 'ba 'ɔmɩ minëlë kälɩ 'kä 'a ‑nyɛɛ 'uun ‑mɔlɔ 'klaaa' minë ‑pʋ!› 25 'Ünya ‑gbala 'ɔɔn: ‹'Pläkänyɔɔ, 'ɔ 'klaa ‑pʋ ‑mölöö!› 26 'Ɔ ‑nëma: ‹'Amɔ 'n ‑gbala, nyɔɔlɔ 'klaaa' diijie nɩ, Nyɔsʋa nya 'iin 'wlibɩaa. ‑Maa nyɔɔlɔ 'nyɩa' dɛɛ 'klaa nɩ, 'ɔnya 'nɩmɩ 'ɔɔn ‑mɛlɛ 'ɔ 'klaaa' kälɩ 'baa. 27 'Na 'nyüamlɩjraranyüülü nɩ, 'ünyɩ 'bata ɩa' 'mäa' 'kama nɩ, 'ba ja ‑pɩ 'üün 'na 'klɩ 'kä 'a 'blaa 'üün.› »
JESUA 'TÄPA 'SƆRƐ ‑TƲTƲ ‑GÄLƖ 'ƆA ‑GÄTƲTAƖN NYRA 'ƆA JÄJÄKƲ
19.28–23.56
Jesu 'jraa' Jerusalɛɛmë
28 Jesu bɩaa' wiiklɩpaplakʋ nɩ, 'ɔnya ‑ta 'nyʋfɔ ‑bɛ 'ü mö Jerusalɛɛmë. 29 'Ü jijröa' Bɛtëfajëbätä nyra Betaniibätä ‑gba nɩ, ‑nyɛɛ 'dʋgbalä 'ü 'daraa' Oliivëtiia 'Dʋgbaa 'pɛlɩ nɩ, 'ɔnya blɔ 'ɔa 'wʋnyɛrɛnyüüa ‑tɔrʋpɩɔa nyüü 'sɔɔ. 30 'Ɔ ‑gbala 'üün ‑maa: «'Ba mi bätälä 'a 'jääa' 'wʋ 'lee 'äa 'mlɩ. 'Ama 'jra 'lɩ, ‑sʋbrejʋ kä ‑gälɩ nyɔɔ ‑kaapɩɔa' 'jra kpasra ‑plɩɩ, 'ba ‑jejie 'ɔɔn 'kä 'a ja 'ɔɔn. 31 Nyɔɔ ma 'bete 'amɩ: ‹Dɛplɛɛ kä ‑gʋ 'a ‑jejie 'ɔɔn le?› 'Ba ‑gbala 'ɔɔn: ‹'Pläkänyɔɔ 'bata 'ɛɛn.› »
32 Nyüülü Jesu blɔa' nya mi. 'Ü 'tɔa' nɩ, wiili 'ɔ ‑gbala ɩa' 'ümɩ nɩ, 'ii 'ü jrä 'lɩ. 33 'A ‑sʋbrelɛ 'ü ‑jejie ɩ, 'ɛa käkänyɔɔ nya 'bete 'üün: «Dɛplɛɛ kä ‑gʋ 'a ‑jejie ‑sʋbrejʋlɔ le?» 34 'Ü ‑nëma: «'Pläkänyɔɔ 'bata 'ɛɛn.» 35 'Ünya fa Jesu ‑sʋbrejʋlɔ. 'Ünya 'pepe 'ɔa ‑gälɩ 'üa 'koti, 'ünya 'jra Jesu 'ɔa ‑gälɩ†. 36 'Asɩ 'ɛɛ 'nyɛɛ ‑bɛ nyüü 'pepe 'üa 'sosroodii 'nyʋfɔ 'wʋ†. 37 'Ü 'tɔa' 'nyʋfɔa 'cerefa 'wʋ Oliivëa 'Dʋgba 'wli nɩ, dɔrʋ 'bla nyüülü kä 'fɩɔ 'nyɛrɛa' 'ɔɔn ‑gba, ‑bɛ 'ü ‑gbolomlɩ 'ü 'bʋala Nyɔsʋaa 'nyrɩ ‑saragbili kä 'fɩɔ 'ü 'jäa' 'ia ‑gʋ. 38 ‑Bɛ 'ü nö:
«‑Jɔrʋ pala 'kɩɩlɔ jröröa' 'Pläkänyɔɔa 'nyrɩklɩ ‑gälɩ!
Abɩa 'wlinönrökʋ bä cɛlɩ,
'kä 'Pläkänyɔɔa 'nyrɩ 'bʋala cɛɩɩa 'mlɩ ‑gböösa†!»
39 Farisinyüü 'doorodoolü bä ɩa' ‑jria 'lɩ nya ‑gbala 'ɔɔn: «'Kpɩkpɩanyɔɔ, ‑gbala ‑na 'wʋnyɛrɛnyüü ü 'kpla 'üa 'mä!» 40 'Ɔnya ‑gbala 'üün: «'Amɔ 'n ‑gbala: 'üülü, 'üma 'kpla 'mä nɩ, 'täkë nya 'mɩ 'bʋalaa 'kpökpökʋ 'lɩ!»
Jesu 'wuö Jerusalɛɛmëa ‑gʋ
41 Jesu jijröa' Jerusalɛɛmëa ‑gba ‑bɛ 'ɔ 'jääa' 'ään 'wʋ 'lee nɩ, 'ɔnya 'wu 'äa ‑gʋ, 42 ‑bɛ 'ɔ nö: «‑Na 'mʋgbɛ ‑oo†, 'saarɩa ‑srɩlɩ bäa' ‑na ‑srɩ, ‑ama jre ɩ dɛɛlɛ 'mäa' ‑mɩ 'wlinönrökʋ ‑nyɩ! ‑Maa ‑nyɩ 'lɩ ‑a bɩa ‑mä 'iin 'jä; 'i 'a ‑sisie. 43 Jrüü nya ‑mɩ ‑gälɩjräa ‑na 'nyüamlɩjraranyüü nya ‑mɩ 'klɩklua 'ümä tou ja. 'Ünya ‑mɩ 'klɩtraraa 'kä 'ünya ‑na 'fɩɔ ‑mɛmrɛfa 'wʋ 'pa. 44 'Ünya ‑mɩ bʋblɔa, ‑mɔ ‑bɛ ‑na 'jü, 'ü ‑nëmä 'täkä 'dööa ‑gälɩ 'täkä ‑a tɩ; 'be 'taɩn 'lɩ kä mlɩ Nyɔsʋa jia' ‑mɩ 'lɩmlɩbakalɩ nɩ, ‑nyɩ 'iin wiiwʋ ‑a 'ba.»
'Perupanyüülü Jesu prɛrɛa' Nyɔsʋaanyuku kpaku ‑wälɩ
45 'I ‑sia' nɩ, 'ɔnya pa Nyɔsʋaanyuku kpaku ‑wälɩ, 'ɔnya prɛ nyüülü 'palaa' 'lɩ 'üa dii 'peru†, 46 'ɔnya ‑gbala 'üün ‑maa: «'I ‑jɩjra nyɔsʋapɔɔkʋ 'lɩ kä:
‹'Na nyuku bä nyɔsʋabibienyuku†.
‑Maa 'amɔlɔ nɩ, 'a nrörö 'uun 'jejienyüüa trarafa 'lɩ†.› »