Jesua 'kamakʋ
20
1 'Ia jrüü 'doo 'lɩ nɩ, Jesu 'kpɩa ɩ nyüü Nyɔsʋaanyuku kpaku ‑wälɩ, ‑bɛ 'ɔ 'sara 'lɩ nyüü Nyɔsʋaa 'Mʋfagogo, ‑bɛ ‑gbɔsapɛrɩnyüü kpakü, ‑dɔkpɩanyüü, nyra tagbü 'tɔ 'ɔɔn ‑gba. 2 'Ünya 'bete 'ɔɔn: «‑Gbala amɩ, ‑na 'ciö 'plɛɛ ‑bɛ ‑nö 'saa le? Nyɔɔ 'plɛɛ ‑gbala 'saa ‑mɩ le?» 3 'Iibäa' 'ɔɔn nɩ: «'Na 'mʋgbɛ wii 'doo 'nëmä 'amɩ 'lɩbetre, 'ba 'sa 'mɩ ‑gälɩ. 4 ‑A 'plɛɛ Jaan a nyüüa 'nɩwlipajrʋpa sɔrɔ le? Cɛlɩ ‑maa nyüü kälɩ?» 5 'Üa 'kpɔa ‑tɔrʋpɩɔ 'ü 'pawii ɔ: «Ama 'daa: ‹Nyɔsʋa blɔ kä 'ɔɔn›, 'ɔnya 'daa: ‹‑Bɛ dɛplɛɛ kä ‑gʋ 'anyɩ wiili Jaan 'saalɩ wiidara le?› 6 ‑Maa ama 'daa: ‹Nyüü blɔ kä 'ɔɔn› nɩ, nyüüa 'fɩɔ nya amɩ 'täkë 'kaklaa 'kä 'ünya amɩ 'bla, 'be 'ü nɩnɩa Jaan bä nyɔsʋaamlɩpalanyɔɔ.» 7 'Ünya ‑gbala 'ɔɔn 'ünyɩ nyɔɔlɔ blɔa' 'ɔɔn ‑a jre. 8 'Ɔnya ‑gbala 'üün: «'Na 'mʋgbɛ nyɔɔlɔ blɔa' 'mɩ 'nëmä 'amɩ 'ɔa 'nyrɩ ‑a ‑srara.»Plɛbʋbɔ 'jrʋpafɛnyüüa tapönänä
9 'Ɔnya 'pala 'üün tapönänä 'klɩ 'ɔnya ‑gbala nyüü ‑maa: «Nyɔɔ 'doo pla kä viinyëputu†, 'ɔnya tɩ 'ua 'mlɩ nyüü 'ɔnya mi nyɔtugbabre 'ɔnya fa nyɔtugbabre jrüü jie†. 10 Rɛsɛɛn a 'sasataɩn jräa' 'lɩ nɩ, 'ɔnya blɔ 'ɔa 'jrʋpafɛnyɔɔ 'doo nyüülü ‑fɛɛɛrɛa' putulua 'mlɩ 'jrʋpa, ü ‑nyɩ 'ɔɔn 'ɔa nɛ rɛsɛɛn, ɔ ja 'ɔmɩ 'ɛɛn. ‑Maa bɔtɔ 'ü bɔtɔ 'ɔɔn, 'ünyɩ 'ɔɔn dɛɛ ‑a ‑nyɩ, 'ünya prɛ 'ɔɔn. 11 'Ɔnya 'patä 'ɔnya blɔ 'lɩ 'jrʋpafɛnyɔɔ ‑moloo. Bɔtɔ 'ü bɔtɔ 'ɔɔn bɩa, 'ünya ‑jejre 'ɔɔn, 'ünyɩ 'ɔɔn dɛɛ ‑a ‑nyɩ, 'ünya prɛ 'ɔɔn. 12 'Ɔnya blɔ ‑tääa nɔ. 'Ia nɔlɔ nɩ, ‑gou 'ü wa 'ɔɔn bɩa, 'ünya prɛ 'ɔɔn. 13 'Ii känyrɩ putukänyɔɔ ‑nëma: ‹‑Asɩ ‑a nʋ le? 'Mä 'na ‑wawajʋ blɔ; ‑beeredɛ 'üma 'jä 'ɔɔn 'ünya 'ɔɔn nyɔɔwʋbaa.› 14 ‑Maa 'jrʋpafɛnyüü 'jäa' 'jʋlɔ nɩ, 'üa plɛ 'klɩ 'ü ‑nëma: ‹‑Jää 'jʋlɔ nëmäa' ‑jaaa ji; 'ba ji a 'bla 'ɔɔn, ‑bɛ amä ‑jaalä ji!› 15 'Ünya 'cie 'ɔɔn putu 'lɩ, 'ünya 'bla 'ɔɔn. ‑Asɩ putukänyɔɔlɔ nya ‑plɩɩ nʋ ɔ le? 16 'Ɔnya jia; 'ɔnya 'jrʋpafɛnyüülü kʋa' ‑pɩ 'blaa, 'kä 'ɔnya 'lɩ 'jrʋpafɛnyüü ‑mölöö ‑tʋ.»
Nyüülü 'nua' 'iin 'wli nɩ, 'ü ‑nëma: «'Inyɩ bäsaa!» 17 ‑Maa Jesu nya tɛ 'üün 'klɩ 'ɔ ‑nëma: «Wiili kʋa' ‑pɩ i ‑jɩjraa' nyɔsʋapɔɔkʋ 'lɩ, 'ia ‑gbaa le:
'Täkälä nyëkapanyüü be käa' 'klʋɛɛ nɩ,
'ää nʋ 'tasɩrɩ nyukua ‑gɔmʋʋ†.
18 Nyɔɔ o nyɔɔ nëmäa' 'ia 'täkälä ‑gälɩ blö nɩ, 'ɔa ‑gbaa dii nya 'katraa†; ‑bɛ äma blö nyɔɔ ‑gälɩ nɩ, 'änya 'ɔɔn fɛtrɔa†.» 19 ‑Gbɔsapɛrɩnyüü kpakü nyra ‑dɔkpɩanyüü 'bata 'ümä ‑plɩɩ 'ɔɔn 'kplara dotro, 'be 'ü jre 'iin 'sɩrɩ tapönänälä 'ɔ 'paa' käläa' 'üün ‑gba. ‑Maa nyüülü bäa' ‑plɩɩ, 'üa ŋalɛ 'blaa 'üün. 'Ia ‑gʋ 'ünya 'cɛrɛ 'ɔɔn ‑wälɩ 'ünya mi.
Dapooa 'pɛpɛɛkʋ
20 'Bala 'ia ‑srɩ 'lɩ, 'ü 'prɛrɛ 'ɔɔn 'nyü dɛrɩa 'doo. 'Ünya pla 'ɔɔn nyüü ‑wälɩ, ‑bɛ 'ü 'betre 'ɔɔn wii 'lɩ ‑beere 'sɩrɩ nyüü ‑gäa' 'klɩ; 'ia 'taɩn 'lɩ 'ɔa 'papawii ma sɔ 'nyʋfɔ 'wʋ nɩ, 'ümä 'ɔmɩ 'iin 'kplara. 'Ümä 'ɔɔn ‑gofɩanëma kälɩ ‑nyɩ 'ia ‑gʋ 'ü nö 'saa. 21 'Ünya 'bete 'ɔɔn: «'Kpɩkpɩanyɔɔ, a jre 'iin 'sɩrɩ ‑saaa' 'lɩ 'cɩcasa ‑bɛ wiili ‑kpɩaa' bäa' 'cɩcasa. ‑Bɛ ‑nyɩ ‑gbasa nyüü 'lɩ ‑a, ‑bɛ ‑kpɩa 'üün 'cɩcasa Nyɔsʋaa 'nyʋfɔ. 22 A kä amä Sesaa dapoo kälɩ 'pɛɛrɛ? ‑Yɛɛ ‑ale 'woo?» 23 Jesu jrea' ‑gʋ 'iin 'sɩrɩ 'ü bäa' ‑glagälɩsrörönyüü nɩ, 'ɔnya ‑gbala 'üün: «Dɛplɛɛ kä ‑gʋ 'a ji 'mɩ 'lɩtɛ le†? 24 'Ba ja 'mɩ denie 'dee† 'mä 'ɛɛn 'jä. Nyɔɔ 'plɛɛ kä 'pike nyra ‑jɩjradii bä 'lɩ ‑gälɩ le?» 'Ü ‑nëma: «Sesaalɔ.» 25 'Ia ‑gʋ 'ɔnya ‑gbala 'üün: «'I 'na! Dɛɛlɛ bäa' Sesaa dɛɛ, 'ba ‑nyɩ 'ɛɛn Sesaa, ‑bɛ dɛɛ bäa' Nyɔsʋaa dɛɛ 'ba ‑nyɩ 'ɛɛn Nyɔsʋa.» 26 'Ünyɩ 'lɩ ‑a bɩa 'ü 'kplara 'ɔɔn 'ɔa 'papawii mlɩ nyüüa 'klʋɩ. 'Ɔa wii ‑gälɩ 'sasakʋ nya kala 'üün plɛ 'klɩ ‑gböösa, 'ü ‑kanyɩ mɛ ‑a cɛ.
Jäjänyüü nya ‑srɩɩ 'kuaabre sɔa
27 Sadusinyüülü 'daaa' ‑maa nyɔɔ ma jä 'ɔ ‑kanyɩ sɔ 'kuaabre nɩ, 'üa nyüü ‑mölöö nya jijrö Jesu ‑gba, 'ünya 'bete 'ɔɔn: 28 «'Kpɩkpɩanyɔɔ, Moisëa ‑dɔ ‑gbalaa' amɩ nɩ: ‹Nyɔɔa ‑wlajʋ nyra 'ɔa 'ŋlʋʋ ma 'nyɩ 'jʋ ‑a ‑gu ‑bɛ ɔma jä nɩ, 'ɔa ‑wlajʋ kä 'kusroŋlʋʋlɔ 'ɔ nyra 'ɔɔn 'mä 'ɔa ‑wlajʋa 'jü ‑gu†.› 29 ‑Bɛ 'ü bä kä ‑wlajü ‑uunsɔɔ. Kpaköa nɔ ‑kätɩ 'ti, 'ɔnyɩ 'jʋ ‑a ‑gu 'ɔnya jä. 30 ‑Wlajʋ 'sɔɔa nɔ nya dɔrɔ 'kusroŋlʋʋlɔ 'wʋ 'ɔnya kä 'ɔɔn. 'Ɔnyɩ 'jʋ ‑a ‑gu 'ɔnya jä. 31 Tääa nɔ nya kä 'ɔɔn 'a dɛɛ 'dee. 'Üa ‑uunsɔɔlü 'nyɩ 'jü ‑a ‑gu 'ünya jä. 32 'Üa 'fɩɔ bɩaa' nɩ, 'ŋlʋʋlɔ nya jä bɩa. 33 'I 'na ɔ, nyüü ma sɔ ‑srɩɩ 'kuaabre, ‑mɔ 'plɛɛ nya 'ŋlʋʋlɔ kä ɔ le? 'Be 'ɔ kä 'üa ‑uunsɔɔa 'fɩɔ ‑o?» 34 'Ɔnya ‑gbala 'üün ‑maa: «‑Pɩ ‑tʋtʋ ‑gälɩa nyüü 'tie, 35 ‑maa ‑mülü Nyɔsʋa 'mäa' 'klɩnyiere, 'ümäa' 'plälä jöa' a 'mlɩ pa nɩ, 'taɩn 'lɩ jäjänyüü 'mäa' ‑srɩɩ 'kuaabre sɔ nɩ, 'ü ‑ka ‑nëmä 'ti ‑a 'ti. 36 'Ü ‑ka ‑nëmä jä ‑a jä, 'be 'ünya ‑beere 'aanjë. Nyɔsʋaa 'jü 'ü bä, 'be 'ü 'a 'kuaabre sɔ. 37 Wiili bäa' jäjänyüüa 'kuaabrea sɔsɔkʋ nɩ, Moisëa 'mʋgbɛ ‑srara 'iin 'taɩn 'lɩ 'ɔ 'paa tuu jɔlɔa fifikʋa ‑gä. 'Ɔ were ‹'Pläkänyɔɔ Abraamëa Nyɔsʋa, Isaakëa Nyɔsʋa, nyra Jakɔɔbëa Nyɔsʋa†.› 38 'Be Nyɔsʋa 'klɩ 'üa 'fɩɔ bä 'lɩbänyüü. Nyɔsʋa 'nyɩ jäjänyüüa Nyɔsʋa ‑a bä, ‑maa 'lɩbänyüüa Nyɔsʋa 'ɔ bä.» 39 ‑Dɔkpɩanyüü 'doorodoo nya ‑gbala 'ɔɔn: «'Kpɩkpɩanyɔɔ, 'cɩcasa ‑saalɩ.» 40 Nyüü ‑kanyɩ 'ɔɔn 'bete ‑a 'bete.
Nyɔɔ 'plɛɛ kä 'jʋ bä Jesu le?
41 Jesu nya ‑gbala 'üün: «‑Gbaa 'plɛɛ kä ‑gʋ 'ü 'daraa' 'Kriisë Daviidëa 'jʋ le? 42 'Lɩbrɛrɛpɔɔkʋa ‑pɔɔkʋa 'mlɩ Daviidëa 'mʋgbɛ nɩnɩa:
'Pläkänyɔɔ ‑gbala 'na 'Pläkänyɔɔ: 'A ‑pɩ 'na 'dupa 'lɩ ‑a kʋ kʋ,
43 'kä 'n nrörö ‑na 'nyüamlɩjraranyüü ‑na bökligälɩtʋkpö 'lɩ†.
44 Daviidëa 'mʋgbɛ 'dara 'ɔɔn 'Pläkänyɔɔ; ‑bɛ ‑asɩ 'ɔ nʋ ‑bɛ 'ɔ bä bɩa 'ɔa 'jʋ le?»
‑Dɔkpɩanyüüa bʋbɔgbi
45 Nyüüa 'fɩɔ ‑ka ponyakli, Jesu nya ‑gbala 'ɔa 'wʋnyɛrɛnyüü: 46 «'Ba ‑tre 'ana nyüfë ‑dɔkpɩanyüüa ‑gʋ! ‑Panë 'ü 'palɩ ‑bɛ 'ü ‑piie, ‑bɛ ü ‑waa' ‑saplɛ 'klɩa 'trɔrʋ nyra 'sraaplanyuku ‑wälɩa 'klɔɔtrʋa 'kpatëa ‑gälɩa kʋkʋkʋ. ‑Glɩsɩglɩsɩ ma jrälɩ nɩ, tuponyüüa 'kpatë ‑gälɩ 'ü kɔkɔ. 47 'Ü bɩa 'kusroŋlëgë diia 'fɩɔ kälɩ, ‑bɛ üma bibie Nyɔsʋa 'ü ‑wlɛlɩ ‑beere 'cɩcanyüü nyüü 'mä ‑gʋ 'üün 'jäjrä. 'Üa ‑gäa ‑tʋtʋkʋ nya 'lɩklaa ‑gböösa.»