Jesu kolo ‑dɔkpɩanyüü nyra Farisinyüüa 'nyüa 'mlɩ wli
23
1 'Ii ‑sia' nɩ, Jesu ‑gbala ‑jria nyra 'ɔa 'wʋnyɛrɛnyüü ‑maa: 2 «‑Dɔkpɩanyüü nyra Farisinyüü kʋ Moisëa ‑pi 'lɩ†. 3 'Ii känyrɩ, 'ba ‑träärälɩ wiili kä 'fɩɔ 'ü 'kpɩa 'amɩ; ‑maa 'anyɩ dɔrɔ 'üa nʋnʋgbi 'wʋ, 'be wiili 'ü 'kpɩaa' nyüü ‑mää 'iin 'ünyɩ nʋ. 4 Kälɩbä ‑gblalë kä ‑gbötökʋ 'klaa' 'lɩ, 'üü 'ü kpasa 'ü tro nyüü 'wli; ‑maa 'ü nɩnɩa 'üa wli ‑nëmä dɛɛ ‑gbaa ‑a ‑fɛ 'ü ‑pɩ nyɔɔ ‑gbaji. 5 Diili kä 'fɩɔ 'ü nöa', nyüü 'mä ‑gʋ 'üün 'jäjrä. 'Ü kpasra 'üa 'kʋtapra ‑gälɩ nyɔsʋaawii. 'Ü tʋŋlɔ 'üa ‑panëa 'mri ‑gböösa†. 6 'Ü ‑wa 'klɔɔtrʋa 'kpatë ‑gälɩa kʋkʋkʋ ‑glɩsɩglɩsɩ 'lɩ nyra juifëa 'sraaplanyuku ‑wälɩ. 7 'Ü ‑wa abɩa nyüü 'trɛɛ 'üün ‑saplɛ 'klɩ, 'kä 'ü were 'üün Rabii, Rabii†.8 «‑Maa 'amɔlɔ nɩ, 'kpɩkpɩanyɔɔ 'doo 'a kä, 'ɔɔ bä 'Kriisë †, 'ii känyrɩ 'anyɩ 'nyie 'ünyɩ 'dara 'amɩ Rabii. 'Ana 'fɩɔ bä ‑wlajü. 9 Tʋ 'doo 'a kä, 'ɔ bä cɛlɩ; 'ii känyrɩ 'anyɩ were nyɔɔ tʋ ‑pɩ ‑tʋtʋ ‑gälɩ. 10 'Anya kä 'Cifi 'doo, 'ɔɔ bäa' 'Kriisë. 'Ii känyrɩ, 'anyɩ 'nyie 'ünyɩ were 'amɩ 'cifi. 11 Nyɔɔlɔ bäa' 'ana ‑tɔrʋpɩɔa kpaköa nɔ, ɔ bä 'ana 'jrʋpafɛnyɔɔ. 12 'Be nyɔɔ o nyɔɔ 'mäa' 'ɔa nyufa 'jrara nɩ, 'ɔnya 'wʋcierea; ‑bɛ nyɔɔ o nyɔɔ 'ciea' 'ɔa nyufa 'wʋ, 'ɔnya 'jraraa.»
13 «Busukʋ bä 'amɩ ‑gälɩ ‑dɔkpɩanyüü nyra Farisinyüü, ‑glagälɩsrörönyüü! 'Amɔ 'paa cɛɩɩa 'kamapläa tatu: 'ana 'mʋgbɛ 'nyɩ pa pa ‑a, 'anyɩ 'cɛrɛ bɩa ‑mülü 'bataa' papakʋ ‑wälɩ ‑a. 14 Busukʋ bä 'amɩ ‑gälɩ ‑dɔkpɩanyüü nyra Farisinyüü, ‑glagälɩsrörönyüü! 'A bɩa 'kusroŋlëgë diia 'fɩɔ kälɩ, ‑bɛ 'ama bibie Nyɔsʋa 'a ‑wlɛlɩ ‑beere 'cɩcanyüü, nyüü 'mä ‑gʋ 'amɩ 'jäjrä. 'Ia ‑gʋ 'ana ‑gäa ‑tʋtʋkʋ nya 'lɩklaa ‑gböösa†.
15 «Busukʋ bä 'amɩ ‑gälɩ ‑dɔkpɩanyüü nyra Farisinyüü, ‑glagälɩsrörönyüü! 'A ‑pie ‑tʋtʋ nyra 'nie ‑gälɩ 'amä nyɔɔ 'doo wii ‑gbapala 'ɔmä 'ana 'wʋnyɛrɛnyɔɔ bä. 'Ama 'jä 'ia nyɔɔlɔ nɩ, 'a nrörö 'ɔɔn 'wʋsɔɔ 'wʋ kapulu 'nyɩ 'nyrɔlɔa' a 'jʋ 'lɩ; 'sɩrɩ 'anyɩa' bä.
16 «Busukʋ bä 'amɩ ‑gälɩ, 'amɔ 'nɔɔa' ‑bɛ ɔ 'tierea' nyüü. 'A nɩnɩa: Nyɔɔ ma 'sɔrɩ Nyɔsʋaanyuku kpakua 'nyrɩklɩ nɩ, 'ia 'sɔrɩkʋlʋ 'nyɩ ‑gbaa ‑a kä. ‑Maa ɔma 'sɔrɩ ‑sikalä bäa' Nyɔsʋaanyuku kpaku ‑wälɩa 'nyrɩklɩ nɩ, 'ii kä ‑gbaa, 'ɔ kä 'ɔmä wiili 'ciea' 'ɔ mlɩ nʋ. 17 Mlüüpanyüü 'amɩ! 'Nɔnɔnyüü! ‑Mɛ 'plɛɛ ‑siwʋ le, ‑sika ‑ale Nyɔsʋaanyuku kpakulu 'paaa' ‑sika 'ku ‑gälɩ? 18 'A nɩnɩa bɩa: Nyɔɔ ma 'sɔrɩ ‑gbɔsatöwlöa 'nyrɩklɩ nɩ, 'ia 'sɔrɩkʋlʋ 'nyɩ ‑gbaa ‑a kä; ‑maa ɔma 'sɔrɩ ‑gbɔlʋ bäa' ‑gbɔsatöwlöläa ‑gälɩ nɩ, 'ii kä ‑gbaa, 'ɔ kä 'ɔmä wiili 'ciea' 'ɔa mlɩ nʋ. 19 Mlüüpanyüü 'amɩ†! 'Nɔnɔnyüü! ‑Mɛ 'plɛɛ ‑siwʋ le, ‑gbɔ ‑maa ‑gbɔsatöwlölä 'paaa' ‑gbɔ 'ku ‑gälɩ? 20 Nyɔɔlɔ 'sɔrɩa' ‑gbɔsatöwlöa 'nyrɩklɩ nɩ, ‑gbɔsatöwlö nyra diili kä 'fɩɔ bäa' 'äa ‑gälɩa 'nyrɩklɩ 'ɔ 'sɔrɩ. 21 Nyɔɔlɔ 'sɔrɩa' Nyɔsʋaanyuku kpakua 'nyrɩklɩ nɩ, Nyɔsʋaanyuku kpaku nyra nyɔɔlɔ kʋa' 'ua ‑wälɩa 'nyrɩklɩ 'ɔ 'sɔrɩ. 22 Nyɔɔlɔ 'sɔrɩa' cɛlɩa 'nyrɩklɩ, Nyɔsʋaa 'kɩɩkpataa 'nyrɩklɩ nyra Nyɔsʋalɔ kʋa' 'äa ‑gälɩa 'nyrɩklɩ 'ɔ 'sɔrɩ.
23 «Busukʋ bä 'amɩ ‑gälɩ ‑dɔkpɩanyüü nyra Farisinyüü, ‑glagälɩsrörönyüü! 'Ana papladiia 'sipijiea ‑tɔrʋpɩɔ 'a 'baalɩ ‑pʋa në 'pɛ 'kä 'a 'trɛɛ Nyɔsʋa: 'maatë, anɛɛtë, nyra kumɛɛ†. ‑Maa ‑dɔa 'mlɩ wiili ‑sia' 'ia 'fɩɔ 'wʋ nɩ, 'ii 'anyɩ ‑träärälɩ: 'klɩgägäkʋ, nyatɛplɛ, nyra nyɔsʋaplɛtorokʋ kä 'imä 'amɩ 'lɩ bä, nyra bɩa wii ‑mɩlɩ bäa' ‑dɔa 'mlɩ. 24 'Nɔnɔɔtierenyüü! 'A doro diili 'a nëmäa' 'mla ‑wälɩ ‑sugbaa ‑gʋ, ‑bɛ 'a 'mlaa samoo†.
25 «Busukʋ bä 'amɩ ‑gälɩ ‑dɔkpɩanyüü nyra Farisinyüü, ‑glagälɩsrörönyüü! ‑Köwü nyra 'plëëa ‑gälɩlɩ nyüü 'jääa' 'wʋ nɩ, 'ii 'a kpëtä, ‑maa 'ana 'mlɩ 'si 'jejiekʋ nyra dɛɛnyükäkäkʋ. 26 'Nɔnɔɔ Farisinyɔɔ! Kpëtä ‑kätɩ ‑na ‑köwö nyra 'plaaa 'mlɩ, ‑bɛ 'ia ‑gälɩ 'mä 'na.
27 «Busukʋ bä 'amɩ ‑gälɩ ‑dɔkpɩanyüü nyra Farisinyüü, ‑glagälɩsrörönyüü! 'A ‑beere 'dasili 'ü 'pɔlɔa'. 'I 'nara ‑gälɩ, ‑maa 'ia 'mlɩ 'si jäjänyüüa 'koi nyra diili plaa' nyɔɔ ‑fre 'lɩ. 28 'Asɩ 'a bä; 'a ‑beere 'klɩgänyüü, ‑maa 'ana 'mlɩ 'si yrʋ 'klɩ. Nyɔsʋaa ‑dɔ 'a 'pɩɛ ‑gälɩ.
29 «Busukʋ bä 'amɩ ‑gälɩ ‑dɔkpɩanyüü nyra Farisinyüü, ‑glagälɩsrörönyüü! 'A 'paa 'nana 'dasi nyɔsʋaamlɩpalanyüüa ‑gʋ; 'kä 'a 'nara 'klɩgänyüüa 'dasi, 30 'kä 'a 'jää ‑maa: ama bä kä ‑plɩɩ ana tʋɩɩa 'taɩn 'lɩ, a ‑nëmä kä 'üün ‑a 'nyiere 'ümä nyɔsʋaamlɩpalanyüüa ‑toru 'kä ‑gblɔɔ. 31 'Asɩ 'ana 'papawiia 'mʋgbɛ srara 'sɩrɩ 'a bäa' nyüülü 'blaa' nyɔsʋaamlɩpalanyüüa 'jü! 32 ‑Bɛ 'ba mi 'ba 'wlara wiili 'ana tʋɩɩ koloa' 'kä! 33 Trii 'amɩ! 'Mëmlɛtapaa 'jü 'amɩ! ‑Asɩ 'anya kapulu 'nyɩ 'nyrɔlɔa' 'plɔʋ mlɩ sɔ le? 34 'A 'ia ‑gʋ 'nyaa 'amɩ nyɔsʋaamlɩpalanyüü, nyra 'lɩglanyüü, nyra ‑dɔkpɩanyüü jaa; 'kä 'anya ‑mölöö 'bla, 'kä 'anya ‑mölöö krʋa ‑gälɩ kolo; 'kä 'anya ‑mölöö ‑gbalɛfi ‑gälɩgba 'ana 'sraaplanyuku ‑wälɩ, 'kä 'anya 'üün bätë o bätëa 'mlɩ prɛrɛ. 35 Kolo 'klɩgänyɔɔ Abɛɛlë ‑gälɩ 'kä ‑a ji Barakiia 'jʋ Sakariilɔ 'a 'blaraa' Nyɔsʋaanyuku kpaku nyra ‑gbɔsatöwlöa ‑tɔrʋpɩɔ ‑gälɩ nɩ, 'üa ‑torulu kä 'fɩɔ ‑gbäträa' ‑pɩ ‑tʋtʋ ‑gälɩ 'kä nya 'amɩ 'wli kʋa. 36 'Cɩcasa 'n ‑gbala 'amɩ, ‑taa nyüüglügbölä kʋa' ‑pɩ ‑gälɩ 'ia 'fɩɔlʋ nëmä 'wli tɩɔ.
Jesua ‑sɩsra Jerusalɛɛmëa ‑gʋ
37 «‑Awɛɛ Jerusalɛɛmë, Jerusalɛɛmë, ‑mɔ 'blaaa' nyɔsʋaamlɩpalanyüü|Nyɔsʋaamlɩpalanyɔɔ 'kä ‑kaakla nyüülü 'ü jaa' ‑mɩ 'täkë. 'Wʋ ‑srüplɛɛ 'wʋ 'n 'bata ‑na 'jüa ‑gbapaplakʋ ‑beere sapëgoolu papla 'ua 'jü 'ua ‑pëkateri le? ‑Maa 'anyɩ 'nyie ‑a 'nyie. 38 'I 'na ɔ! ‑Jää, 'ana nyukua fʋfʋ tɩɔ 'amɩ kälɩ! 39 'Amɔ 'n ‑gbala, 'a ‑ka ‑nëmä 'mɩ ‑a 'jäjää, 'kä 'anya ‑srɩɩ 'daa: ‹‑Jɔrʋ pala nyɔɔlɔ jröröa' 'Pläkänyɔɔa 'nyrɩklɩ†!› »