'Titiöa ‑glɩsɩglɩsɩ kpakia tapönänä
22
1 Jesu nya 'pala 'üün 'sɔɔwʋ tapönänä ‑mɩdoo 'klɩ 'ɔnya ‑gbala 'üün: 2 «Cɛɩɩa 'kamaplä ‑beere 'sɩrɩ 'kɩɩ nʋa' ‑glɩsɩglɩsɩ 'ɔa nyɩbɛjʋlɔ 'tia' a ‑gʋ. 3 'Ɔnya blɔ 'ɔa 'jrʋpafɛnyüü ü we nyüülü 'ɔ tupo ɩa' 'titiöläa ‑glɩsɩglɩsɩ 'lɩ. ‑Maa jijitʋ 'nyɩ tuponyüülü ‑a 'bla. 4 'Ɔnya blɔ 'sɔɔwʋ 'ɔa 'jrʋpafɛnyüü ‑mölöö ü mi ü ‑gbala 'üün: ‹'Na ‑glɩsɩglɩsɩlɛ 'a ‑ëlere; 'n 'bla 'na nɔnɔ bruu nyra 'na nɔnɔ mlaa, 'ia 'fɩɔ 'a ‑ëlere. 'Ba ji 'titiöa ‑glɩsɩglɩsɩ 'lɩ amä dɛɛji!› 5 ‑Maa tuponyüülü 'flara 'iin 'wli kälɩ. ‑Mölöö mi 'üa pütia 'lɩ, ‑mölöö mi 'üa 'perupajrʋpa 'lɩ. 6 ‑Mölöö 'kpla 'jrʋpafɛnyüü 'ünya nʋ 'üün ‑gbigba, 'ünya 'bla 'üün. 7 'Kɩɩlɔ 'nua' 'iin 'wli nɩ, 'ɔnya ‑tʋ 'crɛ 'ɔnya blɔ 'ɔa 'sʋgɩanyüü 'ümä 'ia nyüüblanyüülü 'bla, 'kä 'ü 'pütö 'üa bätä. 8 'Ɔnya ‑gbala 'ɔa 'jrʋpafɛnyüü ‑maa: ‹'Titiöa ‑glɩsɩglɩsɩ 'a ‑ëlere, ‑maa tuponyüülü 'nyɩ ɩ 'iin 'klɩ ‑a 'wʋ. 9 'Ba mi bätäa 'nyifi kpaküa mlɩ, 'ba tupo nyüülü kä 'fɩɔ 'amäa' 'jä ü ji 'titiöa ‑glɩsɩglɩsɩ 'lɩ.› 10 'Jrʋpafɛnyüü nya mi 'ünya 'papla nyüülü kä 'fɩɔ 'ü 'jäa' ‑gba; 'cɩcanyüü nyra bʋbɔnyüü. 'Asɩ 'ü nʋ nʋ 'titiöa ‑glɩsɩglɩsɩ nya 'si nyüü 'klɩ.11 «'Kɩɩlɔ paa' 'ɔmäa' tuponyüülü jä nɩ, 'ɔnya 'jä nyɔɔ 'doo 'nyɩa' 'titiöa 'kotu 'lɩpa. 12 'Ɔnya ‑gbala nyɔɔlɔ: ‹'Na nyɔɔ, ‑nyɩ 'titiöa 'kotu 'lɩ ‑a 'pa, ‑asɩ nʋ ‑bɛ ‑paa ‑tɛ le?› Nyɔɔlɔ 'nyɩ mɛ ‑a cɛ. 13 'Kɩɩ nya ‑gbala 'ɔa 'jrʋpafɛnyüü: ‹'Ba kpasra 'ɔa bei nyra 'ɔa 'dari ‑gba, 'kä 'ba be 'ɔɔn ‑fälɩ 'jöjrüükpü 'lɩ. 'A ‑plɩɩ 'ümä 'wu ‑bɛ 'ümä ‑gla ji.› 14 'Be Nyɔsʋa tupo nyüü 'kɔkɔmlɛ, ‑maa nyüülü 'ɔ 'baa' 'lɩ 'nyɩ ‑sümlö ‑a ‑sümlö.»
Dapooa 'pɛpɛɛkʋ
15 Farisinyüü nya mi 'ünya pla 'ɔa 'kpɛɛ 'sɩrɩ 'ümäa' 'ɔa 'papawii kälɩ ‑srörö ‑bɛ 'ümä 'ɔɔn 'kpla. 16 'Ünya blɔ 'üa 'wʋnyɛrɛnyüü nyra Erɔɔdëa nyüü Jesu dɛrɩ, ü 'bete 'ɔɔn: «'Kpɩkpɩanyɔɔ, a jre 'iin 'sɩrɩ ‑saaa' 'lɩ 'cɩcasa, ‑bɛ ‑kpɩaa' 'cɩcasa Nyɔsʋaa 'nyʋfɔ. Nyɔɔ 'nyɩ ‑mɩ ŋalɛ 'wʋ ‑a kä, ‑nyɩ ‑gbasa nyüü 'lɩ ‑a. 17 'Ii känyrɩ, ‑gbala amɩ wiili boboa' ‑taa wiilia ‑gʋ: A kä amä Sesaa dapoo kälɩ 'pɛɛrɛ? ‑Yɛɛ ‑ale 'woo?» 18 Jesu jrea' bʋbɔwiili 'ü boboa' nɩ, 'ɔnya ‑gbala 'üün: «Dɛplɛɛ kä ‑gʋ 'a ji 'mɩ 'lɩtɛ le, ‑glagälɩsrörönyüü 'amɩ? 19 'Ba ‑srara 'mɩ möliili 'ü nöa' ‑bɛ 'ü 'pɛɛa' dapoo!» 'Ünya ja 'ɔmɩ denie 'dee†. 20 'Ɔnya 'bete 'üün: «Nyɔɔ 'plɛɛ kä 'pike nyra ‑jɩjradii bä 'lɩ ‑gälɩ le?» 21 'Ü ‑nëma: «Sesaalɔ.» 'Ɔnya ‑gbala 'üün: «Dɛɛlɛ bäa' Sesaa dɛɛ, 'ba ‑nyɩ 'ɛɛn Sesaa, ‑bɛ dɛɛ bäa' Nyɔsʋaa dɛɛ 'ba ‑nyɩ 'ɛɛn Nyɔsʋa.» 22 'Ü 'nua' 'iin 'wli nɩ, 'üa plɛklɩkala. 'Ünya ‑sɔ 'ɔɔn ‑gba, 'ünya mi.
Jäjänyüü nya ‑srɩɩ 'kuaabre sɔa
23 'Ia ‑srɩlɩa 'mlɩ nɩ, Sadusinyüülü 'daaa' ‑maa nyɔɔ ma jä 'ɔ ‑kanyɩ sɔ 'kuaabre ‑a nɩ, 'ünya jijrö Jesu ‑gba 'ünya 'bete 'ɔɔn: 24 «'Kpɩkpɩanyɔɔ, Moisë ‑gbala amɩ: ‹Nyɔɔ ma jä ‑bɛ 'ɔ ma 'nyɩ 'jʋ ‑a kä nɩ, 'ɔa ‑wlajʋ kä 'kusroŋlʋʋlɔ 'ɔ nyra 'ɔɔn 'mä nyɔɔlɔa 'jü ‑gu†.› 25 ‑Bɛ ana ‑tɔrʋpɩɔ nɩ, a kä kä ‑wlajü ‑uunsɔɔ. Kpaköa nɔ ‑kätɩ 'ti, 'ɔnyɩ 'jʋ ‑a ‑gu 'ɔnya jä. 'Ɔa ‑wlajʋ 'doo nya dɔrɔ 'ŋlʋʋlɔ 'wʋ. 26 'A dɛɛ 'dee jrä 'sɔɔa nɔ ‑gälɩ, tääa nɔ, ‑a ‑tɔɔ ‑uunsɔɔa nɔ ‑gälɩ. 27 'Üa 'fɩɔ bɩaa' nɩ, 'ŋlʋʋlɔ nya jä bɩa. 28 ‑Srɩlɩ nyüü 'mäa' 'kuaabre sɔ nɩ, 'üa ‑uunsɔɔa ‑tɔrʋpɩɔ ‑mɔ 'plɛɛ nya 'ŋlʋʋlɔ kä le, 'be 'ɔ kä 'üa 'fɩɔ ‑o?»
29 'Iibäa' Jesu nɩ: «'Be 'anyɩ 'nu nyɔsʋapɔɔkʋ 'wli ‑a, ‑bɛ 'anyɩ Nyɔsʋaa 'klü ‑a jre, 'a 'ia ‑gʋ 'a ‑trɔɔrɔ 'ana nyüfë. 30 ‑Srɩlɩ jäjänyüü 'mäa' ‑srɩɩ 'kuaabre sɔ nɩ, 'titikʋ ‑ka ‑nëmä 'lɩ ‑a bä, ‑maa 'ünya ‑beere Nyɔsʋaa 'aanjëlü bäa' cɛlɩ. 31 ‑Bɛ dɛɛlɛ bäa' jäjänyüüa 'kuaabrea sɔsɔkʋ nɩ, 'a ‑kaapɩɔ wiili Nyɔsʋa ‑gbalaa' 'amɩ ‑täsä? 'Ɔ nɩnɩa: 32 ‹'Mɔɔ bä *Abraamëa Nyɔsʋa, *Isaakëa Nyɔsʋa, 'nyaa bä Jakɔɔbëa Nyɔsʋa†.› Nyɔsʋa 'nyɩ jäjänyüüa Nyɔsʋa ‑a bä, ‑maa 'lɩbänyüüa Nyɔsʋa 'ɔ bä.» 33 Nyüülü 'nua' 'iin 'wli nɩ, 'i kala 'üün plɛklɩ.
‑Dɔlʋ ‑sia' 'wʋ
34 Farisinyüü 'nua' 'sɩrɩ Jesu kalaa' Sadusinyüüa 'më nɩ, 'ünya trara. 35 'Üa ‑tɔrʋpɩɔa ‑dɔkpɩanyɔɔ 'doo nya ji 'lɩ Jesu tɛ, 'ɔnya 'bete 'ɔɔn: 36 «'Kpɩkpɩanyɔɔ, ‑dɔa 'fɩɔa ‑tɔrʋpɩɔ, ‑mʋ 'plɛɛ ‑siwʋ le?» 37 'Iibäa' Jesu nɩ: «‑Kä ‑mä ‑na plɛa 'fɩɔ nʋ, ‑mä ‑na ‑susua 'fɩɔ nʋ, ‑na bobowlia 'fɩɔ nʋ ‑mä ‑na 'Pläkänyɔɔ Nyɔsʋa ‑wa†. 38 'A ‑dɔlʋ bäa' ‑kätɩ ‑dɔ; u ‑sia' ‑dɔa 'fɩɔ 'wʋ. 39 ‑Jää ‑moloo nyra 'uun bäa' dɛɛ 'dee: ‹'Sɩrɩ ‑waa' ‑na nyufa, ‑wa 'saa ‑na ‑moloo†.› 40 ‑Dɔa 'fɩɔ nyra nyɔsʋaamlɩpalanyüüa 'kpɩkpɩakʋa 'fɩɔ bä 'ia ‑dɔ 'sɔɔlʋa mlɩ.»
Nyɔɔ 'plɛɛ kä 'jʋ bä Jesu le?
41 Farisinyüü traraa', Jesu nya 'bete 'üün: 42 «Wii 'plɛɛ 'a jrere 'Kriisë ‑gälɩ le? Nyɔɔ 'plɛɛ kä 'jʋ 'ɔ bä le?» 'Iibäa' 'üün nɩ: «Daviidëa 'jʋ 'ɔ bä.» 43 'Ɔnya 'bete 'üün: «‑Bɛ ‑asɩ 'i nʋ kä ‑bɛ Nyɔsʋaa ‑Susu 'cere kä Daviidë ‑gälɩ ‑bɛ 'ɔ 'dara 'ɔɔn 'Pläkänyɔɔ le? 'Be 'ɔ nɩnɩa:
44 'Pläkänyɔɔ ‑gbala 'na 'Pläkänyɔɔ: 'A ‑pɩ 'na 'dupa 'lɩ ‑a kʋ kʋ,
'kä 'n 'pie ‑na 'nyüamlɩjraranyüü ‑na bökli ‑wälɩ
‑beere bökligälɩtʋkpö†.