Nyüüa ‑glʋɩtää nyüü ‑pʋlü Jesu blɔa'
10
1 'Ia 'fɩɔ ‑sia' nɩ, 'Pläkänyɔɔ nya blɔ bɩa nyüüa ‑glʋɩtää nyüü ‑pʋ† ‑mölöö, 'ɔnya blɔ 'üün 'sɔɔrɔ 'sɔɔ, ü ‑ta 'ɔɔn 'nyʋfɔ 'klɔɔtrʋ, ü mi bätä nyra ‑plɩɩlɩ kä 'fɩɔ 'ɔmäa' ‑srörö. 2 'Ɔnya ‑gbala 'üün: «Putulu nëmäa' 'bölö 'bʋa, ‑maa 'ua 'böbönyüü 'nyɩ ‑sümlö ‑a ‑sümlö. 'Ii känyrɩ, 'ba bibie Nyɔsʋa ɔ bäa' putukänyɔɔ, 'ɔmä 'jrʋpafɛnyüü ‑mölöö ja, 'ümä ji 'ümä 'uun 'bö. 3 'Ba mi! Blɔ 'n blɔ 'amɩ ‑beere nyɔɔ blɔ ‑bablëëjü 'klʋɛɛa ‑fäa ‑tɔrʋpɩɔ. 4 'Anyɩ fa pɔtëmɔnɛɛ, 'anyɩ fa sakɔsʋ, 'anyɩ fa 'sii ‑mɩdoo, 'anyɩ 'nyüglö 'anyɩ 'trɛɛ nyüü 'nyʋfɔ mlɩ. 5 Nyuku o nyuku kä ‑wälɩ 'a nëmäa' pa nɩ, 'ba 'daa ‑kätɩ: ‹Abɩa plɛgälɩflɛrɛkʋ bä nyukulu kʋa' ‑pɩa ‑wälɩ!› 6 Nyɔɔ ma bälɩ ɔma 'bata plɛgälɩflɛrɛkʋ nɩ, 'ana plɛgälɩflɛrɛkʋ nya 'ɔɔn 'lɩbäa. ‑Maa ima 'nyɩ 'iin bä ‑a bä nɩ, 'ana mlɩa wii nya 'amɩ bei 'wʋ dɛrɩblöa. 7 ‑Plɩɩlɩ 'ü tʋäa' 'amɩ nɩ, 'ii 'ba kʋ, 'ba ji dɛɛlɛ 'ü ‑nyɛɛa' 'amɩ, 'ba 'mla dɛɛlɛ 'ü ‑nyɛɛa' 'amɩ, 'be nyɔɔlɔ ‑fɛɛɛa' 'jrʋpa 'ɔ kä 'ɔmä 'pɛrɛ†. 'A 'nɩ ‑pi nyëka ‑wälɩ. 8 Bätä o bätä 'a nëmäa' pala ‑bɛ 'ümäa' 'amɩ 'lɩkʋɛɛ nɩ, 'ba ji diili kä 'fɩɔ 'ümäa' 'amɩ ‑nyɩ. 9 'Ba ‑futo ‑wusublanyüülü bäa' 'lɩ, 'kä 'a ‑gbala 'üün: ‹Nyɔsʋaa 'kamaplä 'a 'amɩ ‑gbajijrö.› 10 ‑Maa 'ama mi bätäa 'mlɩ, ‑bɛ üma 'nyɩ 'lɩ 'amɩ ‑a 'kʋɛɛ nɩ, 'ba mi 'äa 'nyifi mlɩ 'kä 'a nö: 11 ‹'Ana bätäa ‑tʋtʋlʋ bäa' 'nɩmɩ ana bei ‑gba a ‑gbɔpɔ 'uun†. ‑Maa 'ba jresaa: Nyɔsʋaa 'kamaplä 'a 'amɩ ‑gbajijrö.› 12 ‑Bɛ 'n ‑gbala 'amɩ, ‑srɩlɩ kä 'mlɩ Nyɔsʋa 'mäa' ‑gä ‑tʋ nɩ, Sodɔɔmëa† ni ‑nëmä dɛɛ ‑a bä 'kä 'ia në bätäläa ‑gʋ.13 «Busukʋ jrä 'amɩ ‑gälɩ Korasɛɛnyüü 'amɩ! Busukʋ jrä 'amɩ ‑gälɩ Bɛtësaidaanyüü 'amɩ! ‑Saragbili nröröa' 'ana bätä, 'ima 'daa Tiirë nyra Sidɔɔn† 'i nrörö kä nɩ, 'ia nyüü 'a 'kä ‑balʋ ‑wälɩ 'cɛrɛ; 'ü 'a 'kä ‑bɛjʋ 'sroo 'ümä 'dugu 'lɩ pa, 'kä 'ünya 'pʋpʋ 'lɩ 'käwawla†. 14 'A 'ia ‑gʋ, jrüülü kä 'mlɩ Nyɔsʋa 'mäa' ‑gä ‑tʋ nɩ, Tiirë nyra Sidɔɔn a ‑gä ‑nëmä dɛɛ ‑a bä 'kä 'ana näa ‑gʋ, 15 nyra 'amɔ, Kapɛrënaumëa nyüü 'amɩ, ɔ 'jraraa' cɛlɩ, ‑nya 'wʋciecie 'kä ‑nya 'kuaabre 'tɔ!
16 «Nyɔɔ ma po 'amɩ 'nyakli nɩ, 'mɔɔ 'ɔ ponyakli. Nyɔɔ ma jrara 'amɩ 'nyüamlɩ nɩ, 'mɔɔ 'ɔ jraranyüamlɩ. ‑Bɛ nyɔɔlɔ jraraa' 'mɩ 'nyüamlɩ nɩ, nyɔɔlɔ blɔa' 'mɩ 'ɔ jraranyüamlɩ.»
17 'Taɩn 'lɩ 'üa nyüüa ‑glʋɩtää ‑bɛ ‑pʋlʋ† 'blööa' ‑bɛ 'ü jia' nɩ, dɔrʋ 'blaa 'ümɩ. 'Ü ‑nëma: «'Pläkänyɔɔ, ama 'pala ‑na 'nyrɩklɩ wii nɩ, ‑kä domüü ‑träärälɩ wiili a 'daaa'!» 18 'Ɔnya ‑gbala 'üün: «'N 'jä Sataan ‑bɛ 'ɔ sɔ cɛlɩ 'ɔ blö ‑beere ‑mamɛɛ. 19 'Ba ponyakli 'cɩcasa: 'N ‑nyɩ 'amɩ 'klü 'amä 'trii nyra ‑gbätë ‑gälɩ 'nyɛ; 'nyaa ‑nyɩ 'amɩ 'klü 'amä ‑Gbakäklɛnyɔɔ† du, 'kä dɛɛ 'dee ‑nëmä 'amɩ bʋblɔ. 20 ‑Maa, dɔrʋ 'nyɩ 'bla 'amɩ dɛɛlɛ kä ‑gʋ ‑sisi nöa' wiili 'a 'daaa'; ‑maa 'ana 'nyrɩlɩ ‑jɩjraa' cɛlɩ nɩ, abɩa 'ia dɔrʋ 'blaa' 'amɩ.»
Jesu 'bʋala Nyɔsʋaa 'nyrɩ
21 'A 'ia 'taɩn 'lɩ dotro dɔrʋ 'si Jesu 'klɩ 'Nyüna ‑Susu 'lɩ† 'ɔ ‑nëma: «Tʋ, cɛ nyra ‑tʋtʋa 'Pläkänyɔɔ, 'n 'trɛɛ ‑mɩ 'sɩrɩ nʋa' ‑bɛ ‑sisrea' wiili 'lɩglanyüü nyra ‑pɔɔkɩjrenyüü ‑gba, ‑bɛ ‑sraraa' 'iin 'jütɛtɛɛ. ‑Yɛɛ, Tʋ, 'a wiili käa' ‑mɩ 'tʋ, 'ii nʋ! 22 'Na Tʋ ‑nyɩ 'mɩ diia 'fɩɔ kälɩ. Nyɔɔ 'nyɩ 'Jʋ ‑a jre, ima 'nyɩ Tʋ ‑a bä. Nyɔɔ 'nyɩ Tʋ ‑a jre, ima 'nyɩ 'Jʋ nyra nyɔɔlɔ 'Jʋ 'bataa' 'ia srarakʋ ‑a bä.» 23 'Ɔnya ‑sie 'ɔa 'wʋnyɛrɛnyüüa 'dooa 'pɛlɩ kälɩ, 'ɔnya ‑gbala 'üün: «Abɩa dɔrʋ 'bla nyüülü 'jääa' diili 'a 'jääa' 'wʋ! 24 'Amɔ 'n ‑gbala, nyɔsʋaamlɩpalanyüü 'kɔkɔmlɛ nyra 'kɩɩɩ 'bata kä i 'a 'jääa' a 'jäjäkʋ, ‑maa 'ünyɩ 'iin 'jä ‑a 'jä; 'ü 'bata wiili 'a 'nööa' 'wlia 'wlinunukʋ, ‑maa 'ünyɩ 'iin 'wli ‑a 'nu.»
‑Dɔlʋ ‑sia' 'wʋ
25 ‑Dɔkpɩanyɔɔ 'doo 'bataa' Jesua bɔʋdɛrɩpapakʋ nɩ, 'ɔnya sɔwʋ 'ɔ ‑nëma: «'Kpɩkpɩanyɔɔ, ‑asɩ 'nyaa nʋ ‑bɛ 'nyaa 'klälä 'nyɩa' blöröfa kä 'jä le?» 26 'Iibäa' Jesu nɩ: «Wii 'plɛɛ ‑jɩjra ‑Dɔa ‑pɔɔkʋa 'mlɩ le? ‑Ama ‑täsä 'uun wii 'plɛɛ ‑nööwli le?» 27 'Iibäa' nyɔɔlɔ: «‑Kä ‑mä ‑na plɛa 'fɩɔ nʋ, ‑mä ‑na ‑susua 'fɩɔ nʋ, ‑mä ‑na 'klüa 'fɩɔ nyra ‑na bobowlia 'fɩɔ nʋ ‑mä ‑na 'Pläkänyɔɔ Nyɔsʋa ‑wa†, ‑bɛ 'sɩrɩ ‑waa' ‑na nyufa, ‑wa 'saa ‑na ‑moloo†.» 28 'Iibäa' Jesu nɩ: «'Asɩ 'i bä. ‑Ama nʋ 'imɩ ‑nya 'klälä 'nyɩa' blöröfa kä 'jäa.»
29 ‑Bɛ 'ɔ 'bataa' 'ɔmäa' ‑gä kä nɩ, 'ɔnya 'bete Jesu: «‑Bɛ nyɔɔ 'plɛɛ bä 'na ‑moloo le?» 30 Jesu nya 'paplawiiklɩ 'ɔnya ‑gbala 'ɔɔn ‑maa: «Nyɔɔ 'doo sɔ kä Jerusalɛɛmë, ‑bɛ 'ɔ mö kä Jerikoo. 'Jejienyüü nya 'kpla 'ɔɔn, 'ünya 'ba 'ɔmɩ 'ɔa diia 'fɩɔ kälɩ, 'ünya bɔtɔ 'ɔmɩ. 'Ɔnya blö 'kumulɩ, 'ünya tɩ ‑plɩɩ 'ɔɔn, 'ünya fɔ. 31 'A 'nyʋfɔ 'doolʋ nɩ, 'uu ‑gbɔsapɛrɩnyɔɔ ja. 'Ɔmä 'saa nʋkalɩ mi nɩ, 'ɔ 'a nyɔɔlɔ 'jä. 'Ɔ ‑gölöa' 'lɩgälɩ 'ɔ ‑gaala, 'ɔnya ‑si. 32 'Asɩ Leviitënyɔɔ† 'doo nʋ bɩa. 'Ɔ 'tɔa' nyɔɔlɔa ‑gba nɩ, 'lɩgälɩ 'ɔ ‑gaala. 33 ‑Maa Samariinyɔɔ 'doo mö ɩa' nyɔtugbabre nɩ, 'ɔ 'tɔa' nyɔɔlɔa ‑gba nɩ, 'ɔa nyatɛrɩ 'bla 'ɔɔn ‑gböösa. 34 'Ɔnya jijrö 'ɔɔn ‑gba, 'ɔnya 'papa 'ɔa ‑fëa 'klɩ ‑duvɛɛn nyra 'kpɩ† 'ɔnya ‑fifra 'üün dapɩa, 'ɔnya 'jrara 'ɔɔn 'ɔa 'mʋgbɛa ‑sʋbre ‑gälɩ. 'Ɔnya fa 'ɔɔn ‑sisinyüüa nyukua ‑wälɩ, 'ɔmä 'ɔɔn 'kʋɛrɛ. 35 'Ia ‑srɩ paa' ‑bɛ 'ɔmäa' ‑si nɩ, 'ɔnya 'balɩ denie† 'sɔɔ 'ɔnya ‑gbala nyɔɔlɔ käläa' nyukulua wii ‑gba ‑maa: ‹‑Futo 'ɔmɩ; möliili ‑nëmäa' 'lɩgälɩ 'saara nɩ, ama 'blöö 'na 'mʋgbɛ nya 'iin mlɩsaa.›
36 «'Nɩnɩa nɩ, ‑na plɛklɩ nɩ, 'üa nyüü tääläa ‑tɔrʋpɩɔ; ‑mɔ 'plɛɛ 'kpla nyɔɔlɔ 'jejienyüü bɔtɔa' ‑beere 'ɔa ‑moloo le?» 37 'Iibäa' ‑dɔkpɩanyɔɔlɔ nɩ: «Nyɔɔlɔ 'jäa' 'ɔa nyatɛrɩ.» Jesu nya ‑gbala 'ɔɔn: «Mi! ‑Ama mi nɩ, nʋ bɩa 'ɔa 'sa.»
Marëtë nyra Marii
38 'A 'nyʋfɔ 'ü fa ‑bɛ 'ü mö ɩ, Jesu nya pala bätä 'dööa 'mlɩ. 'Ŋlʋʋ 'doo 'ü 'daraa' Marëtë nya fa 'ɔɔn 'ɔa ‑nyɛɛ. 39 Marëtë kä ‑wladia 'doo 'ɔɔ 'ü 'dara Marii. Marii 'prɛrɛa' Jesua ‑gba ‑wälɩ 'ɔ kʋ; wiili 'ɔ 'saalɩ, 'ii 'ɔ ponyakli. 40 ‑Maa Marëtëlɔ 'nyɩ trarakä ‑a, nyɔtugbanyüüa ‑gä kla 'ɔɔn 'wʋ ‑gböösa. 'Ɔnya 'jrara Jesu 'klɩ 'ɔnya 'bete 'ɔɔn: «'Pläkänyɔɔ, 'inyɩ nʋ ‑mɩ dɛɛ ‑gba ‑a 'kä 'na ‑wladia 'mä 'na 'doo 'klɩtɛ 'mä 'jrʋpaa 'fɩɔ ‑fɛ; ‑gbala 'ɔɔn ɔ ji 'mɩ ‑gba.» 41 Jesu† nya ‑gbala 'ɔɔn: «Marëtë, Marëtë, ‑na plɛ ‑taaralɩ, ‑bɛ ‑fɛɛɛ 'jrʋpa 'kɔkɔmlɛ dii 'kɔkɔmlɛa ‑gʋ. 42 ‑Maa dɛɛ 'dee 'leee, 'ɛɛ bä 'mʋfadɛɛ, 'a 'mʋfadɛɛlɛ 'ɛɛ Marii 'balɩ; nyɔɔ 'nyɩ 'lɩ ‑a bɩa ɔ 'ba 'ɔmɩ 'ɛɛn kälɩ.»