Paplanyɔɔa tapönänä
13
1 'Ia ‑srɩ 'lɩ nɩ, Jesu 'ciea' nyüköli 'ɔnya mi 'nie ‑gba 'ɔnya 'kʋwälɩ. 2 Nyüü 'kɔkɔmlɛ nya trara 'ɔɔn 'klɩ. 'Üa ‑sümlökʋa ‑gʋ nɩ, 'ɔnya 'jra ‑gɔlʋ 'lɩ 'ɔnya kʋwälɩ, 'a ‑plɩɩ 'kɔtʋmlɩ nyüülü kä 'fɩɔ jia' 'nyüglö.3 'Ɔ 'kpɩa 'üün wii 'kɔkɔmlɛ. Tapönänä 'ɔ 'paa ‑bɛ 'ɔ ‑gbala 'üün. 'Ɔ nɩnɩa: «‑Jää paplanyɔɔ 'doo mi kä 'ɔa putu 'lɩ papladii ‑gbagba. 4 'Asɩ 'ɔ ‑gbaaa' 'iin ‑bɛ 'ɔ möa' nɩ, 'jaju ‑moloo böblö 'nyʋfɔ 'mlɩ, 'kä nyisie jö 'ua 'fɩɔ. 5 ‑Moloo böblö 'täkë ‑tʋtʋ 'lɩ, ‑tɛ 'lɩ ‑tʋtʋ 'nyɩa' ‑sümlö. 'Ua nu ‑gaaa sɔsɔ, 'be ‑tʋtʋ 'nyɩ 'lɩ ‑a ‑sümlö. 6 ‑Maa 'ua tigblii 'nyɩa' ‑gʋ 'lɩtʋŋlɔ nɩ, 'jrʋ 'pʋa', 'unya jä. 7 ‑Moloo böblö nänë 'lɩ. Nänë ‑gaa' 'änya kakla 'uun ‑fʋflʋ 'klɩ. 8 ‑Moloo nya böblö 'mʋfa ‑tʋtʋ 'lɩ; 'unya ‑ga, 'unya tʋ 'mʋfasa. ‑Gö ‑mölöö tʋä 'jajua ‑glʋɩgböö (100), ‑mölöö tʋä 'jajua ‑glʋɩtää (60), ‑bɛ ‑mölöö tʋä 'jaju ‑glʋ 'jaju ‑pʋ (30). 9 Nyɔɔlɔ käa' 'nununyakli, ɔ 'nu!»
Wiili kä ‑gʋ Jesu 'palaa' nyüü tapönänë 'klɩ
10 'Ɔa 'wʋnyɛrɛnyüü nya jijrö 'ɔɔn ‑gba, 'ünya 'bete 'ɔɔn: «Wii 'plɛɛ kä ‑gʋ ‑paalaa' nyüü tapönänë 'klɩ le?» 11 'Ɔ ‑nëma: «Nyɔsʋa ‑nyɩ 'amɩ 'klü 'amä 'ɔa cɛɩɩa 'kamapläa 'mlɩa ‑sisiewii jre; ‑maa 'ɔnyɩ 'iin nyüü ‑mülü ‑a ‑nyɩ. 12 Nyɔɔlɔ 'klaaa' diijie, Nyɔsʋa nya 'iin 'wlibɩaa 'ɔmä 'kɔkɔmlɛ kä. ‑Maa nyɔɔlɔ 'nyɩa' dɛɛ 'klaa nɩ, 'ɔnya 'nɩmɩ 'ɔɔn ‑mɛlɛ 'ɔ 'klaaa' kälɩ 'baa. 13 'A 'ia ‑gʋ 'n 'pala 'üün tapönänë 'klɩ ‑bɛ 'n ‑gbala 'üün: 'Ü ‑pʋpɔ ‑maa 'ünyɩ 'jäkä ‑a, 'ü ponyakli ‑maa 'ünyɩ 'nunu ‑a, ‑bɛ 'ünyɩ 'ia ‑gbaa jre. 14 'I jrä 'lɩ 'kä wiili nyɔsʋaamlɩpalanyɔɔ Esaii 'daa käa' 'mä nrörö. 'Ɔ nɩnɩa kä:
'Anya 'nyaklipo po, ‑maa 'a ‑nëma ‑srɩɩ 'nu ‑a 'nu;
'anya ‑pʋpɔ ‑pʋpɔ, ‑maa 'a ‑nëmä ‑srɩɩ dɛɛ 'wʋ ‑a 'jä.
15 'Be ‑taa ‑glügböläa plɛ 'a 'bʋa,
'üa 'nunukʋ 'a 'lɩkla;
'ü 'mʋmɔ 'üa 'nyü
'ü ‑pɩ 'nyü nʋ 'ü ‑pɩ 'käjä;
'ü ‑pɩ 'nyakli nʋ 'ü ‑pɩ 'nyaklipo;
'üa plɛ ‑pɩ wii 'wlinu, 'ü ‑pɩ 'na 'pɛlɩ kälɩsie 'nyɩ ‑pɩ 'üün 'pʋɔ†.
16 ‑Maa 'amɔlɔ nɩ, abɩa dɔrʋ 'bla 'amɩ 'be 'ana 'nyü 'jääkä ‑bɛ 'ana 'nyakli 'nöö. 17 'Cɩcasa 'n ‑gbala 'amɩ: nyɔsʋaamlɩpalanyüü 'kɔkɔmlɛ nyra 'klɩgänyüü 'kɔkɔmlɛ 'bata kä wiili 'a 'jäa' 'ia 'jäjäkʋ, ‑maa 'ünyɩ 'iin 'jä ‑a 'jä. 'Ü 'bata wiili 'a 'nööa' 'wli, 'ia 'wlinunukʋ ‑maa 'ünyɩ 'iin 'wli ‑a 'nu.
Paplanyɔɔlɔa tapönänäa ‑gbaa
18 «'Amɔlɔ nɩ, 'ba 'nu wiili paplanyɔɔlɔa tapönänä ‑gbaa 'wli. 19 'Nyʋfɔlʋ kä mlɩ papladii böblöa' nɩ, 'a nyɔɔlɔ poa' 'Kamapläa wii 'nyakli ‑bɛ Plɛbʋbɔsusu† jöa' ‑bɛ 'u 'baaa' 'ɔa plɛ 'klɩ wiili plaraa' 'lɩ. 20 'Täkëtʋtʋlʋ kä ‑gälɩ papladii böblöa' nɩ, 'a nyɔɔlɔ ɔma 'nua' nyɔsʋaawii 'wli dotro ‑bɛ ɔ 'kplaaa' 'iin dɔrʋsa, 21 ‑maa 'ɔa plɛ 'nyɩ 'iin 'kpla ‑a 'kpla 'cɩcasa. 'Ɔnyɩ ‑tʋ wii 'nyügba ‑a. 'Pɩrɩgälɩ nɩ, ɔma bä ‑sʋɩ 'lɩ, 'aiɛ üma jrara 'ɔɔn 'nyüamlɩ nyɔsʋaawiia ‑gʋ nɩ, 'köklesaplɩɩ 'ü 'wʋä nyɔsʋaawii dɛrɩ. 22 Papladiili blöa' nänëa mlɩ nɩ, 'a nyɔɔlɔ 'nööa' nyɔsʋaawii 'wli, ‑maa 'ɔa plɛ ‑ka bä ‑tʋtʋ ‑gälɩa dii dɛrɩ, 'ɔa 'nyü ‑ka fɔlɔa' 'bɩɔ dɛrɩ 'fʋflɛsa. 'Ii kakla nyɔsʋaawii 'klɩ, 'a 'ia ‑gʋ 'inyɩ 'lɩ ‑a bɩa i tʋ. 23 ‑Maa papladiili blöa' 'mʋfa ‑tʋtʋ ‑gälɩ, 'a nyɔɔlɔ poa' nyɔsʋaawii 'nyakli ‑bɛ 'ɔ 'nöa'. 'Ɔɔ ‑beere papladiili kä ‑gö 'döö tʋäa' ‑glʋɩgböö (100), ‑mölöö tʋäa' ‑glʋɩtää (60), ‑bɛ ‑mölöö tʋäa' ‑glʋ ‑bɛ ‑pʋ (30).»
Bʋbɔsipia tapönänä
24 Jesu nya ja tapönänä ‑mölöö, 'ɔ nɩnɩa: «Cɛɩɩa 'kamaplä ‑beere 'sɩrɩ nyɔɔ plaa' 'cɩcadii 'ɔa putu 'lɩ. 25 ‑Maa 'taɩn 'lɩ nyüü 'mʋmɔa' nɩ, 'ɔa 'nyüamlɩjraranyɔɔ nya ji, 'ɔnya papla bleeejajulu 'ɔ pla ɩa' a 'mlɩ bʋbɔsipi 'ɔnya mi. 26 ‑Bleeelɛ ‑gaa' 'ɛnya tʋ, bʋbɔsipi nya ‑ga bɩa. 27 Putukänyɔɔa 'jrʋpafɛnyüü nya ji 'ɔɔn 'bete: ‹'Kamanyɔɔ, ‑mää 'cɩca papladii ‑nyɩ ɩ ‑na putu 'lɩ pla? ‑Bɛ ‑a 'plɛɛ ‑taa bʋbɔ 'sipili sɔ le?› 28 'Iibäa' 'ɔɔn nɩ: ‹'Na 'nyüamlɩjraranyɔɔ nʋ 'imɩ.› 'Ünya 'bete 'ɔɔn: ‹‑Baata a mi a 'dɛdɩɛ bʋbɔ 'sipili?› 29 'Ɔnya ‑gbala 'üün: ‹'Woo! 'Ama 'dɛdɩɛ bʋbɔsipi nɩ, 'i 'mrɛɛ i 'dɛdɩɛ bɩa ‑bleeelɛ. 30 'Ba 'cɛrɛ 'iin ‑wälɩ ‑bleeea 'sasataɩn 'mä 'lɩjrä. 'Ɛa 'sasataɩn 'lɩ nɩ, 'nyaa 'jrʋpafɛnyüü ‑gbalaa: 'Ba 'böbö ‑kätɩ bʋbɔsipi 'amä 'iin 'pütö. ‑Maa ‑bleeelɛ nɩ, 'ba ‑teere 'ɛɛn 'na nyikli 'lɩ.› »
Mutarëdëa 'jajua tapönänä
31 Jesu nya ja tapönänä ‑mölöö, 'ɔ ‑nëma: «Cɛɩɩa 'kamaplä ‑beere 'sɩrɩ nyɔɔ dɔrɔa' mutarëdëa 'jaju 'wʋ ‑bɛ 'ɔ plaa' 'uun 'ɔa putu 'lɩ. 32 Mutarëdë 'jaju bä sʋsʋ 'unya ‑si ‑tʋtʋ ‑gälɩa 'jajua 'fɩɔ, ‑maa uma 'bʋa 'u ‑sööö putulɩa 'sʋsʋa tiia 'fɩɔ 'wʋ 'kä 'u nö tuu kpaku, 'kä nyisie 'pala 'ua katëa 'mlɩ 'dëdrëë.»
Farinë nyra levurëa tapönänä
33 'Ɔnya ‑gbala 'üün tapönänä ‑mölöö: «Cɛɩɩa 'kamaplä ‑beere 'sɩrɩ 'ŋlʋʋ 'paa' farinëa kiloo ‑glʋ ‑bɛ ‑gbööa† dɛrɩ levurë ‑bɛ 'ia 'fɩɔ 'jraaa'.»
Tapönänë 'kɔkɔmlɛ Jesu nö ‑bɛ 'ɔ 'paa nyɔsʋaawii
34 'Ia 'fɩɔlʋ nɩ, tapönänë Jesu nö ‑bɛ 'ɔ 'kpɩa nyüü. 'Ɔnyɩa' tapönänë 'pa 'ɔ ‑kaaŋlʋ 'üün ‑a ‑gbala. 35 'Asɩ wiili nyɔsʋaamlɩpalanyɔɔ ‑gba käa' 'mä nrörö; 'ɔ nɩnɩa kä:
Tapönänë 'nëmä 'pa ‑bɛ 'mä 'üün 'kpɩa.
'Bala 'pläa 'käkolofa 'wʋ ‑a jrä 'saarɩ ‑gälɩ,
'nyaa 'lɩ 'ia wiili ‑sisiea' 'saa†.
Bʋbɔsipilia tapönänäa ‑gbaa
36 Jesu nya sɔ ‑jria 'lɩ 'ɔnya pa nyüköli. 'Ɔa 'wʋnyɛrɛnyüü nya jijrö 'ɔɔn ‑gba 'ü ‑nëma: «Tapönänälä ‑paaa' ‑plɩɩ, ‑bɛ 'daaa' bʋbɔsipili ‑gaaalaa' putu 'lɩ nɩ, ‑nyɩ amɩ 'ia ‑gbaa.» 37 'Ɔ ‑nëma: «Nyɔɔlɔ ‑gbaaa' 'cɩcaa papladiili nɩ, 'a Nyɔɔa 'Jʋ. 38 Putulu nɩ, 'u bä 'plä; 'cɩca papladiili nɩ, 'iibä 'kamapläa 'jü; bʋbɔsipili nɩ, 'a Plɛbʋbɔsusua† 'jü. 39 'Nyüamlɩjraranyɔɔlɔ plaa' bʋbɔsipi nɩ, Sataan bäsaa; 'ia 'böbökʋlʋ nɩ, 'a 'pläa bɩarafa, nyüülü 'bööa' 'uun nɩ, 'abɩa 'aanjëɩɩ. 40 'Sɩrɩ 'ü 'bütöa' bʋbɔsipi ‑bɛ 'ü bea' 'iin kapu 'lɩ nɩ, 'asɩ 'pläa bɩarafa 'mä ‑srɩɩ bä. 41 Nyɔɔa 'Jʋ nya 'ɔa 'aanjë blɔa; 'kä 'ünya 'ɔa 'kamapläa 'mlɩ nyüülü kä 'fɩɔ 'tutroa' nyüü ‑balʋ 'lɩ nyra nyüülü nöa' ‑balʋ 'lɩba. 42 'Kä 'ünya 'üün kapu kpaku 'lɩ be. 'A ‑plɩɩ 'ümä 'wu ‑bɛ 'ümä ‑gla ji. 43 'A ‑plɩɩ 'klɩgänyüü 'mä 'üa Tʋa 'kamapläa 'mlɩ plörö ‑beere 'jrʋ. Nyɔɔlɔ käa' 'nununyakli, ɔ 'nu!
'Bɩɔlʋ ‑sisiea' a tapönänä
44 «'Asɩ cɛɩɩa 'kamaplä ‑beere 'sɩrɩ 'bɩɔ ‑sisrea' putu 'lɩ. Nyɔɔ 'doo nya 'jä 'uun 'ɔnya ‑sisie 'sɔɔwʋ 'uun ‑pɩɔ ‑mɩdoo. 'Ɔa dɔrʋa 'mlɩ nɩ, 'ɔnya 'pa diili kä 'fɩɔ 'ɔ 'klaaa' 'peru 'ɔmä putulu ‑su.
'Wlea tapönänä
45 «'Asɩ cɛɩɩa 'kamaplä ‑beere 'sɩrɩ 'perupanyɔɔ 'bataa' 'nana 'wlelɛ kä 'peru 'bʋaa'. 46 'Ɔ 'jäa' 'wlelɛ kä 'peru 'bʋaa' nɩ, 'ɔnya 'pa diili kä 'fɩɔ 'ɔ 'klaaa' 'peru 'ɔnya ‑su 'ɛmɩ.
‑Tataa tapönänä
47 «'Asɩ cɛɩɩa 'kamaplä ‑beere ‑tatalä 'ü bea' 'tanie 'lɩ ‑bɛ ä 'kplaaa' ‑srüa 'kaɩn 'kaɩn. 48 Äma 'si 'kä 'ü 'kʋɛɛrɛ 'ään 'kɔtʋmlɩ, 'kä 'ü ‑gbasa 'mʋfa ‑srü 'lɩ: ‑mülü 'naa' 'ü 'papa 'üün dɔgbɩ 'lɩ, 'kä 'ü be be ‑mülü 'nyɩa' 'na 'klʋɛɛ. 49 'Asɩ 'imä ‑srɩɩ bä 'pläa bɩara 'taɩn 'lɩ: 'aanjëlü nya jia 'ümä 'klɩgänyüüa ‑tɔrʋpɩɔ plɛbʋbɔnyüü 'ba. 50 'Ünya 'üün kapu kpaku 'lɩ berea. 'A ‑plɩɩ 'ümä 'wloro ‑bɛ 'ünya ‑gla ji.»
Dɛɛ sʋ nyra dɛɛ dëdrä
51 Jesu nya 'bete 'ɔa 'wʋnyɛrɛnyüü: «'A 'nu 'ia 'fɩɔlʋ 'wli?» 'Ü ‑nëma: «‑Yɛɛ, 'Pläkänyɔɔ†.» 52 'Ɔnya ‑gbala 'üün: «'A 'ia ‑gʋ ‑dɔkpɩanyüülü kä 'fɩɔ nröröa' cɛɩɩa 'kamapläa 'wʋnyɛrɛnyüü 'lɩ nɩ, 'ü ‑beere ‑gböööa tʋ: 'ɔ 'baa 'ɔa 'dokloeea 'mlɩ dii dëdrë nyra dii sʋ.»
'Sɩrɩ Nasarɛɛtënyüü 'nyɩa' Jesu ‑wa
53 Jesu bɩaa' tapönänë 'papakʋ nɩ, 'ɔnya mi. 54 'Ɔ 'tɔa' bätälä kä 'mlɩ 'ɔ 'bʋalaa', 'ɔnya ‑tʋ 'lɩ 'kpɩkpɩakʋ 'üa 'sraaplanyüköli. 'I kala nyüü plɛklɩ ‑bɛ 'ü 'bete: «‑A 'plɛɛ ‑taa nɔ nyɔɔlɔ 'ba 'sama 'lɩgaglakʋ nyra ‑saragbili 'ɔ nöa' le? 55 ‑Mää 'kamëdɛa 'jʋ ‑a? ‑Mää 'ɔa 'yioa 'nyrɩ 'nyɩ Marii bä? ‑Mää Jaakë, Josɛɛsë†, Simɔɔ nyra Judëɩɩa në ‑wlajʋlɔ ‑a? 56 ‑Mää ‑mɔlɔ kä ‑wlayörü a nyra 'üün kä 'fɩɔ kʋa' bätä ‑a? Nyɔɔ 'plɛɛ ‑nyɩ 'ɔɔn 'ia 'klülüa 'fɩɔ le?» 57 'A 'ia 'fɩɔlʋa ‑gʋ 'ünyɩ toro 'ɔɔn plɛ ‑a. ‑Bɛ Jesu ‑gbala 'üün ‑maa: «‑Pɩɔ o ‑pɩɔ nyɔsʋaamlɩpalanyɔɔ ‑sröröa' nɩ 'ü 'dara 'ɔɔn nyɔɔ, ‑maa 'ɔa 'brea nyüü, 'ɔa nyükölia nyüü, 'üa 'doo 'üü 'nyɩ 'dara 'ɔɔn nyɔɔ.» 58 'Ünyɩa' ‑gʋ 'ɔɔn plɛtoro nɩ, 'ɔnyɩ 'lɩ ‑saragbi 'kɔkɔmlɛ ‑a nrörö.