'Sɩrɩ Sataan 'traɩn a' Jesu ‑aaga 'lɩ
4
1 Jesu sɔa' Jurëdɛɛn 'lɩ nɩ, 'Nyüna ‑Susu 'si 'ɔɔn 'klɩ, 'unya 'tiere 'ɔɔn ‑aaga 'lɩ. 2 'Ii Sataan 'traɩn 'ɔɔn jrüüa ‑glʋɩsɔɔ. 'Ɔnyɩ dɛɛ ‑a ji 'ia jrüülüa 'fɩɔ. Jrüülü blöa' 'fɩɔwʋ, ‑gbëka nya 'bla 'ɔɔn ‑gböösa.3 Sataan nya ‑gbala 'ɔɔn: «‑Ama bä Nyɔsʋaa 'Jʋ nɩ, 'pala 'täkälä kʋa' ‑pɩ wii ‑gba 'ämä 'flɔɔ 'lɩ 'cicri.» 4 Jesu nya ‑gbala 'ɔɔn ‑maa: «Nyɔsʋapɔɔkʋ nɩnɩa: ‹‑Mää jijrɛa 'doo 'nyɩ ‑nyɩ nyɔɔa 'klä†, ‑maa 'papawiili kä 'fɩɔ jaa' Nyɔsʋaa mlɩ†.› » 5 Sataan nya fa 'ɔɔn 'dʋgba kpakö 'wli, 'a ‑plɩɩ 'ɔ kʋ dotro 'ɔnya srara 'ɔɔn ‑tʋtʋ ‑gälɩa ‑glügbüa 'fɩɔ†. 6 'Ɔnya ‑gbala 'ɔɔn: «‑Mɔ 'nëmä 'üa 'kamakʋ nyra 'üa 'bɩɔa 'fɩɔ kälɩ ‑nyɩ, 'be 'mɔɔ kä 'ümɩ. Nyɔɔlɔ 'n ‑waa' 'ɔɔ 'n ‑nyɛɛ 'üün. 7 'Ii känyrɩ ‑ama ‑pʋpʋa 'mɩ nɩ, ‑nya 'ia 'fɩɔ faa.» 8 Jesu nya ‑gbala 'ɔɔn: «Mumlö 'mɩ 'lɩ dɛrɩ, Sataan†! 'I ‑jɩjra nyɔsʋapɔɔkʋa 'mlɩ ‑maa: ‹'Pläkänyɔɔ, ‑na Nyɔsʋa, 'ɔa 'dooa 'klʋɩ ‑nëmä kotifli 'pala, 'ɔa 'doo ‑nëmä ‑pʋpʋa†.› »
9 'I ‑sia' nɩ, Sataan nya 'tiere 'ɔɔn Jerusalɛɛmë. 'Ɔnya 'jrara 'ɔɔn Nyɔsʋaanyuku kpakua 'ukpɛ 'wʋ. 'Ɔnya ‑gbala 'ɔɔn ‑maa: «‑Ama bä Nyɔsʋaa 'Jʋ nɩ, sɔ ‑tɛ cɛlɩ ‑a be ‑na nyufa ‑tʋtʋ 'wʋ; 10 'be 'i ‑jɩjra nyɔsʋapɔɔkʋ 'lɩ ‑maa:
‹Nyɔsʋa nya 'ɔa 'aanjë ‑gbalaa,
'ümä ‑mɩ 'nyiöligäälä.›
11 'I ‑jɩjra 'sɔɔwʋ:
‹'Ünya ‑mɩ ‑gbötöa,
‑na bɔʋ ‑pɩ 'täkä 'klɩ 'kala†.› »
12 Jesu nya 'sa 'ɔɔn ‑gälɩ, 'ɔ ‑nëma: «Nyɔsʋapɔɔkʋ nɩnɩa: ‹‑Nyɩ 'traɩn ‑na 'Pläkänyɔɔ Nyɔsʋa†.› » 13 Sataan bɩaa' 'lɩ wiili kä 'fɩɔ 'ɔmäa' nʋ ‑bɛ 'ɔmäa' 'ɔɔn bɔʋdɛrɩ 'pa nɩ, 'ɔnya tʋŋlɔlɩ 'ɔmɩ dɛrɩ, ‑bɛ 'ɔ ‑glaaa 'taɩn ‑mɩdoo.
JESU NYA MI GALILEE KƲ
4.14–9.50
'Mʋfagogolä Jesu 'saraa' Galilee
14 Nyɔsʋa ‑Susua 'klü 'si Jesu 'lɩ, 'ɔnya 'blöö Galilee dɛrɩ. 'Ɔa 'nyrɩ ‑gbaala Galileea ‑tʋtʋa 'fɩɔ ‑gälɩ 'kä. 15 'Ɔ 'kpɩara juifëa 'sraaplanyuku ‑wälɩ, ‑bɛ 'üa 'fɩɔ 'paa 'ɔa 'cɩcanyrɩ.
'Sɩrɩ Nasarɛɛtënyüü 'nyɩa' Jesu ‑wa
16 Jesu nya mi Nasarɛɛtë, i 'ɔ 'bʋalaa'. ‑Bɛ, 'i bäa' ‑fʋflʋpasrɩ nɩ, 'ɔnya mi juifëa 'sraaplanyuku ‑wälɩ 'sɩrɩ 'ɔ nöa' a 'doo. 'Ɔnya sɔwʋ 'ɔmä nyɔsʋapɔɔkʋ 'lɩ ‑täsä. 17 'Ünya ‑nyɩ 'ɔɔn ‑pɔɔkʋlʋ nyɔsʋaamlɩpalanyɔɔ Esaii ‑jɩjraa'. 'Ɔnya ‑jie 'uun 'klɩ, 'ɔnya ‑täsä ‑plɩɩlɩ 'daaa' ‑maa:
18 'Pläkänyɔɔa ‑Susu bä 'mɩ ‑gälɩ, 'ɔnya 'balɩ 'mɩ
'mä 'pʋablanyüü 'Mʋfagogo 'sa.
'Ɔ blɔ 'mɩ 'mä nyüülü ‑kanyɩa' plɛtorofa kä plɛlɩpa†;
'mä ‑jienyüü ‑gbala 'sɩrɩ 'ü ‑kanyɩa' ‑jienyüü bä,
‑bɛ 'mä 'nɔnɔnyüü ‑gbala, 'ü 'mrɛɛ 'ü 'jäkä,
'mä nyüülü 'jääa' ‑sʋɩ, ‑sʋɩ 'lɩ 'ba†.
19 'Ɔ blɔ 'mɩ ‑a ‑gbala nyüü: 'a ‑sʋlʋ kä 'mlɩ 'Pläkänyɔɔ 'mäa' 'ɔa ‑gbinanakʋ sraraa†. 20 'Ɔ kpaa' ‑pɔɔkʋlʋ 'klɩ nɩ, 'ɔnya ‑nyɩ 'uun nyɔɔlɔ kʋa' 'ɔa ‑gba, 'ɔnya kʋwälɩ. 'Ɔɔ nyüülü kä 'fɩɔ bä ɩa' 'sraaplanyukulua ‑wälɩ tɛklɩ. 21 'Ɔnya ‑gbala 'üün: «Nyɔsʋawiili ‑jɩjraa' 'ii 'a poa' 'saarɩ ‑plɩɩ 'nyakli nɩ, 'i 'a nrörö 'saarɩ.» 22 'Üa 'fɩɔ 'paa 'ɔa 'cɩcanyrɩ, 'mʋfagogolä jaa' 'ɔa mlɩ kala 'üa 'fɩɔ plɛklɩ. 'Ü ‑nëma: «‑Mää Josɛɛfëa 'jʋ 'nyɩ ‑pɩ kʋ?»
23 Jesu nya ‑gbala 'üün: «‑Beeredɛ 'anya 'mɩ ‑taa tapönänälä kʋa' ‑pɩ 'klɩ 'palaa: ‹‑Wusufutonyɔɔ, ‑futo ‑na nyufa!› 'Kä 'anya bɩa 'daa: ‹A 'nu wiili ‑nröröa' Kapɛrënaumë 'wli; 'ii känyrɩ, nrörö bɩa 'iin ‑na 'bre!› » 24 'Ɔ ‑nëma 'sɔɔwʋ: «'Cɩcasa 'n ‑gbala 'amɩ, nyɔsʋaamlɩpalanyɔɔ 'nyɩ kälä 'ɔa 'bre 'cɩcanyrɩ ‑a. 25 'Tasɩrɩa 'cɩcasa 'n ‑gbala 'amɩ, nyɔsʋaamlɩpalanyɔɔ Eliia 'taɩn 'lɩ nɩ, 'nʋŋlʋ 'nyɩ da ‑a da ‑sɩ tää ‑söplü ‑uundoo; ‑gbëka pala kä ‑tʋtʋa 'fɩɔ ‑gälɩ. ‑Bɛ 'ia 'taɩn 'lɩa 'mlɩ nɩ, 'kusroŋlëgë 'kɔkɔmlɛ bä kä Israɛɛlë, 26 ‑maa ‑mää 'üa ‑nyɛɛ Nyɔsʋa 'nyɩ Elii blɔ. ‑Maa 'kusroŋlʋʋ 'doo bä kä Sidɔɔn a ‑tʋtʋ ‑gälɩa bätälä 'ü 'daraa' Sarɛtë, 'ii 'ɔ blɔ 'ɔɔn. 27 'Asɩ 'jrʋklanyüü ‑sümlö kä bɩa Israɛɛlë, nyɔsʋaamlɩpalanyɔɔ Eliseea 'taɩn 'lɩ. ‑Maa 'jrʋklanyɔɔ 'doo 'nyɩ kä 'pʋ ‑a 'pʋ 'ima 'nyɩ Siriia 'blɩ ‑gälɩa nyɔɔlɔ 'ü 'daraa' Naama ‑a bä†.» 28 Nyüülü kä 'fɩɔ bä ɩa' 'sraaplanyukulua ‑wälɩ 'nua' 'iin 'wli nɩ, 'crɛ nya 'si 'üün 'klɩ. 29 'Ünya sɔwʋ, 'ünya fa 'ɔɔn bätäa 'mäklɩ. ‑Bɛ 'üa bätä kʋa' 'dʋgba 'klɩ nɩ, 'ünya fa 'ɔɔn 'dʋgbaa 'wli 'klɩ 'ümä 'ɔɔn 'lɩ ‑wälɩ 'tutro. 30 ‑Maa 'ɔnya ‑srörö 'üa ‑tɔrʋpɩɔ 'ɔnya mi.
Jesu mia' Kapɛrënaumë
31 'Ɔnya mi Kapɛrënaumë, Galileea ‑tʋtʋ ‑gälɩa bätä; ‑bɛ 'ɔ 'kpɩa juifëa ‑fʋflʋpasrɩ 'lɩ. 32 'Ɔa 'kpɩkpɩakʋ pa 'üün ‑gba, 'be 'kamasa 'ɔ 'kpɩa.
33 Jrüü 'doo 'lɩ nɩ, nyɔɔ 'doo bä ɩ 'sraaplanyukulua ‑wälɩ, ‑frepadomoo bä 'ɔmɩ 'lɩ; 'ɔnya 'kpölɩkä: 34 «‑Yii! Wii 'plɛɛ bä a nyra ‑mɔ kɔsɔa ‑tɔrʋpɩɔ le, Nasarɛɛtënyɔɔ Jesu? Amɔ ‑ji bʋblɔ? 'N jre nyɔɔlɔ bäa': Nyɔsʋaa 'Nyünanyɔɔ, 'ɔɔ ‑bä!» 35 Jesu nya nyrara 'ɔɔn 'wli: «'Kpla ‑na 'mä, 'kä ‑ciie nyɔɔlɔ 'lɩ!» Domoolɔ nya 'kpa nyɔɔlɔ 'kä nyüüa ‑tɔrʋpɩɔ, 'ɔnya 'cie 'ɔɔn 'lɩ; 'ɔnyɩ 'ɔɔn mɩmɩa ‑a mɩmɩa. 36 'I prɛ 'üa 'fɩɔa ‑gälɩa ‑susu, ‑bɛ 'ü 'betre 'lɩ 'üa 'kpɔa ‑tɔrʋpɩɔ: «'Papawii ‑mɩ 'plɛɛ kʋ 'sɔɔwʋ ‑pɩ le? 'Wʋsɔɔrɔkʋ nyra 'kamakʋ 'ɔ nö ‑bɛ 'ɔ ‑gbala ‑frepasisi i 'cie, 'kä 'i 'cie.» 37 Jesua 'nyrɩ nya ‑gbaala 'pläa 'fɩɔ ‑gälɩ 'kä. 38 Jesu sɔa' 'sraaplanyukulua ‑wälɩ nɩ, Simɔɔa nyuku ‑wälɩ 'ɔ mi. ‑Bɛ Simɔɔa ŋʋtayio 'nyɩ ‑ya ‑a ‑ya, 'ɔa fugba 'plöö. 'Ünya ‑gbala 'iin Jesu. 39 Jesu nya 'nyüglö 'ŋlʋʋlɔa 'wli 'lɩ 'ɔnya prɛ ‑wusulu, 'unya sɔ 'ɔɔn 'lɩ. 'Ɔ sɔa' 'wʋ dotro 'üa ‑gä 'ɔ 'pa. 40 ‑Gbiajrʋ möa' nɩ, nyüüa 'fɩɔ nya ja 'üa ‑wusublanyüülü ‑wusua 'kaɩn 'kaɩn 'blaaa' Jesu. 'Ɔnya 'pepe 'üün klʋgbë ‑gälɩ 'doorodoo, 'ünya 'pʋ. 41 Domüü 'cecie bɩa nyüü 'kɔkɔmlɛ 'lɩ; 'üü 'kpöö ‑gböösa ‑bɛ 'ü nö: «‑Mɔ bä 'Kriisë†, Nyɔsʋaa 'Jʋ.» ‑Maa Jesu 'daa 'üün, ‑bɛ 'ɔ kakla 'üün ‑fʋflʋ 'klɩ 'ü ‑pɩ wii 'pa, 'be 'ü jre 'ɔɔn 'sɩrɩ 'ɔɔ bäa' 'Kriisë†. 42 ‑Srɩ paa' nɩ, Jesu nya 'cie bätä, 'ɔnya bereklɩ ‑aaga 'lɩ. Nyüü 'kɔkɔmlɛ 'bata 'ɔɔn, 'ünya mi ‑tɛ 'lɩ 'ɔ bäa'. 'Ü 'bata 'ümä 'ɔɔn 'klɩ ka 'ɔ ‑pɩ mi. 43 ‑Maa 'ɔnya ‑gbala 'üün: «'N kä 'mä Nyɔsʋaa 'kamapläa 'mʋfagogo bätä ‑mölööa 'mlɩ 'sara bɩa; 'ia ‑gʋ Nyɔsʋa blɔ 'mɩ.» 44 ‑Bɛ 'ɔ 'pala nyɔsʋaawii Galilee† 'sraaplanyëka ‑wälɩ.