'Sɩrɩ Sataan 'traɩn a' Jesu ‑aaga 'lɩ
4
1 'I ‑sia' nɩ, Nyɔsʋaa ‑Susu nya fa Jesu ‑aaga 'lɩ Sataan 'mä 'ɔɔn 'traɩn. 2 'Ɔ bɩaa' ‑srɩa ‑glʋɩsɔɔ nyra ‑gbiaa ‑glʋɩsɔɔa supapakʋ nɩ, ‑gbëka nya 'bla 'ɔɔn ‑gböösa. 3 'Traɩnyɔɔ Sataan nya jijrö 'ɔɔn ‑gba 'ɔnya ‑gbala 'ɔɔn ‑maa: «‑Ama bä Nyɔsʋaa 'Jʋ nɩ, 'pala 'täkëlë kʋa' ‑pɩ wii ‑gba 'ümä 'flɔɔ 'lɩ 'cicri.» 4 'Iibäa' Jesu nɩ: «'I ‑jɩjra nyɔsʋapɔɔkʋ 'lɩ ‑maa: ‹‑Mää jijrɛa 'doo 'nyɩ ‑nyɩ nyɔɔ 'klä†, ‑maa 'papawiili kä 'fɩɔ jaa' Nyɔsʋaa mlɩ, ‑nyɛɛɛ 'klä.› » 5 'I ‑sia' nɩ, Sataan nya 'tiere 'ɔɔn 'Nyüna Bätäa 'mlɩ, 'ɔnya fa 'ɔɔn Nyɔsʋaanyuku kpakua 'ukpɛ 'wʋ. 6 'Ɔnya ‑gbala 'ɔɔn ‑maa:«‑Ama bä Nyɔsʋaa 'Jʋ nɩ, sɔ ‑tɛ ‑a be ‑na nyufa ‑tʋtʋ 'wʋ;
'be 'i ‑jɩjra nyɔsʋapɔɔkʋ 'lɩ ‑maa: Nyɔsʋa nya 'ɔa 'aanjë ‑gbalaa,
'ümä ‑mɩ ‑gbötö ‑na bɔʋ ‑pɩ 'täkä 'klɩ 'kala†.»
7 'Iibäa' Jesu nɩ: «'Ii ‑jɩjra 'lɩ bɩa ‑maa: ‹‑Nyɩ 'traɩn ‑na *'Pläkänyɔɔ Nyɔsʋa†!› »
8 Sataan nya fa 'ɔɔn 'dʋgba kpakö 'wli, 'ɔnya srara 'ɔɔn ‑tʋtʋ ‑gälɩa ‑glügbüa 'fɩɔ nyra 'üa 'wliklɩbʋabʋakʋ, 9 'ɔnya ‑gbala 'ɔɔn: «‑Ama 'pala 'na 'klʋɩ kotifli ‑bɛ ‑ama ‑pʋpʋa 'mɩ, 'nyaa ‑mɩ 'ia 'fɩɔ ‑nyɩa.» 10 Jesu nya ‑gbala 'ɔɔn: «Mumlö 'mɩ 'lɩ dɛrɩ, Sataan! 'I ‑jɩjra nyɔsʋapɔɔkʋa 'mlɩ ‑maa: ‹'Pläkänyɔɔ, ‑na Nyɔsʋa, 'ɔa 'dooa 'klʋɩ ‑nëmä kotifli 'pala, 'ɔa 'doo ‑nëmä ‑pʋpʋa†.› »
11 Sataan nya cɛrɛ 'ɔɔn ‑wälɩ; 'aanjë nya ji 'ünya kälä 'ɔa wii ‑gba.
'JRƲPALÄ JESU ‑FƐƐƐRƐA' GALILEEA ‑TƲTƲ ‑GÄLƖ
4.12–18.35
Jesu 'blööa' Galilee dɛrɩ
12 Jesu 'nua' ‑maa 'ü 'paa Jaan ‑jie 'lɩ nɩ, 'ɔnya mi Galilee. 13 'Ɔ sɔa' Nasarɛɛtë nɩ, 'ɔnya mi Kapɛrënaumëbätälä bäa' Sabulɔɔn nyra Nafëtaliia ‑tʋtʋ ‑gälɩ kʋkalɩ. 14 'Kä wiili nyɔsʋaamlɩpalanyɔɔ Esaii 'pa käa' 'mä nrörö; 'ɔ nɩnɩa kä:
15 Sabulɔɔn nyra Nafëtaliia nyüü,
'niea 'pɛlɛ bäa' Jurëdɛɛn dɛrɩ,
'amɔ nyüülü 'nyɩa' juifë bä ‑bɛ 'a kʋa' Galileea ‑tʋtʋ ‑gälɩ:
16 Nyüülü kʋa' 'jöjrüükpü 'lɩ,
'jä 'napɛ kpaki!
‑Bɛ nyüülü kʋa' jäjäa 'jöjrüükpü 'lɩ nyra jäjäa 'blɩa 'mlɩ nɩ,
'napɛ nya 'üün ‑gälɩ ŋʋala†!
17 'A ‑plɩɩ Jesu 'bala nyüüa nyɔsʋaawiia ‑gbapalakʋ. ‑Jäsɩ 'ɔ ‑gbaaa' nɩ: «'Ba toro 'lɩ ‑balʋ ‑gälɩ, 'be Nyɔsʋaa 'kamaplä 'a 'amɩ ‑gbajijrö!»
'Wʋnyɛrɛnyüülü ‑kätɩ Jesu wea'
18 Jesu ‑gblaara ɩ Galileea 'nie, 'ɔnya 'jä Simɔɔlɔ 'ü 'daraa' Piɛɛrë nyra 'ɔa ‑wlajʋ Andree. ‑Tata 'ü 'pa ɩ 'nie 'lɩ, 'be fɩafɩanyüü 'ü bä. 19 Jesu nya we 'üün: «'Ba ji 'nyraa 'amɩ 'mä 'nyɛ, ‑bɛ 'mä 'amɩ nyüüfɩanyüü 'lɩnrörö.» 20 'Köklesa 'a ‑plɩɩ 'ü ‑gba 'üa ‑tatë 'kä, 'ünya ‑mɛ 'ɔɔn ‑gälɩ. 21 'Ɔ mia' 'klɔɔtrʋ jie nɩ, 'ɔnya 'jä ‑wlajü 'sɔɔ ‑mölöö: Jaakë nyra Jaan, nyɔɔlɔ 'ü 'daraa' Sebedee 'ɔa 'jü, 'üü ‑bɛ 'üa tʋ bä ɩ ‑gɔlʋ 'lɩ 'ü ‑nyɩgla 'üa ‑tatë 'kä; 'ɔnya we 'üün. 22 'A ‑plɩɩ 'ü tɩ dotro ‑gɔlʋ nyra 'üa tʋ Sebedee, 'ünya ‑mɛ 'ɔɔn ‑gälɩ.
Jesu 'kpɩa, 'ɔ 'saa 'mʋfagogo ‑bɛ 'ɔ 'pʋɔ nyüü
23 Jesu nya mi Galileea 'pläa 'fɩɔ ‑gälɩ, 'ɔ 'kpɩa nyüü 'üa 'sraaplanyëka ‑wälɩ ‑bɛ 'ɔ 'sara 'lɩ 'Kamapläa 'mʋfagogo, ‑bɛ 'ɔ 'pʋɔ nyüülü ‑wusu 'blaaa' nyra ü 'jääa' mɩmɩakʋa 'fɩɔ.
24 'Ɔa 'nyrɩ nya ‑gbaala Siriia ‑tʋtʋa 'fɩɔ ‑gälɩ, ‑bɛ 'ü jaja 'ɔɔn nyüülü kä 'fɩɔ ‑wusua 'kaɩn 'kaɩn 'blaaa' ‑bɛ ü 'jääa' mɩmɩakʋ: nyüülü domüü bäa' 'lɩ, saklanyüü, nyüülü kä ‑gbaa dii jäa', 'kä 'ɔ 'pʋɔ 'üün. 25 Nyüülü prɛa' 'ɔɔn dɛrɩ ‑mää 'üa ‑srɩ 'nyɩ ‑pɛ: 'ü sɔ Galileea ‑tʋtʋ ‑gälɩ, 'ü sɔ Dekapɔlë†, ‑mölöö nya sɔ Jerusalɛɛmë, Judee nyra Jurëdɛɛn a 'pɛ ‑mɩdee ‑gälɩ.