Lukë 5

'Wʋnyɛrɛnyüülü ‑kätɩ Jesu wea'

Matiö 4.18-22; Marëkë 1.16-20; Jaan 1.35-51; 21.1-11

1 'Taɩn 'doo 'lɩ nɩ, Jesu 'nyüglö Genesarɛtëa 'niea 'mäklɩ; nyüü 'kɔkɔmlɛ 'kakla 'ɔɔn 'klɩ, 'ümä nyɔsʋaawii 'nyaklipo. 2 'Ɔnya 'järä ‑plɩɩ ‑goli 'sɔɔ; fɩafɩanyüülü käa' 'iin nɩ, 'ü 'cie 'ümä 'üa ‑tatë kpëtä. 3 Simɔɔ kälä ‑goli 'sɔɔlʋa ‑tɔrʋpɩɔ 'doo. Jesu nya 'jra ‑gɔlʋlʋa 'mlɩ, 'ɔnya ‑gbala Simɔɔ ɔ 'tutro 'uun 'niea 'mlɩ jie. Jesu nya kʋwälɩ, 'a ‑gɔlʋa mlɩ 'ɔ kʋ ‑bɛ 'ɔ 'kpɩa nyüülü. 4 'Ɔ bɩaa' 'kpɩkpɩakʋ nɩ, 'ɔnya ‑gbala Simɔɔ: «Fa ‑gɔlʋlʋ 'niea ‑plɩɩlɩ tʋŋlɔa' 'lɩ, 'kä 'a be 'ana ‑tatë 'nie 'klɩ.» 5 'Iibäa' Simɔɔ nɩ: «'Kamanyɔɔ, anyɩ 'mʋmɔ ‑a 'mʋmɔ ‑gbiara, a fɩafɩa anya sɩa, anyɩ dɛɛ ‑a 'jä. ‑Maa ‑gbaa' 'iin nɩ, 'nyaa ‑tata bea.» 6 'Ü nʋa' 'imɩ nɩ, 'ü 'kpla ‑srü 'kɔkɔmlɛ, ‑bɛ 'üa ‑tata köklö. 7 'Ünya we 'üa ‑mülü bä ɩa' ‑gɔlʋ ‑mʋlʋa 'mlɩ, 'ümä 'üün ‑gbaji. 'Ünya ji, 'ünya 'sie ‑goli 'sɔɔlʋ, diijie tɩɔ 'lɩ 'imä ‑fli pa. 8 Simɔɔ Piɛɛrë 'jäa' 'imɩ nɩ, Jesua bei 'wʋ 'ɔ blö, 'ɔ ‑nëma: «, 'n bibie ‑mɩ, tʋŋlɔ 'mɩ 'lɩdɛrɩ! ‑Balʋnyɔɔ 'n bä!» 9 ‑Srü 'kɔkɔmlɛlë 'ɔɔ ‑bɛ ‑mülü fɩaa' nɩ, 'i kala 'üün plɛklɩ, 'ia ‑gʋ 'ɔ ‑gba 'iin. 10 'Asɩ 'i kala bɩa Sebedeea 'jü Jaakë nyra Jaan plɛklɩ. 'Üü ‑bɛ Simɔɔ 'nyɛrɛ 'wʋ. Jesu nya ‑gbala Simɔɔ: «Ŋalɛ 'nyɩ 'bla ‑mɩ. 'Bala 'saarɩ ‑gälɩ nɩ, nyüü ‑nëmä fɩa.» 11 'Ü jaa' ‑goli 'nie 'mäklɩ nɩ, 'a ‑plɩɩ 'ü tɩ 'üa diia 'fɩɔ 'ünya ‑mɛ 'ɔɔn ‑gälɩ.

'Jrʋklanyɔɔlɔ Jesu 'pʋɔa'

Matiö 8.1-4; Marëkë 1.40-45

12 'Taɩn 'doo 'lɩ nɩ, Jesu bä ɩ bätëlëa ‑tɔrʋpɩɔa bätä 'dööa 'mlɩ, ‑bɛ nyɔɔ 'doo ji, 'ɔa fugba 'si 'jrʋa 'kpafë 'klɩ. Nyɔɔlɔ 'jäa' Jesu nɩ, 'ɔnya 'pa 'ɔa 'klɩ kotifli, ‑bɛ 'ɔ bibie 'ɔmɩ: «'Pläkänyɔɔ, ‑ama 'bata 'na 'pʋpʋɔkʋ, ‑mrɛɛ ‑a ‑futo 'mɩ.» 13 Jesu nya to 'darʋ, 'ɔnya ‑fɛ 'ɔɔn ‑gba, 'ɔnya ‑gbala 'ɔɔn: «'N 'bata ‑na 'pʋpʋɔkʋ; 'pʋ!» 'A ‑plɩɩ 'jrʋ kʋ dotro, 'unya 'wʋ 'ɔɔn 'lɩ. 14 Jesu nya ‑gbala 'ɔɔn: «‑Nyɩ ‑gbala nyɔɔ, ‑maa ‑ama mi nɩ, mi ‑a ‑srara ‑na nyufa 'klɩ, 'kä ‑saaa ‑gbɔlʋ 'daaa' 'ba 'saa'; 'uu nëmä 'nyrɩkä, 'kä nyüüa 'fɩɔ nya 'iin jre 'sɩrɩ 'jrʋ ‑kanyɩa' ‑mɩ kla.» 15 ‑Maa Jesua 'nyrɩ mö ‑a 'doo. Nyüü 'kɔkɔmlɛ jö 'ɔɔn 'nyaklipo; ‑mölöö jö 'ɔmä 'üün 'pʋɔ. 16 ‑Maa Jesulɔ nɩ, ‑aaga 'lɩa 'doo 'ɔ bereklɩ, 'ii 'ɔ bibrie Nyɔsʋa.

Nyɔɔlɔ kä ‑gbaa dii jäa' ‑bɛ Jesu 'pʋɔa'

17 'Taɩn 'doo 'lɩ, ‑bɛ Jesu 'kpɩa' nɩ, nyra bä ‑plɩɩ. 'Ü sɔ Galilee nyra bätëa 'fɩɔ ‑gälɩ. ‑Mölöö sɔ bɩa Jerusalɛɛmë. ‑Bɛ 'Pläkänyɔɔ Nyɔsʋaa 'klülü bäa' 'ɔɔn ‑gälɩ ‑futo ‑wusublanyüü. 18 Nyüü 'doo nya ji, 'ü ‑gbötö nyɔɔ 'doo ‑gbitɛɛ ‑gälɩ; 'ɔa ‑gbaa dii jä. 'Ü 'bata 'ümä 'ɔɔn pla 'ümä 'ɔɔn Jesu 'klɩ 'pie. 19 ‑Maa 'ünyɩ 'jäa' ‑sröröfa nyüüa ‑sümlökʋa ‑gʋ nɩ, nyuku ‑gälɩ 'ü nyra 'ɔɔn 'jra, 'ünya 'balɩ tuilë 'ünya ‑srörö 'lɩ nyɔɔlɔ; 'ünya 'pie 'ɔɔn Jesua 'klɩ. 20 Jesu 'jäa' 'üa nyɔsʋaplɛ nɩ, 'ɔnya ‑gbala nyɔɔlɔ: «'Na ‑bei, ‑na ‑balʋ 'a ‑mɩ cere.» 21 'Ia ‑gʋ ‑dɔkpɩanyüü nyra Farisinyüü 'pala ‑plɛlɩ wii ‑bɛ 'ü nö: «Nyɔɔglügbö 'plɛɛ kʋ ‑pɩ le? Nyɔsʋa 'ɔ nɔpɔ! Ima 'nyɩ Nyɔsʋa 'doo ‑a bä, nyɔɔ 'plɛɛ 'mrɛɛ ɔ cere nyɔɔa ‑balʋ le?» 22 ‑Maa Jesu jrea' 'üa bobowli nɩ, 'ɔnya 'bete 'üün: «Dɛplɛɛ kä ‑gʋ 'a 'pala 'samaa wii 'ana plɛ 'klɩ le? 23 ‑Gbala nyɔɔ ‑maa: ‹‑Na ‑balʋ 'a ‑mɩ cere›, ‑bɛ ‑a ‑gbala 'ɔɔn: ‹Sɔwʋ ‑a ‑nyɛɛ!› ‑Mɩ 'plɛɛ klalɩ le? 24 ‑Maa 'amä 'saa jre 'sɩrɩ käläa' ‑tʋtʋ ‑gälɩ 'kamakʋ. 'Ɔ 'mrɛɛ 'ɔ cere ‑balʋ. 'Ia ‑gʋ 'ɔ ‑gbala nyɔɔlɔ: ‹Sɔwʋ! Dɔrɔ ‑na 'wʋpidɛɛ 'wʋ, 'kä mö ‑gbööli!› » 25 'A ‑plɩɩ nyɔɔlɔ kʋ dotro nyüüa 'fɩɔa 'klɩ, 'ɔnya sɔwʋ; 'ɔnya dɔrɔ 'ɔa 'wʋpidɛɛ 'wʋ 'ɔnya mi. 'Ɔ 'bʋala Nyɔsʋaa 'nyrɩ ‑bɛ 'ɔ mö ‑gbööli. 26 'I kala nyüüa 'fɩɔa plɛ 'klɩ ‑bɛ 'ü 'bʋala Nyɔsʋa; ŋalɛ nya 'bla 'üün, ‑bɛ 'ü nö: «'Nn! A 'jä 'saarɩ ‑saragbi!»

Levii nʋa' Jesua 'wʋnyɛrɛnyɔɔ

27 'I ‑sia' nɩ, Jesu nya 'cie 'ɔnya 'jä 'doo, 'ɔ kʋ ‑plɩɩ 'lɩ 'ü 'pɛɛrɛa' dapoo. 'Ɔɔ 'ü 'daraa' Levii. Jesu nya we 'ɔɔn: «Ji 'nyraa ‑mɔ 'mä 'nyɛ!» 28 'Ɔnya 'cɛrɛ 'ia 'fɩɔ ‑wälɩ, 'ɔnya ‑mɛ Jesu ‑gälɩ.

29 Levii nya nrörö 'ɔa ‑gbööli ‑glɩsɩglɩsɩ kpaki Jesua 'nyrɩklɩ. Dapookälɩpɛrɛnyüü 'kɔkɔmlɛ ‑mölöö nyra nyüü ‑mölöö bä ɩ ‑plɩɩ. 'Ɔ nyra 'üün nya tara 'wʋ. 30 Farisinyüü nyra ‑dɔkpɩanyüü 'pala ‑plɛlɩ wii. 'Ünya 'bete 'ɔa : «Dɛplɛɛ kä ‑gʋ 'a nyra dapookälɩpɛrɛnyüü nyra ‑balʋnyüü ‑mölöö tara 'wʋ ‑bɛ 'a 'mlara 'wʋ le?» 31 Jesu nya ‑gbala 'üün, ‑maa: «Nyüülü ‑wusu 'blaaa', 'üü mö ‑dɔta 'lɩ, ‑maa ‑mää ‑mülü ka fugbë 'naa' ‑a. 32 'Nyɩ nyüülü ‑gäa' 'klɩ wekalɩ ‑a ji, ‑maa ‑balʋkänyüü 'n ji we 'ümä ‑balʋ 'pie.»

33 'Ünya 'bete 'ɔɔn: «Dɛplɛɛ kä ‑gʋ Jaan a 'wʋnyɛrɛnyüü nyra Farisinyüü pa su ‑bɛ 'ü trarawlia 'doo, ‑bɛ ‑na nyüü jödɛɛ ‑a 'doo ‑bɛ 'ü 'mlaa le?» 34 Jesu nya ‑gbala 'üün: «'Taɩn 'lɩ nyɔɔlɔ 'tiea' ‑bɛ 'ɔa ‑mülü jia' 'ɔa 'titiö 'lɩ ‑bɛ 'ü nyra 'ɔɔn ‑ka kʋa' ‑wälɩ nɩ, 'kä 'anya 'üün ‑gbala 'kpɔɔ 'ü pa su? 35 ‑Maa jrüülü kä 'mlɩ 'ümäa' 'ɔɔn 'üa ‑tɔrʋpɩɔ 'ba nɩ, 'bala 'ia 'taɩn 'lɩ nɩ, 'ünya su paa.» 36 'Ɔnya 'pala 'üün tapönänä ‑mölö 'klɩ: «Nyɔɔ 'nyɩ nʋ dapɛ dëdrä 'ɔnyɩ 'pa dafʋ 'pakɩ ‑a. Ɔma nʋ 'imɩ nɩ, dëdräa nu nya sʋa nu 'ŋlaraa; 'kotu dëdräa 'pɛ nyra 'klɩbɩa nu 'nyɩ dɛɛ 'dee ‑a bä. 37 'Asɩ nyɔɔ 'nyɩ pɔtrɔ ‑duvɛɛn 'jɩjarɛ 'klɩbɩa mlafikpalë 'lɩ ‑a. Ɔma nʋ 'iin nɩ, ‑duvɛɛn 'jɩjarɛ nya 'kpalëlë wa wa, 'kä ‑duvɛɛnlɛ nya 'kägblɔɔ, 'kä 'kpalëlë nya bʋblɔ. 38 Mlafikpalë dëdrëa 'mlɩ 'ü 'paa ‑duvɛɛn 'jɩjarɛ, 'ia 'taɩn 'lɩ 'ia 'sɔɔ 'nyɩ bʋblɔ bʋblɔ ‑a. 39 ‑Maa nyɔɔ ma 'mla ‑duvɛɛnlɛ ‑wlɛa' 'lɩ nɩ, 'ɔ ‑nëmä 'nyie ‑a 'nyie 'ɔmä ‑duvɛɛn dëdrä 'mla. 'Ɔnya 'daa: ‹‑Duvɛɛnlɛ ‑wlɛa' 'lɩ 'ɛɛ 'na.› »